Oilonga yOvayapostoli 1:1-26
1 Membo lange lotete olo nde ku shangela Teofilus, onde ku lombwela kombinga yoinima aishe oyo Jesus a ninga nokwa honga+
2 fiyo efiku olo a kufwa po,+ konima eshi a yandja omalombwelo okupitila momhepo iyapuki kovayapostoli ovo a hoolola.+
3 Konima eshi a hepekwa fiyo omefyo, okwe ve lihololela luhapu, opo va tomhwe filufilu kutya oku na omwenyo.+ Ove mu mona momukokomoko womafiku 40, nokwa kala ta popi kombinga yOuhamba waKalunga.+
4 Eshi a li a ongala pamwe navo, okwe va lombwela ta ti: “Inamu dja mo muJerusalem,+ ndele kaleni mwa teelela osho nde mu lombwela, osho Tate e mu udanekela.+
5 Ndele Johannes okwa ninginifa momeva, ashike nye mafiku otamu ka ninginifwa nomhepo iyapuki.”+
6 Fimbo va li va ongala, ova pula Jesus tava ti: “Omwene, ouhamba waIsrael oto u tungulula tuu pefimbo eli?”+
7 Okwa tya kuvo: “Tate womeulu oye aeke e na oufemba wokuufa* kutya efimbo peni oinima tai ka ningwa, ndele nye efimbo olo inamu pumbwa oku li shiiva.+
8 Ndele otamu ka pewa eenghono, ngeenge omwa tililwa omhepo iyapuki,+ opo nee otamu ka yandja oundombwedi+ kombinga yange muJerusalem,+ muJudea nomuSamaria+ ashishe nosho yo koitukulwa yokokulekule yokombada yedu.”*+
9 Konima eshi a popya ngaho, fimbo va li tave mu tale, okwa yelulwa po nokwa uvikwa koshilemo moipafi yavo.+
10 Fimbo va li va tala keulu, eshi Jesus ta i, ohaluka puvo ope uya ovalumenhu vavali va djala oikutu itoka,+
11 ndele tava ti kuvo: “Ovalumenhu nye Ovagalilea, omolwashike mwa fikama tamu tale keulu? Jesus ou a kufwa po punye a ya meulu, ota ka aluka naanaa ngaashi mwe mu mona, eshi ta i meulu.”
12 Opo nee ova shuna kuJerusalem+ va dja komhunda oyo hai ifanwa Omhunda yEemono, oyo i li popepi naJerusalem, oule woshinano osho hashi endwa mefiku lEshabata.
13 Eshi va fika, ova ya monduda yopombada omo va li hava kala. Monduda oyo omwa li Petrus, Johannes, Jakob, Andreas, Filippus, Tomas, Bartolomeus, Mateus, Jakob, omonamati waAlfeus, Simon omuladi naJudas, omonamati waJakob.+
14 Aveshe ovo ova kala tava ilikana ve na ediladilo limwe, pamwe novakainhu vamwe+ nosho yo Maria, ina yaJesus, novamwainamati vaJesus.+
15 Pomafiku oo, Petrus okwa fikama mokati kovamwatate (omuvalu* wovanhu aushe kumwe owa li 120 lwaapo) nokwa tya:
16 “Ovalumenhu, ovamwatate, eendjovo odo David a li a popya a nwefwa mo komhepo iyapuki oda li di na okuwanifwa. Okwa popya kombinga yaJudas+ oo a li omukwatelikomesho waavo va kwata po Jesus.+
17 Okwa li umwe womufye,+ ha longo pamwe nafye moshilonga eshi.
18 (Omulumenhu oo okwa li a landa epya nondjabi oyo a li a pewa omolwoilonga yaye ihe li pauyuki;+ okwe lidenga po a fikila po omutwe, olutu laye ola topa* noinima yaye aishe yomeni oya wa mo.+
19 Osho osha shiivika kOvajerusalem aveshe, nepya olo ove li luka melaka lavo Akeldama, sha hala okutya, “Epya lOhonde.”)
20 Embo lOmapsalme ola ti, ‘Onhele yaye nai ninge eputu, namu kale muhe na nande omukalimo,’+ ‘noshinakuwanifwa shaye shoupashukili nashi pewe umwe e lili.’+
21 Onghee otwa pumbwa okuhoolola umwe womovalumenhu ovo va kala pamwe nafye efimbo alishe olo Omwene Jesus a kala ta longo oilonga* yaye mokati ketu,
22 okudja eshi a ninginifwa kuJohannes,+ fiyo efiku olo a ya meulu;+ omulumenhu oo na kale yo e na oumbangi kutya Jesus okwa nyumuka.”+
23 Opo nee ova popila ovalumenhu vavali, Matias nosho yo Josef, oo ha ifanwa Barsabas noha ifanwa vali Justus.
24 Ndele ova ilikana tava ti: “Jehova,* oove u shii omitima dovanhu aveshe,+ tu ulikila kutya elipipo wa hoolola povalumenhu ava vavali,
25 opo a ninge omuyapostoli noku longe oshilonga osho Judas a efa po, ndele ta i neendjila daye.”+
26 Onghee ova umba oihoololifo pokati kovalumenhu ovo,+ nova hoolola Matias, nokwa li a valulilwa* pamwe novayapostoli 11.
