Hesekiel 9:1-11
9 Opo nee okwa ingida nondaka inene momatwi ange ta ti: “Ifana ovo tava ka eta ehandukilo moshilando, keshe umwe e na oshilwifo shaye shehanauno meke laye!”
2 Onda mona ovalumenhu vahamano tava di kombinga yomuvelo wopombada,+ oo wa taalela kolundume, keshe umwe e na oshilwifo shaye meke laye shokunyanyaula; nomokati kavo omwa li omulumenhu umwe a djala oshikutu sholiina, e na oshishangifo shahamushanga* moshiya shaye, ndele tave uya mo, nokukala ofika polwamba loaltari yongopolo.+
3 Opo nee oshinge shaKalunga kaIsrael+ osha dja ko kombada yovakerubi, opo sha li sha fikama, ndele tashi i poshivelo sheumbo,+ nokwa hovela okwiingida omulumenhu, oo a li a djala oshikutu sholiina, oo a li e na moshiya shaye oshishangifo shahamushanga.
4 Jehova okwa tya kuye: “Inda moshilando ashishe, muJerusalem ashishe, ndele to tula edidiliko meembaba doipala yovalumenhu, ovo tava tu omadima notava keme+ omolwoinima aishe itondifa, oyo tai ningwa moshilando.”+
5 Nokwa lombwela vakwao momatwi ange ta ti: “Indeni moshilando mwe mu shikula nokuponoka. Inamu efa omesho eni a file onghenda, noinamu ulika olukeno.+
6 Omu na okudipaa filufilu omulumenhu omukulunhu,* omulumenhu omunyasha, okakadona elela, okaana kanini nosho yo omukainhu.+ Ashike inamu ehena popepi nomunhu keshe oo a didilikwa.+ Omu na okutameka monhele yange iyapuki.”+ Onghee ova li va hovela novakulunhu, ovo va li komesho yeumbo.+
7 Opo nee okwa tya kuvo: “Nyatekeni eumbo, nokuyadifa omikala noonakudipawa.+ Indeni!” Onghee ova li va ya, nokudipaa ovanhu moshilando.
8 Ofimbo va li tave va dipaa, aame andike nda li nda xupa po, nonda li nde linyongamena pedu, ndele handi kuu handi ti: “Akutu shili! Omwene Omunamapangelo aeshe, Jehova! Mbela oto ka hanauna po aveshe ovo va xupa po muIsrael, eshi to tilile ehandu loye muJerusalem?”+
9 Onghee okwa tya kwaame: “Epuko leumbo laIsrael nosho yo laJuda ola kula, la kula neenghono.+ Edu ola yadifwa netiko lohonde,+ noshilando oshi yadi oulingilingi.+ Osheshi otava ti, ‘Jehova okwa fiya po edu, na Jehova ke wete ko.’+
10 Ndele ame, eisho lange itali ka fila onghenda, ile ndi ulike olukeno.+ Oilanduliko yeenghatu davo ohandi ke i tula komitwe davo vene.”
11 Opo nee onda mona omulumenhu, oo a djala oshikutu sholiina, noku na oshishangifo moshiya shaye, a eta ondjovo ta ti: “Onda ninga ngaashi wa lombwela nge.”
