Onhumwafo yotete kuTimoteus 1:1-20
1 Ame Paulus, omuyapostoli waKristus Jesus palombwelo laKalunga Omuxupifi wetu nolaKristus Jesus, oo okupitila muye tu na eteelelo,+
2 ohandi shangele Timoteus,*+ omona wange omuholike+ meitavelo:
Efilonghenda nonghenda nombili yaKalunga Tate noyOmwene wetu, Jesus Kristus, nai kale pamwe naave.
3 Ngaashi ashike nda li nde ku ladipika u kale muEfeso, eshi nda li pokuya kuMakedonia, paife ohandi ku indile u kumaide oohandimwe vaha tandavelife omahongo oipupulu,
4 novaha pwilikine komahokololo oipupulu+ nokeendjokonona di na sha nomapata. Oinima ya tya ngaho inai fimana,+ ndele ohai twala meenghundafana dihe na ekwafo lasha, ponhele yokukundafana oinima oyo va pewa kuKalunga i pameke eitavelo lavo.
5 Eshi nda yandja elombwelo* olo, onda hala tu kaleni tu na ohole yashili+ tai di komutima, eliudo liwa nosho yo eitavelo+ lihe na oihelele.
6 Mokweefa po oinima oyo, vamwe ove lininga ovapopi voinima yongaho.+
7 Ova hala okukala ovahongimhango,+ ashike kave udite ko oinima oyo tava popi, ile oinima oyo tava komangele unene.
8 Otu shi shii kutya Omhango oiwa, ngeenge oya tulwa nawa* moilonga.
9 Ashike otu shi shii yo kutya omhango inai nuninwa ovayuki, ndele oya nuninwa ovadinimhango+ novanashibofa, ovahenakalunga novalunde, ovo vehe fi ovadiinini,* ovo ve tonde osho shiyapuki, ovadipai vooxe novadipai vooina, ovadipai vovanhu,
10 ovahaeli,* ovalumenhu ovo hava kufa ombinga moushenge,* ovo hava kwata po ovanhu ombabyona, ovanaipupulu, ovaani voipupulu,* naashishe osho shi li omhinge nomahongo a yuka*+
11 oo e li metwokumwe nonghundana iwa oyo nde lineekelelwa, oyo ya dja kuKalunga oo ha kala alushe a hafa.+
12 Ohandi pandula Omwene wetu, Kristus Jesus, oo a pa nge eenghono nokwa pa nge oshilonga shiyapuki, molwaashi okwa tala nge ko ndi li omudiinini,+
13 nonande nale onda li omusheki, omuhepeki woshiwana shaKalunga nomuhayavala.+ Ashike onda li nda filwa onghenda, molwaashi kanda li ndi shii osho handi ningi nokanda li ndi na eitavelo.
14 Ashike efilonghenda lOmwene wetu olinene neenghono pamwe neitavelo nosho yo ohole muKristus Jesus.
15 Eendjovo edi odoshili nohatu dulu oku di lineekela filufilu, odo tadi ti: Kristus Jesus okwe uya mounyuni, opo a xupife ovalunde.+ Naame, aame omulunde a shiya ko.+
16 Ndele nande ongaho, onda filwa onghenda, opo Kristus Jesus a ulike okupitila mwaame ou ndi li omulunde a shiya ko kutya oku na onheni filufilu, nondi kale oshihopaenenwa kwaaveshe ovo ve mu itavela, opo va ka mone omwenyo waalushe.+
17 Ndele Kalunga aeke,+ oo iha xulu po+ noiha monika,+ Ohamba yaalushe,+ na fimanekwe nokutumbalekwa alushe fiyo alushe. Amen.
18 Omumwange Timoteus, ohandi ku pe elombwelo* olo li li metwokumwe neendjovo odo da popiwa nale kovaprofeti di na sha naave, notadi ku kwafele u twikile okukondja ekondjo liwa,+
19 nou diinine eitavelo nokukala neliudo liwa+ olo la ekelwashi kuvamwe, naasho osha ningifa oskepa yeitavelo lavo i teke.
20 Vamwe vomuvo oHimeneus+ naAleksander, nonde va yandja momake aSatana,+ opo va mone outekuduliko vaha sheke vali.
Omashangelo opedu
^ Tali ti “Oo ha fimaneke Kalunga.”
^ Ile “oufemba.”
^ Eln., “pamhango.”
^ Ile “vehe na ohole i na oudiinini.”
^ Ile “taa tungu; taa eta ouwa.”
^ Ile “ovo hava ane ongaho.”
^ Ile “ovalumenhu ovo hava i momilele novalumenhu vakwao.” Eln., “ovalumenhu ovo hava ende konima ovalumenhu vakwao.”
^ Tala Omafatululo oitya, “Oluhaelo.”
^ Ile “oufemba.”
