Benhadad, ohamba yaSiria, okwa kala nokulwifa Israel. Ashike omuprofeti Elisa okwa li ha londwele ohamba yaIsrael efimbo keshe, nomolwaasho ohamba oya li hai ka hondama. Opo nee Benhadad okwa li a tokola a kwate po Elisa. Okwa li a mona kutya Elisa oku li moshilando shedina Dotan, nokwa li a tuma etangakwaita laSiria opo li ke mu kwate po.

Ovasiria ova li va ya oufiku kuDotan. Ongula eshi kwasha, omupiya waElisa okwa li a ya pondje ndele ta mono kutya oshilando osha kondekwa ketangakwaita linene. Okwa li a tila ndele ta ingida ta ti: ‘Elisa, natu ninge ngahelipi?’ Elisa okwe mu lombwela a ti: ‘Ava ve li pufye ovahapu ve dule venya ve li puvo.’ Pefimbo opo tuu opo, Jehova okwa li a ningifa omupiya waElisa a mone kutya keemhunda adishe domoshilando oku yadi eenghambe nomatemba oita omundilo.

Eshi ovakwaita vaSiria va li tava kendabala okukwata po Elisa, Elisa okwa ilikana a ti: ‘Jehova, kwafele nge u va ninge ovapofi.’ Diva, nonande ova li ve wete ko, ovakwaita kava li ve shii kutya ove li peni. Opo nee Elisa okwa lombwela ovakwaita ta ti: ‘Omu li moshilando sha puka. Shikuleni nge, opo  ndi mu twale komulumenhu ou tamu kongo.’ Ova shikula Elisa fiyo okuSamaria, oko kwa li haku kala ohamba yaIsrael.

Konima yefimbo ova li va dimbuluka kutya ove li peni. Opo nee ohamba yaIsrael oya pula Elisa ya ti: ‘Nandi va dipae?’ Mbela Elisa okwa li a longifa omhito oyo opo a talife nawa ovanhu ovo va li tava kendabala oku mu etela oshiponga? Ahowe. Elisa okwa tya: ‘Ino va dipaa. Va pa oikulya opo va dule okutwikila nondjila yavo.’ Opo nee ohamba oye va ningila oitendele inene ndele tai va lekele va ye komaumbo.