Josia okwa ninga ohamba yaJuda eshi a li e na omido hetatu. Pefimbo opo, ovanhu ova li hava kufa ombinga moumhulile nokulongela oikalunga. Eshi Josia a li e na omido 16, okwa li a kendabala okulihonga okulongela Jehova monghedi ya yuka. Eshi a li e na omido 20, okwa li a hovela okuhanauna po oikalunga neealtari moshilongo ashishe. Eshi a li e na omido 26, okwa li a ninga omalongekido opo otembeli yaJehova i wapekululwe.

Omupristeri omukulunhu Hilkia okwa li a hanga omushangwatonywa wOmhango yaJehova motembeli, tashi dulika omushangwatonywa oo wa li wa shangwa kuMoses. Safan, hamushanga wohamba, okwa li a etela Josia omutonywashangwa ndele ta hovele okulesha Omhango mokule. Eshi Josia a pwilikina osho sha leshwa, okwa li a mona kutya oshiwana inashi kala tashi dulika kuJehova oule womido dihapu. Ohamba Josia oya li ya lombwela Hilkia ya ti: ‘Jehova okwe tu handukila neenghono. Inda u ka popye naye. Jehova ote ke tu lombwela osho tu na okuninga.’ Jehova okwa li e va nyamukula okupitila momuprofeti womukainhu Hulda a ti: ‘Ovajuda ova ekela nge shi. Otava ka handukilwa, ashike hapefimbo lohamba Josia, molwaashi okwe lininipika.’

Eshi ohamba Josia ya uda etumwalaka olo, oya ya kotembeli ndele tai ifana Ovajuda va ongale. Opo nee oya li ya leshela oshiwana ashishe Omhango yaJehova mokule. Josia noshiwana ova li va udaneka kutya otava ka dulika kuJehova nomutima wavo aushe.

 Oshiwana shaJuda kasha li vali hashi dana Opaasa oule womido. Ashike eshi Josia a lesha mOmhango kutya Opaasa oi na okudanwa omudo keshe, okwa li a lombwela oshiwana a ti: ‘Ohatu ka danena Jehova Opaasa.’ Okudja opo, okwa li a longekida omayambo mahapu nokwa unganeka eengudu dovaimbi kotembeli. Opo nee oshiwana osha dana Opaasa, nokonima yaasho, Oshivilo shOmingome inadi ya Onhafi oule womafiku aheyali. Oshiwana osha li she lixula okudana Opaasa ya tya ngaho okudja eshi Samuel a fya. Josia okwa li e hole shili Omhango yaKalunga. Mbela oho hafele ngoo okulihonga kombinga yaJehova?