Eshi Saul a fya, David okwa ninga ohamba ofimbo a li e na omido 30. Konima eshi a kala ohamba omido donhumba, oufiku umwe okwa li a mona omukainhu muwa fimbo a li kombada yombala yaye. David okwa li a uda kutya omukainhu oo oye Batseba nonokutya okwa hombolwa komukwaita wedina Uria. Okwa li a pula a etelwe Batseba kombala yaye. David okwa nangala naBatseba ndele ta ningi eteelelo. David okwa li a kendabala okuholeka oshinima osho. Okwa li a lombwela ondjai yaye i tule Uria komesho molwoodi ndele ovakwaita vakwao tava shuna monima. Konima eshi Uria a dipaelwa molwoodi, David okwa hombola po Batseba.

Ashike Jehova okwa li e wete oinima ii aishe oyo ya li tai ningwa. Mbela okwa li ta ka ninga po shike? Jehova okwa li a tuma omuprofeti wedina Natan kuDavid. Natan okwa ti: ‘Omulumenhu wonhumba oshipuna okwa li e na eedi dihapu, ofimbo omulumenhu umwe ohepele a li e na okadjona kamwe, nokwa li e ka hole neenghono. Omulumenhu oshipuna okwa kufa po okadjona kohepele oko akeke.’ David okwa li a handuka neenghono, ndele ta ti: ‘Omulumenhu oo oshipuna oku na okufya!’ Opo nee Natan okwa li a lombwela David a ti: ‘Oove omulumenhu oshipuna!’ David okwa li a nyika oluhodi neenghono, ndele ta lombwele Natan ta ti: ‘Onda nyona kuJehova.’ Enyono olo ola li la etela David noukwaneumbo waye omaupyakadi mahapu. Jehova okwa li a handukila David, ashike okwa li e mu efa a kale nomwenyo molwaashi okwa li omunashili nomulininipiki.

David okwa li a hala okutungila Jehova otembeli, ashike Jehova okwa li a hoolola omonamati waDavid, Salomo, oye a tunge otembeli. David okwa li a  ningila Salomo omalongekido ndele ta ti: ‘Otembeli yaJehova oi na okukala inenenene. Salomo omunyasha natango, ashike ohandi ke mu kwafela a longekide oinima.’ David okwa yandja omayambidido oimaliwa ihapu omolwoilonga yokutunga. Okwa li a konga ovanailonga ovo ve na ounghulungu. Okwa li a ongela oshingoli noshisilveri nokwa konga omiti domisederi okudja kuTirus naSidoni. Eshi David a li pokufya, okwa li a pa Salomo omutungilo u na sha nanghee otembeli i na okutungwa. Okwa ti: ‘Jehova okwa ti nandi ku shangele oinima ei. Jehova ote ke ku kwafela. Ino kala wa tila, kala wa pama, nokulonga oilonga oyo.’