Oufiku umwe, Nebukadnesar okwa li a twa ondjodi ikumwifi. Oya li unene tai mu piyaaneke ndele ta londokwa keemhofi. Okwa li a ifana eemhule daye ndele te di lombwele ta ti: ‘Fatululilei nge ondjodi yange.’ Opo nee oda tya: ‘Tu lombwela osho wa twa ondjodi, ohamba.’ Ashike Nebukadnesar okwe va lombwela a ti: ‘Ahowe, onye tamu lombwele nge eshi nda twa ondjodi, ngeenge hasho ohandi mu dipaa.’ Natango oda tya kuye: ‘Tu lombwela ondjodi yoye opo tu dule oku ku fatululila.’ Okwa tya: ‘Amushe otamu kendabala okukengelela nge. Lombwelei nge eshi nda twa ondjodi.’ Ova lombwela ohamba va ti: ‘Kape na vali omunhu e na omwenyo ta dulu okuninga ngaho. Osho to pula itashi dulu okuningwa nande efiku limwe.’

Nebukadnesar okwa li a handuka neenghono ndele ta yandje elombwelo kutya ovalumenhu aveshe ovo ve na ounongo nava dipawe, mwa kwatelwa Daniel, Sadrak, Mesak naAbednego. Daniel okwa li a pula ohamba i mu pe efimbo lonhumba. Opo nee ye nookaume kaye ova ilikana kuJehova nokupula e va kwafele. Mbela Jehova okwa li a ninga po shike?

Jehova okwa li a hololela Daniel ondjodi yaNebukadnesar nosho yo efatululo layo okupitila memoniko. Efiku la landula ko, Daniel okwa ya komupiya wohamba ndele ta ti: ‘Inamu dipaa nande oumwe womovalumenhu ovanongo. Ohandi dulu okufatululila ohamba ondjodi yayo.’ Opo nee omupiya okwa kufa Daniel noku mu twala kuNebukadnesar. Daniel okwa lombwela ohamba ta ti: ‘Kalunga okwe ku hololela onakwiiwa. Ondjodi yoye oyo ei: Owa mona oshihongwafano sha kula shi na omutwe woshingoli, onhulo nomaoko asho oshisilveri, edimo neenho dasho oshivela shitwima, omaulu asho oshivela shilaula, eemhadi kombinga oshivela kombinga omunoko. Opo nee emanya ola natuka komhunda ndele tali denge oshihongwafano keemhadi. Oshihongwafano osha nyanyauka nosha kala ngaashi olungu poshipale tali i nomhepo. Emanya ola shituka omhunda inene ndele tai mane ko edu alishe.’

 Opo nee Daniel okwa lombwela ohamba ta ti: ‘Efatululo londjodi yoye otali ti ngaha: Ouhamba woye oo omutwe woshingoli. Oshisilveri osho ouhamba oo tau shikula ko. Opo nee otaku uya ouhamba oo tau ka kala ngaashi oshivela shitwima, tau ka pangela ounyuni aushe. Ouhamba oo tau ka shikula ko otau ka kala u na eenghono ngaashi oshivela shitwima. Nohauxuuninwa, otapa ka holoka ouhamba wa tukauka, ombinga imwe oya kola ngaashi oshivela shitwima, ikwao inai kola ngaashi omunoko. Emanya olo la ninga omhunda olo Ouhamba waKalunga. Otau ka nyanyaula omauhamba aeshe ndele tau ka kala fiyo alushe.’

Nebukadnesar okwa twa eengolo koshipala shaDaniel, oshipala shaye sha twa medu ndele ta ti: ‘Kalunga koye okwe ku hololela ondjodi ei. Kape na Kalunga ngaashi ou.’ Ponhele yokudipaa Daniel, Nebukadnesar okwa lenga Daniel komesho yovalumenhu aveshe muBabilon ashishe. Mbela ou wete nghee Jehova a li a nyamukula eilikano laDaniel?