1, 2. Openi hatu dulu okumona eameno lashili kunena?

DILADILA nee ngeno to ende nondjila ku na oshikungulu shomhepo. Eulu ola hovela okulaula fokofoko. Odula oya hovela okushela nokungunguma, opo nee odula inene yoshikungulu oya hovela okuloka. Ove owa hovela okweendelela neenghono, to kongo onhele yokuyaama. Ohaluka, owa mona okatala pomunghulo wondjila. Oka pama, inamu tuta nomuwa okuyaama. Ito ka kala tuu wa pandula onhele oyo yeameno!

² Otu li mefimbo la piyaana. Eenghalo dounyuni otadi naipala neenghono. Ndele ope na eameno li shii okulineekelwa, olo tali dulu oku tu amena koiponga oyo tai dulu oku tu yahameka neenghono. Eameno olo olilipi? Didilika osho Ombibeli tai hongo, tai ti: “Ye ota ti kOmwene: Eameno lange, nohotengulu yange, Kalunga kange, ou handi mu lineekele.” — Epsalme 91:2.

3. Ongahelipi hatu dulu okuninga Jehova eameno letu?

³ Diladila ashike kwaasho! Jehova, Omushiti nOmupangeli weshito alishe, ota dulu okukala eameno letu. Ota dulu oku tu amena, molwaashi  oku na eenghono dinenenene e dule keshe umwe ile keshe shimwe osho tashi dulu oku tu etela oshiponga. Nokuli nongeenge otwa ehamekwa, Jehova ota dulu okukufa po ouyahame keshe. Ongahelipi hatu dulu okuninga Jehova eameno letu? Otwa pumbwa oku mu lineekela. Natango, Eendjovo daKalunga otadi tu ladipike tadi ti: “Likaleka mohole yaKalunga.” (Judas 21) Heeno, otwa pumbwa okulikaleka mohole yaKalunga, hatu kaleke po oukaume wopofingo naTate yetu womeulu. Opo nee ohatu dulu okukala nelineekelo kutya ote tu amene. Ndele ongahelipi hatu dulu okupanga oukaume wa tya ngaho?

4, 5. Eenghedi dimwe dilipi omo Jehova e ku ulikila ohole?

⁴ Opo tu kale mohole yaKalunga, otwa pumbwa okudidilika nghee Jehova e tu ulikila ohole yaye. Diladila shi na sha nomahongo amwe Ombibeli oo we lihonga kekwafo lembo eli. E li Omushiti, Jehova okwe tu pa edu li li eumbo letu liwa. Okwe li yadifa oikulya ihapu nomeva, eedjo dopaushitwe, oinamwenyo ikumwifi nosho yo eenhele diwa. E li Omushangi wOmbibeli, Kalunga okwe tu hololela edina laye nosho yo omaukwatya aye. Kakele kaasho, Eendjovo daye otadi holola kutya okwa tuma Omona waye omuholike Jesus kombada yedu, nokwe mu efa a mone oixuna noku tu file. (Johannes 3:16) Oshali oyo otai ti shike kufye? Otai tu pe eteelelo lonakwiiwa ikumwifi.

⁵ Eteelelo letu li na sha nonakwiiwa ole likolelela yo koshinima shimwe osho Kalunga a ninga. Jehova okwa dika po epangelo lomeulu, Ouhamba wopaMessias. Otali ka xulifa po mafiku okumona oixuna akushe notali ka ninga edu oparadisa. Diladila ashike! Ohatu dulu oku ka kala kombada yedu mombili notu na ehafo fiyo alushe. (Epsalme 37:29, OB-1986) Lwopokati opo, Kalunga okwe tu pa ewiliko li na sha nanghee hatu dulu okukala nonghalamwenyo ya denga mbada kunena. Okwe tu pa yo oshali yeilikano, oyo okupitila muyo hatu dulu okupopya naye twa manguluka efimbo keshe. Odo odi li ashike eenghedi dimwe po omo Jehova ha ulikile ovanhu aveshe ohole nosho yo ove pauhandimwe.

6. Oto dulu okulinyenga ngahelipi kohole oyo Jehova e ku ulikila?

⁶ Epulo la fimanenena olo u na okulipula ololo kutya:  Mbela ohandi ke linyenga ngahelipi kohole yaJehova? Vahapu otava ka tya: “Ondi na okukala ndi hole Jehova ngaashi ye e hole nge.” Mbela osho u udite ngaho? Jesus okwa ti kutya oshipango shinenenene kuikwao aishe, osho: “Hola Omwene Kalunga koye nomutima woye aushe nomwenyo woye aushe neendunge doye adishe.” (Mateus 22:37) Osha yela kutya ou na omatomheno mahapu okukala u hole Jehova Kalunga. Ndele mbela okukala u udite kutya ou na ohole ya tya ngaho osho ashike sha kwatelwa mokukala u hole Jehova nomutima woye aushe, nomwenyo woye aushe nosho yo neendunge doye adishe?

7. Mbela osha wana ashike okukala tu udite kutya otu hole Kalunga? Shi yelifa.

⁷ Ngaashi sha hokololwa mOmbibeli, okuhola Kalunga osha kwatela mo shihapu shi he fi ashike okukala nomaliudo kutya otu mu hole. Doshili, nonande okukala tu udite kutya otu hole Jehova osha fimanenena, omaliudo a tya ngaho oku li ashike ehovelo lohole yashili yoku mu hola. Opo pa holoke omuti woiimati yoiapula, opa pumbiwa filufilu ombuto yeapula. Ndele ngeenge owa hala oiapula, mbela oto ka kala ashike wa wanenwa ngeenge umwe e ku pe ombuto yeapula? Hasho nandenande! Sha faafana, okukala u udite kutya ou hole Jehova Kalunga oku li ashike ehovelo. Ombibeli otai hongo kutya: “Ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” (1 Johannes 5:3) Opo ohole yokuhola Kalunga i kale i li paushili, oi na okwiimika oiimati iwa. Oi na okuulikwa okupitila moilonga. — Mateus 7:16-20.

8, 9. Ongahelipi hatu dulu okuulika ohole yetu yokuhola Kalunga nosho yo olupandu loku mu pandula?

⁸ Ohatu ulike ohole yetu yokuhola Kalunga ngeenge hatu diinine oipango yaye nokutula moilonga omafinamhango aye. Kashi fi shidjuu okuninga ngaho. Ponhele yokukala didjuu, eemhango daJehova oda nuninwa oku tu kwafela tu kale nonghalamwenyo iwa, ihafifa notai mbilipaleke. (Jesaja 48:17, 18) Mokukala metwokumwe newiliko laJehova, ohatu ulikile Tate yetu womeulu  kutya otu na shili olupandu li na sha noinima aishe oyo e tu ningila. Shinyikifa oluhodi, ovanhu ashike vanini mounyuni kunena hava ulike olupandu la tya ngaho. Inatu hala okukala tu he na olupandu, ngaashi ovanhu vamwe ovo va li ko eshi Jesus a li kombada yedu. Jesus okwa li a velula ovanashilundu omulongo, ndele omunashilundu ashike umwe a li e mu alukila e mu pandule. (Lukas 17:12-17) Nope he na omalimbililo, otwa hala okukala twa fa omunashilundu oo a li e na olupandu, ndele hangaashi venya omuwoi, ovo va li ve he na olupandu.

⁹ Ndele oipango yaJehova ilipi twa pumbwa okudiinina? Otwa kundafana ihapu yomuyo membo eli, ndele natu endululeni imwe yomuyo. Okudiinina oipango yaKalunga otaku ke tu kwafela tu kale mohole yaKalunga.

10. Yelifa to yandje oshihopaenenwa kutya omolwashike sha fimana okutwikila okumona eshiivo lokushiiva Jehova Kalunga.

¹⁰ Okulihonga kombinga yaJehova oku li onghatu ya fimanenena mokweehena popepi elela naye. Oku na okukala onghedi tai  twikile. Mbela ngeno owa li u li momufitu oufiku to xuxumukwa moutalala wamemememe, ngeno oto ka efa omundilo u fiilile ndele tau dimi po? Hasho. Oto ka kala to tula po oikuni opo omundilo u kale wa tema nawa. Ngeenge hasho, oto dulu okufya koutalala filufilu. Ngaashi ashike oikuni hai kaleke omundilo wa tema, “eshiivo lokushiiva Kalunga” ohali pameke ohole yetu yokuhola Jehova. — Omayeletumbulo 2:1-5.

11. Ehongo laJesus ola li la nwefwa mo ngahelipi ovashikuli vaye?

¹¹ Jesus okwa li a hala ovashikuli vaye va twikile okukala nohole ya xwama yokuhola Jehova nosho yo Eendjovo daYe doshili di na ondilo. Konima yenyumuko laye, Jesus okwa li a honga ovahongwa vaye vavali shi na sha nomaxunganeko onhumba e li mOmishangwa dOshiheberi oo a li a wanifilwa muye. Oshidjemo osha li shike? Ova ka popya konima yefimbo va ti: “Omitima detu inadi xwama tuu muye, eshi a popya nafye mondjila ndele [e] tu fatululila omishangwa!” — Lukas 24:32.

12, 13. (a) Shi na sha novanhu vahapu kunena, oshike tashi ningwa po shi na sha nohole yavo yokuhola Kalunga nosho yo Ombibeli? (b) Ongahelipi hatu dulu okuhenuka okweefa ohole yetu i talale?

¹² Eshi we lihonga tete osho Ombibeli tai hongo lela, mbela omutima woye kawa li tau xunga ehafo, nokwa li u udite u na ouladi nohole yokuhola Kalunga? Osha yela kutya osho wa li u udite ngaho. Vahapu osho hava kala ve udite ngaho. Paife, eshongo olo wa taalela olo okutwikila okukala nohole ya xwama noku i kulika. Inatu hala okulandula oikala younyuni wonena. Jesus okwa xunganeka a ti: “Ohole yavahapu otai talala.” (Mateus 24:12) Ongahelipi to dulu okukelela ohole yoye yokuhola Jehova nosho yo oshili yOmbibeli iha talale?

¹³ Twikila okumona eshiivo lokushiiva Jehova Kalunga nosho yo Jesus Kristus. (Johannes 17:3) Dilonga, sha hala okutya, u diladile moule shi na sha naasho we lihonga mEendjovo daKalunga, mokulipula kutya: ‘Oshinima eshi otashi hongo nge shike shi na sha naJehova Kalunga? Omatomheno makwao elipi tashi pe nge e na sha noku mu hola nomutima wange aushe, neendunge dange adishe nosho yo nomwenyo wange aushe?’ (Epsalme 119:97) Okudilonga kwa tya ngaho otaku ka kaleka ohole yoye yokuhola Jehova ya xwama.

14. Ongahelipi eilikano tali dulu oku tu kwafela tu kaleke ohole yetu yokuhola Jehova ya xwama?

 ¹⁴ Onghedi imwe vali i na sha nokukaleka ohole yoye yokuhola Jehova ya xwama oyo okwiilikana pandjikilile. (1 Ovatessaloniki 5:17) MEtukulwa eti-17 lembo eli, otwe lihonga kutya eilikano oli li oshali i na ondilo ya dja kuKalunga. Ngaashi ashike omakwatafano ovanhu haa pamekwa ngeenge hava kundafana pandjikilile va manguluka, ekwatafano letu naJehova ohali pamekwa kokukala hatu ilikana kuye pandjikilile. Osha fimanenena okuhenuka okwiilikana omailikano itaa di komutima, sha hala okutya, tu ha ilikane omailikano a faafana efimbo keshe nope he na omaliudo ile eityo la sha. Otwa pumbwa okupopya naJehova ngaashi okaana taka popi naxe omunahole. Doshili, otwa hala okupopya nefimaneko, ndele otwa manguluka, hatu popi oshili notashi di komutima. (Epsalme 62:9) Heeno, ekonakonombibeli lopaumwene nosho yo eilikano tali di komutima oi li oinima ya fimanenena mokulongela Kalunga kwetu, notai tu kwafele tu kale mohole yaYe.

15, 16. Omolwashike sha yeleka okutala ko oilonga yokuudifa Ouhamba i li oufembanghenda nemona?

¹⁵ Ekonakonombibeli lopaumwene nosho yo eilikano oi li oshitukulwa shelongelokalunga, oyo hatu dulu okuninga pauhandimwe. Ndele paife natu konakoneni oshitukulwa shimwe shelongelokalunga osho hatu ningi moipafi: okupopya navamwe shi na sha neitavelo letu. Mbela owa lombwela nale vamwe shi na sha noshili yonhumba yOmbibeli? Ngeenge osho ngaho, oshi li oufembanghenda mukumwifi kwoove. Ngeenge hatu lombwele vamwe oshili oyo twe lihonga shi na sha naJehova Kalunga, ohatu wanifa po oshilonga sha fimanenena osho sha pewa Ovakriste aveshe vashili — osho shokuudifa onghundana iwa yOuhamba waKalunga. — Mateus 24:14; 28:19, 20.

¹⁶ Omuyapostoli Paulus okwa li a tala ko oukalele waye u li oshinima shi na ondilo, e u ifana emona. (2 Ovakorinto 4:7) Okupopya novanhu kombinga yaJehova Kalunga nosho yo omalalakano aye oyo oilonga ya denga mbada oyo to dulu okulonga. Oi li oilonga oyo hatu longele Omwene muwa ku he na vali notai  etele ovanhu ouwa wa denga mbada. Mokukufa ombinga moilonga oyo, oto kwafele ovanamitima da yuka va ehene popepi naTate yetu womeulu nova ende mondjila oyo tai twala komwenyo waalushe. Oilonga ilipi vali tai dulu okukala tai mbilipaleke neenghono i dule oyo? Natango, okuyandja oundombwedi shi na sha  naJehova nosho yo Eendjovo daye otaku pameke eitavelo loye notaku kaleke ohole yoye yoku mu hola ya xwama. Na Jehova okwa lenga neenghono eenghendabala doye. (Ovaheberi 6:10) Okukala we lipyakidila moilonga ya tya ngaho otaku ku kwafele u kale mohole yaKalunga. — 1 Ovakorinto 15:58.

17. Omolwashike oukalele wopaKriste wa endelela kunena?

¹⁷ Osha fimana okudimbulukwa kutya oilonga yokuudifa Ouhamba oya endelela. Ombibeli otai ti: “Udifa ondjovo; shi ninga [neendelelo, NW].” (2 Timoteus 4:2) Omolwashike okuninga ngaho kwa endelela neenghono kunena? Eendjovo daKalunga otadi tu lombwele tadi ti: “Efiku linene lOmwene oli li popepi! Heeno, popepi li li, ndele tali endelele okufika!” (Sefanja 1:14) Heeno, efimbo olo eshi Jehova ta ka xulifa po onghalelo aishe ei yoinima oli li poduka. Ovanhu ova pumbwa okulondwelwa. Ova pumbwa okushiiva kutya paife olo efimbo lokuhoolola Jehova a kale Omupangeli wavo. Exulilo “itali ka tokelwa.” — Habakuk 2:3, NW.

18. Omolwashike tu na okulongela Jehova moipafi pamwe nOvakriste vashili?

¹⁸ Jehova okwa hala tu mu longele moipafi pamwe nOvakriste vashili. Omolwaasho Eendjovo daye tadi ti: “Tu filafaneni oshisho fye tu twafane omukumo mohole nomoilonga iwa. Tu ha efe [po okwoongala pamwe, OB-1986], ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.” (Ovaheberi 10:24, 25) Ngeenge hatu ongala novaitaveli vakwetu pokwoongala kwopaKriste, otu na omhito iwa okutanga nokulongela Kalunga ketu omuholike. Ohatu tungafana yo nokutwaafana omukumo.

19. Ongahelipi hatu dulu okupameka ekwatafano lopahole meongalo lopaKriste?

¹⁹ Eshi hatu endafana novalongeli vaJehova vakwetu, ohatu pameke ekwatafano lopahole nosho yo oukaume meongalo. Osha fimana okutala komaukwatya mawa avamwe, ngaashi naanaa Jehova ha tale komaukwatya etu mawa. Ino kala wa teelela ovaitaveli vakweni va kale va wanenena. Dimbuluka kutya atusheni otu li peendodo da yoolokafana shi na sha nokukula pamhepo, nakeshe umwe womufye oha ningi omapuko. (Ovakolossi 3:13) Kendabala okupanga oukaume wopofingo naavo ve hole Jehova shili, kungaha oto ka kula pamhepo. Heeno, okulongela  Jehova pamwe novamwaxo novamwanyoko vopamhepo otaku ke ku kwafela u kale mohole yaKalunga. Jehova oha yandje ondjabi ngahelipi kwaavo have mu longele noudiinini nohave likaleke mohole yaye?

20, 21. ‘Onghalamwenyo yashili’ oshike, nomolwashike i li eteelelo likumwifi?

²⁰ Jehova oha yandje ngahelipi ondjabi yomwenyo kovapiya vaye ovadiinini, nomwenyo oo owa tya ngahelipi? Mbela oto hafele ngoo shili onghalamwenyo paife? Vahapu vomufye otava ka tya kutya heeno, ohatu hafele onghalamwenyo. Doshili, ohatu fuda, ohatu li nohatu nu. Nope he na omalimbililo, ohatu hafele onghalamwenyo. Pomafimbo oo hatu kala twa hafa unene, otashi dulika tu popye nokuli hatu ti: “Paife ohatu hafele shili onghalamwenyo!” Ndele Ombibeli otai ulike kutya kaku na omunhu ta hafele shili onghalamwenyo pauyadi kunena.

²¹ Eendjovo daKalunga otadi tu ladipike tu ‘limonene onghalamwenyo yashili.’ (1 Timoteus 6:19, OB-1986) Eendjovo odo otadi ulike kutya ‘onghalamwenyo yashili’ oshinima osho twa teelela oku ka mona monakwiiwa. Heeno, eshi hatu ka kala twa wanenena, ohatu ka hafela onghalamwenyo pauyadi, molwaashi ohatu ka kala ngaashi Kalunga a li a lalakanena tu kale pehovelo. Eshi hatu ka kala meduparadisa tu na oukolele filufilu, ombili nehafo, ohatu ka hafela ‘onghalamwenyo yashili,’ sha hala okutya, omwenyo waalushe. (1 Timoteus 6:12) Mbela kali fi eteelelo likumwifi olo?

22. Ongahelipi to dulu ‘okulimonena onghalamwenyo yashili’?

²² Ongahelipi hatu dulu ‘okulimonena onghalamwenyo yashili’? Metukulwa olo mwa dja eendjovo odo, Paulus okwa ladipika Ovakriste ‘va longe ouwa’ nova ‘ninge oipuna yoilonga iwa.’ (1 Timoteus 6:18) Onghee hano, osha yela kutya shihapu oshe likolelela kunghee hatu tula moilonga oshili oyo twe lihonga mOmbibeli. Ndele mbela Paulus okwa li a hala okutya ohatu dulu okulimonena ‘onghalamwenyo yashili’ mokulonga oilonga iwa? Hasho, omolwaashi etimaumbwile olo likumwifa ole likolelela ashike ‘kefilonghenda’ laKalunga. (Ovaroma 5:15) Ndele Jehova okwa hafa okupa ondjabi ovo tave mu longele noudiinini. Okwa hala  oku ku mona to hafele ‘onghalamwenyo yashili.’ Ovo ve li mohole yaKalunga ova teelela oku ka kala nomwenyo waalushe ve na ehafo nombili.

23. Omolwashike sha fimanenena okukala mohole yaKalunga?

²³ Keshe umwe womufye oku na okulipula kutya: ‘Mbela ohandi longele Kalunga metwokumwe naasho a popya mOmbibeli?’ Ngeenge ohatu shilipaleke efiku nefiku kutya osho hatu ningi ngaho, osha yela kutya ohatu mu longele monghedi ya yuka. Ohatu dulu okukala nelineekelo kutya Jehova oye eameno letu. Ota ka amena ovapiya vaye ovadiinini momafiku aa axuuninwa e yadi omaupyakadi onghalelo ei yoinima ya kulupa. Jehova ote ke tu twala yo monghalelo yoinima ipe ikumwifi oyo i li popepi. Itatu ka kala tuu twa hafa okukala monghalelo ya tya ngaho! Noitatu ka kala tuu twa hafa eshi twa ninga omatokolo a yuka momafiku aa axuuninwa! Ngeenge owa ningi omatokolo a tya ngaho paife, oto ka hafela ‘onghalamwenyo yashili’ fiyo alushe, ngaashi Jehova Kalunga a li a lalakanena pehovelo.