1. Ohatu ka mona ouwa ngahelipi ngeenge ohatu longele Kalunga monghedi ya yuka?

JEHOVA KALUNGA oku na ko nasha nafye neenghono nokwa hala tu mone ouwa mewiliko laye lopahole. Ngeenge ohatu mu longele monghedi ya yuka, ohatu ka kala twa hafa nohatu ka henuka omaupyakadi mahapu monghalamwenyo. Ote ke tu nangeka yo noupuna note ke tu kwafela. (Jesaja 48:17) Ndele ope na omalongelokalunga omafele oo taa ti kutya otaa hongo oshili kombinga yaKalunga. Ndele okwa yooloka neenghono momahongo ao e na sha nokutya Kalunga oye lyelye nosho yo osho ta pula kufye.

2. Ongahelipi hatu dulu okulihonga onghedi ya yuka yokulongela Jehova, nefaneko lilipi tali tu kwafele tu ude ko onghedi omo hatu dulu oku shi ninga?

² Ongahelipi to dulu okushiiva onghedi yokulongela Jehova oyo i li mondjila? Ino pumbwa okukonakona nokuyelekanifa omahongo omalongelokalunga aeshe. Owa pumbwa ashike okulihonga osho Ombibeli tai hongo lela shi na sha nelongelokalunga lashili. Oku shi faneka: Moilongo ihapu omu na oupyakadi u na sha noimaliwa yoikengelela. Ngeno ou pewe oilonga yokukwata mo oimaliwa ya tya ngaho yoikengelela, ngeno oto ke shi enda ngahelipi? Mbela oto ke lihonga momutwe omaukwatya aeshe oimaliwa yoikengelela? Hasho. Otashi ka kala pandunge  okukonakona oimaliwa yo venevene. Ngeenge owa shiiva kutya oimaliwa yo venevene oi li ngahelipi, oto ka dula okukwata mo oyo yoikengelela. Sha faafana, ngeenge otwe lihongo kutya elongelokalunga lashili ola tya ngahelipi, ohatu ka dula okumona mo omalongelokalunga oo oipupulu.

3. Pakupopya kwaJesus, otu na okuninga shike ngeenge otwa hala okukala twa hokiwa kuKalunga?

³ Osha fimana okulongela Jehova monghedi oyo a hokwa. Ovanhu vahapu ova itavela kutya omalongelokalunga aeshe okwa hokiwa kuKalunga, ndele Ombibeli hasho tai hongo ngaho. Inashi wana nokuli okutya ashike kutya otu li Ovakriste. Jesus okwa ti: “Hakeshe ou ta ti kuame: Omwene, Omwene! ta i mouhamba womeulu, ndelenee oye tuu ou ha longo ehalo laTate womeulu.” Onghee hano, opo tu kale twa hokiwa kuKalunga, otu na okulihonga osho Kalunga ta pula kufye noku shi wanifa po. Jesus okwa ula ovo ihava longo ehalo laKalunga a ti kutya “ovakolokoshi.” (Mateus 7:21-23) Ngaashi oimaliwa yoikengelela, omalongelokalunga oipupulu kae na ongushu yasha. Osho shii unene nokuli, oshosho kutya omalongelokalunga a tya ngaho okwa nyika oshiponga filufilu.

4. Eendjovo daJesus di na sha neendjila mbali otadi ti shike, nondjila keshe otai twala peni?

⁴ Jehova okwa pa keshe umwe kombada yedu omhito yoku ka mona omwenyo waalushe. Ndele opo tu ka kale nomwenyo waalushe mOparadisa, otu na okulongela Kalunga monghedi ya yuka nokukala nonghedi yokukalamwenyo oyo ya hokiwa kuye. Shi nyikifa oluhodi, vahapu ohava anye oku shi ninga. Omolwaasho Jesus a popya a ti: “Indeni mu pite moshivelo sha finana. Osheshi oshivelo oshinene, nondjila oya mbwalangadja ei tai twala mekano, ndele ava tava i mo ovahapu; ndele oshivelo oshinini nondjila oya finana ei tai twala momwenyo, novanini vongaho ovo tave i mono.” (Mateus 7:13, 14) Elongelokalunga lashili otali twala komwenyo waalushe. Omalongelokalunga oipupulu otaa twala kehanauno. Jehova ina hala nande omunhu umwe a ka hanaunwe po, nomolwaasho ta yandje omhito kovanhu keshe pamwe ve lihonge kombinga yaye. (2 Petrus 3:9) Doshili, onghedi omo hatu longele Kalunga otai ti omwenyo ile efyo kufye.

5. Ongahelipi hatu dulu okudidilika mo ovo ve li melongelokalunga lashili?

⁵ Ongahelipi ‘ondjila oyo tai twala momwenyo’ tai dulu okumonika? Jesus okwa ti kutya elongelokalunga lashili otali ka kala li liwetikile mokukalamwenyo kwovanhu ovo ve li mulo. Okwa ti: “Otamu va koneke koiimati yavo. . . . Omuti keshe muwa ohau ima oiimati iwa.” (Mateus 7:16, 17) Noitya imwe, ovo ve li melongelokalunga lashili otava didilikwa mo omolwomahongo avo nosho yo elihumbato lavo. Nonande inava wanenena nohava ningi omapuko, ovalongelikalunga vashili ve li ongudu ohava kendabala okulonga ehalo laKalunga. Natu konakoneni oinima ihamano oyo tai didilikifa ovo ve li melongelokalunga lashili.

6, 7. Ovapiya vaKalunga ohava tale ko ngahelipi Ombibeli, na Jesus okwa tula po oshihopaenenwa shilipi shi na sha naasho?

⁶ Omahongo ovapiya vaKalunga okwa kanghamekelwa kOmbibeli. Ombibeli otai ti: “Omishangwa adishe da yandjwa keenghono dOmhepo yaKalunga odi shii kulonga nokukumaida nokupukulula nokutekula mouyuki, omunhu womuKalunga opo a kale a wana nokwa wanenena oshilonga keshe shiwa.” (2 Timoteus 3:16, 17) Omuyapostoli Paulus okwa li a shangela Ovakriste vakwao a ti: “Ondjovo yaKalunga mwe i uda kufye, mwe i tambula hangaashi ondjovo yovanhu, ndelenee ongaashi i li shili ondjovo yaKalunga.” (1 Ovatessaloniki 2:13) Onghee hano, omahongo neenghedi delongelokalunga lashili inae likolelela komataleko ile keenghulunghedi dovanhu. Oye likolelela kEendjovo daKalunga da nwefwa mo, Ombibeli.

⁷ Jesus Kristus okwa tula po oshihopaenenwa shiwa mokukanghamekela ehongo laye kEendjovo daKalunga. Okwa popya meilikano kuXe womeulu, a ti: “Eendjovo doye odo oshili.” (Johannes 17:17) Jesus okwa li a itavela Eendjovo daKalunga, nakeshe osho kwa li a honga okwa li shi li metwokumwe nado. Luhapu, Jesus okwa li ha ti: “Okwa shangwa.” (Mateus 4:4, 7, 10) Opo nee Jesus oha tofa mo omushangwa. Sha faafana, ovapiya vaKalunga vokunena ihava hongo omadiladilo avo vene. Ova itavela  kutya Ombibeli oyo Eendjovo daKalunga, nova kanghamekela filufilu omahongo avo kwaasho tai ti.

8. Oshike sha kwatelwa mokulongela Jehova?

⁸ Ovo ve li melongelokalunga lashili ohava longele Jehova oye aeke, nohava shiivifa edina laye. Jesus okwa ti: “Omwene Kalunga koye u noku mu twila eengolo, noye aeke u noku mu kalela.” (Mateus 4:10) Onghee hano, ovapiya vaKalunga ohava longele Jehova aeke. Elongelokalunga olo ola kwatela mo okushiivifila ovanhu edina laKalunga kashili nosho yo omaukwatya aye. Exodus 15:3 (OB-1954), ota ti: “Jehova Ofule: edina laye Jehova.” Jesus okwa tula po oshihopaenenwa shi na sha nokukwafela vamwe va shiive Kalunga, ngaashi e shi popya meilikano a ti: “Edina loye onde li hololela ovanhu ava we va pa nge mounyuni.” (Johannes 17:6) Sha faafana, ovalongelikalunga vashili kunena ohava hongo vamwe shi na sha nedina laYe, omalalakano aye nosho yo omaukwatya aye.

9, 10. Omeenghedi dilipi Ovakriste vashili hava ulikilafana ohole?

⁹ Oshiwana shaKalunga ohashi ulikilafana ohole yashili, yokuhelihola mwene. Jesus okwa ti: “Opo tuu opo aveshe tave mu koneke kutya, nye ovalongwa vange, ngenge mu holafane.” (Johannes 13:35) Ovakriste vonale ova li ve holafane nohole ya tya ngaho. Ohole yopakalunga ohai pondola onhondo oyo hai etifwa keyooloko lopamihoko, lopanghalafano nosho yo lopashiwana nohai hanganifa ovanhu moumwainafana washili nowa kola. (Ovakolossi 3:14) Oilyo yomalongelokalunga oipupulu kai na ohole youmwainafana ya tya ngaho. Otu shi shii ngahelipi? Ohai dipaafana omolwomayooloko opashiwana noopamihoko. Ovakriste vashili ihava kufa ombinga moita va ka dipae ovamwaxe Ovakriste ile ovanhu vakwao. Ombibeli otai ti: “Opo tuu opo tapa shiivika ovana vaKalunga novana vaSatana. Keshe tuu ou iha longo ouyuki, oye ke fi womuKalunga, naau e he hole omumwaxe. . . . Fye otu nokuholafana, tu ha fe Kain, ou a dja momunawii nokwa dipaa ondenge yaye.” — 1 Johannes 3:10-12; 4:20, 21.

¹⁰ Doshili, ohole yashili oya kwatela mo shihapu shi he fi ashike okuhadipaa vamwe. Ovakriste vashili ohava longifa efimbo lavo, eenghono davo nosho yo oiniwe yavo nokuhelihola  mwene mokukwafelafana nomokutwaafana omukumo. (Ovaheberi 10:24, 25) Ohava kwafelafana momafimbo madjuu, nohava ungaunga navamwe pauyuki. Doshili, ohava tula moilonga omayele Ombibeli e na sha ‘nokuningila aveshe ouwa.’ — Ovagalati 6:10.

11. Omolwashike sha fimana okutambula ko Jesus Kristus e li oo ta longifwa kuKalunga omolwokuxupifa ovanhu?

¹¹ Ovakriste vashili ova tambula ko Jesus Kristus e li oo ta longifwa kuKalunga omolwokuxupifa ovanhu. Ombibeli otai ti: “Kaku namukwao, exupifo la kala muye, osheshi kaku nedina limwe lilili koshi yeulu, la yandjelwa ovanhu omo tu nokuxupifilwa mo.” (Oilonga 4:12) Ngaashi twa mona mEtukulwa eti-5, Jesus okwa yandja omwenyo waye u li ekulilo omolwovanhu ovaduliki. (Mateus 20:28) Natango, Jesus oku li Ohamba ya nangekwa po kuKalunga mOuhamba womeulu oo tau ka pangela edu alishe. Kalunga ota pula yo tu dulike kuJesus nokutula moilonga omahongo aye ngeenge otwa hala oku ka mona omwenyo waalushe. Omolwaasho Ombibeli ya ti kutya: “Ou ta itavele Omona, oye e nomwenyo waalushe; ndelenee ou iha dulika kOmona, ita ka mona omwenyo.” — Johannes 3:36.

12. Okukala tu he fi oshitukulwa shounyuni okwa kwatela mo shike?

¹² Ovalongelikalunga vashili kave fi oshitukulwa shounyuni ou. Eshi Jesus a li momhangu koshipala shomupangeli Omuroma Pilatus, okwa ti: “Ouhamba wange kau fi womounyuni ou.” (Johannes 18:36) Kashi na nee mbudi kutya ovashikuli vashili vaJesus ove li moshilongo shilipi, ove li ovapangelwa vOuhamba waye womeulu nokungaha ihava kufa nandenande ombinga moinima younyuni yopapolotika. Ihava kufa ombinga momalipumomumwe ounyuni. Ndele ovalongeli vaJehova ihave lidopo mwaasho vamwe va hoolola okuninga shi na sha nokuya meengudu dopapolotika, okukala va hala okuhoololwa ile okuhoolola. Ndele nonande ovalongelikalunga vashili kave na ombinga moinima yopapolotika, ohava dulika keemhango doilongo omo ve li. Omolwashike mbela? Omolwaashi Eendjovo daKalunga otadi va lombwele va “dulike kovapangeli.” (Ovaroma 13:1) Ngeenge ope na elipumomumwe pokati kaasho Kalunga ta pula naasho omilandu dopapolotika tadi  pula, ovalongelikalunga vashili ohava landula oshihopaenenwa shovayapostoli, ovo va tile: “Okudulika kuKalunga ku dule okudulika kovanhu.” — Oilonga 5:29; Markus 12:17.

13. Ovashikuli vashili vaJesus ohava tale ko ngahelipi Ouhamba waKalunga, nohava katuka onghatu ilipi shi na sha nao?

¹³ Ovashikuli vashili vaJesus ohava udifa kutya Ouhamba waKalunga oo auke tau ka kandula po omaupyakadi ovanhu. Jesus okwa xunganeka a ti: “Evangeli eli louhamba otali udifilwa ounyuni  aushe li ningile oiwana aishe ondombwedi, opo nee taku uya exulilo.” (Mateus 24:14) Ponhele yokuladipika ovanhu ve lineekele movapangeli vopanhu shi na sha nokukandula po omaupyakadi avo, ovashikuli vashili vaJesus Kristus ohava udifa kutya Ouhamba waKalunga womeulu oo auke tau ka kandula po omaupyakadi ovanhu. (Epsalme 146:3) Jesus okwe tu honga tu ilikane omolwepangelo olo la wanenena, eshi a ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:10) Eendjovo daKalunga oda xunganeka kutya Ouhamba oo womeulu “otau ka nyanyaula notau ka teyaula omauhamba aeshe [oo e li ko kunena] noku a xulifa po, ndelenee owo vene tau ka kala fiyo alushe.” — Daniel 2:44.

14. Elongelokalunga lilipi u wete la wanifa po oiteelelwa yelongelokalunga lashili?

¹⁴ She likolelela kwaasho twa dja nokukundafana, lipula kutya: ‘Elongelokalunga lilipi la kanghamekela omahongo alo aeshe kOmbibeli nohali shiivifa edina laJehova? Elongelokalunga lilipi hali ulike ohole yopakalunga, li na eitavelo tali longo muJesus, li he fi oshitukulwa shounyuni nohali udifa kutya Ouhamba waKalunga oo auke tau ka kandula po omaupyakadi ovanhu? Momalongelokalunga aeshe kombada yedu, lilipi po la wanifa po oiteelelwa aishe oyo?’ Oushili otau ulike sha yela kutya elongelokalunga olo, olo Eendombwedi daJehova. — Jesaja 43:10-12.

15. Kakele kokwiitavela kutya Kalunga oko e li, oshike va li ta pula kufye?

¹⁵ Inashi wana ashike okwiitavela Kalunga ngeenge otwa hala oku mu hafifa. Doshili, Ombibeli otai ti kutya neendemoni oda itavela kutya Kalunga oko e li. (Jakob 2:19) Ndele osha yela kutya ihadi longo ehalo laKalunga noinadi hokiwa kuye. Opo tu kale twa hokiwa kuKalunga, katu na ashike okwiitavela kutya oko e li, ndele otu na yo okulonga ehalo laye. Otu na yo okutukuka ko komalongelokalunga oipupulu nokutambula ko elongelokalunga lashili.

16. Oshike omunhu e na okuninga po shi na sha nokukufa ombinga momalongelokalunga oipupulu?

¹⁶ Omuyapostoli Paulus okwe shi ulika kutya katu na okukufa  ombinga momalongelokalunga oipupulu. Okwa shanga a ti: “Djeni mo mokati kavo nye mu liyoolole mo muvo, Omwene osho [ta] ti, nye inamu kuma eshi sha nyata; opo Ame ohandi mu tambula.” (2 Ovakorinto 6:17; Jesaja 52:11) Onghee hano, Ovakriste vashili ohava henuka keshe shimwe osho shi na ekwatafano nelongelokalunga loipupulu.

17, 18. “Babilon shinene” oshike, nomolwashike sha endelela ‘okudja mo musho’?

¹⁷ Ombibeli otai ulike kutya omalongelokalunga aeshe oipupulu oku li oshitukulwa shaBabilon shinene.’ * (Ehololo 17:5) Edina olo otali tu dimbulukifa oshilando shonale shedina Babilon, omo omalongelokalunga oipupulu a hovela konima yEyelu lopefimbo laNoa. Omahongo neenghedi dihapu odo di li apeshe kunena momalongelokalunga oipupulu oya hovela muBabilon shonale. Pashihopaenenwa, Ovababilon ova li hava longele oikalunga youkwatatu. Kunena, omalongelokalunga mahapu okwa tala ko Oukwatatu u li ehongo la fimanenena. Ndele Ombibeli otai hongo sha yela kutya ope na ashike Kalunga kashili umwe, Jehova, nosho yo kutya Jesus Kristus Omona waye. (Johannes 17:3) Ovababilon ova li yo va itavela kutya ovanhu ove na omwenyo ihau fi, oo hau xupu po konima ngeenge olutu la fi notau dulu oku ka mona oixuna monhele yokuhepekwa. Kunena, omalongelokalunga mahapu ohaa hongo kutya ovanhu ove na omwenyo ile omhepo ihai fi oyo tai dulu okumona oixuna momundilo woheli.

¹⁸ Molwaashi elongelokalunga laBabilon shonale ola tandavela kombada yedu alishe, Babilon Shinene shokunena osha yeleka okutiwa kutya oshi li ouhamba wounyuni womalongelokalunga oipupulu. Kalunga okwa xunganeka yo kutya ouhamba oo womalongelokalunga oipupulu otau ka hanaunwa po ombadilila. (Ehololo 18:8) Mbela ou wete kutya omolwashike sha fimanenena okukala wa tukuka ko koshitukulwa keshe shaBabilon Shinene? Jehova Kalunga okwa hala u “dje mo musho” diva, ofimbo ku na efimbo natango. — Ehololo 18:4.

19. Oto ka mona shike eshi to longele Jehova?

 ¹⁹ Ngeenge owa tokola okweefa po elongelokalunga loipupulu, vamwe otashi dulika va tokole okweefa po okweendafana naave. Ndele mokulongela Jehova pamwe noshiwana shaye, oto ka mona shihapu shi dulife osho to kanifa. Ngaashi ovahongwa vaJesus vonale ovo va li va fiya po oinima imwe ndele tave mu shikula, oto ka kala u na ovamwaxo novamwanyoko vahapu vopamhepo. Oto ka ninga oshitukulwa shoukwaneumbo wa kula womounyuni aushe womamiliyona Ovakriste vashili, ovo tave ke ku ulikila ohole yashili. Oto ka kala yo u na eteelelo likumwifi lomwenyo waalushe ‘mounyuni tau ya.’ (Markus 10:28-30) Konima yefimbo, otashi dulika ovo ve he na ko nasha vali naave omolweitavelo loye va ka konakone osho Ombibeli tai hongo ndele tava ningi ovalongeli vaJehova.

20. Ovo ve li melongelokalunga lashili ove na etimaumbwile lilipi?

²⁰ Ombibeli otai hongo kutya Kalunga ota ka eta mafiku exulilo longhalelo ei yoinima youkolokoshi, ndele te ke i pingena po nounyuni mupe wouyuki oo tau ka pangelwa kOuhamba waye. (2 Petrus 3:9, 13) Itau ka kala tuu ounyuni mukumwifi! Nomonghalelo ipe youyuki ya tya ngaho, otamu ka kala ashike elongelokalunga limwe, sha hala kutya, elongelokalunga lashili. Mbela kashi fi oshinima shopandunge kwoove okukatuka eenghatu odo da pumbiwa okuhovela okweendafana novalongelikalunga vashili paife?