OSHILESHWA 55
Yambidida eongalo leni
Mounyuni aushe, ovanhu omamiliyona ohava longele Jehova nehafo momaongalo omayovi. Ove na olupandu li na sha nehongo nosho yo ewiliko olo hava pewa, nohava yambidida nehalo liwa omaongalo avo meenghedi dihapu. Mbela naave osho u uditile ngaho eongalo leni?
1. Omeenghedi dimwe dilipi to dulu okulongifa efimbo neenghono doye, opo u yambidide eongalo?
Atusheni ohatu dulu okukwafela meongalo. Pashihopaenenwa, mbela meongalo leni omu na ovanamido, ile ovo va nyika ounghundi? Mbela ito dulu oku va kwafela va dule okuya kokwoongala? Ile ito dulu oku va kwafela vali meenghedi dimwe, ngaashi oku va landela ko koipumbiwa yavo, ile oku va kwafela moilonga yomeumbo? (Lesha Jakob 1:27.) Ohatu dulu yo okuliyamba mokuwapaleka nokukaleka Olupale lOuhamba letu monghalo iwa. Kape na oo he tu fininike tu longe oilonga oyo. Ndele ohole yokuhola Kalunga nosho yo ovamwatate oyo hai tu linyengifa tu longe “nehalo liwa.”— Epsalme 110:3.
Eendombwedi odo da ninginifwa otadi dulu okuyambidida eongalo meenghedi dimwe da wedwa po. Ovamwatate, ovo va pyokoka pamhepo, otava dulu okulonga ve li ovayakuliongalo nomokweendela ko kwefimbo ovakulunhuongalo. Ovamwatate novamwameme otava dulu okuyambidida oilonga yokuudifa mokulonga ve li ovakokolindjila. Eendombwedi dimwe otadi dulu okukwafela mokutunga eenhele dokwoongalela, ile di tembukile koitukulwa oko ku na omaongalo e na omhumbwe, opo di ka kwafele.
2. Ongahelipi hatu dulu okulongifa oiniwe yetu, opo tu yambidide eongalo?
Ombiibeli oya ti: “Omwene mu fimaneka neliko loye.” (Omayeletumbulo 3:9) Otwa hafa eshi tu na oufembanghenda wokuyandja omayambidido opashimaliwa nosho yo oiniwe imwe vali, opo tu yambidide omaongalo etu nosho yo oilonga yokuudifa mounyuni aushe. (Lesha 2 Ovakorinto 9:7.) Omayambidido etu ohaa longifwa yo ngeenge pwa holoka oiponga yopaushitwe. Vahapu ohava “ongele sha” pandjikilile, opo va dule okuyandja omayambidido. (Lesha 1 Ovakorinto 16:2.) Ohatu dulu okutula omayambidido etu moukefa ovo ve li meenhele detu dokwoongalela, ile tu ye kepandja lokuyandja omayambidido ko donate.jw.org. Jehova okwe tu pa omhito yokukala hatu longifa oiniwe yetu, opo tu ulike kutya otu mu hole.
KONAKONA MOULE
Konakona eenghedi dimwe omo to dulu okuyambidida eongalo.
3. Ohatu dulu okulongifa oiniwe yetu
Jehova naJesus ove hole ovo hava yandje nehafo. Pashihopaenenwa, Jesus okwa li a pandula omufiyekadi umwe, oo a li a yandja omayambidido, nonande okwa li a hepa. Lesha Lukas 21:1-4, ndele tamu kundafana omapulo taa shikula:
-
Mbela otwa pumbwa okuyandja omayambidido mahapu, opo tu hafife Jehova?
-
Jehova naJesus ove uditile ngahelipi omayambidido oo hatu yandje tashi di komutima?
Opo u lihonge kutya omayambidido etu ohaa longifwa ngahelipi, dana OKAVIDIO. Opo nee kundafaneni epulo tali shikula.
-
Omayambidido etu ohaa longifwa ngahelipi, opo omaongalo mounyuni aushe a dule okumona mo ouwa?
4. Ohatu dulu okuliyamba, opo tu kwafele
Pefimbo Ombiibeli ya li tai shangwa, ovapiya vaJehova ovaladi ova li hava longo noudiinini, opo va kaleke eenhele davo delongelokalunga monghalo iwa. Osho osha li hashi kala sha kwatela mo shihapu shihe fi ashike okuyandja omayambidido opashimaliwa. Lesha 2 Omafimbo 34:9-11, ndele tamu kundafana epulo tali shikula:
-
Omuisrael keshe okwa li ha kwafele ngahelipi, opo a file oshisho eumbo laJehova, ile onhele yelongelokalunga?
Opo u mone kutya ongahelipi Eendombwedi daJehova hadi shikula oshihopaenenwa osho shonale, dana OKAVIDIO. Opo nee kundafaneni omapulo taa shikula.
-
Omolwashike sha fimana okukaleka Olupale letu lOuhamba la yela noli li monghalo iwa?
-
Omeenghedi dimwe dilipi to dulu okukwafela?
5. Ovamwatate otava dulu okulitulila po elalakano, opo va longe shihapu meongalo
Omishangwa otadi ladipike ovalumenhu Ovakriste, opo va lalakanene okuninga ngaashi tava dulu va yambidide eongalo. Opo u mone oshihopaenenwa, dana OKAVIDIO. Opo nee nyamukula epulo tali shikula.
-
Ngaashi sha ulikwa mokavidio, ongahelipi Ryan e litulila po elalakano, opo a yambidide pauyadi eongalo?
Ombiibeli oya tumbula oiteelelwa, oyo ovamwatate ve na okuwanifa po, opo va dule okulonga ve li ovayakuliongalo nosho yo ovakulunhuongalo. Lesha 1 Timoteus 3:1-13, ndele tamu kundafana omapulo taa shikula:
-
Ovamwatate, ovo ve li ovayakuliongalo nosho yo ovakulunhuongalo, ova teelelwa va kale ve na elihumbato la tya ngahelipi?
-
Omaukwaneumbo avo okwa teelelwa a kale e na elihumbato la tya ngahelipi?— Tala ovelishe 4 nosho yo 11.
-
Ngeenge ovamwatate ova kendabala okuwanifa po oiteelelwa oyo, ongahelipi keshe umwe meongalo ta ka mona ouwa?
UMWE OTASHI DULIKA A PULE KUTYA: “Oilonga yEendombwedi daJehova ohai yambididwa ngahelipi pashimaliwa?”
-
Oto ka nyamukula ngahelipi?
ENGONGO
Jehova oha pandula neenghono eenghendabala odo hatu ningi, opo tu longife efimbo, eenghono nosho yo oiniwe yetu, tu yambidide eongalo.
Eendululo
-
Ongahelipi hatu dulu okulongifa efimbo nosho yo eenghono detu, opo tu yambidide eongalo?
-
Ongahelipi hatu dulu okulongifa oiniwe yetu, opo tu yambidide eongalo?
-
Omeenghedi dilipi wa hala okuyambidida eongalo?
TALA OUYELELE WA WEDWA PO
Konakona, opo u mone kutya omolwashike Kalunga ina teelela vali ovapiya vaye va yandje oshitimulongo.
“Ombiibeli otai ti ngahelipi kombinga yoshitimulongo?” (Web article)
Lihonga kutya osha hala okutya ngahelipi “okulalakanena” okupewa oinakuwanifwa meongalo.
“Owa ‘hala’ ngoo okupewa oinakuwanifwa meongalo?” (Oshungonangelo, 15 Septemba 2014)
Shiiva shi na sha nEendombwedi dimwe diladi, odo da ninga omaliyambo manene, opo di dule okutwaalela Ovakriste vakwao oishangomwa.
Tala kutya ongahelipi oilonga yetu hai yambididwa pashimaliwa monghedi ya yooloka ko kwaayo omalongelokalunga amwe hae shi ningi.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
