MBELA ou shii omunhu wonhumba oo ha kala alushe a hala okukala wotete keshe pamwe? —  Otashi dulika a undule mo umwe momukweyo opo a kale komesho. Mbela owa mona oshinima sha tya ngaho tashi ningwa? —  Omuhongi Munene okwa li a mona oshinima sha tya ngaho tashi ningwa nokuli nokovakulunhu ovo va li hava kala ve lihalela komesho ile va li va hala okukala ve na eendodo da fimana. Omuhongi Munene ka li e hole oshinima sha tya ngaho. Natu ka tale kutya oshike sha li sha ningwa po.

Ombibeli otai ti kutya pomhito imwe Jesus okwa li a shivwa koshivilo shinene keumbo lOmufarisai umwe, oo a li omuwiliki welongelokalunga a fimana. Eshi Jesus a li a fika keumbo olo, okwa li a mona ovaenda vamwe ovo navo va li va shivwa tave lihoololele oipundi yokomesho. Onghee hano,  okwa li a hokololela ovanhu ovo va li va shivwa ehokololo. Mbela owa hala okuuda ehokololo olo? — 

Jesus okwa ti: ‘Ngenge wa shivwa kuumwe koshivilo shehombolo, ino hoolola okukala omutumba koshipundi shokomesho.’ Mbela ou shi shii kutya omolwashike Jesus a li a popya ngaho? —  Jesus okwa li a tya kutya otashi dulika pa kale pa shivwa umwe oo a fimana e ku dule. Onghee hano, ngaashi u shi wete pefano olo li li pepandja la shikula ko, mwene woshivilo okwe uya ndele ta ti: ‘Yapukila omulumenhu ou, ndele to i u ka kale omutumba koshipundi shokonima.’ Mbela omweenda oo a kufwa poshipundi shokomesho ota ka kala e udite ngahelipi? —  Otashi dulika a kale a fya ohoni molwaashi ovaenda vakwao otava ka kala tave mu tale eshi ta kufwa ponhele oyo yokomesho a yukifwa konima.

Jesus okwa li a ulika kutya inashi yuka okukala twe lihalela oipundi yokomesho. Onghee hano, Jesus okwa ti: ‘Ngeenge wa shivwa koshivilo shehombolo, inda ndele to kala omutumba koipundi yokonima. Naau e ku ifana, ngeenge te uya mo ote ku lombwele kutya: Kaume kange, ehena pombada. Opo nee oto ka fimanekwa moipafi yovaenda aveshe eshi ve ku wete to twalwa koipundi yokomesho.’ — Lukas 14:1, 7-11.

Mbela owa didilika oshitwa osho Jesus a li a hala okudivilika mehokololo laye? —  Natu ka tale koshihopaenenwa shimwe ndi tale ngeenge owa didilika sha. Natu tye nee ngeno oto londo mobesa omo tamu londo ovanhu vahapu. Mbela oto ka endelela u londe tete opo u kale omutumba, ofimbo omukulunhu wonhumba ta ka kala e li ofika? —  Mbela Jesus ota ka kala a hafa ngeenge owa ningi ngaho? — 

Umwe otashi dulika a tye kutya Jesus ke na ko nasha naasho hatu ningi. Ndele mbela osho oshoshili ngoo? —  Eshi Jesus a li koshivilo shinene keumbo lOmufarisai, okwa li a tala ovanhu ovo va li ve lihoololela oipundi yokomesho. Mbela ito diladila kutya Jesus oku na ohokwe  mwaasho hatu ningi kunena, ngaashi ashike a li e na ohokwe okutala ovanhu ovo va li va shivwa koshivilo? —  Paife eshi Jesus e li meulu, oku wete nawa oshinima keshe osho hatu ningi.

Otashi dulu okweeta omaupyakadi ngeenge omunhu okwa kala e liholele komesho. Luhapu ohapa holoka eemhata, ndele ovanhu tava handukilafana. Omafimbo amwe, osho ohashi holoka po ngeenge ounona tava ende mobesa. Shama ashike omuvelo wobesa wa yeuluka, ounona aveshe ohava tondokele mobesa, molwaashi ova hala okukala omutumba koipundi yokomesho ile oyo i li popepi nomakende. Oshike mbela tashi dulu okuningwa po? —  Heeno, ounona ovo otashi dulika va kale ve lihandukila.

Okukala wa hala oove u ninge wotete otashi dulu okweetifa omaupyakadi mahapu. Osho osha li yo sha etifa oupyakadi mokati kovayapostoli vaJesus. Ngaashi twe lihonga nale mEtukulwa eti-6 lembo eli, ovayapostoli vaJesus ova li tava tu eemhata kutya olyelye a li a fimana mokati kavo. Mbela Jesus okwa li a ninga po shike? —  Heeno, okwa li e va pukulula. Ndele ova  ka twa eemhata pomhito vali imwe. Natu ka tale kutya eemhata odo oda li da hovela ngahelipi.

Ovayapostoli vaJesus nosho yo vakwao vamwe, ova li va enda pamwe naJesus oshikando shaxuuninwa okuya koshilando shaJerusalem. Jesus okwa li ta popi navo shi na sha nOuhamba waye, onghee hano, Jakob naJohannes ova li tava diladila shi na sha noku ka pangela pamwe naJesus ve li eehamba. Ova li nokuli va lombwela meme wavo, Salome, shi na sha naasho. (Mateus 27:56; Markus 15:40) Onghee hano, ofimbo va li ve li mondjila va finda kuJerusalem, Salome okwa li e uya kuJesus, ndele ta tu eengolo koshipala shaJesus, ndele te mu pula e mu ningile ouwa wonhumba.

Jesus okwa li e mu pula a ti. “Owa hala shike?” Salome okwa li a nyamukula kutya okwa hala Jesus a pitike ovana vaye va ka kale pamwe naJesus mOuhamba waye, umwe okolulyo laye namukwao okolumosho. Mbela oto diladila kutya ovayapostoli vakwao omulongo ova li ve udite ngahelipi eshi va li va uda kutya Jakob naJohannes ova li va tuma meme wavo kuJesus e ke va pulile sha? — 

 Heeno, okwa li va handukila neenghono Jakob naJohannes. Onghee hano, Jesus okwa li a pa ovayapostoli vaye aveshe omayele mawa. Jesus okwa li e va lombwela kutya ovapangeli voiwana ove hole okukala va tumbala neenghono. Ova hala okukala neendodo dopombada opo keshe umwe a kale ta dulika kuvo. Ndele Jesus okwa li a lombwela ovashikuli vaye kutya vo kave na okukala ngaho. Ponhele yaasho, Jesus okwa li e va lombwela a ti: “Ou womunye a hala a ninge munene mokati keni, ye na kale omuyakuli weni.” Diladila kombinga yaasho! — Mateus 20:20-28.

Mbela ou shi shii kutya omupiya oha longo oilonga ilipi? —  Oha yakula ovanhu vakwao, noiha kala a teelela okuyakulwa kuvamwe. Iha hoolola oipundi yokomesho, ndele ponhele yaasho, oha kala omutumba koipundi yokonima. Ndele dimbuluka kutya Jesus okwa ti kutya ou a hala okukala wotete oku na okukala ngaashi omupiya wavakwao.

Mbela oto diladila kutya osho otashi tu hongo shike? —  Mbela omupiya ota dulu okutwa eemhata nomwene waye kutya olyelye ta ka kala koipundi yokomesho ile kutya olyelye e na okupewa oikulya tete? Oto diladila ngahelipi mbela? —  Jesus okwa popya kutya omupiya oha tale ko alushe omwene waye e li komesho yaye. — Lukas 17:7-10.

Ponhele yokukala twe lihalela komesho, mbela otu na okuninga po shike? —  Heeno, otu na okukala ngaashi ovapiya kuvamwe, sha hala okutya, otu na okutala ko vamwe ve li komesho yetu, nova fimana ve tu dule. Mbela omeenghedi dilipi hatu dulu okutala ko vamwe va fimana ve tu dule? — Mbela omolwashike ito shuna konima membo loye pepandja 40 nosho yo 41, ndele to tale natango eenghedi dimwe omo to dulu okutala ko vamwe va fimana ve ku dule mokukala ho va yakula?