MBELA owa vakelwa nale oshinima shoye komunhu wonhumba? — Mbela okwa li u udite ngahelipi? —  Omunhu oo a li a vaka po oshinima shoye, ombudi, nokape na oo e hole eembudi. Mbela oto diladila kutya ohashi ende ngahelipi omunhu a ninge ombudi? Mbela ovanhu ovo hava vake ova dalwa ve li eembudi? — 

Opo ashike twe lihongo kutya ovanhu ova dalwa noulunde. Onghee hano, atusheni inatu wanenena. Ndele kape na oo a dalwa ombudi. Omunhu oo ha vake otashi dulika a dje moukwaneumbo omo mu na ovanhu ve na eenghedi diwa. Ovadali nosho yo ovamwaina vomunhu oo ha vake otashi dulika va kale ihava vake. Ndele otashi dulika omunhu a ninge ombudi molwaashi a hala oimaliwa ile oinima oyo hai landwa noimaliwa.

Mbela oto diladila kutya olyelye a li a vaka tetetete? —  Natu diladile kombinga yaasho. Omuhongi Munene okwa li e shii omunhu oo a li a vaka tete eshi a li meulu. Ombudi oyo oya li omweengeli. Ndele osha enda ngahelipi omweengeli oo a ninge ombudi ngeenge Kalunga okwa li a shita ovaengeli aveshe va wanenena? —  Omweengeli oo okwa li a hala oshinima shonhumba osho shihe fi shaye, ngaashi twe lihonga mEtukulwa 8 lembo eli. Mbela oto dimbuluka kutya omweengeli oo okwa li a hala shike? — 

Konima eshi Kalunga a shita omulumenhu nomukainhu wotete, omweengeli oo okwa li a hala ovanhu ovo va kale tave mu longele. Ashike omweengeli oo ka li a wana okulongelwa kuvo, Kalunga oye aeke a li a wana okulongelwa kuvo. Omweengeli oo okwa li a ningifa Adam naEva va kale tave mu longele, nokungaho, okwa li a ninga ombudi, ndele ta ningi Satana Ondiaboli.

Oshike hashi ningifa omunhu ombudi? —  Okukala a hala oshinima osho shihe fi shaye. Ehalo la tya ngaho otali dulu okukala li na eenghono ndele tali ningifa omunhu a longe owii. Omafimbo amwe, ovanhu ovo  hava ningi eembudi ihave livele ombedi opo va kale va li tava longo ouwa. Umwe womovanhu va tya ngaho okwa li Judas Iskariot, oo a li omuyapostoli waJesus.

Judas okwa li e shi shii kutya osha puka okuvaka molwaashi okwa li a hongwa Omhango yaKalunga okudja kounona waye. Okwa li e shi shii kutya Kalunga okwa li a lombwela oshiwana shaye pomhito imwe okudja meulu, a ti: “Ino vaka.” (Exodus 20:15) Eshi Judas a kula, okwa li a shakena nOmuhongi Munene, ndele ta ningi omuhongwa waye. Konima yefimbo, Jesus okwa li a hoolola Judas a ninge umwe womovayapostoli vaye 12.

Jesus novayapostoli vaye ova li hava ende pamwe, nova li yo hava li pamwe. Oimaliwa aishe oyo va li ve na oya li hai tuvikilwa mokakefa, na Jesus okwa li a pa Judas okakefa oko a kale te ka file oshisho. Ashike oimaliwa oyo ya li mokakefa oko kaya li yaJudas. Ndele mbela ou shi shii kutya Judas okwa li a ninga po shike konima yefimbo? — 

Judas okwa li a hovela okukufa oimaliwa mokakefa oko nonande ka li e na epitikilo oku shi ninga. Oimaliwa oyo okwa li he i kufa mo ngeenge vamwe vehe mu wete, nokwa li nokuli a kendabala opo mokakefa oko muye oimaliwa ihapu. Judas okwa li a hovela okukala ta diladila kombinga yoimaliwa efimbo keshe. Natu ka tale kutya omahalo a puka aJudas oo okwa li a etifa shike omafiku manini fimbo Omuhongi Munene a li ina dipawa.

Maria, omumwaina waLasarus kaume kaJesus, okwa li a kufa omaadi onhumba mawamawa ndele te a vaeke keemhadi daJesus. Ndele Judas okwa li a ngongota kombinga yoshinima osho. Mbela ou shi shii kutya omolwashike Judas a li a ngongota? —  Judas okwa ti kutya omaadi oo okwa li e na okulandifwa po opo nee oimaliwa tai pewa ovanhu ovo va hepa. Ndele paulelalela, Judas okwa li ashike a hala mokakefa muye oimaliwa ihapu opo e i vake mo. — Johannes 12:1-6.

Jesus okwa li a lombwela Judas aha piyaaneke Maria, molwaashi Maria okwa li e na olukeno. Judas ka li a panda eendjovo odo Jesus a li e mu lombwela, onghee hano, okwa li a ya kovapristeri ovakulunhu, ovo va li  ovatondi vaJesus. Ovapristeri ovo ova li va hala okukwata Jesus, ndele ova li va hala oku shi ninga konguloshi opo ovanhu vehe va mone.

Judas okwa li a lombwela ovapristeri a ti: ‘Ohandi mu lombwele kutya openi tamu dulu okuhanga Jesus opo mu mu kwate ngeenge omwa penge oimaliwa. Omwa hala okupa nge oimaliwa ingapi?’

Ovapristeri ova li va nyamukula Judas va ti: ‘Ohatu ku pe oimaliwa oisilveri omilongo nhatu.’ — Mateus 26:14-16.

Judas okwa li a tambula ko oimaliwa oyo, nokungaho, okwa fa a li ta landifa po Omuhongi Munene kovalumenhu ovo. Diladila ashike omunhu ta ningi oshinima shii sha tya ngaho! Ovanhu ohava ningi oinima ya tya ngaho ngeenge va ningi eembudi nohava vake oimaliwa. Ovanhu va tya ngaho ohava kala ve hole oimaliwa shi dulife eshi ve hole ovanhu vakwao ile Kalunga nokuli.

Otashi dulika u tye: ‘Nghi na efiku ndi ka kale ndi hole oshinima shonhumba shi dulife eshi ndi hole Jehova Kalunga.’ Onawa eshi u udite ngaho. Eshi Jesus a li a hoolola Judas a ninge omuyapostoli waye, otashi dulika Judas osho a li e udite ngaho. Ovanhu vamwe ovo va ninga eembudi navo otashi dulika osho va li ve udite ngaho. Natu ka kundafane kombinga yovanhu vamwe va tya ngaho.

Umwe womuvo okwa li Akan, omupiya waKalunga oo a li ko nale fimbo Omuhongi Munene a li ina dalwa e li omunhu kombada  yedu. Akan okwa li a mona oshikutu shiwa, oshingoli nosho yo oimaliwa yoishilveri. Ashike oinima oyo kaya li yaAkan. Ombibeli oya ti kutya oinima oyo oya li yaJehova molwaashi oya li ya kufwa kovatondi voshiwana shaJehova. Ndele Akan okwa li a halelela oinima oyo, nomolwaasho okwa li e i vaka po. — Josua 6:19; 7:11, 20-22.

Ope na vali oshihopaenenwa shimwe shaDavid, oo a li a hoololwa kuJehova a ninge ohamba yOvaisrael mefimbo lonale. Efiku limwe, David okwa li a mona omukainhu muwa Batseba. David okwa kala ta tale Batseba nokudiladila e mu ete keumbo laye a kale naye. Ashike Batseba okwa li omukulukadi waUria. Mbela David okwa li e na okuninga po shike? — 

David okwa li e na okweefa okudiladila kombinga yokukufa po Batseba, ndele David okwa kala ashike ta diladila kombinga yaasho. Onghee hano, David okwa li a ifanifa Batseba  keumbo laye, ndele ta dipaifa Uria. Omolwashike David a li a ninga oshinima shii sha tya ngaho? —  Omolwaashi okwa kala a hala omukainhu womushamane umwe. — 2 Samuel 11:2-27.

Jehova okwa li a efa David a kale nomwenyo molwaashi okwa li e livela ombedi. Ashike David okwa li a hangwa komaupyakadi mahapu. Omona waye Absalom okwa li a hala oku mu kufa ouhamba. Ngeenge ovanhu va li tave uya kuDavid, Absalom okwa li ha kwata ovanhu ovo komapepe noku va xupita. Ombibeli oya ti: ‘Absalom okwa yula omitima dOvaisrael.’ Absalom okwa li a ningifa ovanhu va kale va hala a ninge ohamba ponhele yaDavid. — 2 Samuel 15:1-12.

Mbela ope na efiku limwe wa li wa hala neenghono oshinima shonhumba ngaashi Akan, David naAbsalom? —  Ngeenge owa kufa po oshinima shomunhu umwe uhe na epitikilo molwaashi we shi hala, kungaho, owe shi vaka po. Mbela oto dimbuluka kutya ombudi yotete, Satana, oya li ya hala shike? —  Okwa li a hala ovanhu va kale tave mu longele, ponhele yokulongela Kalunga. Onghee hano, Satana okwa li ta vake eshi a li a ningifa Adam naEva vaha dulike kuKalunga.

Ngeenge omunhu e na oshinima shonhumba, oku na oufemba wokupopya kutya oolyelye tava dulu oku shi longifa. Pashihopaenenwa, otashi dulika u ka danauke nounona vamwe keumbo lavo. Mbela otashi ka kala ngoo sha yuka okukufa ko oshinima shonhumba keumbo lavo ndele to shi eta keumbo leni? —  Ahowe, inashi yuka, okuninga shapo wa pewa epitikilo kutate wavo ile kumeme wavo. Ngeenge owa kufa oshinima shonhumba keumbo limwe nopehe na okupula epitikilo, kungaho owa vaka.

Omolwashike tashi dulika u kwatwe keamo lokuvaka? —  Omolwaashi owa hala oshinima osho shihe fi shoye. Nokuli nongeenge kape na omunhu oo e ku mona eshi to shi kufa po, mbela olyelye e ku mona? — OJehova Kalunga. Otwa pumbwa yo okudimbuluka kutya Kalunga oku tonde oumbudi. Onghee hano, ohole yokuhola Kalunga nosho yo ovanhu vakweni otai ke ku linyengifa uha kale to vake.