Jesus okwa longa shihapu pefimbo loukalele waye muGalilea. Eshi a popya a ti: “Ondi na yo okuudifila oilando imwe onghundana iwa yOuhamba waKalunga,” ka li ashike ta udifile muGalilea, ndele okwa li yo “ta udifa meeshinagoga daJudea.” (Lukas 4:43, 44) Osho oshi shii okuudiwa ko molwaashi osha li opefimbo lokwenye noshivilo muJerusalem osha li pokufika.

Eshi twa lesha kombinga youkalele waJesus muGalilea, otwa mona ouyelele munini mOmavangeli kombinga yoilonga yaye muJudea. Ovanhu vOmujudea kava li ve linyenga nawa, ashike osho kasha li sha ningifa Jesus a efe po oilonga yaye yokuudifa nouladi nokulonga oilonga iwa keshe opo a li.

Jesus okwa li pokuya koshilandopangelo, Judea, muJerusalem, koshivilo shOpaasa shomo 31 O.P. Popepi nomuvelo wokupitila eedi, opa li etale la kula hali ifanwa Betesda. Vahapu ovo va li tava vele, ovapofi noilema ova li ve uya ketale oko. Omolwashike mbela? Omolwaashi ovanhu vahapu ova li va itavela kutya otava dulu okuvelulwa ngeenge ova i metale eshi omeva tae linyenge.

Mefiku lEshabata, Jesus okwa li a mona omulumenhu petale oo a kala ta vele oule womido 38. Jesus okwe mu pula a ti: “Ino hala okuveluka?” Omulumenhu okwa nyamukula a ti: “Omufimanekwa, kape na ou ta tula nge metale ngeenge omeva tae linyenge, ndele shimha handi i, vamwe ohava piti nge komesho.” — Johannes 5:6, 7.

Jesus okwa li a popya oshinima osho sha kumwifa omulumenhu oo nosho yo aveshe ovo ve shi uda, a ti: “Fikama! Kufa olutala loye ndele to ende.” (Johannes 5:8) Omulumenhu oo osho naanaa a li a ninga. Diva okwa veluka, ndele ta kufa olutala laye nokwa hovela okweenda.

Ponhele Ovajuda va hafele oshinima osho sha ningwa po shitunhula, eshi va mona omulumenhu oo, ove mu tokola tava ti: “Nena Eshabata noinashi pitikwa pamhango u humbate olutala.” Omulumenhu oo okwa tya kuvo: “Ou a velula nge okwa lombwela nge ta ti, ‘Kufa olutala loye ndele to ende.’” (Johannes 5:10, 11) Ovajuda ova li va tokola omulumenhu oo a velulwa mEshabata.

Ova li va hala okushiiva shihapu ndele tave mu pula tava ti: “Olyelye e ku lombwela u kufe olutala ndele to ende?” Omolwashike va pula omulumenhu oo ngaho? Omolwaashi Jesus okwa li a “dja po diva ndele ta i mongudu yovanhu,” nomulumenhu oo a velulwa ka li e shii Jesus. (Johannes 5:12, 13) Ashike omulumenhu oo okwa li vali ta ka shakena naJesus. Lwanima, okwa ka shakena naJesus motembeli nokwa li a dimbuluka kutya oye winya e mu velula petale.

Omulumenhu oo a velulwa okwa li vali a mona Ovajuda ovo va li ve mu pula shi na sha nanghee a velulwa. Okwa li e va lombwela kutya Jesus oye e mu velula. Eshi ve shi uda, ova ya kuJesus. Mbela ova li va ya kuJesus va ka ude kutya okwa longa oilonga oyo keenghono dalyelye? Ahowe. Ponhele yaasho, ova li ve ke mu hokololifa omolwoinima iwa oyo a li a longa mefiku lEshabata. Ova li va hovela oku mu hepeka.