Eshi Maria opo a ningi eteelelo, okwa li a ka talela po omupambele waye Elisabet, oo a li ha di keemhunda daJudea. Opo nee okwa shuna keumbo kuNasaret, neteelelo laye ola li na eemwedi nhee. Nakeshe umwe okwa li ta ka mona kutya omufimba. Diladila nghee osho sha li tashi ke mu kuma.

Osho sha li sha ningifa onghalo idjuu oshosho kutya Maria okwa hangwa a valekwa komuhongi woipilangi wedina Josef. Nokwa li e shi shii nawa kutya paMhango yaKalunga, oyo a li a pa Ovaisrael, omukainhu oo a hangwa a valekwa komulumenhu ndele ta nangala naumwe e lili, oku na okudipawa nomamanya. (Deuteronomion 22:23, 24) Ashike nonande Maria ka li a ya momilele, otashi dulika a li te lipula kombinga yaasho a li ta ka lombwela Josef shi na sha neteelelo naasho tashi ka ningwa po.

Maria okwa li a ninga eemwedi nhatu ehe po peumbo, onghee ohatu dulu okukala noushili kutya Josef okwa li e mu teelela nodjuulufi. Eshi va shakena, Maria otashi dulika a li e mu lombwela kombinga yonghalo yaye, noku mu yelifila kutya oufimba oo e na owomhepo iyapuki yaKalunga. Diladila ashike nghee sha li shidjuu kuJosef oku shi uda ko noku shi itavela.

Josef okwa li e shii kutya Maria omukainhu e li nawa, nonokutya oku na elihumbato liwa. Okwa li e mu hole neenghono. Nonande Josef okwa li a yelifilwa osho sha ningwa po, otashi dulika a li ta diladila kutya Maria oku na ashike okukala a pewa eteelelo olo komulumenhu umwe. Josef ka li a hala Maria a dipawe nomamanya ile a fifwe ohoni, ponhele yaasho okwa li a diladila oku mu henga po meholeko. Pefimbo lonale, ovanhu ovo ve livaleka ova li hava talika ko va fa  va hombola nale, nova li hava dulu okuhengafana.

Lwanima, eshi Josef a li ta diladila oshinima osho moule, okwa ya a ka nangale. Opo nee omweengeli waJehova okwe mu holokela mondjodi ta ti: “Ino tila okuhombola po Maria, molwaashi oufimba oo e na owomhepo iyapuki. Ota ka dala okaana okamati ndele to ke ka luka Jesus, osheshi Jesus ota ka xupifa ovanhu moulunde wavo.” — Mateus 1:20, 21.

Josef okwa li a penduka a pepelelwa eshi oinima ya yela mo nawa. Ka li a kwatakwata okuninga osho omweengeli e mu lombwela. Okwa li a twala Maria keumbo laye. Osho osha ningwa moipafi yavahapu opo ovanhu va mone kutya ye naMaria ova hombola. Ashike nande ongaho, Josef ka li a nangala naMaria eshi a li e na etelelo.

Konima yeemwedi donhumba, Josef naMaria, oo a li e na edalelwapeni, ova li tave lilongekidile okuya molweendo lile okudja peumbo lavo muNasaret. Ova li tava i peni pefimbo opo Maria a li pokumona okaana?