1. Ovanhu vahapu, mwa kwatelwa Ovakriste vamwe vashili, ohava kala va limbililwa kombinga yashike?

 MBELA Jehova Kalunga oku ku hole ngoo pauhandimwe? Ovanhu vamwe ova itavela kutya Kalunga oku hole ounyuni aushe ngaashi tashi popiwa muJohannes 3:16, ndele ohava kala ve udite kutya: ‘Kalunga ita dulu okukala e hole nge pauhandimwe.’ Nokuli nOvakriste vashili omafimbo amwe ohava hangwa komadiladilo a tya ngaho. Omulumenhu umwe oo a li a teka omukumo okwa ti: “Ohandi mono shidjuu okwiitavela kutya Kalunga oku na ko nasha naame.” Mbela naave osho ho kala u udite ngaho omafimbo amwe?

2, 3. Olyelye oo a hala tu itavele kutya katu na oshilonga momesho aJehova nonokutya ke tu hole, nongahelipi hatu dulu okukondjifa ediladilo olo?

² Satana okwa halelela tu itavele kutya Jehova Kalunga ke tu hole nonokutya ina valula nande oumwe womufye. Odoshili kutya Satana luhapu oha hongaula ovanhu ovo ve na ounhwa. (2 Ovakorinto 11:3) Ndelenee, oku hole yo okuningifa ovanhu ovo ve li peendodo dopedu va kale ve udite kutya vo ovanhu vanafangwa. (Johannes 7:47-49; 8:13, 44) Osho osho naanaa ta lalakanene unene tuu ‘momafiku axuuninwa,’ oo madjuu okukaliwa muo. Ovanhu vahapu kunena otava tekulwa momaukwaneumbo, omo ‘muhe nohole,’ ofimbo vamwe ve li momidingonoko, omo ovanhu ve li ovakwanyanya, ve lihole vo vene noihava yavala. (2 Timoteus 3:1-5) Ovanhu va tya ngaho ohava kala ve udite kutya vo ovanhu vahamakasha nokave holike, molwaashi ova kala tava ningwa onyanya, tava ungaungwa navo nonhondo nosho yo noutondwe oule womido dihapu.

³ Ngeenge oinima ya tya ngaho ohai ku ningifa u kale we lifya ounye, ino teka omukumo. Vahapu vomufye ohatu kala twe lidina, ile twe lifya ounye efimbo nefimbo inashi pumbiwa. Ndele dimbulukwa kutya Eendjovo daKalunga oda nuninwa ‘oku tu pukulula.’ (2 Timoteus 3:16) Ombiibeli otai ti: “[Ohatu] tulumukifa omutima  wetu koshipala shaye, osheshi omutima wetu ngenge tau tu hokololifa, Kalunga Oye e dule omutima wetu, noinima aishe oku i shii.” (1 Johannes 3:19, 20) Paife natu ka taleni keenghedi nhee, omo Omishangwa tadi dulu oku tu kwafela tu ‘tulumukife omutima wetu,’ tu lishilipaleke kutya Jehova oku tu hole.

4, 5. Efaneko laJesus li na sha noiyandja otali ulike ngahelipi kutya otu na ongushu momesho aJehova?

⁴ Onghedi yotete: Ombiibeli oye shi popya sha yukilila kutya Kalunga okwa lenga ovapiya vaye aveshe. Pashihopaenenwa, Jesus okwa ti: “Oiyandja ivali ihai landwa ngeno okahaulapa kamwe akeke? Ndele kaku na nande shimwe tashi wile poshi [Xo yeni ine shi koneka, NW]. Ndele osho eexwiki deni adishe domutwe oda valwa yo. Hano inamu tila; onye mu dule oiyandja ihapu.” (Mateus 10:29-31) Natu ka taleni kutya eendjovo odo oda li tadi ti shike kovapwilikini vaJesus vomefelemudo lotete.

⁵ Otashi dulika tu lipule kutya omolwashike omunhu a li e na okulanda oshiyandja. Pefimbo laJesus, oshiyandja osho sha li okadila ke na ombilixa koudila aveshe ovo hava liwa. Didilika kutya oiyandja ivali oya li hai kosho okahaulupa kamwe. Ndele Jesus okwa ti yo kutya, ngeenge omunhu oku na ouhaulapa vavali, ka li ha pewa oiyandja ine, ndele okwa li ha pewa itano. Oshiyandja oshititano osho sha li hashi wedwa po osha li sha talika ko sha fa shihe na ongushu yasha. Nonande oudila ovo otashi dulika va li va talika ko kovanhu vehe na ongushu yasha, mbela Omushiti okwa li e va tala ko ngahelipi? Jesus okwa ti: ‘Kalunga iha dimbwa nande oshimwe shomuyo.’ (Lukas 12:6, 7) Paife otu wete oshitwa osho Jesus a li a hala okuyelifa. Ngeenge Jehova okwa tala ko oshiyandja shimwe kutya oshi na ongushu momesho aye, kedimbwe nee ovanhu. Ngaashi Jesus e shi yelifa, Jehova oku shii keshe shimwe kombinga yetu, nomolwaashi taku tiwa kutya eexwiki detu adishe dokomutwe oda valwa.

6. Omolwashike hatu dulu okutya Jesus okwa li ta popi oshili, eshi a ti kutya eexwiki detu dokomutwe oda valwa?

⁶ Ovanhu vamwe otashi dulika va diladile kutya itashi shiiva okuvala eexwiki detu dokomutwe ngaashi Jesus a ti. Ndele diladila natango keteelelo lenyumuko. Mbela Jehova ota ka dula ngahelipi  oku tu shitulula, ngeenge ke tu shii nawanawa? Oushili oyoo kutya, Jehova okwe tu tala ko tu na ongushu, nomolwaasho okwa koneka oshitwe yetu, mwa kwatelwa oufyuululwakwatya wetu noimoniwa aishe oyo twa pita muyo noinima oyo i li medimbuluko letu. a Onghee hano, kuye oshinima shanafangwa okushiiva omuvalu weexwiki detu odo hadi kala di li oupokati wo 100 000.

7, 8. (a) Omaukwatya amwe elipi Jehova a halelela okumona, eshi ta panaapana omitima dovanhu? (b) Oilonga imwe ilipi oyo hatu longo Jehova a lenga neenghono?

⁷ Onghedi onhivali: Ombiibeli otai tu hongo kombinga yaasho Jehova a hokwa movapiya vaye. Oku shi popya paunafangwa, oha hokwa omaukwatya etu mawa noha pandula yo eenghendabala odo hatu ningi. Ohamba David oya li ya lombwela omona Salomo ya ti: “Omwene ta panaapana omitima adishe nediladilo keshe lomomwenyo ye e li shii.” (1 Omafimbo 28:9) Eshi Kalunga ta panaapana omitima dovanhu omabiliyona mounyuni ou u yadi elongifo leenghono noutondwe, iha kala tuu a hafa okumona ovanhu ovo ve hole ombili, oshili nouyuki! Oshike tashi ka ningwa po, ngeenge okwa mono omunhu oo e mu hole nokwa hala okulihonga kombinga yaye nosho yo okulombwela vamwe kombinga yaye? Jehova ote tu lombwele kutya oha kala e wete ovanhu ovo hava lombwele vamwe kombinga yaye. Oku na nokuli “embo lokudimbulukwa” aveshe ovo have ‘mu tila nohava fimaneke edina laye.’ (Malakia 3:16) Okwa lenga shili ovanhu ovo ve na oikala ya tya ngaho.

⁸ Oilonga iwa yoludi lilipi Jehova a lenga? Nopehe na omalimbililo, okwa lenga eenghendabala odo hatu ningi, eshi hatu hopaenena Omona waye, Jesus Kristus. (1 Petrus 2:21) Okwa lenga unene tuu oilonga yetu yokuudifa etumwalaka lOuhamba. Ovaroma 10:15 ova ti: “Eemhadi oda fewa ngahelipi daava hava udifa eenghundana  diwa.” Otashi dulika ihatu mono eemhadi detu da “fewa.” Ndele omushangwa oo otau popi shi na sha neenghendabala odo hatu ningi, eshi hatu udifa onghundana iwa. Jehova okwa lenga neenghono eenghendabala da tya ngaho. — Mateus 24:14; 28:19, 20.

9, 10. (a) Omolwashike tu na oushili kutya Jehova oha pandula, eshi hatu lididimikile omaudjuu? (b) Oshike osho Jehova iha ningi, ngeenge ta konenene ovapiya vaye ovadiinini?

⁹ Jehova ohe tu pandula yo omolwelididimiko letu. (Mateus 24:13) Dimbuluka kutya Satana okwa hala tu efe po okulongela Jehova. Efiku keshe to kala omudiinini kuJehova oto yandje oumbangi kutya Satana omunaipupulu. (Omayeletumbulo 27:11) Efimbo limwe ihashi kala shipu okulididimika. Ohatu shakeneke omashongo ngaashi okuhenoukolele, eenghalo dopamaxupilo da nyaya komunhu, nokuwililwa po koisho. Okuteelela efimbo lile otaku kulaukifa omwenyo. (Omayeletumbulo 13:12) Ndele Jehova ohe shi pandula, eshi hatu lididimikile omashongo a tya ngaho. Nomolwaasho ohamba David oya popya kombinga yomaudjuu ayo ya ti: “Omahodi ange, we a pimhila moshimbudju shoye,” noya popya yo nelineekelo ya ti: “Owe a nyolela membo loye.” (Epsalme 56:9) Doshili, Jehova okwa lenga noha dimbuluka omahodi etu  nokumona oixuna kwetu, eshi hatu kendabala okukanyatela oudiinini wetu kuye.

¹⁰ Molwaashi oshi na oupu tu lifye ounye, omitima detu otashi dulika di tu ningife tu anye okutambula ko oumbangi wa yela oo tau ulike kutya Jehova okwe tu tala ko tu na ongushu. Otashi dulika di tu ningife tu lipopile momitima hatu ti: ‘Ope na ovanhu vahapu ve na oihopaenenwa iwa ve dule nge. Jehova ita ka kala a hokwa nge mokuyelekanifa nge navo.’ Ndele Jehova iha yelekanifa ovanhu, molwaashi oku na ondjele. (Ovagalati 6:4) Oha konenene nelitulemo oikala yomitima detu, noha didilike omaukwatya etu mawa, nokuli nonande inaa twa lela.

11. Ohatu lihongo shike kombinga yaJehova monghedi omo a ungaunga noshinima shaAbia?

¹¹ Onghedi onhinhatu: Eshi Jehova ta panaapana omitima detu, oha yandje unene elitulemo komaukwatya mawa. Pashihopaenenwa, eshi Jehova a li a tokola okukomba po epata alishe lohamba Jerobeam olo la li lihe fi lidiinini kuye, okwa li a popya kutya Abia, oo a li umwe womovana vohamba, na lilwe eefya nokupakwa nefimaneko. Omolwashike Jehova a li a yandja elombwelo la tya ngaho? “Osheshi mepata alishe laJerobeam [muAbia aeke] mwa monika sha, osho tashi wapalele Omwene, Kalunga kaIsrael.” (1 Eehamba 14:1, 10-13) Osha yela kutya Jehova okwa li a tala momutima womulumenhu oo omunyasha nokwa li a mona mo sha ‘osho she mu wapalela.’ Kashi na nee mbudi kutya oukwatya oo owa li wa tana shi fike peni, Jehova okwa shilipaleka kutya oshinima osho osha tumbulwa mEendjovo daye. Okwa ulika yo olupandu laye, eshi a shilipaleka kutya oshilyo osho shoukwaneumbo waJerobeam osha pakwa nefimaneko. Kungaho, Jehova okwa ulika kutya omunefilonghenda.

12, 13. (a) Onghedi omo Jehova a ungaunga nohamba Josafat oya ulika ngahelipi kutya oha tale komaukwatya etu mawa nonande otwa nyona? (b) Ngeenge tashi uya poilonga yetu iwa nomaukwatya etu mawa, Jehova oha ulike ngahelipi kutya oku li Omudali, oo e na ohokwe mufye?

¹² Natu taleni yo koshinima shi na sha nohamba Josafat oyo ya li i na yo omaukwatya mawa. Eshi ohamba oyo ya li inai katuka pandunge,  omuprofeti waJehova okwa li e i lombwela a ti: “Ehandu laKalunga tali uya kombada yoye.” Kala li tuu elombwelo tali halukifa! Ndele omuprofeti waJehova okwa weda ko a ti: “Ndele muove mwa monika oinima iwa.” (2 Omafimbo 19:1-3) Ehandu laJehova li li pauyuki kala li le mu imba a mone oukwatya muwa oo Josafat a li e na. Mepingafano naasho, tu li ovanhu inava wanenena ihatu dimbulukwa noupu omaukwatya mawa avamwe, ngeenge twe va handukila. Navali, ngeenge twa nyona, twa fya ohoni, ile okukala tu udite tu na etimba otashi dulika i tu ningife tu dimbwe omaukwatya etu vene mawa. Ndele dimbulukwa kutya, ngeenge otwe livele ombedi nokukendabala okuhaendulula enyono la tya ngaho, Jehova ohe tu dimine po.

¹³ Ngeenge Jehova te tu panaapana, oha ekeleshi kokule omatimba etu, oku shi popya pafaneko, ngaashi ashike ovakongi vokawe hava ekeleshi edu longaho konima, eshi va kufa mo okawe. Ongahelipi shi na sha nomaukwatya etu mawa noilonga yetu iwa? Jehova okwa lenga omaukwatya etu mawa noilonga yetu iwa ngaashi ashike ovakongi vokawe hava kala ve ka lenga noku ka diinina. Mbela owa didilika ngoo kutya ovadali vamwe ohava kala va hokwa omafano oo a fanekwa neenyala kovana vavo, ile oinima yonhumba oyo va ninga kofikola, nohava tuvikile oinima ya tya ngaho oule womido, oyo tashi dulika ovana vavo ve i dimbwe nokuli? Jehova oku li Omudali oo e na ohokwe filufilu  mufye. Ngeenge otwa kala ovadiinini kuye, ita ka dimbwa nandenande oilonga yetu iwa nomaukwatya etu mawa. Okwe shi tala ko nokuli shi li okuhenouyuki okudimbwa oilonga yetu nomaukwatya etu mawa, notu shii kutya Jehova ke fi omuhenouyuki nandenande. (Ovaheberi 6:10) Natango ope na va li onghedi imwe ihokwifa omo Jehova he tu tale ko.

14, 15. (a) Omolwashike okuhawanenena kwetu itaku imbi Jehova a mone omaukwatya mawa mufye? Shi faneka. (b) Jehova ota ka ninga po shike shi na sha nomaukwatya mawa, oo e wete mufye, noha tale ko ngahelipi ovapiya vaye ovadiinini?

¹⁴ Jehova oku shii kutya inatu wanenena noku shii kutya oshike osho hatu dulu okuninga. Diladila kwaashi: Ovanhu ovo hava faneke omafano neenyala, ile hava hongo oinima yokufeweka ohava longo noudiinini, opo va wapeke omafano a tya ngaho, ile oinima oyo, ngeenge ya kulupa, ile ya nyonauka. Pashihopaenenwa, efano limwe olo la fanekwa neenyala komufaneki omunekeka, Leonardo da Vinci, longushu yeedola daAmerika omamiliyona 30, olo la kala la diininwa monhele yomaulikilo yomuLondon, shaEngland, ola li la yashwa komunhu wonhumba. Ndele kapa li nande oumwe oo a li a diladila kutya nali ekelweshi ashike. Divadiva, opa li pa ningwa omalongekido, opo efano olo li na omido 500 lwaapo, li wapekululwe. Omolwashike mbela? Omolwaashi efano olo ola li la talika ko li na ondilo kovanhu ovo ve hole oilongwanima yomake ya tya ngaho. Mbela fyeni tu li ovanhu katu na ongushu tu dule omafano a tya ngaho? Otu na ondilo momesho aJehova, kashi na nee mbudi kutya otwa nyonaunwa shi fike peni kokuhawanenena. (Epsalme 72:12-14) Jehova Kalunga e li Omushiti omunekeka, oo a shita ovanhu aveshe, ota ka ninga keshe osho a pumbwa okuninga, opo a alulile mewaneneno ovanhu aveshe ovo hava tambula ko omafiloshisho aye opahole. — Oilonga 3:21; Ovaroma 8:20-22.

¹⁵ Jehova oha mono omaukwatya mawa mufye oo tashi dulika tuhe a mone fye vene. Eshi hatu mu longele, ota kala te tu kwafele mokweendela ko kwefimbo, opo omaukwatya oo a kale a twa nawa fiyo osheshi twa fika mewaneneno. Kashi na nee mbudi kutya ounyuni waSatana owe tu tala ko ngahelipi, Jehova okwe tu lenga tu li ovapiya vaye ovadiinini, e tu tala ko ngaashi omamona e na ondilo. — Haggai 2:7.

16. Oumbangi wa kola ulipi tau ulike kutya Jehova oku tu hole, notu shi shii ngahelipi kutya efyo laJesus otali ti sha kufye pauhandimwe?

¹⁶ Onghedi onhine: Jehova ohe tu ulikile ohole yaye okupitila moilonga. Nopehe na omalimbililo, ekuliloyambo laKristus otali yandje oumbangi wa kola, oo tau nyaneke pomutenya oipupulu yaSatana, oyo kutya katu na ongushu momesho aKalunga nonokutya ke tu hole. Kakele kaasho, inatu dimbwa kutya ekuliloyambo otali ulike kutya Jehova naJesus ove tu hole. Jesus okwe shi ulika, eshi e liyamba okufya komuti womahepeko monghedi tai udifa omunhu omwenyo munyenye; Jehova okwe shi ulika, eshi a efa Omona waye omuholike a fye, nonande osha li she mu yahameka komutima, eshi a li ta tale Omona waye ta monifwa oixuna. Mupya munene, ovanhu vahapu inava itavela kutya efyo laJesus otali ti sha kuvo pauhandimwe. Ohava kala ve litala ko ve li ovanhu vahamakasha. Ndele dimbulukwa kutya omuyapostoli Paulus okwa li nale omuhepeki wovashikuli vaKristus. Ndele eshi a ninga Omukriste okwa li a popya a ti: ‘Omona waKalunga oku hole nge nokwe liyandja ponhele yange.’ — Ovagalati 1:13; 2:20.

17. Jehova ohe tu nanene ngahelipi kuye nosho yo kOmona waye?

¹⁷ Jehova ohe tu ulikile yo ohole yaye, eshi he tu kwafele pauhandimwe tu mone ouwa mekuliloyambo laKristus. Jesus okwa ti: “Kape na ou ta dulu okuuya kuame okuninga Tate, ou a tuma nge, te mu shili.” (Johannes 6:44) Heeno, Jehova oye mwene he tu shilile kOmona noku tu pa eteelelo lomwenyo waalushe. Mbela ohe shi ningi ngahelipi? Ohe shi ningi okupitila moilonga yokuudifa onghundana iwa yOuhamba, oyo twa udifilwa pauhandimwe, nosho yo moku tu kwafela okupitila momhepo yaye iyapuki, opo tu ude ko eeshili dopamhepo noku di tula moilonga nonande otu na omangabeko noinatu wanenena. Onghee hano, eendjovo daJehova odo a li a lombwela Ovaisrael otadi dulu yo okuyukifwa kufye, eshi a ti: “Onda kala ndi ku hole nohole yaalushe. Onghee nde ku shilila kuame nouwanghenda.” — Jeremia 31:3.

18, 19. (a) Efiloshisho lihokwifa unene lopahole lilipi Jehova e tu pa, noshike tashi ulike kutya oye ha ungaunga nalo paumwene? (b) Omishangwa otadi tu shilipaleke ngahelipi kutya Jehova oha pwilikine komailikano etu nohe tu udile oukwao wananghali?

¹⁸ Oufembanghenda weilikano ou li efiloshisho lihokwifa unene  lopahole olo Jehova e tu pa. Ombiibeli otai tu ladipike tu ‘ilikane kuKalunga tuhe nedimbuko.’ (1 Ovatessaloniki 5:17) Jehova oha pwilikine komailikano etu, nomolwaasho ta ifanwa nokuli “Omuudi womailikano.” (Epsalme 65:3) Jehova oye aeke ha udu omailikano; kape na nande oumwe, oo a pewa oufembanghenda wokuuda omailikano, mwa kwatelwa Omona waye. Diladila ashike kOmushiti weshito alishe te tu ladipike tu popye naye twa manguluka! Mbela Jehova oku li omupwilikini a tya ngahelipi? Mbela oha pwilikine ngoo nelitulemo komailikano etu? Osho naanaa.

¹⁹ Jehova ohe tu udile oukwao wananghali. Oukwao wananghali oshike? Omukriste umwe omudiinini omunamido okwa ti: “Oukwao wananghali oo okukala nouyahame woye momutima wange.” Mbela Jehova oha kala ngoo shili e udite ouyahame wetu? Ombiibeli oya popya shi na sha nanghee a li ha kala e uditile Ovaisrael ya ti:“Momaluhepo avo aeshe okwe va nyikila oluhodi.” (Jesaja 63:9) Ka li ashike e wete omaudjuu avo, ndele okwa li yo e va udila oukwao wananghali. Kokutya kutya oha kala e uditile ngahelipi ovapiya vaye, okwe shi yelifa nawa neendjovo daye mwene, eshi a ti: “Ou te mu kumu, ota kumu ondada yeisho [lange, NW].” b (Sakaria 2:8) Eendjovo odo itadi yelifa tuu nawa nghee Jehova ha kala e udite ouyahame, ngeenge ovapiya vaye tava mono oixuna! Doshili, Jehova ohe tu udile oukwao wananghali. Ngeenge tu li moudjuu, ohashi mu kumu komutima.

20. Opo tu dulike komayele oo e li mOvaroma 12:3, oikala yopamadiladilo ilipi tu na okuhenuka?

²⁰ Nonande Jehova oku tu hole shili, tu li Ovakriste ovanandjele, katu na okukala tu na ounhwa, ile hatu yandje unene elitulemo kufye vene. Omuyapostoli Paulus okwa ti: “[Kefilonghenda] olo nde li pewa ohandi mu lombwele, keshe umwe mokati keni mu he lidiladilile kombada yaashi she mu yeleka, ndele kendabaleni okudiladila pandjele, keshe tuu ou pauhapu weitavelo laye, olo Kalunga e li mu pa.” (Ovaroma 12:3) Etoloko limwe vali ola ti: “Onda hala  okulombwela keshe umwe womunye kutya ine litala ko e na ongushu inene i dulife pwaayo e na shili, ndele ne litale ko pandjele.” (A Translation in the Language of the People, kuCharles B. Williams) Nonande otwa hafa, eshi tu shii kutya Tate yetu womeulu oku tu hole, natu kaleke momadiladilo kutya paulelalela inatu wana ngeno okuulikilwa ohole noitatu dulu okufutila oilonga yohole oyo e tu longela. — Lukas 17:10.

21. Oipupulu yaSatana ilipi tuhe na okwiitavela, noshili yOmbiibeli ilipi tu na okudimbuluka alushe, opo tu shilipaleke omitima detu kutya Kalunga oku tu hole?

²¹ Atusheni natu kaleni twa tokola toko tuha itavele nande oipupulu aishe yaSatana, oyo kutya Kalunga ke tu hole nonokutya ine tu valula. Ngeenge oho diladila kutya Kalunga ke ku hole pauhandimwe omolweenghalo odo wa pita mudo, ile kutya oilonga yoye iwa itai ti sha kuye, ile kutya omatimba oye omahapu nomolwaasho ku wete taa dulu okudimwa po pakanghameno lekuliloyambo lOmona waKalunga, dimbuluka kutya omadiladilo a tya ngaho kae li mondjila. Ekelashi filufilu omadiladilo a tya ngaho! Natu twikileni okushilipaleka omitima detu neendjovo daPaulus odo da nwefwa mo tadi ti: “Ondi shi shii shili, haefyo ile omwenyo, haovaengeli ile ovapangelinghono, haai yopaife ile ei yokomesho, haenghono, [haule wopombada ile oule woposhi, hashishitwa] nande shimwe tashi dulu oku tu tukula mohole yaKalunga yomuJesus Kristus, Omwene wetu.” — Ovaroma 8:38, 39.