Fimbo Jesus a li e na ko efimbo lixupi a dipawe, okwa a li xunganeka a ti: “Evangeli eli louhamba [ile tu tye, “onghundana ei iwa youhamba, NW] otali udifilwa ounyuni aushe li ningile oiwana aishe ondombwedi, opo nee taku uya exulilo.” (Mateus 24:14) Ndele mbela oilonga oyo yokuudifa onghundana iwa mounyuni aushe oya li tai ka wanifwa po ngahelipi? Oya li tai ka longwa monghedi omo Jesus a li he i longo eshi a li kombada yedu. — Lukas 8:1.

Ohatu udifile ovanhu momaumbo. Jesus okwa li a deula ovahongwa vaye va kale hava udifa eumbo neumbo. (Mateus 10:11-13; Oilonga 5:42; 20:20) Ovahongwa ovo vonale ova li yo va lombwelwa kondadalunde kutya okoitukulwa ilipi ve na oku ka udifa. (Mateus 10:5, 6; 2 Ovakorinto 10:13) Nokunena, oilonga yetu yokuudifa oya unganekwa nawa; eongalo keshe oli na oshitukulwa shalo omo li na okuudifila. Osho ohashi tu kwafele tu wanife po elombwelo laJesus kutya natu “udifile ovanhu noku va hepaululila [ile tu tye, “noku va pa oundombwedi nawanawa,” NW].” — Oilonga 10:42.

Ohatu udifile yo ovanhu keshe opo hatu dulu oku va hanga. Jesus okwe tu tulila po yo oshihopaenenwa shokuudifa moipafi eshi a li a udifila ovanhu komunghulofuta nosho yo pondungu yomeva. (Markus 4:1; Johannes 4:5-15) Nafye ohatu kendabala okulombwela ovanhu etumwalaka lOmbibeli keshe apa hatu va hange, kutya nee omomapandavanda, opeenhele domalandifilo, omeeparka, ile okupitila mongodi. Ohatu udifile yo ovashiinda shetu, ovanailonga vakwetu, ovanafikola vakwetu nosho yo ovapambele vetu, ngeenge eenghalo otadi shi pitike. Omolweenghendabala da tya ngaho, ovanhu omamiliyona mounyuni aushe ova dula ‘okuudifilwa etumwalaka lexupifo.’ — Epsalme 96:2.

Mbela owa diladila kombinga yomunhu wonhumba oo to dulu okulombwela onghundana iwa yOuhamba waKalunga, nokutya Ouhamba oo otau ka ningila shike ovanhu monakwiiwa? Ino ongaonga okulombwela vamwe etumwalaka olo leteelelo. Kendabala oku va lombwela omanga tapa tiwa nena.

• ‘Onghundana iwa’ oyo tu na okuudifa oilipi?

• Eendombwedi daJehova ohadi shikula ngahelipi oshihopaenenwa shaJesus ngeenge tashi uya pokuudifa