Okudja ashike eshi nda li okaana onda kala ndi hole eshito. Oukwaneumbo wetu owa li hau hafele okuya momifitu nosho yo komatale oo a dingilila odoolopa yetu yaJyväskylä moFinland. Ondi hole yo oinamwenyo. Eshi nda li okaana, onda li nda hala ashike ngeno ohandi dana nokambishi nokambwa keshe handi mono! Eshi nda li handi ende handi kulu, onda li handi kala nda nyemata eshi ovanhu tava ungaunga nai noinamwenyo. Mokweendela ko kwefimbo, onda li nda waimina ehangano olo hali amene oinamwenyo, nonda li nda shakena ko novanhu ovo ve na etaleko la fa lange.

Otwa li hatu ningi omakangha opo tu popile oufemba woinamwenyo. Otwa li hatu andjakaneke omauyelele, nokuningila omakangha eefitola odo hadi landifa omalududi oinamwenyo nosho yo oipangelo oyo hai konakona oinamwenyo. Otwa li nokuli twa tota po ehangano lokwaamena oinamwenyo. Molwaashi otwa li hatu katuka nokuli neenghatu odo dihe li paveta, otwa li hatu lihange tu li mo nai novapolifi. Onda li nda mangwa po nokutwalwa komhangu lwoikando ihapu.

Kakele ashike kokunakonasha kwange noinamwenyo, onda li yo handi lipula kombinga yomaupyakadi oo e li mounyuni. Mokweendela ko kwefimbo, onda ka waimina omahangano onhumba, ngaashi ehangano ledina Amnesty International nosho yo Greenpeace. Onda li handi longifa eenghono dange mokuyambidida oilonga yomahangano oo. Onda li handi popile oufemba weehepele, ovo tava fi ondjala nosho yo ovo vehe na sha nandenande.

Ashike onda ka mona kutya itandi dulu okuninga omalunduluko mounyuni. Nonande omahangano oo okwa dula okukandula po omaupyakadi amwe manini, eenghalo mounyuni oda li ashike tadi naipala. Osha fa ashike ounyuni aushe wa li wa kwatwa ko kowii nokape na oo e na ko nasha nao. Onda li ndi udite kutya itandi dulu okuninga po sha.

Molwaashi onda li nda nyika oluhodi omolwonghalo oyo, onda hovela okulipula shi na sha naKalunga nosho yo Ombiibeli. Monakudiwa onda li handi konakona Ombiibeli nEendombwedi daJehova. Nonande Eendombwedi oda li da kenukila nge noda li di na ko nasha naame, pefimbo opo kanda li nde lilongekida okuninga omalunduluko. Ashike pomhito ei, oinima oya li ya yooloka ko.

Onda kufa Ombiibeli yange nonda hovela oku i lesha. Osho nda lesha omo osha li sha hekeleka nge shili. Onda li nda didilika kutya omishangwa dihapu oda popya kombinga yokuungaunga nawa noinamwenyo. Pashihopaenenwa, Omayeletumbulo 12:10 okwa ti kutya “omuyuki a shiiva osho oshimuna shaye sha hala.” Onda ka mona yo kutya Kalunga haye omweetifi womaupyakadi mounyuni. Ndele ponhele yaasho, omaupyakadi etu otaa hapupala molwaashi ovanhu vahapu inava hala okudulika kewiliko laye. Onda li nda kumwa neenghono eshi nde lihonga kutya Jehova oku tu hole nohe tu lididimikile. — Epsalme 103:8-14.

Pefimbo opo tuu opo, onda li nda mona okafooloma kokupula u tuminwe embo Ombibeli otai hongo lela shike? nonda li nde ka yadeke noku ka tuma. Diva konima yaasho, onda li nda taalelwa po kovalihomboli vEendombwedi, nonda hovela okukonakona Ombiibeli navo. Onda li yo nda hovela okukala pokwoongala kwopaKriste kOlupale lOuhamba. Naasho osha ningifa oshili yOmbiibeli i mene omidi momutima wange.

Onda li nda dula okuninga omalunduluko mahapu omolwekwafo lOmbiibeli. Onda li nda efa po okushila omakaya nokunwa sha pitilila. Onda li nda wapeka eholokepo lange nosho yo onghedi yange yokupopya. Onda li nda lundulula etaleko lange li na sha novakwanepangelo. (Ovaroma 13:1) Onda li yo nda efa po onghedi yange yokukalamwenyo inai koshoka, omo nda li nokuli ndihe na elipangelo.

Elunduluko linene olo nda ndi na okuninga olo okukala ndi na etaleko liwa li na sha nomahangano oo e lile po oufemba wovanhu noinamwenyo. Osho inandi shi ninga ashike mepakumo leisho. Potete, onda li ndi udite ondjo molwaashi nda efa po oku a yambidida. Ashike, onda li nda mona kutya Ouhamba waKalunga oo ashike ekandulepo lomaupyakadi mounyuni. Onda li nda tokola okulongifa eenghono dange mokuyambidida Ouhamba oo nokukwafela vamwe ve lihonge kombinga wao. — Mateus 6:​33.

Eshi nda li handi popile oufemba wovanhu noinamwenyo, onda li nda tala ko ovanhu kutya ope na vamwe ovo ve na omitima diwa naado dii; nonda li handi kala nde lilongekida okukatukila eenghatu ovo ve na omitima dii. Ashike omolwekwafo lOmbiibeli, kandi tonde vali ovanhu. Ponhele yaasho, ohandi kendabala okukulika ohole yokuhola ovanhu aveshe. (Mateus 5:​44) Opo ndi i ulike, ondi hole okuudifila vamwe onghundana iwa yOuhamba waKalunga. Ohandi kala nda hafa molwaashi oilonga oyo otai xumifa komesho ombili, ehafo nohai kwafele ovanhu va kale ve na eteelelo la twa.

Ondi na ombili yopamadiladilo molwaashi oinima aishe onde i yandje momake aJehova. Onda tomhwa kutya ye, e li Omushiti wetu, ita ka efa ovanhu noinamwenyo va monifwe oixuna fiyo alushe, navali ita ka efa edu letu liwaliwa li hanaunwe po. Ponhele yaasho, ota ka longifa Ouhamba waye a wapekulule edu. (Jesaja 11:1-9) Ohashi hafifa nge eshi ndi shii oshili nohandi dulu okukwafela vamwe va kale ve na eitavelo muo. Paife kandi udite vali kutya ondi na okuninga omalunduluko mounyuni.