Oraporta yovaudifi vouhamba

Okwa mona onghalamwenyo i na eityo

JESUS okwa ti oku shii eedi daye. (Johannes 10:14) Ngeenge omunhu oku na omutima muwa, e hole ombili nouyuki, ota ka nanenwa kovashikuli vaJesus. Omunhu a tya ngaho ota ka mona onghalamwenyo i na eityo, ngaashi ashike omukainhu umwe wokoBelgium e i mona. Ehokololo laye oli li ngaashi tashi shikula:

“Eshi Eendombwedi daJehova da konghola pomuvelo wange, oda hanga nda wililwa po, nonda li handi diladila okulidipaa. Onda hafela osho Eendombwedi da popya kombinga yekandule po lomaupyakadi omounyuni ou wa nyonauka, ashike kanda li nda hafela ediladilo olo kutya Kalunga oye e na okuninga po sha. Onda hangwa nda efa po okuya kongeleka oule womido hetatu, molwaashi onda li ndi tonde oihelele oyo nda mona ko. Ashike onda li nda mona kutya omu na oushili mwaasho Eendombwedi tadi popi, nonda li nde shi mona mo kutya oshidjuu okukala uhe na ekwatafano naKalunga.

“Shinyemateka, konima eshi Eendombwedi da talela nge po oikando inini, otwe likanifa nado. Onda li nda lulilwa. Onda li handi shili oupakete vomakaya vavali mefiku, fiyo nda ya moingangamifi nokuli. Molwaashi onda li nda hala okukwatafana natatekulu oo a fya nale, aame winya moinima youmhulile. Osho osha ponokelifa nge keendeemoni, nonda li handi kala nda tila okukala aame andike oufiku. Onghalo oyo oya li ya kwata oule weemwedi. Alushe keenguloshi onda li handi kala nda tila okukala aame andike.

“Opo nee fiku limwe onda li nde ke livyula momaulu, nonda li nda ya nondjila imwe i lili, ndele hayo oyo handi i nayo shito, opo nee onde litwa metungo limwe la kula opo tali tungwa. Onda li nda kumwa molwaashi opa li ovanhu vahapu. Eshi nda ehena popepi, onda li nda mona kutya mboli Eendombwedi daJehova tadi tungu Olupale lOuhamba. Opo nee onda dimbuluka eshi Eendombwedi da li da talela nge po, ndele handi lipula kutya, ngeno okwa li ounyuni aushe wa fa ovanhu ava, ngeno ito shi pewa luvali.

“Molwaashi onda li nda hala ngeno Eendombwedi di uye vali di talele nge po keumbo letu, onda popya navamwe ovo tava longo petungo lolupale. Onda ilikana kuKalunga, nokonima yomafiku omulongo, omulumenhu ou a li a talela nge po oshikando shotete, okwe e uya peumbo letu. Okwa li a lombwela nge tu twikile nekonakonombiibeli letu, nonda li nda dimina nehafo. Opo nee okwa shiva nge diva kokwoongala, nonda dimina. Inandi mona nande onale onhele ya fa inya! Onda kala handi kongo ovanhu ovo ve holafane, nova hafa. Nde va mona nee!

“Okudja opo inandi faula vali okwoongala. Konima yoivike itatu, onda efa po onghedi yange ii yokushila omakaya. Opo nee onda kupulashi omambo okunyanekela, neemusika dange da nyika oinima yeendemoni, nonda li ndi udite kutya eendemoni otadi hale okweefa nge. Onda li nda tula onghalamwenyo yange melandulafano, metwokumwe nomifikamhango dOmbiibeli, nokonima yeemwedi nhatu, onda li nda hovela okuudifa onghundana iwa. Konima yeemwedi hamano, onda li nda ninginifwa. Konima yomafiku avali okudja eshi nda ninginifwa, onda hovela oukwafelikokolindjila.

“Onda pandula Jehova omolwoinima iwa aishe oyo a ningila nge. Xuuninwa onghalamwenyo yange oya ka kala i na eityo. Heeno shili, edina laJehova olo oshungongulu ya pama omo handi hondama nokwaamenwa. (Omayeletumbulo 18:10) Ondi udite lela ngaashi omupsalme eshi a shanga mEpsalme 84:10, a ti: ‘Efiku limwe alike momikala doye li dule omafiku eyovi pamwe pe lili! Onda hoolola okukala konhu yeumbo laKalunga kange, shi dule okukala meenduda dovalunde.’

Omukainhu oo omulininipiki osho a mono onghalamwenyo i na eityo. Keshe oo ta kongo Jehova, e na omutima muwa, naye ota dulu okumona onghalamwenyo i na eityo.