Eshi to diladila Ouhamba oo hatu popi oulipi?— Ohatu popi kombinga yOuhamba waKalunga, oo tau ka ninga edu oparadisa. Mbela owa hala okulihonga shihapu kombinga yOuhamba oo?—

Ouhamba keshe ohau kala u na ohamba. Ohamba ohai pangele ovanhu ovo ve li moshitukulwa shayo. Mbela ou shii kutya Ohamba yOuhamba waKalunga olyelye?— OJesus Kristus, noku li meulu. Ndele mafiku ota ka ninga Ohamba yakeshe umwe kombada yedu. Eshi to diladila ohatu ka kala ngoo twa hafa ngeenge Jesus a hovele okupangela e li Ohamba yedu alishe?—

Ohatu ka kala twa hafa neenghono! MOparadisa ovanhu itava ka lwifafana, ile tu tye, itamu ka kala oita nandenande. Ovanhu aveshe otava ka kala ve holafane. Kape na ou ta ka vela ile ta ka fya. Ovapofi otava ka kala hava mono ko, eembolo otadi ka kala hadi udu ko, noilema otai ka kala tai dulu okweenda nokunuka. Ohatu ka kala tu na oikulya ya wana. Oinamwenyo otai ka kala i na ombili naikwao nosho yo novanhu. Ovanhu ovo va fya otava ka nyumuka, ndele tava kala vali ve na omwenyo. Ovanhu vahapu ovo twe lihonga kombinga yavo mokambo aka ngaashi Rebekka, Rahab, David naElia otava  ka nyumuka yo. Mbela ino hala oku ke va mona eshi tava ka nyumuka?—

Jehova oku ku hole nokwa hala u kale wa hafa. Ngeenge owa twikile okulihonga kombinga yaye nokukala ho dulika kuye, oto ka kala nomwenyo fiyo alushe moparadisa oyo tai ka kala iwaiwa! Mbela ino hala oku ka kala mOparadisa?—