Eshi eongalo laRoma la uda kutya Paulus ote uya, ongudu yovamwatate oya li ya enda eekilometa 64 ye ke mu shakeneka. Ohole yavo yokuhelihola mwene oya li ya kuma ngahelipi Paulus? Ombiibeli oya ti: “Paulus eshi e va mona, okwa pandula Kalunga nokwa ladipalekwa.” (Oil 28:15) Nonande Paulus okwa li ha tu omukumo omaongalo ngeenge te a talele po, pomhito oyo oye a li a tuwa omukumo kovamwaxe eshi a li modolongo. — 2Kor 13:10.

Kunena, ovapashukilishikandjo ohava talele po omaongalo opo va twe omukumo ovamwatate novamwameme. Omafimbo amwe ohava kala va loloka, ve na oshisho nova teka omukumo ngaashi ashike ovapiya vakwao vaKalunga. Moshikando tashi shikula eshi omupashukilishikandjo nomukulukadi waye tave uya okutalela po eongalo leni, oshike to ka ninga po opo mu ‘twaafane omukumo’? — Rom 1:11, 12.

• Kala pelongekido loilonga yomomapya. Ovapashukilishikandjo ohava tuwa omukumo neenghono kovaudifi ngeenge tava ningi omaliyambo opo va kufe ombinga moukalele oshivike osho tava talele po. (1Tes 1:2, 3; 2:20) Oto dulu okukufa oukwafelikokolindjila omwedi oo omupashukilishikandjo te mu talele po. Mbela ito dulu okulonga pamwe nomupashukilishikandjo nosho yo nomukulukadi waye ile uye naumwe kovakonakonimbiibeli voye? Ohava hafele okulonga pamwe novaudifi va yoolokafana, mwa kwatelwa ovo vape ile ovo vehe na owino moukalele.

• Kala ho va yakula. Mbela ito dulu oku va pa omulele ile oku va telekela omusha? Osho otashi ka ulikila omupashukilishikandjo nomukulukadi waye kutya omu va hole. Inava pumbwa shihapu. — Luk 10:38-42.

• Kala ho pwilikine nokutula moilonga omayele oo te tu pe. Omupashukilishikandjo ohe tu kwafele pahole tu ninge omalunduluko eshi hatu longele Jehova. Otashi dulika e tu pe omayele a kwata moiti omafimbo nomafimbo. (1Kor 5:1-5) Omupashukilishikandjo oha kala a hafa ngeenge hatu dulika nehalo liwa. — Heb 13:17.

• Kala ho ulike olupandu. Kala ho lombwele omupashukilishikandjo nosho yo omukulukadi waye osho wa hafela meenghendabala odo va ninga. Oto dulu oku shi va lombwela odikilila, okupitila monhumwafo, mokakalata nosho tuu. — Kol 3:15.