“OMOLWASHIKE NDA NINGILWA NGAHA? Omolwashike Kalunga a efa eshi shi ningilwe nge?” Sidnei wokoBrazil womido 24 okwa kala te lipula nomapulo oo. Okwa li a monena oshiponga mondama yokuyowa, noku na okukala mokatemba onghalamwenyo yaye aishe.

Ovanhu vahapu ohava kala ve udite va udifwa nai kuKalunga ngeenge tava mono oixuna oyo hai etifwa koiponga, kouyehame, kefyo lomuholike wavo, koiponga yopaushitwe nokoita. Havo votete tava pe Kalunga ombedi. Tatekulululwa Job oo a li ko nale okwa li a hangwa koiponga ya shikulafana. Okwa li a pa Kalunga ombedi, a ti: “Ame ohandi ku kuwile ekwafo, ndelenee Ove ito nyamukula nge. Ame handi kala apa, ndee Ove ho dakamene nge omesho. Ove wa shitukila nge omukukutu u he nonghenda. Omolweenghono deke loye Ove ho haula nge ngaashi omutondadi.” — Job 30:20, 21.

Job ka li eshi kutya omaupyakadi aye otaa di peni noka li e shii kutya omolwashike ta mono oixuna. Shihafifa, Ombibeli oye tu yelifila kutya omolwashike oiningwanima ya tya ngaho hai holoka nanghee tu na okulinyenga kuyo.

Ombibeli oya popya kombinga yaKalunga ya ti: “Oilonga yaye oya wana ya pwa. Osheshi eendjila daye adishe do omatokolo. Ye Kalunga koudiinini, ndee ehe nowidi. Ye omuyuki nomunashili.” (Deuteronomion 32:4) Ngeenge Kalunga “omuyuki nomunashili,” oshi li ngoo pandunge a monife ovanhu oixuna ile e va etele omaupyakadi opo e va handukile ile e va honge sha?

Mepingafano naasho, Ombibeli oya ti: “Omunhu [ngeenge] ta shindwa, ina tya: ‘Ohandi shindwa kuKalunga,’ osheshi Kalunga iha dulu a shindwe kowii, naye mwene iha shindi nande omunhu.” (Jakob 1:13) Otwe lihonga mOmbibeli kutya Kalunga okwa li a shita ovanhu va wanenena. Okwa li a pa Adam naEva oshikuninoumbo shiwa, oipumbiwa yonghalamwenyo aishe noilonga ishambula. Kalunga okwe va lombwela a ti: “Dalafaneni nokuhapupala ndee yadifeni edu, lo nali kale mepangelo leni.” Adam naEva kava li ve na etomheno lokupa Kalunga ombedi. — Genesis 1:28.

Ashike kunena eenghalo hasho di li ngaho. Ondjokonona otai ulike kutya ovanhu aveshe ove li monghalo inyikifa oluhodi. Ombibeli oya ti: “Osheshi otu shi shii oishitwa aishe ohai keme kumwe ndele oi nefeto lokudala fiyo paife.” (Ovaroma 8:22) Oshike sha ningwa po?

Opo tu shiive kutya omolwashike pe na okumona oixuna, otu na okudiladila kehovelo oko wa tamekela. Omweengeli omunashibofa oo a ka ifanwa lwanima Satana Ondiaboli, okwa heka Adam naEva va ekeleshi omifikamhango daKalunga di na sha naasho shi li mondjila naasho sha puka, odo da li di lilwe po koshipango shokuhalya “komuti wokushiiva ouwa nowii.” Ondiaboli oya lombwela Eva kutya itava ka fya shili ngeenge inava dulika kuKalunga, nokungaho oya lundila Kalunga kutya omunaipupulu. Satana okwa lundila yo Kalunga kutya okwa ngungunina ovapangelwa vaye oufemba wokuhoolola osho shiwa naasho shii. (Genesis 2:17; 3:1-6) Satana okwa ti yo kutya ovanhu otava ka kala ve li nawa nopehe na epangelo laKalunga. Oinima aishe oyo oya etifa po epulo la fimanenena olo kutya, mbela Kalunga okwa wana ngoo okupangela?

Ondiaboli oya etifa po vali omhata imwe. Oya lundila ovanhu kutya ohava longele ashike Kalunga omolwokuliholamwene. Oya popya shi na sha nomulumenhu omudiinini Job, ya ti: “Ove mwene, ndi shii, we mu amena keembinga adishe neumbo laye naaishe e i kwete. . . Ndelenee nana eke loye u kume aishe e i kwete: ye ote ke ku liteeka shili moipafi yoye.” (Job 1:10, 11) Nonande Satana okwa li ta popi Job, eendjovo odo otadi dulu okuyukifwa kovanhu aveshe kutya ohava longele Kalunga omolwokuliholamwene.

Onghedi ya denga mbada ilipi tai dulu okukandula po eemhata odo lumwe aluke? Kalunga, oo omunaendunge adishe oku na enyamukulo la denga mbada olo tali tu hafifa. (Ovaroma 11:33) Okwa efa ovanhu  ve lipangele vovene oule wefimbo opo oidjemo i holole kutya olyelye e na eenghonopangelo da shiya ko.

Eenghalo dii odo di li kombada yedu kunena otadi yandje oumbangi kutya omapangelo opanhu okwa dopa filufilu. Inaa dopa ashike okweeta ombili, eameno, ehafo ndele ohaa nyono yo edu. Oushili oo ou liwetikile nawa mOmbibeli eshi ya ti: ‘Ondjila yomunhu ihai kala mepangelo laye mwene, nhumbi ta ende, nhumbi ta yukifa eenghatu daye.’ (Jeremia 10:23) Onghedi yaKalunga yokupangela oyo ashike tai dulu okweeta ombili tai kalelele, ehafo nokweetela ovanhu ouwa molwaashi oshi li metwokumwe nelalakano laye. — Jesaja 45:18.

Ongahelipi Kalunga ta ka wanifa po elalakano laye li na sha novanhu? Didilika kutya Jesus okwa honga ovashikuli vaye va ilikane va tye: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:10) Onghee hano, mafiku Kalunga ota ka xulifa po okumona oixuna akushe okupitila mOuhamba waye. (Daniel 2:44) Oluhepo, omikifi nefyo itai ka kala po vali. Shi na sha neehepele, Ombibeli oya ti kutya Kalunga ‘ota ka xupifa epongo eli tali kuu onghuwo e li kwafe.’ (Epsalme 72:12-14) Kombinga youyehame, Ombibeli oya udaneka ya ti: “Ndele onakukala mo nande umwe ta ti: Aame oshingone.” (Jesaja 33:24) Jesus okwa popya shi na sha noonakufya ovo ve li medimbuluko laKalunga a ti: “Osheshi efimbo tali uya, opo aveshe ava va kala meembila otava udu ondaka yaye. Ndee tava holoka mo.” (Johannes 5:28, 29) Oo kae fi tuu omaudaneko a tunhula!

Sidnei oo a popiwa pehovelo loshitukulwa eshi, konima yomido 17 okudja poshiponga, okwa ti: “Ihandi pe vali Jehova Kalunga ombedi omolwoshiponga, ashike potete okwa li nde mu handukila. Omafimbo amwe ohandi kala nda nyemata, nohandi kwena ngeenge handi diladila koulema wange. Kakele kaasho, paife onda mona mOmbibeli kutya oshiponga kashi fi ehandu la dja kuKalunga. Ombibeli oya ti: “Efimbo noiningwanima yombadilila otai dulu okuhanga keshe umwe.” Onda kala handi ilikana kuJehova nokulesha omishangwa dokondadalunde opo ndi kale nda pama pamhepo nokukala netaleko liwa. — Omuudifi 9:11, NW; Epsalme 145:18; 2 Ovakorinto 4:8, 9, 16.

Kaleka momadiladilo kutya omolwashike Kalunga a efa okumona oixuna ku kale po nonghee oilanduliko ya ko oyo tai ka xulifwa po mafiku tashi tu kwafele tu finde eliudo keshe lokukala tu udite twa udifwa nai kuye. Kalunga okwe tu shilipaleka kutya ‘ovo tave mu kongo, ote va pe ondjabi.’ Keshe oo a itavela muye nomOmona waye ita ka nyematekwa. — Ovaheberi 11:6; Ovaroma 10:11.