Mbela ito dimine kutya ngeenge ovanhu ova nyonauka, nepangelo olo tava kwatele komesho oli na okukala la nyonauka? Ngeenge osho, epangelo olo tali ka kala lihe na oulingilingi kali na okukwatelwa komesho kovanhu. Ombibeli oya yelifa epangelo olo kutya Ouhamba waKalunga, epangelo olo Jesus a li a honga ovashikuli vaye va ilikane. — Mateus 6:9, 10.

Ouhamba waKalunga owo epangelo lolela olo tali pangele okudja meulu. Otali ka pingena po omapangelo aeshe opanhu. (Epsalme 2:8, 9; Ehololo 16:14; 19:19-21) Ouhamba otau ka etela yo ovanhu omanangeko noupuna, amwe omuo, oku ka xulifa po oulingilingi. Natu ka taleni koinima ihamano oyo tai ulike kutya Ouhamba otau ke shi wanifa po.

OUPYAKADI: Omapangelo opanhu ohaa yambididwa pashimaliwa kovakwashiwana, unene okupitila mokufuta oifendela. Oimaliwa oyo ohai tula ovanambelewa vamwe meyeleko nohave i vake po, omanga vamwe hava pewa ombubo okudja koohandimwe ovo va hala oifendela yavo ile eefuto dimwe odo hava futu kepangelo di ninipikwe. Edingonoko lii la tya ngaho, ohali ningifa epangelo li londeke oifendela opo li shunife po osho la kanifa, naasho ohashi hapupalifa ashike oulingilingi. Monghalo ya tya ngaho, ovanashili ovo unene hava mono oixuna.

EKANDULEPO LOUPYAKADI: Ouhamba waKalunga ou na eenghono odo da dja kuKalunga Omunaenghono adishe, Jehova. * (Ehololo 11:15) Inau pumbwa okwoongela oifendela opo u dule okupangela. Ponhele yaasho, otau ka wanifa po filufilu eemhumbwe adishe dovapangelwa vao, molwaashi “eenghono [daKalunga]  odinene” noha yandje nopehe na okuliholamwene. — Jesaja 40:26; Epsalme 145:16.

OUPYAKADI: Susan Rose-Ackerman oo a popiwa moshitukulwa sha tetekela, okwa ti: “Opo oulingilingi u xulifwe po, ovanhu ove na okutamekela movapangeli.” Omapangelo ihaa kala e lineekelwa molwaashi nonande ohaa kendabala okuxulifa po oulingilingi oo u li movapolifi nomovanambelewa vopeengaba, ohave lipwililikile oo u li movanambelewa vopombada. Nokuli nonande omupangeli okukale ta pangele nawa, okwa fyuulula okuhawanenena. Ngaashi Ombibeli ya popya, “kombada yedu [kaku na] nande omunhu omuyuki, ou ha ningi ngeno ouwa auke.” — Omuudifi 7:20.

EKANDULEPO LOUPYAKADI: Mepingafano novanhu inava wanenena, Jesus Kristus, oo Kalunga a hoolola a ninge Omupangeli wOuhamba waye, iha dulu okuyelekwa a longe owii ile osho inashi yuka. Jesus okwa li e shi ulika eshi a li a anya okutambula ombubo ya denga mbada eshi a li ta pewa “omauhamba aeshe omounyuni nefimano lao.” Jesus okwa li a udanekelwa oinima aishe ei ngeenge okwa twile eengolo omupangeli wounyuni ou, Ondiaboli. (Mateus 4:8-10; Johannes 14:30) Nokuli naashi a li a hepekwa fiyo omefyo, okwa li a tokola toko okukanyatela oudiinini waye eshi a li a anya okunwa omaviinyu oo a li tae ke mu ningifa a kale ehe udite ouyahame nokukanifa elipangelo. (Mateus 27:34) Onghee hano, Jesus okwa li a ulika filufilu kutya okwa wana okupangela e li Ohamba, nopaife okwa nyumukila omwenyo womeulu oo a pewa kuKalunga. — Ovafilippi 2:8-11.

OUPYAKADI: Ovanhu moilongo ihapu ohava ningi omahoololo shi li onghedindjikilile. Osho ohashi va pe omhito opo va ku fe ko koipundi ovanambelewa ovo va nyonauka. Oushili oyou kutya, oikonga nomahoololo ohai kala ya kwatela mo oulingilingi nokuli nomoilongo oyo ya talika ko ya putuka. Okupitila mokuyambidida oikonga nosho yo eenghedi dikwao, ovakengeli ove li enwefemo la kula ngeenge tashi uya pwaavo ve li koipundi ile tava ka ya ko monakwiiwa.

Omupanguli John Paul Stevens wOmomhangu yOpombada ya-U.S, okwa ti enwefemo la tya ngaho ihali xutula ashike “ongushu yoveta yepangelo ndele ohashi ningifa yo ovakwashiwana vehe lineekele vali epangelo.” Onghee hano, itashi kumwifa eshi ovanhu vahapu va tala ko eengudu dopapolotika odo da nyonauka unene.

EKANDULEPO LOUPYAKADI: Ouhamba waKalunga otau ka xulifa po oukengeleledi oo hau kala poikonga yomahoololo, molwaashi otau ka kalelela nokupangela fiyo alushe. (Daniel 7:13, 14) Epangelo laKalunga inali likolelela komahoolola ovanhu noitava dulu oku li umba ko, shaashi Omupangeli wao okwa hoololwa kuKalunga. Molwaashi otau ka kalelela, osho tau ka wanifa po otashi ka etela ovanhu ouwa fiyo alushe.

OUPYAKADI: Ovanhu ohava diladila kutya okutota po eemhango dipe ohashi xwepopaleke eenghalo. Ndele ovanawino ova mona kutya okuninga ngaho ohashi hapupalifa eemhito dihapu dokulonga oulingilingi. Shimwe vali, eemhango dokondadalunde odo da nuninwa okuninipika oulingilingi luhapu ohadi pula oshimaliwa shihapu opo di tulwe moilonga, ashike ihadi kwafa sha.

EKANDULEPO LOUPYAKADI: Eemhango dOuhamba waKalunga odi dule kokule eemhango domapangelo opanhu. Pashihopaenenwa, ponhele yo ku yandja omusholondodo woinima oyo ovanhu ve na novehe na okuninga, Jesus okwa yandja efinamhango li na sha nanghee tu na okuungaunga navamwe. Okwa ti: “Keshe eshi mwa hala ovanhu ve mu ningile, osho va ningileni yo.” (Mateus 7:12) Shididilikwedi, eemhango dOuhamba ohadi tale komalinyengotomheno omunhu nokoilonga yaye. Jesus okwa ti yo: “Hola omukweni ngaashi ove u lihole mwene.” (Mateus 22:39) Onghee hano, Kalunga oo ha mono osho shi li momutima ota dulu shili okutula po eemhango odo. — 1 Samuel 16:7.

OUPYAKADI: Osho hashi linyengifa ovanhu va longe oulingilingi olwisho nokuliholamwene. Ovanambelewa vepangelo novakwashiwana luhapu ohava ulike omaukwatya mai a tya ngaho. Etungo olo la popiwa moshitukulwa sha dja ko la teka po moSeoul, oovene veetendela ova li va yandja ombubo kovanambelewa vepangelo. Ova li ve shii kutya ngeenge ova futu ombubo otashi ke va pula shinini ponhele yokulongifa oitungifo oyo ya kola nokutunga monghedi oyo i li pamufika.

Opo oulingilingi u xulifwe po, ovanhu ove na okuhongwa okududa mo okahalu kolwisho nokuliholamwene. Kakele kaasho, omapangelo opanhu kae na ehalo neenghono dokutula moilonga elongo la tya ngaho.

EKANDULEPO LOUPYAKADI: Ouhamba waKalunga otau kandula po osheetifi shoulingilingi mokuhonga ovanhu nghee tava dulu okufinda omaukwatya mai oo  haa etifa oulingilingi. * Ehongo la tya ngaho ola kwafela ovanhu va ‘shituke vape momhepo yomadiladilo avo.’ (Ovaefeso 4:23) Ponhele yokukala ovanalwisho nokuliholamwene ove li honga okukala va wanenwa nokukala ve na ko nasha navamwe. — Ovafilippi 2:4; 1 Timoteus 6:6.

OUPYAKADI: Nokuli novanhu vamwe ovo ve li momidingonoko diwa nova mona ehongo la denga mbada lopaenghedi, ohava ningi oulingilingi noihava kala ovanashili. Ovanawino ova dimina kutya olo olo etomheno molwaashi omapangelo opanhu ihaa dulu okuxulifa po oulingilingi. Osho omapangelo taa diladila okuninga po okuninipika ashike oulingilingi noilanduliko yao.

EKANDULEPO LOUPYAKADI: Ehangano li na sha nokukondjifa oulingilingi mOiwana yaHangana (United Nations Convention Against Corruption) ola popya kutya opo kukondjifwe oulingilingi, omapangelo oku na okuxumifa komesho oudiinini, ounashili noulineekelwa. Nonande oo omalalakano a denga mbada, Ouhamba waKalunga otau ningi shihapu shihe fi ashike okuxumifa komesho omaukwatya oo ndele ovapangelwa vao ova teelelwa va kale ve a na. Ombibeli oya ti ‘ovanalwisho’ “novanaipupulu” itava ka fyuulula Ouhamba waKalunga. — 1 Ovakorinto 6:9-11; Ehololo 21:8.

Ngaashi Ovakriste votete, ovanhu otava dulu okulihonga okukanyatela komifikamhango dopaenghedi da denga mbada. Pashihopaenenwa, eshi omuhongwa wedina Simon a li ta kendabala okulanda omhepo iyapuki kovayapostoli, ova li va anya okutambula ombubo nove mu lombwela va ti: “Lidilulula, u dje mo mowii ou woye.” Simon eshi a didilika omahalo a ye a puka, okwa li a lombwela ovayapostoli ve mu ilikanene opo a dule oku a finda. — Oilonga 8:18-24.

Ou na omhito yokukala omupangelwa wOuhamba waKalunga, kashi na nee mbudi kutya owa dja moshiwana shilipi. (Oilonga 10:34, 35) Ehongo olo hali yandjwa kOuhamba waKalunga mounyuni aushe otali ke ku ulikila nghee to dulu okuninga omupangelwa wOuhamba. Eendombwedi daJehova otadi ka kala da hafa oku ku ulikila nghee ekonakonombibeli lavo loshali lokoshivike hali ningwa, olo hali dulu okukwata efimbo linini nande ominute omulongo ashike. Kakele koinima ikwao, oto dulu okulihonga shihapu kombinga ‘yevangeli [onghundana iwa] lOuhamba waKalunga,’ nonghee Ouhamba tau ka xulifa po oulingilingi womapangelo. (Lukas 4:43) Ohatu ku shivi u kwatafane nEendombwedi daJehova domoshitukulwa sheni ile u tale ko-Web site yetu, o-jw.org