Mefimbo opo la di ko, metumwalaka limwe olo la li la shangwa kekafa lonhumba lomashiivifo olo la li la futilwa kongudu yaavo inava itavela muKalunga, omwa li mwa shangwa taku ti: “Onye ava mu udite kutya inamu pumbwa Kalunga? Ovanhu omamiliyona osho ve udite ngaho” kutya inava pumbwa Kalunga.

Kakele kaasho, ovanhu vahapu ovo hava ti kutya ova itavela muKalunga ohava ningi omatokolo oo taa ulike kutya okwa fa ehe ko. Salvatore Fisichella, omubishofi omukulunhu waKatolika, okwa lombwela oilyo yongeleka yavo a ti: “Okutala kufye kape na nande oumwe kunena ta dulu okudidilika kutya fye Ovakriste molwaashi onghedi yetu yokukalamwenyo oya faafana noyaavo vehe fi ovaitaveli.”

Vamwe kave na efimbo lokulipula kombinga yaKalunga. Ohave mu tale ko e li kokule unene navo noita dulu okudana onghandangala tai ti sha monghalamwenyo yavo. Ovanhu va tya ngaho ohava diladila ashike kombinga yaKalunga ngeenge ve li moupyakadi ile va pumbwa sha, onghee, ove mu tala ko ashike a fa omupiya wavo oo e li po oku va ningila osho va hala.

Vamwe ihava tula moilonga omahongo omalongelokalunga avo tashi dulika molwaashi kave shii ngeenge osha fimana kuvo. Pashihopaenenwa, eepersenda 76 dOvakatolika moNdowishi oda itavela kutya inashi puka omulumenhu nomukainhu va kale pamwe manga inava hombola, netaleko olo itali tu kumwe nomahongo ongeleka yavo nosho yo Ombibeli. (1 Ovakorinto 6:18; Ovaheberi 13:4) Oshoshili kutya, Ovakatolika havo aveke onghedi yavo yokukalamwenyo ihai kala metwokumwe nomahongo ongeleka yavo. Ovawiliki veengeleka dihapu ohava kala va nyemata molwaashi ovakwaneongalo vavo ohave lihumbata va fa inava itavela muKalunga.

Oihopaenenwa oyo oya etifa po epulo e li kutya: Mbela otwa pumbwa ngoo shili Kalunga? Kashi fi oshikando shotete taku lipulwa epulo olo. Ola li la holoka oshikando shotete momapandja opehovelo Ombibeli. Opo tu mone enyamukulo lepulo olo, natu ka yandjeni elitulemo koinima imwe oyo i li membo lOmbibeli laGenesis.