1. Moses okwa li a ulika ngahelipi kutya okwe lineekela muJehova, eshi a wilika Ovaisrael va dje mo muEgipiti?

 MOSES oku li umwe womwaavo va li ve na eitavelo, ovo va popiwa membo lOvaheberi. (Heb. 3:​2-5; 11:​23-25) Okwa li a ulika kutya oku na eitavelo, eshi a kwatela komesho Ovaisrael, opo va dje mo muEgipiti. Ka li a efa a tilifwe kuFarao nosho yo ketangakwaita laye. Molwaashi okwa li e lineekela muJehova, okwa li a kwatela komesho oshiwana, opo va taulule Efuta Litilyana nokuya mombuwa. (Heb. 11:​27-29) Ovaisrael vahapu ova li tave lipula ngeenge Jehova ota ka dula ngoo vali oku va fila oshisho, ashike Moses okwa twikila okulineekela muKalunga. Kalunga okwa li a pa Ovaisrael omeva nosho yo oikulya, opo va dule okukala nomwenyo mombuwa. a — Ex. 15:​22-25; Eps. 78:​23-25.

2. Mbela omolwashike Kalunga a pula Moses a ti: “Mbela eke laJehova olixupi unene”? (Numeri 11:​21-23)

² Nonande Moses okwa li e na eitavelo la kola, konima yomudo umwe lwaapo eshi Ovaisrael va xupifwa pashikumwifilonga, okwa li te lipula ngeenge Jehova ota dulu ngoo oku va pa ombelela, ngaashi a li e va udanekela. Osha li shidjuu kuMoses okwiitavela kutya Jehova ota ka yandja ombelela ya wana ovanhu omamiliyona, ovo va li va onga onhanda mombuwa. Jehova okwa li a pula Moses, a ti: “Mbela eke laJehova olixupi unene?” (Lesha Numeri 11:​21-23.) Outumbulilo “eke laJehova” otau ulike komhepo iyapuki yaKalunga, ile keenghono odo ha longifa, opo a wanife po ehalo laye. Noitya imwe, Jehova okwa li ta pula Moses, ta ti: ‘Mbela oto diladila kutya itandi dulu okuwanifa po osho nda udaneka?’

3. Omolwashike sha fimana okudiladila koshihopaenenwa sha Moses nOvaisrael?

³ Mbela owe lipulile ngoo nande onale, ngeenge Jehova ota dulu oku ku fila oshisho, ile okufila oshisho oukwaneumbo woye  palutu? Kashi na nee mbudi kutya owe lipulile ngaho, ile hasho, natu ka konakoneni oshihopaenenwa shaMoses nosho yo shOvaisrael, ovo vaha li ve na elineekelo muKalunga kutya ota dulu oku va fila oshisho. Ohatu ka tala yo kOmishangwa dimwe odo tadi ke tu kwafela tu kale tu na elineekelo kutya Jehova ote ke tu kwafela alushe.

LIHONGA KOSHIHOPAENEWA SHAMOSES NOSHOVAISRAEL

4. Omolwashike Ovaisrael vahapu va li tave lipula ngeenge Jehova ote ke va file ngoo oshisho?

⁴ Omolwashike Ovaisrael vahapu va li tave lipula ngeenge Jehova ote ke va file ngoo oshisho? Oshiwana shOvaisrael nosho yo “eemhunga dovanhu va lumbakana” ovo vehe fi Ovaisrael, ova li mombuwa oule wefimbo, eshi va li tava ende okudja kuEgipiti va finda kEdu lEudaneko. (Ex. 12:38; Deut. 8:15) Ovo vehe fi Ovaisrael ova li va loloka okulya omanna, onghee Ovaisrael vahapu navo ova li ve va waimina, ndele tava ngongotele Moses. (Num. 11:​4-6) Ovanhu ovo ova li va hovela okukala va hala oikulya oyo va li hava li muEgipiti. Molwaashi ova li tava ngongotele Moses, okwa li ta diladila kutya oye a li e na oku ke va kongela ombelela, noka li e shi kutya ote ke i hanga peni. — Num. 11:​13, 14.

5-6. Oshike hatu dulu okulihonga kunghee ovo vehe fi Ovaisrael va li va nwefa mo Ovaisrael vahapu?

⁵ Ovo vehe fi Ovaisrael kava li ve na olupandu laasho Jehova a li e va pa, nOvaisrael ova li va hovela okudiladila ngaashi vo. Ovanhu ovo ve tu dingilila otava dulu oku tu nwefwa mo, molwaashi kave na olupandu, ndele nafye hatu kala tuhe na olupandu laasho Jehova e tu pa. Ohatu dulu okukala twa djuulukwa oinima oyo twa li tu na nale, ile tu hovele okutwila vamwe ondubo omolwoinima oyo ve na. Ashike ngeenge otwa kala twa wanenwa kwaasho tu na, ohatu ka kala twa hafa, kashi na nee mbudi kutya otu na shi fike peni.

⁶ Ovaisrael ova li ve na okudimbuluka kutya Kalunga okwe va udanekela kutya otava ka hafela oinima ihapu iwa, ngeenge ova fiki kEdu lEudaneko. Eudaneko olo ola li tali ka wanifwa eshi ve li mEdu lEudaneko, ndele hasheeshi tava ende mombuwa. Sha faafana, ponhele yokukala hatu yandje elitulemo kwaasho tuhe na mounyuni ou, otwa pumbwa okukala hatu diladila kombinga yaasho Jehova e tu udanekela mounyuni mupe. Ohatu dulu yo okudilonga komishangwa odo tadi dulu oku tu kwafela, opo tu kale twe lineekela muJehova.

7. Omolwashike hatu dulu okukala noushili kutya Jehova ota dulu oku tu kwafela alushe?

⁷ Natango, otashi dulika u lipule kutya omolwashike Jehova a pula Moses a ti: “Mbela eke laJehova olixupi unene?” Eshi Jehova a pula Moses epulo olo, okwa li a hala Moses a diladile kombinga yoinima ivali; kutya oku li Omunaenghono adishe nosho yo kutya ota dulu okulongifa eenghono daye keshe pamwe. Nonande Ovaisrael ova li ve li mombuwa, Kalunga okwa li ta dulu oku va pa ombelela ya wana. Xuuninwa, Ovaisrael ova ka mona oushili weendjovo odo David a shanga konima yomido dihapu, odo tadi ti: “Oto nanene eke loye. . . Eke loye lokolulyo otali xupifa nge.” (Eps. 138:​6, 7) Onghee ngeenge hatu piti momashongo, ohatu dulu okukala noushili kutya Jehova ota dulu okukwafela keshe umwe womufye kashi na nee mbudi kutya otu li peni.

8. Oshike tashi dulu oku tu kwafela, opo tuha ninge epuko la faafana naalo la li la ningwa kwaavo va li mombuwa? (Tala yo efano.)

⁸ Jehova okwa li a wanifa po eudaneko laye, nokwa li e va pa oudila voimote vahapu. Ashike Ovaisrael kava li va pandula Kalunga omolwoshikumwifilonga osho. Ponhele yaasho, vahapu ova li va kwatwa kolwisho. Ova kala tava ongele oudila voimote oule wefiku netata. Jehova okwa li a handukila neenghono “ovo va li va halelela oikulya omolwokulihola mwene,” nokwa li e va pa ehandukilo. (Num. 11:​31-34) Ohatu dulu  okulihonga koshihopaenenwa shavo. Otwa pumbwa okulungama tuha kwatwe kolwisho. Kashi na nee mbudi kutya otu li oipuna, ile otu li ovafyoona, otwa pumbwa okuyandja tete elitulemo kokuliongelela “omamona meulu,” hatu shi ningi mokukulika ekwatafano letu naJehova nosho yo naJesus. (Mat. 6:​19, 20; Luk. 16:9) Ngeenge otwa ningi ngaho, ohatu dulu okukala noushili kutya Jehova ote ke tu fila oshisho.

9. Elineekelo lilipi hatu dulu okukala tu na?

⁹ Jehova okwe lilongekida okufila oshisho oshiwana shaye nokunena. Ndele osho itashi ti kutya ohatu ka kala alushe tu na oikulya, ile oimaliwa ya wana. b Ashike ohatu dulu okukala tu na elineekelo kutya Jehova ote ke tu fila alushe oshisho. Ote ke tu pa alushe ekwafo olo twa pumbwa, kashi na nee mbudi kutya ohatu piti meenghalo da tya ngahelipi. Ongahelipi hatu dulu okuulika kutya otu na elineekelo kutya Jehova ote ke tu fila oshisho? Natu ka kundafaneni eenghalo dopavali: (1) ngeenge twa pumbwa oimaliwa, opo tu file oshisho oukwaneumbo wetu nosho yo (2) ngeenge hatu diladila kunghee hatu ke lifila oshisho, ngeenge twa kulupa.

NGEENGE TWA PUMBWA OSHIMALIWA

10. Oupyakadi wopashimaliwa ulipi tashi dulika tu ka taalele?

¹⁰ Eshi ounyuni ou tau ende wa yuka pexulilo, otwa teelela ouxupilo u kale tau kande omapunya. Otashi dulika oinima ngaashi opolotika, oita, oiponga yopaushitwe, ile omikifi dekomba, i tu ningife tu longife oimaliwa ihapu inatu shi  teelela, ile tu kanife oilonga yetu, oiniwe yetu, ile nokuli omaumbo etu. Otashi dulika twa pumbwa okukonga oilonga moshitukulwa shetu, ile tu tembukile koshitukulwa shimwe noukwaneumbo wetu, opo tu dule oku u fila oshisho. Oshike tashi dulu oku tu kwafela, opo tu ninge omatokolo oo taa ulike kutya otwe lineekela muJehova?

11. Oshike tashi dulu oku ku kwafela, opo u ungaunge noupyakadi wopashimaliwa? (Lukas 12:​29-31)

¹¹ Oshinima osho tashi dulu oku ku kwafela, okwiilikana kuJehova to mu lombwele kombinga yaasho to lipula nasho. (Omayel. 16:3) Mu pula e ku pe ounongo oo wa pumbwa, opo u dule okuninga omatokolo oo e li mondjila nou kale wa ngungumana, opo u henuke okukala u na “oshisho sha pitilila.” (Lesha Lukas 12:​29-31.) Kala to mu pula e ku kwafele, opo u kale wa wanenwa kwaasho u na. (1 Tim. 6:​7, 8) Ninga omapekapeko moishangomwa yetu kombinga yanghee to dulu okuungaunga noupyakadi wopashimaliwa. Vahapu ova mona ouwa mouvidio nosho yo moitukulwa oyo i li ko-jw.org, tai popi kombinga yokuungaunga nomauxupilo taa kande omapunya.

12. Mbela omapulo elipi Omukriste ta dulu okulipula, opo a ninge etokolo olo tali dulu okweetela oukwaneumbo waye ouwa?

¹² Vamwe ova li va tambula ko oilonga oyo tai va pula va kale hava di kokule noukwaneumbo wavo, ashike vahapu ova ka didilika kutya etokolo olo va ninga ka li li pandunge. Ofimbo ino tambula ko oilonga, ponhele ashike yokudiladila kombinga yoimaliwa oyo to ka futwa, owa pumbwa yo okudiladila kunghee tai ka kuma oupamhepo woye nosho yo woukwaneumbo woye. (Luk. 14:28) Lipula kutya: ‘Mbela otashi ka kuma ngahelipi ohombo yange, ngeenge onda kala handi di kokule nakaume kange kopahombo? Mbela ohandi ka dula ngoo okukala handi i kokwoongala pandjikilile, okuya moukalele nosho yo okweendafana novamwatate novamwameme?’ Ngeenge ou na ounona, owa pumbwa yo okulipula epulo eli la fimana kutya: ‘Ohandi ka dula ngahelipi okutekula ounona vange “noku va deula metwokumwe newiliko laJehova,” ngeenge ihandi di pamwe navo?’ (Ef. 6:4) Ngeenge to ningi omatokolo, shikula osho Jehova ta ti, ndele hasheeshi ovapambele, ile ookaume koye ovo ihava dulika komifikamhango dOmbiibeli tava ti. c Tony, oo ha di kuAsia lokouninginino, okwa li a mona oilonga oyo ya li tai mu pula a ka longele koshilongo shimwe nokwa li ta ka futwa ondjabi ya kola. Ashike konima eshi Tony a ilikana kombinga yaasho, nokukundafana nomukulukadi waye, okwa li a tokola aha tambule ko oilonga oyo, nokwa li a diladila kombinga yanghee tava dulu okukaleka onghalamwenyo yavo paunafangwa, opo vaha longife oimaliwa ihapu. Tony okwa ti: “Onda li nda mona oufembanghenda wokukwafela ovanhu va dule okushiiva Jehova, nounona vetu ove na ouladi wokulongela Jehova. Oukwaneumbo wetu owa li we lihonga kutya, ngeenge otwa tula moilonga eendjovo odo tadi hangwa muMateus 6:​33, Jehova ote ke tu fila oshisho.”

NGEENGE HATU LIPULA KOMBINGA YANGHEE HATU KE LIFILA OSHISHO, NGEENGE TWA KULUPA

13. Mbela oshike hatu dulu okuninga paife, opo tu dule oku ke lifila oshisho ngeenge twa kulupa?

¹³ Elineekelo letu muJehova otali dulu yo okuyelekwa, ngeenge hatu diladila kombinga yanghee hatu ke lifila oshisho shimha twa kulupa. Ombiibeli otai tu ladipike tu longe noudiinini, opo tu dule oku ke lifila oshisho ngeenge twa kulupa. (Omayel. 6:​6-11) Ngeenge otashi shiiva, oshi li pandunge okutuvikila oimaliwa, opo u ke i longife shimha wa kulupa. Oshoshili kutya oimaliwa otai dulu oku tu kwafela. (Omuud. 7:12) Ashike, otwa pumbwa okuhenuka okupitifa komesho oimaliwa monghalamwenyo yetu.

14. Ovaheberi 13:5 otave tu kwafele ngahelipi, opo tuha kale hatu lipula unene shi na sha nanghee hatu ke lifila oshisho ngeenge twa kulupa?

 ¹⁴ Jesus okwa li a yandja efaneko, opo a ulike kutya omunhu oo he lituvikilile ashike emona loimaliwa, ndele ihe lituvikilile ‘emona puKalunga,’ elai. (Luk. 12:​16-21) Kape na oo e shii osho tashi ka ningwa mefiku lomongula. (Omayel. 23:​4, 5; Jak. 4:​13-15) Jesus okwa popya kutya keshe oo a hala okuninga omushikuli waye oku na okukala e lilongekida ‘okufiya po oinima yaye aishe.’ (Luk. 14:33) Osho osha li sha ningilwa Ovakriste vomuJuda vopefimbo lovayapostoli. Ova li ve lilongekida okufiya po ashishe osho va li ve na. (Heb. 10:34) Kunena, ovamwatate vahapu ova kanifa oilonga yavo, molwaashi va anya okukufa ombinga moinima yopapolotika. (Eh. 13:​16, 17) Oshike she va kwafela, opo ova ninge ngaho? Ova kala ve na elineekelo meudaneko laJehova, olo tali ti: “Itandi ku efa noitandi ku fiye po.” (Lesha Ovaheberi 13:5.) Onghee ohatu ningi ngaashi hatu dulu paife, opo tu dule oku ke lifila oshisho ngeenge twa kulupa, notu na elineekelo kutya Jehova ote ke tu kwafela, ngeenge opa holoka eenghalo odo twa li inatu teelela.

15. Ovadali Ovakriste ove na okukala ve na etaleko li li pandjele lilipi li na sha novana vavo? (Tala yo efano.)

¹⁵ Momaputuko amwe, ovanhu ohava kala va  hala okukala ve na ounona, opo ounona va dule oku ke va kwafela pashimaliwa ngeenge va kulupa. Ndele Ombiibeli oya popya kutya ovadali ovo ve na okufila oshisho ovana vavo. (2 Kor. 12:14) Oshoshili kutya eshi ovadali tava ende tava kulupa, otashi dulika va pumbwa okuyambididwa. Ounona vahapu ohava kwafele ovadali vavo nehalo liwa. (1 Tim. 5:4) Ashike ovadali Ovakriste ove shii kutya ehafo lavo lashili, ihali di mokutekula ounona nelalakano loku ka kwafelwa kuvo pashimaliwa ngeenge va kulupa, ndele ohali di mokukwafela ovana vavo va ninge ovapiya vaJehova. — 3 Joh. 4.

16. Ongahelipi ovadali tava dulu okulongekida ovana vavo, opo va dule oku ke lifila oshisho pashimaliwa ngeenge va kulu? (Ovaefeso 4:28)

¹⁶ Eshi to kwafele ovana voye ve lihonge nghee tava ka dula okulifila oshisho, va ulikila kutya owe lineekela muJehova. Okudja ashike eshi vanini, va ulikila kutya osha fimana okulonga noudiinini. (Omayel. 29:21; lesha Ovaefeso 4:28.) Eshi tava ende tava kulu, va kwafela va kale hava pondola moilonga yavo yofikola. Ovadali ove na okukala ve na elalakano lokukwafela ovana vavo, opo va ka dule okuwanifa po eemhumbwe davo nova ka kale ve na efimbo lokuudifa, ile okukokola ondjila.

17. Ohatu dulu okukala tu na oushili ulipi?

¹⁷ Ovapiya vaJehova ovadiinini otava dulu okukala noushili kutya Jehova ota dulu nokwa halelela oku va fila oshisho. Eshi ounyuni ou tau ende wa yuka pexulilo, otwa pumbwa okulineekela muJehova shi dulife nale. Kashi na nee mbudi kutya oshike tashi ka ningwa po, otwa hala okukala tu na elineekelo kutya Jehova ota ka longifa eenghono daye, opo e tu file oshisho painiwe. Ohatu dulu okukala noushili kutya Jehova ota ka nana eke laye nosho yo eke laye lokolulyo otali ke tu kwafela.