1-3. Omolwashike Paulus a li a tomhwa kutya ota dulu okulineekela muJehova? (Tala efano pehovelo loshitukulwa.)

NGENO owa li Omukriste muRoma mefelemudo lotete, ngeno owa pita meenghalo didjuu neenghono. Ovakriste pefimbo olo ova li hava hepekwa monghedi inyanyalifi kOvaroma. Ovaroma ova li va pa oushima Ovakriste kutya ovo va li va etifa omundilo oo wa xwika po oshilando shaRoma nove va lundila kutya ove tonde ovanhu. Ovakriste vahapu ova li va mangwa po. Vamwe ova li va ekelwa koinamwenyo va like po. Vamwe ova li va valelwa koiti nokuxwikwa po ve na omwenyo, va ningwa eenyika dokuminikila momilaulu. Onghee hano, efiku keshe ngeno otashi dulika wa li wa teelela u ningilwe imwe yomoinima oyo.

² Omuyapostoli Paulus okwa li a tulwa modolongo pefimbo olo la li lidjuu neenghono. Pomhito opo otashi dulika Paulus a li te lipula ngeenge ovamwaxe Ovakriste ova li ngoo tave ke mu kwafela molwaashi okwa li a dimbuluka eshi a li monghalo yonhumba ndele kapa li oo e mu kwafela. Ashike okwa li a kwafelwa kuJehova okupitila mOmwene Jesus. Okwa shanga a ti: “Omwene okwa kala pamwe naame, nokwa pameka nge.” Jesus okwa li a pa  Paulus eenghono odo a li a pumbwa. Paulus okwa shanga nokuli kutya okwa “xupifwa mokanya konghoshi.” — 2 Timoteus 4:16, 17. * (Tala eshangelo lopedu.)

³ Paulus okwa li a dimbuluka nghee Jehova a li e mu kwafela monakudiwa. Onghee hano, okwa li a tomhwa kutya Jehova ote ke mu pa eenghono odo a pumbwa opo e lididimikile onghalo oyo a li muyo pefimbo opo nosho yo eyeleko keshe olo ta ka shakeneka monakwiiwa. Okwa li e na oushili waasho, nomolwaasho a shanga a ti: ‘Omwene ota ka mangulula nge mo mukeshe tuu oshilonga showii.’ (2 Timoteus 4:18) Paulus okwa li e lihonga kutya nokuli nomeenghalo omo ovamwaxe itava dula oku mu kwafela, okwa li ha kala alushe e na elineekelo kutya Jehova naJesus otave ke mu kwafela. Ka li e na omalimbililo nandenande.

4, 5. (a) Olyelye ta dulu oku ku pa alushe ekwafo olo wa pumbwa? (b) Ongahelipi to dulu okupameka ekwatafano loye naJehova?

⁴ Mbela owa shakeneka ngoo nale oupyakadi wa kwata moiti, wa li u udite wa wililwa po nokape na oo te ku kwafele? Otashi dulika wa kanifa oilonga ile wa taalela omafininiko kofikola. Otashi dulika wa li to yahama neenghono ile wa li wa taalela eyeleko limwe vali la kwata moiti. Otashi dulika wa li wa pula vamwe ve ku kwafele, ashike owa li wa nyemata molwaashi kava li ve ku pa ekwafo olo wa pumbwa. Oshoshili kutya omaupyakadi amwe itaa dulu okukandulwa po kovanhu. Ndele mbela oshike to dulu okuninga po? Ombibeli oye tu lombwela tu ‘lineekele Omwene.’ (Omayeletumbulo 3:5, 6) Ndele mbela oto dulu ngoo okukala noushili kutya ote ke ku kwafela? Heeno! Ohatu dulu okulesha oihopaenenwa ihapu mOmbibeli oyo tai tu tomho kutya Jehova oha kwafele lela oshiwana shaye.

⁵ Ino kala wa nyemata ngeenge ovanhu inave ku pa ekwafo olo wa pumbwa. Ndele ponhele yaasho, dimbuluka kutya eyeleko otali ku pe omhito u kale we lineekela muJehova filufilu ngaashi Paulus. Otali ku pe yo omhito u mone nghee Jehova te ku file oshisho monghalamwenyo yoye. Elineekelo loye muJehova nekwatafano loye naye otali ka kala la pama.

6. Omolwashike tashi dulika shiha kale shipu okulineekela muJehova ngeenge tu na oupyakadi wa kwata moiti?

⁶ Otashi dulika u kale u na oupyakadi wa kwata moiti oo we ku nyemateka. Owa ninga keshe osho to dulu shi na sha nonghalo oyo, nowa ilikana kuJehova e ku kwafele. Mbela paife oto dulu okukala u udite wa pepelelwa molwaashi ou na elineekelo kutya Jehova ote ke ku kwafela? Heeno, oto dulu. (Lesha Epsalme 62:9; 1 Petrus 5:7.) Ngeenge owa hala okukala u na ekwatafano liwa naJehova, osha fimana okulihonga oku mu lineekela. Ashike haalushe hashi kala shipu okuninga ngaho. Omolwashike mbela? Etomheno limwe ololo kutya Jehova otashi dulika aha nyamukule eilikano loye pefimbo opo. — Epsalme 13:2, 3; 74:10; 89:47; 90:13; Habakuk 1:2.

7. Omolwashike Jehova iha nyamukula alushe omailikano etu pefimbo opo?

⁷ Omolwashike Jehova iha nyamukula alushe  omailikano etu pefimbo opo? Ombibeli oya ti kutya Jehova oTate nafye otu li ovana vaye. (Epsalme 103:13) Xe omudali iha pe omona keshe osho ta pula ile e shi mu pe pefimbo opo. Oha kala e shii kutya okaana otashi dulika ka hala ashike oshinima osho pefimbo opo ndele lwanima ina ke shi hala vali. Xe omudali oha kala yo e shii kutya oshike sha denga mbada komona, noku shii nghee tashi dulika shi kume vamwe. Oku shii osho omona a pumbwa nonokutya onaini e na oku shi pewa. Ngeenge xe omudali oha pe omona keshe osho ta pula nopefimbo opo e shi pula, omudali a tya ngaho ota ka kala omupiya womona. Jehova, Tate yetu womeulu, oku tu hole. E li Omushiti wetu omunaendunge, oku shii osho twa pumbwa, noha tale kutya efimbo lilipi liwa oku tu pa osho hatu mu indile. Onghee hano, oshiwa kufye okuteelela nokutala nghee Jehova ta nyamukula omailikano etu. — Yelekanifa naJesaja 29:16; 45:9.

8. Jehova okwe tu udanekela shike shi na sha momaupyakadi oo itatu dulu vali okulididimikila?

⁸ Dimbuluka yo kutya Jehova oku shii kutya omunhu keshe ota dulu okulididimikila shike naasho ita dulu okulididimikila. (Epsalme 103:14) Onghee hano, ohe tu pe eenghono odo twa pumbwa. Oshoshili kutya omafimbo amwe ohatu kala tu udite kutya itatu dulu vali okupula komesho. Ashike Jehova okwe tu udanekela kutya ngeenge eyeleko itatu dulu vali oku li lididimikila, ote ke tu pa “omhito yokupita mo.” (Lesha 1 Ovakorinto 10:13.) Otashi hekeleke okushiiva kutya ohatu dulu okukala nelineekelo kutya Jehova oku shii kutya ohatu dulu okulididimika fiyo oposhitwa shilipi.

9. Oshike tu na okuninga ngeenge otwa ilikana Jehova e tu kwafele, ndele ine tu nyamukula pefimbo opo?

⁹ Ngeenge otwa ilikana kuJehova e tu kwafele, ndele ine tu nyamukula pefimbo opo, natu kale twa teelela nelididimiko. Dimbuluka kutya Jehova okwa halelela oku tu kwafela, ashike oha teelele nelididimiko efimbo la wapala opo e tu pe osho twa pumbwa. Ombibeli oye tu lombwela ya ti: “Omwene ota teelele a shiive oku mu fila onghenda, opo nee ota fikama e mu file olukeno, osheshi Omwene Oye Kalunga kouyuki. Ovanelao aveshe ava have mu teelele!” — Jesaja 30:18.

10-12. (a) Oshike tashi dulika shi shi ninge shidjuu okufila oshisho oshilyo shoukwaneumbo osho tashi vele? (b) Ngeenge owa kala we lineekela muJehova pomafimbo madjuu, otashi ka kuma ngahelipi ekwatafano loye naye? Yandja oshihopaenenwa.

¹⁰ Onghalo otashi dulika i kale idjuu neenghono, notashi dulika u kale u udite ngaashi Paulus oo a li a pumbwa okuxupifwa ‘mokanya konghoshi.’ (2 Timoteus 4:17) Pomafimbo a tya ngaho, osha fimanenena okulineekela muJehova. Pashihopaenenwa, otashi dulika to file oshisho oshilyo shoukwaneumbo weni osho tashi vele. Owa ilikana kuJehova e ku kwafele u ninge omatokolo e li pandunge nou kale wa pama. * (Tala eshangelo lopedu.) Oto dulu okukala u na ombili yokomutima ngeenge owa dimbuluka kutya Jehova oku ku wete noku ku udite ko nosho yo onghalo yoye. Ote  ke ku kwafela u lididimike nou kale omudiinini kuye. — Epsalme 32:8.

¹¹ Omafimbo amwe otashi dulika u kale u wete Jehova a fa ite ku kwafele. Otashi dulika eendokotola inadi hala okudimina okuninga osho shi na okuningwa po. Ile wa li wa teelela ovapambele voye ve ku hekeleke, ndele ponhele yaasho ova fa va li tava naipike oinima. Alushe kala we lineekela muJehova e ku pe eenghono. Kala nokweehena popepi naye. (Lesha 1 Samuel 30:3, 6.) Opo nee lwanima ngeenge owa didilike nghee Jehova e ku kwafela, ekwatafano loye naye otali ka kala la pama.

¹² Osho osho Linda a li e udite. * (Tala eshangelo lopedu.) Okwa kala ta file oshisho ovadali vaye ovo va kala tava vele oule wefimbo lile fiyo osheshi va fya. Okwa ti: “Fimbo twa li monghalo oyo, ame, omushamane wange nomumwamememati, luhapu otwa li hatu lihange tuhe shii kutya natu ninge po shike. Ndele paife ngeenge hatu diladila konghalo oyo, otu wete filufilu nghee Jehova a li pamwe nafye. Okwe tu pameka noku tu pa osho twa pumbwa, nokuli nongeenge twa li twa fa tuhe shii kutya natu ninge po shike.”

13. Ongahelipi okulineekela muJehova kwa kwafela Rhonda e lididimikile omaupyakadi a shikulafana oo a li a taalela?

¹³ Okulineekela muJehova filufilu otaku ke tu kwafela tu lididimikile nokuli nomaupyakadi oo a kwata moiti. Osho osho Rhonda a li a ninga. Omushamane waye, oo ehe fi Ondombwedi yaJehova, okwe mu henga po. Pefimbo opo tu opo, omumwainamati okwa li a monika omukifi wa kwata moiti oo hau ningifa ovakwaita volutu va kale tava lwifafana, hau ifanwa lupus. Opo nee konima yeemwedi dinini, omukulukadi womumwainamati okwa fya. Eshi Rhonda a hovela okukala a fa ta pepelelwa omolwoiningwanima oyo tai yahameke, okwa li a ninga omukokolindjila wondjikilile. Ndele lwanima ina okwa ka fya. Ongahelipi Rhonda a li a dula okulididimikila omaupyakadi aeshe oo? Okwa ti: “Ohandi popi naJehova efiku keshe, nokuli nongeenge handi ningi omatokolo moinima inini. Okuninga ngaho okwa kwafela nge opo Jehova a kale omunhu wolela kwaame. Onde lihonga yo okukala nde mu lineekela, ponhele yokukala nde lineekela mwaame mwene ile nokuli muvamwe. Ekwafo olo a li a pa nge ololela; eemhumbwe dange adishe oda li da filwa oshisho. Oshidjemo, ondi wete kutya onda longa pamwe naJehova epepe nepepe.”

14. Ongahelipi Jehova ta dulu oku ku kwafela ngeenge oshilyo shoukwaneumbo weni sha kondwa?

¹⁴ Diladila vali konghalo imwe idjuu. Natu tye nee ngeno umwe moukwaneumbo weni okwa kondwa. Ou shii kutya Ombibeli oya popya shike shi na sha nanghee u na okuungaunga nomunhu oo a kondwa. (1 Ovakorinto 5:11; 2 Johannes 10) Ndele molwaashi ou hole omunhu a tya ngaho, otashi dulika u kale u udite kutya oshidjuu neenghono ile nokuli itashi shiiva okudulika koshipango osho shOmbibeli. Mbela oto ka kala ngoo u na elineekelo kutya Xo womeulu ote ke ku pa eenghono u dulike nou kale omudiinini? Mbela oto  ka tala ko ngoo onghalo oyo i li omhito yokweehena popepi elela naJehova?

15. Omolwashike Adam ina dulika kuJehova?

¹⁵ Ongahelipi onghalo oyo tai dulu okufaafanifwa nonghalo yomulumenhu wotete, Adam? Mbela Adam okwa li ta diladila kutya ota dulu okukala ina dulika kuJehova, ndele ta twikile okukala nomwenyo? Ahowe, Adam “ina pukifwa.” (1 Timoteus 2:14) Ndele omolwashike ina dulika kuJehova? Adam okwa lya oshiimati osho a pewa komukulukadi waye molwaashi okwa li e mu hole shi dulife Jehova. Okwa li a pwilikina komukulukadi waye ponhele yokudulika koshipango shaJehova. — Genesis 3:6, 17.

16. Olyelye tu na okukala tu hole neenghono, nomolwashike?

¹⁶ Etokolo laAdam otali tu hongo kutya otu na okukala tu hole Jehova shi dulife omunhu keshe. (Lesha Mateus 22:37, 38.) Ngeenge otu hole Jehova nohole ya xwama, ohatu ka kwafela ovapambele vetu monghedi ya denga mbada, kutya nee ovovo tava longele Jehova ile ovovo itave mu longele. Onghee hano, kala to pameke ohole yoye yokuhola Jehova nelineekelo loye muye. Ngeenge oto lipula kombinga yoshilyo shoukwaneumbo weni osho sha kondwa, ilikana kuJehova noku mu lombwela omaliudo oye aeshe. * (Tala eshangelo lopedu.) (Ovaroma 12:12; Ovafilippi 4:6, 7) Nonande oto mono oixuna neenghono, tala ko onghalo oyo i li omhito yokupameka ekwatafano loye naJehova. Opo nee oto ka dula oku  mu lineekela nokukala u shii kutya okudulika kuye otaku ka eta oidjemo iwa.

17. Ngeenge otwa kala twe lipyakidila moilonga yokuudifa, elineekelo lilipi hatu dulu okukala tu na shi na sha naasho Jehova ta ka ninga?

¹⁷ Omolwashike Jehova a li a xupifa Paulus ‘mokanya konghoshi’? Paulus okwa ti: “Eudifo levangeli opo li wanifwe kuame.” (2 Timoteus 4:17) Jehova okwe tu pa yo oshilonga shokuudifa “evangeli,” nokwa ti kutya otu li “ovalongi pamwe” naye. (1 Ovatessaloniki 2:4; 1 Ovakorinto 3:9) Ngeenge otwa kala twe lipyakidila moilonga oyo ngaashi hatu dulu, ohatu ka kala nelineekelo kutya Jehova ote ke tu pa keshe osho twa pumbwa. (Mateus 6:33) Nokungaho otashi ka kala shipu kufye okuteelela Jehova a nyamukule omailikano etu.

18. Ongahelipi to dulu okukala we lineekela muJehova nokupameka ekwatafano loye naye?

¹⁸ Pameka ekwatafano loye naJehova efiku keshe. Ngeenge owa hangwa keyeleko nokukwatwa koshisho, longifa omhito oyo u ehene popepi elela naJehova. Lesha, konakona nokudilonga kEendjovo daKalunga, Ombibeli. Kala nokwiilikana kuJehova nokutwikila okukala we lipyakidila to mu longele. Ngeenge owa ningi ngaho, oto dulu okukala nelineekelo kutya Jehova ote ke ku kwafela u lididimikile eyeleko keshe paife nosho yo oo tae ke ku hanga monakwiiwa.