Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Odjona yOpaasa oya li i na okudipawa efimbo peni mo 14 Nisan?

Omatoloko amwe Eembibeli okwa ti kutya oya li ina okudipawa “pokati keenguloshi mbali,” sha hala okutya, eshi etango la ningina ndele ouyelele wetango ou liwetikile ngoo natango. (Ex. 12:6)—12/15, epandja 18-19.

Omafinamhango elipi ovanyasha tava dulu okulongifa opo va ninge omatokolo e li mondjila?

Atatu omuo oo aa: (1) Kongeni tete Ouhamba waKalunga nouyuki waye. (Mat. 6:19-34) (2) Mona ehafo olo hali di mokuyakula vamwe. (Oil. 20:35) (3) Hafela okulongela Jehova fimbo u li omunyasha. (Omuud. 12:1)—1/15, epandja 19-20.

“Ehombolo lOdjona” otali ka ningwa naini? (Eh. 19:7)

“Ehombolo lOdjona” otali ka ningwa konima eshi Ohamba, Jesus Kristus ya findana molwoodi layo, mokuhanauna po Babilon Shinene nokonima eshi oita yaHarmagedon ya luwa. —2/15, epandja 10.

Omolwashike Ovajuda vopefimbo laJesus va li va “teelela” Messias? (Luk. 3:15)

Itatu dulu okushilipaleka kutya Ovajuda vomefelemudo lotete ova li ve udite ko exunganeko laDaniel li na sha naMessias ngaashi tu li udite ko kunena. (Dan. 9:24-27) Ashike otashi dulika va li va uda eshiivifo lomweengeli eshi a li ta shiivifile ovafita voimuna vonhumba ile osho omuprofeti omukainhu Anna a ti eshi a mona okaana Jesus kotembeli. Shikwao vali, ovanongo vokoushilo ova li ve uya tava kongo “Ohamba yOvajuda, ya dalwa.” (Mat. 2:1, 2) Lwanima, Johannes Omuninginifi okwa li a ulika kutya Kristus ota ka holoka diva. —2/15, epandja 26-27.

Ongahelipi hatu dulu okuhenuka okukaleka eendjovo detu heeno na ahowe? (2 Kor. 1:18)

Omafimbo amwe oha pa holoka eenghalo odo itatu dulu okuninga po sha shi na sha nado, naasho ohashi shi ningifa shidjuu okuwanifa po osho twa udaneka. Ashike ngeenge otwa ningi eudaneko, natu ningeni keshe osho hatu dulu opo tu li wanife po. —3/15, epandja 32.

Ongahelipi hatu dulu okufinda eyeleko lokutala omafano oipala?

Ope na eenghatu nhatu odo tadi tu kwafele (1) Ngeenge otwa mono ombadilila omafano oipala, natu alule ko diva omesho etu. (2) Natu amene omadiladilo etu mokuyandja elitulemo koinima oyo ya yuka nokwiilikana kuKalunga. (3) Natu lungamene eenghatu detu mokuhenuka okutala eefilima ile okuya komapandja okointaneta oko ku na omafano oipala. —4/1, epandja 10-12.

Oilanduliko inai teelelwa ilipi tashi dulika i holoke po ngeenge Omukriste okwa fiye po oukwaneumbo wavo opo a ka longe oshimaliwa kondje yoshilongo?

Ngeenge ovadali ova hoolola vaha kale pamwe ve li oukwaneumbo, ovana vavo otashi dulika va kale va wililwa po pamaliudo nohashi kumu eenghedi davo. Otashi dulika va kale va handukila ovadali vavo. Novalihomboli ngeenge ove likala kokule otashi dulika va hangwe komayeleko okuya momilele kondje yohombo. —4/15, epandja 19-20.

Omapulo ane elipi tu na okukaleka momadiladilo ngeenge hatu kundafana novanhu moukalele?

Oolyelye handi udifile? Openi handi va hange? Onaini shi li efimbo liwa okuya kovanhu? Ondi na okupopya navo ngahelipi?—5/15, epandja 12-15.