Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Onaini Jesus a li a udifila ‘eemhepo odo di li modolongo’? (1 Pet. 3:19)

Otashi ulike kutya Jesus okwa li a udifila oishitwa yopamhepo ikolokoshi pefimbo lonhumba konima yenyumuko laye shi na sha netokolo li li pauyuki olo li li poku i hanga.—6/15, epandja 23.

Omashongo opatatu elipi mu na okukondjifa opo ohombo yeni onhivali i pondole?

Okukendabala uha ete oinima yohombo yotete mwaayo i li po paife; okukendabala okukala nekwatafano nookaume koye vakulu ovo kaume koye kopahombo mupe ehe shii; okukendabala okulineekela kaume kopahombo mupe nonande kaume kopahombo mukulu ka li omudiinini.—9/1, epandja 10-12.

Onaini Jesus ta ka tokola ovanhu ve li ngaashi eedi ile oikombo? (Mat. 25:32)

Jesus ota ka tokola ovanhu vomoiwana aishe ve li eedi ile oikombo eshi te ke uya poudjuu munene konima yokuhanaunwa po kwomalongelokalunga oipupulu.—7/15, epandja 6.

Onaini ovo hava nyono ouyuki ovo va popiwa meyele li na sha noilya neu tava ka lila nokulikwesha komayoo? (Mat. 13:36, 41, 42)

Osho otashi ka ningwa pefimbo loudjuu munene eshi tava ka mona kutya kave na apa tava xupile.—7/15, epandja 13.

Exunganeko laJesus li na sha nomupiya omudiinini nomunaendunge ola hovela okuwanifwa po naini? (Mat. 24:45-47)

Ola hovela okuwanifwa okudja mo 1914, ndele hapOpentekoste yomo 33 O.P. Mo 1919, omupiya okwa nangekwa po a pashukile ovapiya ovo va kwatela mo Ovakriste aveshe ovo hava palulwa pamhepo.—7/15, epandja 21-23.

Onaini Jesus a nangeka po omupiya omudiinini a pashukile oinima yaye aishe?

Osho otashi ka ningwa monakwiiwa pefimbo loudjuu munene, eshi ovo ve li oilyo yongudu yomupiya omudiinini nomunaendunge tava ka mona ondjabi yavo meulu.—7/15, epandja 25.

Oshike tashi ke tu ningilwa ngeenge otwa pwila mokulikola oimaliwa?

Ohatu ke lihanga hatu twalwaatwalwa ile hatu longele Jehova netatamutima, naunene tuu ngeenge ohatu hafele oilonga yetu yokulikongela omboloto. (Mat. 6:24)—8/15, epandja 6.

Kakele keenghono odo va li va pewa kuKalunga, oshike sha kwafela Eendombwedi daJehova 230 di xupe molweendo lile lokudja kokamba yaSachsenhausen?

Nonande ovanadolongo aveshe ova li va nghundipala omolwondjala nomikifi, ova kala have litu omukumo opo va dule okutwikila nolweendo.—8/15, epandja 18.

Omolwashike ehokololo lOmbibeli li na sha naashi Ovaisrael va tauluka omulonga waJordan va ye mEdu lEudaneko li li etwomukumo kufye?

Nonande omulonga owa li wa yada omolwodula, Jehova okwa li a kangheka omeva opo oshiwana shaye shi dule okutauluka. Nopehe na omalimbililo, eitavelo nelineekelo lavo muYe oli na okukala la li la pamekwa, nehokololo la tya ngaho otali tu tu omukumo.—9/15, epandja 16.

Oshike hashi ulike kutya Omukriste okwa ‘handukila Jehova’?

Otashi dulika a kale a fula onya, ndele ta fiye po eongalo ile a kale ita yambidida vali omalongekido ehangano laJehova.—8/15, epandja 11.

Ongahelipi exunganeko olo li li muMika 5:4 li na sha novakulunhu novafita tali wanifwa kunena?

Osha yela kutya ‘ovafita va-7 novakulunhu va-8’ ovo va tumbulwa muMika 5:4 otava ulike kovakulunhuongalo ovo va nangekwa po momaongalo notava pameke oshiwana shaKalunga shi lilongekidile omaponokelo oo tae ke shi hanga monakwiiwa.—11/15, epandja 20.

Ehongo lilipi tali etele lela ovapiya vaJehova ouwa?

Ovapiya vaJehova ohava hoolola ehongo olo tali va kwafele va kale ve na owino oo wa pumbiwa opo va kale nonghalamwenyo i li paunafangwa eshi tave mu longele. (1 Tim. 6:6, 8)—10/15, epandja 15.