Ehekeleko olo hatu pewa kovapambele, kookaume nokovaitaveli vakwetu, olo unene hali tu kwafele tu ungaunge nomaudjuu.

Olune nosho yo eendjovo dopahole dakaume otadi dulu okukala da fa omuti wokuvelula nokutulumukifa. (Omayel. 16:24; 18:24; 25:11) Ndele Ovakriste vashili ihava kala ashike va hala okuhekelekwa. Ohava ningi eenghendabala va ‘hekeleke ava ve li moudjuu keshe, nehekeleko olo Kalunga [e va hekeleka nalo].’ (2 Kor. 1:4; Luk. 6:31) Omupashukili woshitukulwa umwe wokoMeksiko, wedina Antonio, okwa li a ninga sha faafana.

Eshi Antonio a li a monika okankela yomohonde, okwa li a nyemata neenghono. Ndele nande ongaho, okwa ninga eenghendabala opo a kondjife omaliudo mai. Okwa li eshi enda ngahelipi mbela? Okwa li ha imbi omaimbilo Ouhamba nokudilonga keendjovo dao. Okwiilikana mokule nokulesha Ombibeli nako okwa li kwe mu hekeleka neenghono.

Antonio okwa ka mona kutya ovaitaveli vakwao navo ova li ve mu kwafela neenghono. Okwa ti: “Ngeenge ame nomukulukadi wange twa wililwa po, ohatu ifana omupambele wetu oo eli omukulunhuongalo e uye a ilikane pamwe fye. Osho osha li she tu hekeleka neenghono noshe tu mbilipaleka pamaliudo.” Okwa ti vali: “Otwa pandula kekwafo lovapambele vetu nosho yo lovamwatate eshi ve tu kwafela tu kondjife omadiladilo mai meni lefimbo lixupi.” Ka li tuu a pandula eshi a kwafelwa kookaume ovo ve na ko nasha naye!

Oshinima shimwe vali osho tashi dulu okukala ekwafo linene pefimbo lomaupyakadi osho omhepo iyapuki oyo twa udanekelwa. Omuyapostoli Petrus okwa ti kutya omhepo iyapuki yaKalunga oyo “oshiyandjwa,” ile tu tye, oshali. (Acts 2:38) Oushili wa tya ngaho owa li we limonikila pOpentekoste 33 O.P eshi ovanhu vahapu va li va vaekwa nomhepo iyapuki. Ndele nande Petrus okwa li ta popi shi na sha novavaekwa, atusheni ohatu dulu yo oku i pewa. Oshali yomhepo iyapuki ihai pu po, onghee hano, omolwashike ito kala ho ilikana alushe u i pewe? — Jes. 40:28-31.

Omuyapostoli Paulus okwa li e lididimikila omaudjuu mahapu, nopeemhito dimwe okwa li a taalela efyo. (2 Kor. 1:8-10) Ndele ka li a wililwa po koumbada wokutila efyo. Okwa li a hekelekwa kokukala e shii kutya Kalunga ote ke mu kwafela. Okwa shanga a ti: “Kalunga naXe yOmwene wetu Jesus Kristus na hambelelwe, oXe yefilonghenda naKalunga kehekeleko alishe, ou te tu hekeleke moudjuu wetu aushe.” (2 Kor. 1:3, 4) Paulus ina kala e lietela onghenda omolwomaupyakadi aye. Ponhele yaasho, okulididimika kwaye okwe mu kwafela a kulike ohole yokuhola ovamwaxe, nokungaho, okwa li ha hekeleke vamwe ovo va pumbwa okuhekelekwa.

Eshi oudu waAntonio wa li wa xwepopala, okwa li a shuna moilonga yaye youpashukili woshitukulwa. Okwa li ha ulikile alushe ovaitaveli vakwao hole, ndele ye nomukulukadi waye ova ka ninga eenghendabala de likalekelwa opo va kale hava talele po nokutwa omukumo ovo tava vele. Pashihopaenenwa, konima eshi va li va talela po Omukriste umwe oo a li ta kondjo noudu wa kwata moiti, Antonio okwa li a didilika kutya omumwatate oo iha i vali kokwoongala. Okwa ti: “Hamolwaashi a li ehe hole Jehova ile ovamwaxe, ndele omolwouvela oo ta kondjo nao nowe mu ningifa a kale e udite ehe na oshilonga.”

Opo Antonio a twe omukumo omumwatate oo ta vele, okwa li e mu pula a ka ilikane kokavilo kamwe. Nonande omumwatate oo okwa li e udite ina wana, okwa li a dimina oku ka ilikana. Antonio okwa ti: “Okwa li a ilikana eilikano liwa, nolwanima okwa li ta monika a fa haye molwaashi okwa li vali e udite e na oshilonga.”

Atusheni otashi dulika tu shakeneke oupyakadi wonhumba ile wongadi. Ndele ngaashi Paulus a popya, osho otashi ke tu linyengifa tu hekeleke vamwe pefimbo opo va pumbwa ehekeleko. Onghee hano, natu kaleni hatu kenukile Ovakriste vakwetu ovo tava mono oixuna nokuhopaenena Kalunga ketu, Jehova, mokukala hatu tu vamwe omukumo.