“Kada li ashike di na ko nasha novanhu, ndele oda li yo di na ohokwe moumbwa vange. Efiku limwe, Elaine, oo a li pokatemba koishangomwa, okwa li a pa oumbwa vange vavali oubiskiti. Okudja opo, efimbo keshe handi ende popepi nokatemba oko, oumbwa ohava kala va hala oku ka enda pEendombwedi, opo va ka pewe ‘oubiskiti’ ngaashi shito.

“Eemwedi oda enda nokulupuka. Oumbwa ova kala hava hafele oubiskiti, ofimbo ame nda li handi hafele eenghundafana di li pauxupi nEendombwedi. Ashike kanda li nda hala okukundafana nado moule. Pefimbo opo, onda li ndi na omido 70 nasha. Kanda li ndi shii kutya Eendombwedi oda itavela shike. Molwaashi onda li nda nyematekwa komalongelokalunga mahapu, onda li ndi wete kutya oshi li xwepo okukonakona Ombiibeli kwaame mwene.

“Efiku vali limwe, onda li nda mona Eendombwedi dimwe di li poutemba vado voishangomwa kombinga ikwao yodoolopa. Nado oda li alushe hadi kala tadi limemesha. Oda li alushe hadi nyamukula omapulo ange a kanghamena kOmbiibeli efimbo keshe. Osho osha ningifa nge ndi kale nde di lineekela.

“Efiku limwe, Elaine okwa pula nge a ti: ‘Ou shii ngoo kutya oinamwenyo oi li oshali ya dja kuKalunga?’ Onda ti: ‘Heeno, ondi shi shii!’ Opo nee Elaine okwa li a leshela nge Jesaja 11:6-9. Eenghundafana odo oda li da lundulula etaleko lange, ashike nande ongaho kanda li nda hala okutambula oshishangomwa shEendombwedi.

“Okudja opo, onda kala handi hafele eenghundafana tadi ti sha nodi li pauxupi naElaine nosho yo nomushamane waye, Brent. Ova li va ninga eetepo ndi leshe Mateus fiyo Oilonga, opo ndi mone osho sha kwatelwa mokuhopaenena Kristus. Onda li nda tula moilonga eetepo lavo. Mafiku hamale, onda li nda dimina okukonakona Ombiibeli naBrent naElaine. Osho osha li mokati komudo wo 2016.

“Onda li handi hafele ekonakonombibeli lange lokoshivike nosho yo okukala pokwoongala kOlupale lOuhamba. Onda li ndi udite nda nangekwa noupuna nonda hafa, eshi handi lihongo osho Ombiibeli tai ti. Onda ka ninginifwa ndi li Ondombwedi, konima yodula. Paife ondi na omido 79, nonda hafa, eshi nda mona elongelokalunga lashili. Jehova okwa punika nge, eshi ndi li oshitukulwa shoukwaneumbo wovapiya vaye, ovo ve mu liyapulila.”