OVAMWATATE novamwameme vahapu ovo va li va tembukila koilongo imwe omolwouxupilo, paife ova shuna komaduumbo avo. Ove linyengifwa va tembukile koitukulwa oko ku na omhumbwe inene yovaudifi vOuhamba omolwohole yavo yokuhola Jehova nosho yo ovanhu vakwao. (Mat. 22:37-39) Omaliyambo elipi va ninga, nongahelipi Jehova e va nangeka noupuna? Opo tu shi mone, natu ka taleni koshilongo shaCameroon, osho shi li mouninginino waAfrica.

Mo 1998, omumwatate wedina Onésime okwa li a fiya po oshilongo shavo Cameroon. Okwa kala kondje yoshilongo oule womido 14. Efiku limwe, pokwoongala kwopaKriste opa li pa popiwa efaneko limwe li na sha noilonga yokuudifa. Omupopi okwa ti: “Natu tye nee ngeno ookaume vavali otava kwata eeshi peenhele da yoolokafana, ndele umwe ota kwata eeshi dihapu di dule damukwao. Mbela oo ta kwata eeshi dinini, ita ka tembukila ponhele opo tapa kwata eeshi dihapu?”

Efaneko olo ola li la diladilifa Onésime a shune koCameroon, oko ku na ovanhu vahapu va hala okulihonga Ombiibeli noku ka kwafele ovaudifi vahapu vomoshitukulwa osho. Ashike okwa li e na omalipulo. Mbela okwa li ngoo ta ka dula okwiikilila onghalo yomoshilongo shavo eshi a kala kondje yoshilongo oule womido dihapu? Onésime okwa li a ka talele po koCameroon opo a mone ngeenge ota ka dula tuu okwiikilila onghalo yako. Opo nee mo 2012, okwa tembukilila koCameroon.

Onésime okwa ti: “Onda li ndi na okwiikilila onghalo yomhepo ya pupyala nosho yo ouxupilo womoshilongo. Onda li yo ndi na okwiikilila okukala omutumba koipundi yoipilangi mOlupale lOuhamba.” Okwa wedwa ko ta popi te limemesha ta ti: “Okuyandja elitulemo pokwoongala, okwa kwafela nge ndi dimbwe oipundi youdjeko oyo nda li handi kala omutumba kuyo.”

Mo 2013, Onésime okwa hombola Géraldine, oo a alukila koCameroon konima eshi a kala koFrance oule womido omuwoi. Omanangeko noupuna elipi ovalihomboli ovo va mona eshi va yamba po onghalamwenyo yavo mokulongela Jehova? Onésime okwa ti: “Tu li ovalihomboli, otwa li twa ya kOfikola yOvaudifi vOuhamba notwa ka longa yo mObetel. Konima yomudo, meongalo letu omwa li mwa ninginifwa ovakonakonimbiibeli 20. Paife ondi wete kutya ondi li ponhele iwa yokukwata ‘eeshi.’” (Mark. 1:17, 18) Géraldine okwa weda ko a ti: “Onda mona omanangeko noupuna mahapu e dulife pwaao nda li nda diladila.”

Judith okwa tembukila koUnited States nokwa li a hala okutamununa mo oukalele waye. Okwa ti: “Luhapu ngeenge hatu talele po Cameroon ohandi kala handi lili, molwaashi ihandi kala nda hala okufiya po ovo nda li handi konakona navo Ombiibeli.”  Ashike Judith okwa kala ha ongaonga okushuna koCameroon. Okwa kala e na oilonga hai futu nawa, oyo ya li ye mu pitika a dule okufuta ouhaku waxe, oo a li moCameroon. Ndele molwaashi Judith okwa li e lineekela muJehova, okwa li a tembuka. Okwa popya kutya okwa li a djuulukwa onghalamwenyo youdjeko oyo a li e na eshi a li kondje yoshilongo. Okwa li a ilikana kuJehova opo a dule okulundulula etaleko laye, nokwa li a tuwa omukumo komupashukilishikandjo nomukulukadi waye.

Okutala konakudiwa, Judith okwa popya a ti: “Moule womido nhatu onda kala nda hafa eshi nda mona ounona vopamhepo vane.” Judith okwa kala ta longo e li omukokolindjila e likalekelwa. Kunena ota longo pamwe nomushamane waye, Sam-Castel, moilonga youpashukilishikandjo. Ndele mbela oshike sha ningwa po shi na sha naxe yaJudith? Judith novapambele vaye ova li va dula okukonga oshipangelo kondje yoshilongo, omo va li tava dulu okufuta etando laxe. Oshitunhula eshi etando la enda nawa.

Omumwatate wedina Victor okwa li a tembukila koCanada. Konima eshi a lesha oshitukulwa mOshungonangelo shi na sha nehongo lopombada, okwa li a diladila moule kombinga yehongo laye. Okwa li a efa po ounivesiti, ndele ta kufa omadeulo manini kofikola yopaungoba. Okwa ti: “Omadeulo oo okwa li a kwafela nge ndi mone oilonga diva, nondi longe osho nda kala nda hala oule wefimbo, oukokolindjila.” Lwanima, Victor okwa ka hombola Caroline, nova li va ka talela po Cameroon ve li ovalihomboli. Ova li va talela po oshitaimbelewa sha mo, novamwatate ova li ve va twa omukumo opo ve uye va longele moCameroon. Victor okwa ti: “Katwa li tu na etomheno lokwaanya, nokudja opo otwa li twa kaleka onghalamwenyo yetu paunafangwa, notwa li twa tambula ko eshiivo olo.” Nonande Caroline ka li e na oukolele, ova li va tokola okutembuka.

Victor naCaroline ova li va hovela okulonga ve li ovakokolindjila vondjikilile opo va kwafele ovo ve na ohokwe mOmbiibeli. Ova li va ongela oimaliwa ya wana, osho sha li she va kwafela opo va wanifwa po eemhumbwe davo dopehovelo. Konima yaasho, ova li va longa moCanada oule weemwedi dinini, osho sha li she va pa omhito opo va dule okwaalukila koCameroon nokutwikila noukokolindjila. Ova li va mona omanangeko noupuna elipi? Ova li va ya kOfikola yOvaudifi vOuhamba, ve li ovakokolindjila ve likalekelwa, nopaife ove li ovapiya vokutunga. Victor okwa ti: “Eshi twa fiya po onghalamwenyo youdjeko oshe tu pitika tu mone nghee Jehova te tu kwafele.”

Mo 2002, Alain, omuhongwa wokoUnivesiti moGermany, okwa li a lesha okafo Ovanyasha — otamu ka longifa ngahelipi onghalamwenyo yeni? Ouyelele oo owa li we mu linyengifa e litulile po omalalakano mape. Mo 2006, okwa li a ya kOfikola yOkudeula mOukalele, nokwa li a tuminwa koCameroon, koshilongo oko a dalelwa.

Alain okwa li a mona oilonga yopakafimbo moCameroon. Opo nee okwa ka mona oilonga hai futu nawa, ashike okwa li a didilika kutya otai ka ya moshipala oukalele waye. Onghee hano, eshi a shivwa a ka longe e li omukokolindjila e likalekelwa okwa li e shi tambula ko nomutima aushe. Omuhona waye okwa li e mu udanekela kutya ota kala te mu futu ondjabi ya kola nawa, ashike Alain okwa li a dika eenyala medu. Lwanima, Alain okwa ka hombola Stéphanie, oo a panga efimbo moFrance. Mbela okwa li a shakeneka omashongo elipi eshi a tembukila koCameroon?

Stéphanie okwa ti: “Onda li nda kwatwa kounghundi wopalutu nosho yo koalegika, ashike  onda li nda veluka molwaashi onda li handi mono epango pandjikilile.” Ovalihomboli ovo ova li va pewa ondjabi omolwelididimiko lavo. Alain okwa ti: “Eshi twa li twa ka udifila komukunda we likalela hau ifanwa Katé, otwa li twa hanga ko ovanhu ovo va li va hala okukonakona Ombiibeli. Lwanima, otwa ka kala hatu konakona navo okupitila mongodi. Ovakonakonimbiibeli vavali vomuvo ova li va ninginifwa, nopa li pa totwa ongudu yovaudifi.” Stéphanie okwa weda ko ta ti: “Onda li nda mona ehafo linene eshi nda kwafela ovanhu ve uye fiyo oposhitwa shokuliyapulila Jehova. Eshi twa kala hatu longele oku, otwa mona ehafo linene lwoikando.” Paife Alain naStéphanie otava longo moilonga youpashukilishikandjo.

Gisèle okwa ninginifwa ofimbo a li te lihongele oinima yopaunamiti moItaly. Okwa li a kuminwa neenghono onghalamwenyo yopaunafangwa yovalihomboli ovakokolindjila ovo va konakona naye Ombiibeli, nokwa li a halelela okulonga shihapu moukalele. Gisèle okwa li a ninga omukokolindjila wondjikilile ofimbo a li pokumana ofikola.

Gisèle okwa li a hala okulongela Jehova shihapu ngeenge a shuna koCameroon, ashike okwa li e na omalipulo. Okwa ti: “Onda li ndi na okufiya po oufemba woshilongo wokukala Omuitaly, nokufiya po ookaume novapambele vange vomoItaly.” Ashike nande ongaho, muMei 2016, Gisèle okwa li a shuna koCameroon. Lwanima, okwa ka hombolwa kuLéonce, noshitaimbelewa shaCameroon osha li sha ninga eetepo opo ovalihomboli ovo va ka longele kuAyos, odoolopa oyo ya li i na omhumbwe inene yovaudifi vOuhamba.

Onghalamwenyo oya li ya tya ngahelipi kuAyos? Gisèle okwa ti: “Oivike ihapu ohatu kala modima, noihatu dulu okutula eengodi detu omundilo. Naluhapu ihadi kala momhepo. Onde lihonga okuteleka noikuni, notwa li hatu ka teka omeva nokatololi konguloshi, molwaashi pefimbo opo ihaku kala ovanhu vahapu.” Mbela ovalihomboli ovo ova li va ungaunga ngahelipi nonghalo oyo? Gisèle okwa ti: “Otwa kwafelwa neenghono komhepo iyapuki yaJehova notwa kala hatu yambididafana tu li ovalihomboli. Ovapambele nookaume ketu ove tu twa omukumo, nomafimbo amwe ova kala have tu yambidida pashimaliwa.”

Mbela Gisèle okwa hafa ngoo eshi a shuna koshilongo oko a dalelwa? Okwa popya nomukumo a ti: “Heeno, opa li omafimbo amwe twa li hatu kala twa loloka notwa teka omukumo, ashike ngeenge otwa findi onghalo ya tya ngaho fye nomushamane wange, ohatu lilombwele kutya otwa longa filufilu osho twa li tu na okulonga. Otwe lineekela filufilu muJehova notwa ehena popepi elela naye.” Léonce naGisèle ova li va ya kOfikola yOvaudifi vOuhamba, nopaife otava longo ve li ovakokolindjila ve likalekelwa vopakafimbo.

Ngaashi ashike ovayuli veeshi ovaladi hava ikilile eenghalo di lili noku lili opo va dule okukwata eeshi, ovo va shuna koshilongo shavo ova ninga omaliyambo opo va dule okukwafela ovo tava pwilikine ketumwalaka lOuhamba. Jehova ke na efiku a dimbwe oilonga youdiinini yovaudifi ovo, eshi va ulika ohole omolwedina laye. (Neh. 5:19; Heb. 6:10) Ngeenge ou li koshilongo shimwe, ndele koshilongo sheni oku na omhumbwe inene yovaudifi vOuhamba, mbela ito dulu okushuna koshilongo sheni u ka kwafele? Ngeenge owa ningi ngaho, oto ka mona omanangeko noupuna mahapu. — Omayel. 10:22.