1-2. (a) Jesus okwa li a ninga shike moufiku oo wa tetekela efyo laye? (b) Omapulo elipi hatu ka kundafana moshitukulwa eshi?

 OSHA li Etine konguloshi mo 14 Nisan, 33 O.P., na Jesus okwa li e li pokukengelelwa, pokuvalelwa komuti womahepeko nokudipawa. Opo ashike a hangika a mane okulya ouvalelo ponduda yopombada pamwe novayapostoli vaye ovadiinini. Konima eshi va lya ouvalelo oo, Jesus okwa li a twa ovayapostoli vaye omukumo. Diva ofimbo aveshe inava dja mo monduda yopombada, Jesus okwa li a ilikana. Omuyapostoli Johannes okwa shanga kombinga yeilikano olo; otali hangwa muJohannes etukulwa 17.

² Eilikano laJesus otali tu hololele shike shi na sha naasho a li te lipula pefimbo opo? Eilikano olo otali ulike ngahelipi osho sha li sha fimanenena kuJesus eshi a li kombada yedu? Natu ka kundafaneni omanyamukulo omapulo oo.

“ONDE VA SHIIVIFILA EDINA LOYE”

3. Jesus okwa li a popya shike kombinga yedina laJehova, nokwa li a hala okutya shike? (Johannes 17:​6, 26)

³ Jesus okwa popya meilikano laye a ti: “Onde va shiivifila edina loye.” Otu shii kutya osho osha li sha fimanenena kuye, molwaashi okwa popya lwoikando ivali kutya okwa shiivifila ovahongwa vaye edina laJehova. (Lesha Johannes 17:​6, 26.) Mbela okwa li a hala okutya shike? Mbela okwa li e va shiivifila  edina olo va li vehe shii nale? Ovahongwa vaJesus ova li Ovajuda, onghee ova li ve shii nale edina laKalunga, Jehova. Ola holoka mo lwoikando omayovi mOmishangwa dOshiheberi. Onghee Jesus ka li ta popi shi na sha nedina loovene laKalunga, ndele ponhele yaasho, okwa li a yukifa kwaasho edina olo la kalela po. Jesus okwa li a kwafela ovahongwa vaye va shiive nawa Jehova, naasho osha li sha kwatela mo okushiiva elalakano laye li na sha nedu nosho yo ovanhu, osho a ninga, osho ta ka ninga nosho yo omaukwatya aye. Jesus oye ashike e shii nawa Jehova.

4-5. (a) Ongahelipi edina laumwe tali dulu okukala la fimanenena kufye? Shi faneka. (b) Omonghedi ilipi ovahongwa vaJesus va li va shiiva nawa edina laJehova?

⁴ Natu shi faneke ngaha, natu tye nee ngeno meongalo leni omu na omukulunhuongalo wedina David noku li yo ndokotola. Omumwatate oo owa kala u mu shii oule womido dihapu. Ashike efiku limwe, owa li wa hakukilwa koshidu. Owa li wa twalwa koshipangelo oko haku longo omumwatate oo, noye a li e ku kwafela. Okudja efiku olo, owa hovela okukala u hole omumwatate oo shi dulife nale. Ngeenge owa udu edina laye oho dimbuluka osho a li e ku ningila. Paife David ino mu tala ko ashike e li omukulunhuongalo oo wa kala u shii omido dihapu, ndele oku li yo ndokotola oo a xupifa omwenyo woye.

⁵ Sha faafana, ovahongwa vaJesus ove shii nale edina laJehova. Ashike edina olo ola ka kala la fimanenena kuvo, molwaashi Jesus okwa li e va kwafela va shiive nawa Jehova. Omolwashike hatu tile ngaho? Omolwaashi Jesus okwa li a hopaenena omaukwatya aXe mukeshe osho a li a popya nosho yo osho a ninga. Onghee ovayapostoli vaye ova li va ‘shiiva’ nawa Jehova mokupwilikina konghedi omo Jesus a li a hongo nomokutala nghee a li ha ungaunga novanhu. — Joh. 14:9; 17:3.

‘EDINA LOYE OLO WA PA NGE’

6. Omeityo lilipi Jehova a li a pa Jesus edina laYe? (Johannes 17:​11, 12)

⁶ Jesus okwa li a ilikanena ovahongwa vaye, a ti: “Va amena omolwedina loye olo wa pa nge.” (Lesha Johannes 17:​11, 12.) Ndele mbela osho osha hala okutya Jesus okwa li ta ka kala ta ifanwa Jehova? Hasho nandenande. Didilika kutya, eshi Jesus a popya kombinga yedina laJehova, okwa ti: ‘Edina loye.’ Onghee edina laJehova kala li la ninga edina laJesus lopaumwene. Ndele mbela Jesus okwa li a hala okutya shike eshi a ti kutya okwa pewa edina laKalunga? Shotete, Jesus okwa li omupopikalelipo waJehova. Okwa li e uya kombada yedu omolwedina laXe nokwa longa oikumwifilonga medina laye. (Joh. 5:43; 10:25) Shikwao vali, edina laJesus otali ti kutya “Jehova omuxupifi.” Onghee eityo ledina laJesus ola kwatela mo edina laJehova.

7. Jesus okwa li a dula ngahelipi okupopya medina laJehova? Shi yelifa.

⁷ Natu shi faneke ngaha, molwaashi omukalelipo woshilongo oha kalele po omupangeli woshilongo, otashi dulika a ka popye ponhele yomupangeli. Onghee ngeenge omukalelipo woshilongo ta popi oha popi a fa oye omupangeli woshilongo. Sha faafana, Jesus okwa li e lile po Jehova, nokwa li a popya novanhu medina laYe. — Mat. 21:9; Luk. 13:35.

8. Omolwashike Jehova a ti kutya edina laYe oli “li” muJesus, nokuli ofimbo ine uya kombada yedu? (Exodus 23:​20, 21)

⁸ Ombiibeli oya ti kutya Jesus “Ondjovo,” molwaashi Jehova okwa li e mu longifa opo a lombwele ovaengeli nosho yo ovanhu osho Jehova a hala va shiive nova ninge. (Joh. 1:​1-3) Jesus otashi dulika oye a li omweengeli oo a li a tumwa kuJehova opo a file oshisho Ovaisrael eshi va li mombuwa. Eshi Jehova a li a lombwela Ovaisrael va dulike komweengeli oo,  okwa li e va lombwela kutya omolwashike ve na okudulika. Okwa ti: “Molwaashi edina lange oli li muye.” a (Lesha Exodus 23:​20, 21.) Jehova okwa li a popya ngaho, molwaashi Jesus okwa li omupopikalelipo waye, noye a li a ulika kutya keshe osho Jehova ta ningi oshi li mondjila noku li omuyapuki.

“TATE, FIMANEKIFA EDINA LOYE”

9. Edina laJehova ola li la fimana ngahelipi kuJesus? Shi yelifa.

⁹ Ngaashi ashike twe shi kundafana, nokuli ofimbo Jesus ine uya kombada yedu, edina laJehova ola li la fimanenena kuye. Eshi a li kombada yedu, okwa li yo a ulika nghee edina laJehova la fimana kuye okupitila mukeshe osho a ninga. Pexulilo loukalele waye, okwa popya a ti: “Tate, fimanekifa edina loye.” Xe okwa li e mu nyamukula diva nondaka yopombada, a ti: “Onde li fimanekifa nale, nohandi ke li fimanekifa vali.” — Joh. 12:28.

10-11. (a) Ongahelipi Jesus a li a fimanekifa edina laJehova? (Tala yo efano.) (b) Omolwashike edina laJehova la pumbwa okuyapulifwa?

¹⁰ Jesus okwa li yo a fimanekifa edina laXe. Ngahelipi mbela? Onghedi imwe omo a li e shi ninga, okwa li a hololela vamwe omaukwatya aJehova a denga mbada nosho yo oinima oyo Jehova a li a ninga. Ashike omwa li mwa kwatelwa shihapu mokufimanekifa Jehova. Edina laJehova ola li la pumbwa okuyapulifwa. Jesus okwa li a ulika nghee osho sha fimana, eshi a li a honga ovashikuli vaye nghee ve na okwiilikana.  Okwa ti: “Tate yetu ou u li meulu, edina loye nali yapulwe.” — Mat. 6:9.

¹¹ Omolwashike edina laJehova la pumbwa okuyapulifwa? Omolwaashi Satana Ondiaboli okwa li a popya oipupulu kombinga yaJehova Kalunga moshikunino shaEden. Satana okwa popya kutya Jehova omunaipupulu noka li a halela Adam naEva oinima iwa. (Gen. 3:​1-5) Satana okwa popya yo kutya onghedi yaJehova yokupangela kai li mondjila. Satana okwa nyateka yo edina laJehova. Lwanima, pefimbo laJob, Satana okwa li a popya kutya ovanhu ohava longele ashike Jehova omolwoinima iwa oyo he va pe. Okwa li yo a popya kutya ovanhu otava ka efa po okulongela Jehova ngeenge ve li momayeleko, molwaashi kave mu hole shili. (Job 1:​9-11; 2:4) Opa li pa pumbiwa efimbo opo ku monike kutya olyelye omunaipupulu; oJehova, ile oSatana.

“OHANDI KA YANDJA OMWENYO WANGE”

12. Molwaashi Jesus okwa li e hole edina laJehova, okwa li a halelela okuninga shike?

¹² Molwaashi Jesus okwa li e hole Jehova, okwa li a hala okuninga ngaashi ta dulu, opo a yapulife edina laJehova. Jesus okwa ti: “Ohandi ka yandja omwenyo wange.” (Joh. 10:​17, 18) Okwa li nokuli a halelela okufila edina laJehova. b Ovanhu votete vavali va wanenena, Adam naEva, kava li va dulika kuJehova nova li va shikula Satana. Mepingafano naasho, Jesus okwa li a halelela okuuya kombada yedu, opo a ulike kutya oku hole Jehova. Okwa li a dulika kuJehova mukeshe shimwe osho a li a ninga. (Heb. 4:15; 5:​7-10) Okwa kala omudiinini onghalamwenyo yaye aishe fiyo osheshi a fya efyo linyanyalifi komuti womahepeko. (Heb. 12:2) Kungaho okwa ulika kutya oku hole Jehova nosho yo edina laYe.

13. Omolwashike Jesus oye a li ta dulu okuulika kutya Satana omunaipupulu? (Tala yo efano.)

¹³ Keshe osho Jesus a ninga, osha ulika kutya Satana omunaipupulu, ndele haJehova. (Joh. 8:44) Kape na omunhu e shii nawa Jehova a fa Jesus. Ngeno oinima aishe oyo Satana a popya kombinga yaJehova oya li yoshili, ngeno Jesus okwa kala e i shii nale. Ashike Jesus okwa li a tokola toko okupopila edina laJehova. Nokuli nonande Jehova okwa li ta monika a fa e mu fiya po, Jesus okwa li a halelela okufya nokukala omudiinini, ponhele yokuhadulika kuXe omunahole. — Mat. 27:46. c

 ‘ONDA MANA OILONGA OYO WA LI WA PA NGE’

14. Ongahelipi Jehova a li a nangeka noupuna Jesus omolwoudiinini waye?

¹⁴ Meilikano olo Jesus a ilikana moufiku oo wa tetekela efyo laye, okwa ti: ‘Onda mana oilonga oyo wa li wa pa nge.’ Okwa li e na elineekelo kutya Jehova ote ke mu nangeka noupuna omolwoilonga yaye youdiinini. (Joh. 17:​4, 5) Jesus okwa li a ninga nawa eshi e lineekela filufilu muXe. Jehova ka li e mu efa a kale mombila. (Oil. 2:​23, 24) Okwa li e mu nyumuna nokwe mu pa ondodo yopombada meulu. (Fil. 2:​8, 9) Lwanima, Jesus okwa li a hovela okupangela e li Ohamba yOuhamba waKalunga. Ouhamba oo otau ka wanifa po shike? Okwa popya moshitukulwa oshitivali sheilikano laye, a ti: “Ouhamba woye nau uye. Ehalo loye [Jehova] nali wanifwe yo kombada yedu ngaashi meulu.” — Mat. 6:10.

15. Oshike vali Jesus ta ka wanifa po?

¹⁵ Monakwiiwa i li popepi, Jesus ota ka lwifa ovatondi vaKalunga nokuhanauna po ovakolokoshi puArmagedon. (Eh. 16:​14, 16; 19:​11-16) Diva konima yaasho, ota ka ekela Satana ‘mombwili,’ omo ita dulu okuninga sha. (Eh. 20:​1-3) Momukokomoko wOmido Eyovi dOkupangela kwaJesus, Jesus ota ka eta ombili kombada yedu nokukwafela ovanhu va kale va wanenena. Ota ka nyumuna ovafi, ta ka ninga edu alishe oparadisa, nelalakano laJehova otali ka wanifwa po. — Eh. 21:​1-4.

16. Oshike tashi ka ningwa po pexulilo lOmido Eyovi dOkupangela kwaJesus?

¹⁶ Oshike twa teelela shi ka ningwe pexulilo lOmido Eyovi dOkupangela kwaJesus? Ovanhu otava ka kala va wanenena. Itava ka kala vali tava pula va diminwe po omatimba avo pakanghameno lekuliloyambo, noitava ka pumbwa vali omupokati, ile omupristeli. “Nefyo, olo li li omutondi waxuuninwa, otali ka xulifwa po.” Oonakufya otava ka nyumunwa. Keshe umwe kombada yedu ota ka kala a wanenena. — 1 Kor. 15:​25, 26.

17-18. (a) Oshike tashi ka ningwa po pexulilo lOmido Eyovi dOkupangela? (b) Jesus ota ka ninga po shike konima ngeenge a mane okupangela? (1 Ovakorinto 15:​24, 28) (Tala yo efano.)

 ¹⁷ Oshike vali tashi ka ningwa po pexulilo lOmido Eyovi dOkupangela kwaJesus? Pefimbo opo otapa ka ningwa oshinima shididilikwedi. Omhata oyo ya kwatela mo okuyapulifa edina laJehova otai ka pongololwa po. Ngahelipi mbela? Moshikunino shaEden, Satana okwa popya kutya Jehova omunaipupulu noiha pangele pahole. Okudja ashike pefimbo opo, ovo va kala tava longele Jehova ova ulika kutya onghedi yaJehova yokupangela oya denga mbada. Onghee pexulilo lOmido Eyovi dOkupangela, edina laJehova otali ka yapulifwa filufilu. Ota ka ulika filufilu kutya oku li Tate womeulu omunahole.

¹⁸ Oipupulu yaSatana otai ka nyanekwa pomutenya filufilu. Jesus ota ka ninga po shike konima ngeenge a mane okupangela? Mbela ota ka shikula oshihopaenenwa shaSatana nokutukulila Jehova oshibofa? Ahawe! (Lesha 1 Ovakorinto 15:​24, 28.) Jesus ota ka yandja Ouhamba kuXe. Ota ka dulika kepangelo laJehova. Mepingafano naSatana, Jesus ota ka yandja po eenghonopangelo daye adishe, molwaashi oku hole Jehova neenghono.

19. Edina laJehova otali ti shike kuJesus?

¹⁹ Jesus okwa li a ulika kutya oku li omukalelipo waXe a wanenena. Nomolwaasho Jehova a li a pa Jesus edina laYe! Edina laJehova otali ti shike kuJesus? Ola fimanenena kuJesus li dule keshe shimwe. Okwa li a halelela okufila edina olo nokuyandja po eenghonopangelo daye kuJehova pexulilo lOmido Eyovi dOkupangela kwaye. Ongahelipi hatu dulu okuhopaenena oshihopaenenwa shaJesus? Ohatu ka kundafana enyamukulo lepulo olo moshitukulwa tashi shikula.