1-2. Omunhu okwa pumbwa okuninga oshike, ofimbo ina ninginifwa?

 MOMUKOKOMOKO womido nhano da pita, ovanhu ve dulife pemiliyona ova ninginifwa ve li Eendombwedi daJehova. Vahapu vomuvo ova hongwa oshili “okudja kounona,” ngaashi omuhongwa Timoteus wopefimbo lovayapostoli. (2 Tim. 3:​14, 15) Vamwe ove lihonga kombinga yaJehova, eshi va li ovakulunhu, ofimbo vamwe osheshi va li ovanamido. Efimbo opo la di ko, omukainhu umwe oo a li a konakona Ombiibeli nEendombwedi daJehova okwa li a ninginifwa, eshi a li e na omido 97.

² Ngeenge ou li omukonakonimbiibeli, ile oto tekulwa kovadali ovo ve li Eendombwedi, mbela oho diladila ngoo kombinga yokuninginifwa? Olo oli li elalakano liwa neenghono. Ashike ofimbo ino ninginifwa, owa pumbwa okuliyapulila Jehova. Oshitukulwa eshi otashi ka yelifa kutya okuliyapulila Kalunga osha kwatela mo shike. Otashi ke ku kwafela yo u mone kutya omolwashike uhe na etomheno lokwoongaonga okukatuka onghatu oyo nokuninginifwa, ngeenge owe lilongekida okuninga ngaho.

OKULIYAPULILA KALUNGA OSHA HALA OKUTYA SHIKE?

3. Yandja oihopaenenwa yopaMbiibeli yovanhu ovo va li va yapulilwa Jehova.

³ Pefimbo lOmbiibeli, omunhu oo a li a yapulilwa Jehova okwa li a hoololwa omolwelalakano liyapuki. Ovaisrael ova li oshiwana osho sha yapulilwa Jehova. Ashike vamwe, vomoshiwana osho, ova li va yapulilwa Jehova monghedi ye likalekelwa. Pashihopaenenwa, Aron okwa li ha djala “okapapa koshingoli taka vema, ke li edidiliko liyapuki li na sha nokunangekwa po.”  Okapapa koshingoli oko otaka ulike kutya okwa li a hoololwa a longe oilonga ye likalekelwa e li omupristeri munene waIsrael. (Lev. 8:9) Ovanasiri navo ova li va yapulilwa Jehova monghedi ye likalekelwa. Oshitya “Omunasiri” osho sha dja koshitya shOshiheberi nazir, otashi ti: ‘Umwe oo E likalekelwa,’ ile ‘E liyapula.’ Ovanasiri ova li ve na okudulika koipango ye likalekelwa, oyo va li va shangelwa mOmhango, oyo Kalunga a li a yandja okupitila muMoses. — Num. 6:​2-8.

4. (a) Omonghedi ilipi omo ovo ve liyapulila Jehova ve likalekelelwa elalakano liyapuki? (b) Osha hala okutya ngahelipi ‘okulixupula’ ove mwene? (Tala yo efano.)

⁴ Ngeenge to liyapulile Jehova, oho hoolola okuninga omuhongwa waJesus Kristus nowa pitifa komesho monghalamwenyo yoye okulonga ehalo laKalunga. Osho osha kwatela mo shike? Jesus okwa ti: “Ngeenge oku na ou a hala okushikula nge, ne lixupule ye mwene.” (Mat. 16:24) Outumbulilo wOshigreka oo wa tolokwa “ne lixupule ye mwene” otau dulu yo okutolokwa “ke li vali kuye mwene.” U li omupiya waJehova e mu liyapulila, owa pumbwa okuhenuka keshe osho itashi hafifa Jehova. (2 Kor. 5:​14, 15) Osho osha kwatela mo okuhenuka “oilonga yombelela,” ngaashi oluhaelo. (Gal. 5:​19-21; 1 Kor. 6:18) Mbela omangabeko a tya ngaho otaa djuupaleke onghalamwenyo yoye? Ngeenge ou hole Jehova, nowa tomhwa kutya eemhango daye otadi ku etele ouwa, itashi ka kala shidjuu kwoove. (Eps. 119:97; Jes. 48:​17, 18) Omumwatate wedina Nicholas okwa ti: “Oto dulu okutala ko omifikamhango daJehova di li ngaashi oitenda yodolongo, oyo tai ku kelele uha longe osho wa hala, ile oitenda yoluumbo longhoshi oyo tai ku amene koshiponga.”

5. (a) Oho liyapulile ngahelipi Jehova? (b) Eyooloko lilipi li li pokati kokuliyapulila Kalunga nokuninginifwa? (Tala yo efano.)

⁵ Oho liyapulile ngahelipi Jehova? Oho mu udanekele meilikano kutya oye aeke to ka longela nonokutya oto ka pitifa komesho  okulonga ehalo laye monghalamwenyo yoye. Opo nee oho udanekele Jehova kutya oto ka twikila okukala u mu hole “nomutima woye aushe, nomwenyo woye aushe, nomadiladilo oye aeshe neenghono doye adishe.” (Mark. 12:30) Eliyapulo loye ohali ningwa meholeko pokati koye naJehova. Mepingafano naasho, eninginifo ohali ningwa moipafi, tali ulikile ovatali kutya owe liyapulila nale Kalunga. Eliyapulo loye oli li eano liyapuki, na Jehova okwa teelela u kale metwokumwe nalo, ngaashi ashike naave osho wa teelela. — Omuud. 5:​4, 5.

OMOLWASHIKE U NA OKULIYAPULILA JEHOVA?

6. Oshike hashi linyengifa omunhu e liyapulile Jehova?

⁶ Etomheno la fimana lokuliyapulila Jehova ololo kutya ou mu hole. Ohole yoye inai kanghamena ashike komaliudo. Ponhele yaasho, oya kanghamena ‘keshiivo’ nosho yo ‘keudeko loinima yopaKalunga’ oyo we lihonga kombinga yaJehova, oyo ya ningifa ohole yoye i kale ya xwama. (Kol. 1:9) Okukonakona kwa tya ngaho kwOmishangwa okwe ku tomha (1) u mone kutya Jehova omunhu wolela, (2) Ombiibeli oi li Eendjovo daye da nwefwa mo (3) ota longifa ehangano laye a wanife po ehalo laye.

7. Oshike wa pumbwa okuninga, ofimbo ino liyapulila Kalunga?

⁷ Ovo tave liyapulile Jehova ove na okushiiva omahongo opehovelo, oo taa hangwa mEendjovo daKalunga, nove na okukala metwokumwe nomifikamhango dao. Ohava ningi ngaashi tava dulu, opo va lombwele ovanhu vakwao kombinga yaasho ve lihonga. (Mat. 28:​19, 20) Ohole yavo yokuhola Jehova ohai kala ya xwama, nohava kala va halelela momitima davo okulongela Jehova oye aeke. Mbela naave hasho u li ngaho? Okukala u na ohole ya  tya ngaho, ito ka tala ko eliyapulo neninginifo loye li li oshinima osho u na okuninga, molwaashi wa hala okuhafifa oo mwa konakona naye, ile ovadali voye. Ito ke shi tala ko yo shi li oshinima osho wa pumbwa okuninga, opo u wapalele ookaume koye.

8. Ongahelipi olupandu tali ku kwafele u ninge etokolo lokuliyapulila Jehova? (Epsalme 116:​12-14)

⁸ Ngeenge to diladila koinima aishe oyo Jehova e ku ningila, ohashi ku ningifa u kale u na olupandu nokukala wa hala oku mu liyapulila. (Lesha Epsalme 116:​12-14.) Ombiibeli oya ifana Jehova e li Omuyandji ‘woshali keshe noinima aishe iwa.’ (Jak. 1:17) Oshali imwe yomeeshali odo da denga mbada ekuliloyambo lOmona waye, Jesus. Diladila ashike kunghee oshali oyo ya denga mbada! Ekulilo ole shi ningifa tashi shiiva, opo u kale nekwatafano lopofingo naJehova. Okwe ku pa yo etimaumbwile lokukala nomwenyo waalushe. (1 Joh. 4:​9, 10, 19) Okuliyapulila Jehova onghalamwenyo yoye oku li onghedi omo ho ulike olupandu omolwohole ya denga mbada oyo e ku ulikila pamwe nomanangeko noupuna makwao oo e ku pa. (Deut. 16:17; 2 Kor. 5:15) Olupandu la tya ngaho ola divilikwa moshileshwa 46, oshitwa 4, shembo Nghee to dulu okuhafela onghalamwenyo fiyo alushe! osho shi na okavidio kominute nhatu ke na oshipalanyole, Nghee mu na okuyandja eeshali kuKalunga.

MBELA OWE LILONGEKIDA NGOO OKULIYAPULILA KALUNGA NOKUNINGINIFWA?

9. Omolwashike omunhu ina pumbwa okukala e udite a fininikwa okuliyapulila Kalunga?

⁹ Otashi dulika u udite kutya ino lilongekida okuliyapulila Kalunga nokuninginifwa. Otashi dulika wa pumbwa okuninga omalunduluko monghalamwenyo yoye nokudulika komifikamhango daKalunga, ile u udite wa pumbwa natango efimbo la wedwa po, opo u pameke ekwatafano loye. (Kol. 2:​6, 7) Havakonakonimbiibeli aveshe hava dulu okuninga exumokomesho ponhapo ya faafana nosho yo kutya havanyasha aveshe ve lilongekida okuliyapulila Kalunga nokuninginifwa pomido da faafana. Kendabala okuuda ko kutya omalunduluko elipi wa pumbwa okuninga, nokuhenuka okuliyelekanifa navamwe. — Gal. 6:​4, 5.

10. Oshike to dulu okuninga, ngeenge owa mono kutya ino lilongekida natango okuliyapulila Kalunga nokuninginifwa? (Tala yo oshimhungu “ Ovo va kulila moshili.”)

¹⁰ Nokuli nongeenge owa mono kutya ino lilongekida natango okuliyapulila Jehova, twikila okulitulila po elalakano olo. Pula Jehova meilikano e ku kwafele u ninge elunduluko keshe la pumbiwa monghalamwenyo yoye. (Fil. 2:13; 3:16) Oto dulu okukala noushili kutya ota ka uda eilikano loye noku li nyamukula. — 1 Joh. 5:14.

OMOLWASHIKE VAMWE HAVA ONGAONGA OKULIYAPULILA KALUNGA NOKUNINGINIFWA?

11. Jehova ote ke tu kwafela ngahelipi tu kale ovadiinini kuye?

¹¹ Vamwe ovo ve lilongekidila okuliyapulila Kalunga nokuninginifwa, natango ohava ongaonga okukatuka onghatu oyo. Otashi dulika va kale va tila kutya, ‘Konima ngeenge onda ninginifwa, ndele handi nyono enyono la kwata moiti, ohandi ka kondwa.’ Ngeenge ou na oumbada wa tya ngaho, shilipalekwa kutya Jehova ote ke ku pa keshe osho wa pumbwa, ‘u mu wapalele nou mu hafife moinima aishe.’ (Kol. 1:10) Ote ke ku pa yo eenghono u dule okulonga osho sha yuka. Okwa li a kwafela ovanhu vahapu va dule okulonga osho sha yuka. (1 Kor. 10:13) Olo olo etomheno limwe molwaashi hapa kala ashike ovanhu vanini ovo hava kondwa meongalo lopaKriste. Jehova oha kwafele oshiwana shaye shi kale oshidiinini.

12. Ongahelipi to dulu okuhenuka okunyona enyono la kwata moiti?

¹² Omunhu keshe ina wanenena oha yelekwa  a longe osho shii. (Jak. 1:14) Ashike ou na okuhoolola osho to ka ninga, ngeenge to yelekwa. Oushili oyoo kutya oto dulu okuhoolola kutya owa hala okukala wa tya ngahelipi. Ovanhu vamwe ohava popi kutya itatu dulu okupangela omaliudo etu nosho yo osho hatu ningi. Ashike osho kashi fi shoshili. Oto dulu okupangela omahalo oye a puka. Nokuli nongeenge to yelekwa, oto dulu okuhoolola uha longe owii. Ope na yo oinima imwe oyo tai dulu oku ku kwafela u henuke okunyona. Pashihopaenenwa, kala ho ilikana kuJehova efiku keshe. Kala u na onghedindjikilile yokukonakona Eendjovo daKalunga. Kala ho ongala. Kala ho lombwele vamwe kombinga yeitavelo loye. Okuninga oinima oyo pandjikilile otashi ke ku pa eenghono u kale omudiinini kuJehova. Ino dimbwa kutya Jehova ota dulu oku ku kwafela u ninge ngaho. — Gal. 5:16.

13. Josef okwe tu tulila po oshihopaenenwa shiwa shilipi?

¹³ Otashi ka kala shipu okukala omudiinini kuJehova, ngeenge owa tokola komesho yefimbo kutya oshike to ka ninga po, ngeenge owa yelekwa. Ombiibeli oye tu lombwela kombinga yovanhu vahapu ovo va li va ninga ngaho, nonande navo ova li inava wanenena. Pashihopaenenwa, omukulukadi waPotifar okwa li a kendabala lwoikando okuhongaula Josef. Ashike Josef okwa kala e shii kutya oshike e na okuninga po. Ombiibeli otai tu lombwele kutya “okwa li a anya,” nokwa popya a ti: “Ongahelipi handi dulu okulonga owii u fike opo nokunyona kuKalunga?” (Gen. 39:​8-10) Osha yela kutya Josef okwa li e shii kutya oshike ta ka ninga po komesho yefimbo, ofimbo ina yelekwa komukulukadi waPotifar. Osho osha li she shi ningifa shipu kuye okulonga osho sha yuka, eshi a li a yelekwa.

14. Ongahelipi hatu dulu okulihonga okuhenuka omayeleko?

¹⁴ Ongahelipi to dulu okuulika kutya owa tokola toko ngaashi Josef? Oto dulu okutokola paife osho to ka ninga, ngeenge opa holoka eyeleko. Lihonga okuhenuka diva oinima oyo Jehova e tonde, nokudika eenyala medu uha diladile nokuli kuyo. (Eps. 97:10; 119:165) Kungaho, otashi ke ku kwafela uha nyone, ngeenge to yelekwa. Ou shii nale nghee to ke linyenga.

15. Ongahelipi omunhu ta dulu okuulika kutya ota kongo Jehova a ‘mana mo’? (Ovaheberi 11:6)

¹⁵ Otashi dulika u shii kutya owa mona oshili nonokutya owa hala okulongela Jehova nomutima woye aushe, ashike natango ku udite  kutya owe lilongekidila okuliyapulila Jehova nokuninginifwa. Oto dulu okuninga osho ohamba David ya ninga. Oto dulu okwiindila Jehova to ti: “Kalunga, konakone nge, u koneke omutima wange! Yeleke nge, u dilakane omadiladilo ange, opo u mone, ngeenge ondi li mondjila yepukifo, Ove u endife nge mondjila, ei tai twala moukwaalushe.” (Eps. 139:​23, 24, KB-13.) Jehova oha nangeke noupuna ovo “tave mu kongo va mana mo.” Eshi to longo noudiinini u hange elalakano lokuliyapulila Kalunga nokuninginifwa, oto mu ulikile kutya oto mu kongo wa mana mo. — Lesha Ovaheberi 11:6.

TWIKILA OKWEEHENA POPEPI NAJEHOVA

16-17. Ovo va kulila moshili, ongahelipi tava dulu okweehena popepi naJehova? (Johannes 6:44)

¹⁶ Jesus okwa popya kutya ovahongwa vaye ova nanwa kuJehova. (Lesha Johannes 6:44.) Diladila kunghee osho shikumwifi nosho yo kutya otashi ti shike kwoove. Jehova okwa mona sha shiwa momunhu keshe oo a nanena kuye. Oha tale ko oohandimwe va tya ngaho “ve likalekelwa,” ile “emona li na ondilo” kuye. (Deut. 7:6; esh.) Naave osho e ku tala ko ngaho.

¹⁷ Otashi dulika u li omunyasha oo a kulila moshili. Otashi dulika u udite kutya oto longele Jehova, molwaashi ashike ovadali voye tave shi ningi, ndele hamolwaashi Jehova e ku nanena kuye. Kakele kaasho, Ombiibeli oya ti: “Eheneni popepi naKalunga, opo nee ota ka ehena popepi nanye.” (Jak. 4:8; 1 Omaf. 28:9) Ngeenge owa katuka onghatu u ehene popepi naJehova, naye ota ka ehena popepi naave. Jehova ine ku tala ko u li ashike oshitukulwa shongudu. Oha nanene kuye keshe umwe pauhandimwe, mwa kwatelwa naavo va kulila moshili. Ngeenge omunhu a tya ngaho okwa katuka onghatu a ehene popepi naJehova, Jehova naye ota ka ehena popepi naye, ngaashi sha popiwa muJakob 4:8. — Yelekanifa 2 Ovatessalonika 2:13.

18. Oshike hatu ka kundafana moshitukulwa tashi shikula ko? (Epsalme 40:8)

¹⁸ Ngeenge owe liyapulile Jehova nokuninginifwa, oto hopaenene Jesus. Okwa li a halelela okuliyandja kuXe a longe keshe osho te mu pula. (Lesha Epsalme 40:8; Heb. 10:7) Moshitukulwa tashi shikula ko, ohatu ka kundafana osho tashi dulu oku ku kwafela u twikile okulongela Jehova noudiinini konima yeninginifo loye.