1. Oshipango shokondadalunde shilipi Jesus a pa ovashikuli vaye? (Tala efano kombada yoshifo.)

MOUFIKU oo wa tetekela efyo laJesus, okwa li a pa ovashikuli vaye oshipango shokondadalunde. Okwe va lombwela a ti: “Kaleni mu holafane ngaashi ame nda kala ndi mu hole.” Okwa weda ko a ti: “Kungaho, ovanhu aveshe otava ka shiiva kutya nye ovahongwa vange ngeenge omu holafane.” — Joh. 13:34, 35.

2. Omolwashike sha fimana okuulikilafana ohole?

² Jesus okwa popya kutya ovashikuli vaye vashili otava ka didilikwa mo ngeenge ova kala hava ulikilafana ohole oyo e va ulikila. Oshipango osho osha li sha yela nawa mefelemudo lotete nosho yo nokunena. Nomolwaasho sha fimanenena okuulikilafana ohole nonande oshidjuu okuninga ngaho.

3. Oshike hatu ka kundafana moshitukulwa eshi?

³ Oshidjuu okuulikilafana ohole molwaashi otu li ovalunde. Ndele nande ongaho, otwa pumbwa okukendabala okuhopaenena Kristus. Oshitukulwa eshi otashi ke tu kwafela tu kale hatu lalakanene ombili, tuhe na okatongo nokukala hatu yakula vamwe. Eshi hatu konakona oshitukulwa eshi, lipula kutya: ‘Oshike hatu lihongo kovamwatate novamwameme ovo va twikila okuulika ohole nonande opa li omashongo?’

4. Metwokumwe naMateus 5:23, 24, omolwashike tu na okupanga ombili nomumwatate oo tu ninafane naye oikonene?

⁴ Jesus okwe tu honga nghee sha fimana okupanga ombili nomumwatate ile nomumwameme oo tu ninafane naye oikonene. (Lesha Mateus 5:23, 24.) Okwa divilika kutya otwa pumbwa okukala tu na ekwatafano liwa novanhu vakwetu ngeenge otwa hala okukala twa hokiwa kuKalunga. Jehova oha kala a hafa ngeenge hatu kendabala tu pange ombili novamwatate. Ita ka kala a hokwa onghedi yetu yoku mu longela ngeenge otu na oikonene novamwatate ile inatu hala okukendabala okupanga ombili navo. — 1 Joh. 4:20.

5. Oshike she shi ningifa shidjuu komumwatate umwe okupanga ombili?

 ⁵ Otashi dulika tu mone shidjuu okupanga ombili. Omolwashike mbela? Natu ka taleni eshi sha ningilwa Mark. * Okwa li a uda nai eshi a tokolwa komumwatate umwe, nokupopila mowii Mark koilyo imwe yeongalo. Mark okwa li e linyenga ngahelipi? Okwa ti: “Onda li nda kanifa elipangelo nonda lya meenyandi.” Lwanima Mark okwa ka uda nai omolwonghedi omo e linyenga, nokwa kendabala okupa ombili omumwatate nokupanga oukaume. Ashike omumwatate okwa kala a dika eenyala medu, ina tambula ombili yaMark. Mark okwe lipopila a ti: ‘Omolwashike ndi na oku mu likumba ngeenge ina hala okupanga ombili naame?’ Ashike omupashukilishikandjo okwa li e mu ladipika aha sholole. Mark okwa li a ninga po shike?

6. (a) Mark okwa kala ta lalakanene ombili ngahelipi? (b) Ongahelipi Mark a tula moilonga Ovakolossi 3:13, 14?

⁶ Konima eshi Mark a diladila moule, okwa ka mona kutya ke na elininipiko nokulishii ouyuki. Okwa li a didilika kutya okwa pumbwa okulundulula oikala yaye. (Kol. 3:8, 9, 12) Opo nee okwa li a shuna vali komumwatate oo nelininipiko, ndele te mu pe ombili omolwelihumbato laye. Mark okwa shangela omumwatate oo onhumwafo noku mu pa ombili, ndele te mu lombwele kutya natango okwa hala va hovele okukala ookaume. Mark okwa pa yo omumwatate omaano manini, oo a li ta diladila kutya omumwatate ota ka kala e a hokwa. Shi nyikifa oluhodi, omumwatate oo ka li a dimina po Mark nokwa li natango a fula onya. Ashike Mark okwa twikila okudulika koshipango shaJesus shokuhola omumwaxe noku mu dimina po. (Lesha Ovakolossi 3:13, 14.) Nonande ovanhu vakwetu inava hala okupanga ombili nafye kutya otwa ninga eenghendabala, ohole yetu yopaKriste otai ke tu kwafela tu va dimine po nokwiilikana tu pange vali navo oukaume. — Mat. 18:21, 22; Gal. 6:9.

7. (a) Jesus okwe tu lombwela tu ninge shike? (b) Omumwameme umwe okwa li a taalela onghalo idjuu ilipi?

⁷ Jesus okwe tu ladipika tu ungaunge novanhu monghedi oyo twa hala ovanhu va  ungaunge nafye. Okwa weda ko yo kutya katu na ashike okukala tu hole ovo have tu ulikile ohole. (Luk. 6:31-33) Nonande inashi sha, ohatu ke linyenga ngahelipi ngeenge umwe meongalo ohe tu henuka noihe tu popifa? Osho osho sha li sha ningilwa Lara. Okwa ti: “Omumwameme umwe okwa li he lidimbike nge, nokanda li ndi shii kutya omolwashike. Osho osha li sha udifa nge nai, nokanda li handi hafele okuya kokwoongala.” Potete, Lara okwa kala ha tomhafana ta ti: ‘Nghi na e shi nde mu ninga. Vamwe meongalo navo ova li va didilika oikala yomumwameme oo.’

8. Oshike osho Lara a ninga opo a pange ombili, noshike hatu lihongo moshimoniwa shaye?

⁸ Lara okwa li a katuka eenghatu a pange ombili. Okwa li a ilikana kuJehova nokwa li a tokola a ka popye nomumwameme oo. Ova li va kundafana shi na sha noupyakadi oo, tave lipapatele nokupanga ombili. Oupyakadi oo owa li tau monika wa fa wa kandulwa po filufilu. Lara okwa ti: “Lwanima, omumwameme oo okwa li a ulikila nge oikala ya fa oyo a li a ulikila nge pehovelo. Osho osha li sha teya nge omukumo.” Potete, Lara okwa li ta diladila kutya ota ka kala ashike a hafa ngeenge omumwameme oo okwa lundulula oikala yaye. Ndele mokweendela ko kwefimbo, Lara okwa ka mona kutya oshinima sha denga mbada osho ta dulu okuninga okutwila okuungaunga naye pahole ‘noku mu dimina po nehalo liwa.’ (Ef. 4:32–5:2) Lara okwa dimbuluka kutya ohole yashili yopaKriste ‘ihai dimbuluka owii ye u ningilwa. Ohai tuvikile aishe, hai itavele aishe, hai teelele aishe nohai lididimikile aishe.’ (1 Kor. 13:5, 7) Lara okwa li a kupula kombuda oupyakadi oo. Mokweendela ko kwefimbo, omumwameme oo okwa ka panga vali oukaume naye. Ngeenge otwa lalakanene ombili novamwatate novamwameme nokutwikila oku va ulikila ohole, ohatu ka mona shili kutya ‘Kalunga kohole nokombili ota ka kala pamwe nafye.’ — 2 Kor. 13:11.

9. Metwokumwe nOilonga 10:34, 35, omolwashike tuhe na okukala tu na okatongo?

⁹ Jehova ke na okatongo. (Lesha Oilonga 10:34, 35.) Ohatu ka ulika kutya fye ovana vaye ngeenge otwa kala tuhe na okatongo. Ohatu  dulika koshipango shokukala tu hole ovanhu vakwetu ngaashi tu lihole fye vene nokukaleka po ombili pokati ketu novamwatate novamwameme. — Rom. 12:9, 10; Jak. 2:8, 9.

10-11. Ongahelipi omumwameme umwe a li a finda omadiladilo mai?

¹⁰ Okukala tuhe na okatongo haalushe hashi kala shipu kuvamwe. Pashihopaenenwa, diladila osho sha ningilwa omumwameme wedina Ruth. Eshi a li omunyasha, okwa li e na oupyakadi naumwe oo a li a dja koshilongo shimwe. Osha li she mu kuma ngahelipi? Ruth okwa ti: “Onda li ndi tonde keshe shimwe shi na sha noshilongo osho. Onda li handi diladila kutya ovanhu aveshe va dja koshilongo osho ova faafana, nokuli novamwatate novamwameme.” Ongahelipi Ruth a finda omadiladilo oo mai?

¹¹ Ruth okwa li a mona kutya oku na okukondjifa omadiladilo a tya ngaho. Opo nee okwa li a lesha oimoniwa nosho yo eelaporta mo-Yearbook [embo lokomudo] di na sha noshilongo osho. Okwa ti: “Onda li nda ninga eenghendabala ndi kale ndi na etaleko liwa li na sha novanhu vokoshilongo osho. Onda li nda didilika kutya ovamwatate novamwameme ove na ouladi wokulongela Jehova. Nonda ka mona kutya navo ove li oshitukulwa shoumwainafana wetu womounyuni aushe.” Lwanima, Ruth okwa ka mona kutya okwa pumbwa okuulikila omumwameme oo ohole. Okwa ti: “Ngeenge nda shakena novamwatate novamwameme vokoshilongo oko, ohandi ningi eenghendabala nda mana mo ndi pange oukaume navo. Ohandi kundafana navo opo ndi va shiive nawa.” Osho osha eta oidjemo ilipi? Ruth okwa ti: “Mokweendela ko kwefimbo, onda li nda efa po filufilu omadiladilo ange mai.”

12. Omumwameme wedina Sarah okwa li e na oupyakadi ulipi?

¹² Vamwe otashi dulika va kale ve na okatongo inave shi didilika. Pashihopaenenwa, Sarah okwa li ta diladila kutya ke na okatongo molwaashi iha tokola ovanhu she likolelela pamihoko, payuuyemo ile molwoinakuwanifwa oyo ve na mehangano. Okwa ti: “Onda li nda mona kutya ondi na okatongo.” Omonghedi ilipi mbela? Sarah okwa dja moukwaneumbo wa hongwa, nokwa li e hole ashike okweendafana novanhu ovo ve na onakudiwa ya faafana noyaye. Pomhito imwe okwa li nokuli a lombwela kaume kaye a ti: “Ohandi endafana ashike novaitaveli vakwetu ovo va hongwa. Ohandi henuka ovo inava kongholwa.” Osho otashi ulike kutya Sarah okwa li e na okuninga omalunduluko e na sha noikala yaye. Ngahelipi mbela?

13. Oshike hatu lihongo konghedi omo Sarah a li a lundulula oikala yaye?

¹³ Sarah okwa li a kwafelwa komupashukilishikandjo opo a lundulule oikala yaye. Okwa popya a ti: “Okwa li a pandula nge omolwoilonga yange youdiinini, omatyekosha mawa nosho yo eshi ndi shii Omishangwa. Opo nee okwa yelifa kutya eshi ngoo eshiivo letu tali ende tali kulu, osho ngoo twa pumbwa okukulika omaukwatya etu opaKriste ngaashi elininipiko, ondjele nolukeno.” Okwa li a tula moilonga eendjovo domupashukilishikandjo. Okwa ti: “Onda mona kutya osho sha fimana okukala tu na olukeno nohole.” Oshidjemo, okwa hovela okukala a tala ko ovamwatate novamwameme ve fike pamwe. Okwa yelifa a ti: “Onda kendabala okuuda ko kutya omaukwatya elipi e va ningifa va kale ve na ongushu momesho aJehova.” Ongahelipi shi na sha nafye? Katu na okukala hatu diladila kutya otu dule vamwe omolwouhongelwe wetu. Ngeenge otu “hole ovamwatate aveshe,” ohatu ka henuka okukala nokatongo. — 1 Pet. 2:17.

14. Metwokumwe nOvaheberi 13:16, Jehova oha kala e udite ngahelipi ngeenge hatu yakula vamwe?

¹⁴ Jehova oha kala a hafa ngeenge hatu  yakula vamwe. (Lesha Ovaheberi 13:16.) Okwe shi tala ko shi li onghedi yoku mu longela, unene tuu ngeenge hatu kwafele ovo ve na omhumbwe. (Jak. 1:27; 2:14-17) Nomolwaasho Ombiibeli ye tu ladipika ya ti: “Kaleni hamu yakula ovaenda.” (Rom. 12:13) Ngeenge hatu yakula vamwe ohatu ulike kutya otu na ko nasha shili navo, tu va hole notwa hala va kale ookaume ketu. Jehova oha kala a hafa ngeenge hatu li navo, hatu nu pamwe navo, ile ngeenge hatu kongo efimbo tu kale navo. (1 Pet. 4:8-10) Ashike ope na oinima imwe oyo tashi dulika i shi ningife shidjuu kufye okukala hatu yakula vamwe.

15-16. (a) Omolwashike vamwe tashi dulika va ongaonge okuyakula? (b) Oshike sha kwafela Edit opo a kale ha yakula vamwe?

¹⁵ Otashi dulika tu ongaonge okuyakula vamwe omolweenghalo donhumba. Natu ka taleni koshihopaenenwa shomufiyekadi wedina Edit. Ofimbo ina ninga Ondombwedi, ka li naanaa e hole okukala novanhu. Edit okwa li ha kala e udite kutya vamwe ovo ashike tava dulu okuyakula.

¹⁶ Konima eshi a ninga Ondombwedi, okwa li a lundulula okudiladila kwaye. Okwe lihonga okukala ha yakula vamwe. Okwa ti: “Eshi Olupale letu lOuhamba lipe la li tali tungwa, omukulunhuongalo umwe okwa li a lombwela nge kutya ope na ovalihomboli vamwe ovo tave uya okukwafela nokwa li a pula ngeenge ohandi dulu oku va idilila oule woivike ivali. Onda li nda dimbuluka nghee Jehova a li a nangeka noupuna omufiyekadi wokuSarefat.” (1 Eeh. 17:12-16) Edit okwa li a dimina oku va idilila. Mbela okwa li ngoo a mona omanangeko noupuna? Okwa ti: “Kava li ashike va kala naame oule woivike ivali, ndele ova li va kala po oule weemwedi mbali. Otwa li twa panga oukaume wopofingo navo oule wefimbo olo.” Edit okwa li yo a nangekwa noupuna eshi a mona ookaume kopofingo meongalo. Paife oku li omukokolindjila noha kala a hafa ngeenge ovo ha longo pamwe navo moukalele ve uya oku mu talela po nokulya pamwe naye. Okwa ti: “Ohandi kala nda hafa ngeenge handi yandje. Ashike oushili oyoo kutya onda mona omanangeko noupuna mahapu.” — Heb. 13:1, 2.

17. Luke nomukulukadi waye ova li va didilika shike?

 ¹⁷ Otashi dulika hatu yakula nale vamwe, ndele mbela itatu dulu okuxwepopala? Pashihopaenenwa, Luke nomukulukadi waye ove li ovalihomboli ovo hava yakula vamwe. Ova kala hava shivi pandjikilile komaumbo avo ovadali vavo, ovapambele, ookaume kopofingo nomupashukilishikandjo nomukulukadi waye. Luke okwa ti, “Otwa didilika kutya otwa li ashike hatu shivi ava vopopepi nafye.” Luke nomukulukadi waye ova li va xwepopaleka ngahelipi onghedi yavo yokuyakula vamwe?

18. Ongahelipi Luke nomukulukadi waye va xwepopaleka onghedi yavo yokuyakula vamwe?

¹⁸ Luke nomukulukadi waye ova li va lundulula etaleko lavo konima eshi va dilonga keendjovo daJesus odo tadi ti: “Ngeenge omu hole ashike ovo ve mu hole, omwa teelela oku ka mona ondjabi yashike?” (Mat. 5:45-47) Ova li va mona kutya ova pumbwa okuhopaenena Jehova oo ha yandje kwaaveshe. Onghee ova li va tokola okushiva ovamwatate novamwameme aveshe ovo inava shiva nande onale. Luke okwa ti: “Atushe ohatu hafele neenghono eendafano la tya ngaho. Ohatu twaafana omukumo nokutungafana.”

19. Ongahelipi hatu dulu okuulika kutya otu li ovahongwa vaJesus, notwa tokola toko okuninga shike?

¹⁹ Otwe lihonga nghee okukala tu holafane tashi tu kwafele tu kale hatu lalakanene ombili, tuhe na okatongo nohatu yakula vamwe. Otu na okududa mo omadiladilo keshe mai nokukala tu hole ovamwatate novamwameme tashi di komutima. Ngeenge otwa ningi ngaho, ohatu ka kala twa hafa nohatu ka ulika kutya otu li shili ovahongwa vaJesus. — Joh. 13:17, 35.