1. Metwokumwe na 1 Petrus 5:2, ovakulunhuongalo ohava hafele oufembanghenda ulipi?

 OVAKULUNHUONGALO Ovakriste ove lineekelelwa oshinakuwanifwa shokufila oshisho eedi daJehova di na ondilo. Ovalumenhu ovo ovadiinini ova lenga oufembanghenda wavo wokuyakula ovamwaxe, nohava longo noudiinini va kale ‘ovafita ovo tave va lifa.’ (Jer. 23:4; lesha 1 Petrus 5:2.) Inatu pandula tuu eshi tu na ovalumenhu va tya ngaho momaongalo etu!

2. Omayeleko elipi tashi dulika ovakulunhuongalo vamwe va taalele?

² Ovakulunhuongalo ohava shakeneke omashongo mahapu, eshi tava wanifa po oinakuwanifwa yavo. Pashihopaenenwa, ovakulunhuongalo ova pumbwa okulonga noudiinini, opo va file oshisho eongalo. Tony, omukulunhuongalo wokoUnited States, okwa li e na okulihonga okukala e na ondjele shi dulife nale, ngeenge tashi uya poilonga oyo e na okutambula ko. Okwa ti: “Eshi omukifi wekomba wo-COVID-19 wa hovela, onda kendabala okulonga oilonga ihapu yokuunganeka okwoongala nosho yo oukalele. Kashi na nee mbudi kutya onda longa shihapu shi fike peni, alushe opa li hapa kala oilonga ihapu ya pumbwa okulongwa. Onda ka kala nde lipyakidila neenghono, nokanda li vali ndi na efimbo lokulesha Ombiibeli, okuninga ekonakono lopaumwene nosho yo okwiilikana.” Ilir, omukulunhuongalo wokoKosovo, okwa li a taalela eshongo li lili. Eshi a li moshitukulwa omo mwa li mu na oita, okwa li ha mono shidjuu okudulika kewiliko olo hali di kehangano. Okwa ti: “Ouladi wange owa li wa yelekwa, eshi oshitaimbelewa sha li sha pa nge oshinakuwanifwa shokukwafela ovamwatate novamwameme,  ovo va li moshitukulwa osho sha li sha nyika oshiponga. Onda li nda tila, nonda li ndi wete ewiliko la fa itali longo.” Tim, omutumwa wokoAsia, okwa li ha mono shidjuu okulonga osho a li a pumbwa okulonga efiku keshe. Okwa ti: “Omafimbo amwe, onda li handi kala ndi udite nda loloka neenghono pamadiladilo nonda wililwa po pamaliudo.” Oshike tashi dulu okukwafela ovakulunhuongalo ovo va taalela omashongo a faafana?

3. Ongahelipi atusheni hatu dulu okumona ouwa mokukonakona oshihopaenenwa shOmutokoli Gideon?

³ Ovakulunhuongalo otava dulu okulihonga koshihopaenenwa shOmutokoli Gideon. (Heb. 6:12; 11:32) Okwa li omwaameni nosho yo omuwiliki woshiwana shaKalunga. (Ovatok. 2:16; 1 Omaf. 17:6) Ngaashi Gideon, ovakulunhuongalo ova nangekwa po, opo va file oshisho oshiwana shaKalunga pefimbo eli lidjuu neenghono. (Oil. 20:28; 2 Tim. 3:1) Ohatu dulu okulihonga kuGideon okukala tu na ondjele, ovalininipiki novaduliki. Elididimiko laye ola li la yelekwa, eshi a li ta wanifa po oinakuwanifwa yaye. Kutya nee otu li ovakulunhuongalo, ile hasho, ohatu dulu okulihonga okukala tu na olupandu omolwovakulunhuongalo vetu. Ohatu dulu okuyambidida ovalumenhu ovo hava longo noudiinini. — Heb. 13:17.

4. Ongahelipi Gideon a ulika kutya oku na ondjele nomulininipiki?

⁴ Gideon okwa li omulumenhu e na ondjele nomulininipiki. b Eshi omweengeli waJehova a li a lombwela Gideon kutya oye a hoololwa a xupife Ovaisrael momake Ovamidian, ovo ve na eenghono dinene, omulumenhu oo omulininipiki okwa li a nyamukula, a ti: “Oludi letu olongahoelela kuManasse, naame mwene omuxupielela movambuletu.” (Ovatok. 6:15) Okwa li e wete ina wana okuwanifa po oshinakuwanifwa osho, ashike Jehova okwa li e shii kutya ota dulu oku shi wanifa po. Kekwafo laJehova, Gideon okwa li a wanifa po oshinakuwanifwa shaye nomupondo.

5. Ongahelipi tashi dulika ondjele nelininipiko lomukulunhuongalo li yelekwe?

⁵ Ovakulunhuongalo ohava ningi ngaashi tava dulu, opo va kale ve na ondjele nosho yo elininipiko moinima aishe. (Mika 6:8; Oil. 20:18, 19) Ihave litangele osho tava dulu okulonga, ile osho va pondola, noihava diladila kutya kave na oshilonga, molwaashi ashike va  ninga omapuko onhumba. Kakele kaasho, omukulunhuongalo ota dulu okutaalela omayeleko. Pashihopaenenwa, otashi dulika a tambule ko oinakuwanifwa ihapu, ndele ta ka mona shidjuu oku i wanifa po aishe. Ile otashi dulika a kembaulwe omolwonghedi omo a ungaunga noshinakuwanifwa shonhumba, ile a tangwe omolwonghedi omo a wanifa po shikwao. Oshike ovakulunhuongalo tave lihongo kuGideon, osho tashi va kwafele meenghalo da tya ngaho?

6. Ovakulunhuongalo otava dulu okulihonga shike shi na sha nondjele kuGideon? (Tala yo efano.)

⁶ Pula ekwafo. Omunhu oo e na ondjele oku shii omangabeko aye. Gideon okwa li e na ondjele, molwaashi okwa li ha pula vamwe ve mu kwafele. (Ovatok. 6:27, 35; 7:24) Ovakulunhuongalo ovanaendunge ohava ningi sha faafana. Tony, oo a popiwa metetekelo, okwa ti: “Omolweputuko lange, ohandi tambula ko oilonga ihapu i dulife pwaayo handi dulu okulonga. Onghee onda li nda tokola, opo ndi kwatele melongelokalunga loukwaneumbo wetu oshikundafanwa shi na sha nondjele, nonda li nda pula omukulukadi wange kutya ota ti ngahelipi kombinga yaasho. Onda li yo nda talulula okavidio ko jw.org ke na oshipalanyole, Deula, lineekela, nokupameka vamwe ngaashi Jesus a li ha ningi.” Tony okwa li a hovela okukala ha pula vamwe ve mu kwafele moilonga yaye. Oshidjemo? Tony okwa ti: “Oilonga oya li ya longwa meongalo nonda li nda mona efimbo la wana lokulipalula pamhepo.”

7. Ongahelipi ovakulunhuongalo tava dulu okuhopaenena Gideon, ngeenge tava kembaulwa? (Jakob 3:13)

⁷ Ino handuka, ngeenge to kembaulwa. Eyeleko limwe olo ovakulunhuongalo tava dulu okutaalela, ongeenge tava kembaulwa. Natango, oshihopaenenwa shaGideon otashi dulu okukwafela. Gideon okwa li e shii kutya ina wanenena. Onghee okwa li a ngungumana, eshi a li ta kembaulwa kOvaefraim. (Ovatok. 8:1-3) Gideon ka li e va nyamukula a handuka. Okwa li a ulika kutya omulininipiki, eshi a li a pwilikina kengongoto lavo nokwa li a popya navo nonghenda. Osho osha li she va ngungumaneka. Ovakulunhuongalo ovanaendunge ohava hopaenene Gideon mokupwilikina nelitulemo nosho yo mokuha handuka, ngeenge tava kembaulwa. (Lesha Jakob 3:13.) Kungaho, otava ka xumifa komesho ombili meongalo.

8. Ovalumenhu ovo va nangekwa po ove na okulinyenga ngahelipi, ngeenge tava pandulwa? Yandja oshihopaenenwa.

⁸ Olupandu nali yukifwe kuJehova. Eshi Gideon a li ta pandulwa, molwaashi a finda Ovamidian, okwa li a yukifa elitulemo kuJehova. (Ovatok. 8:22, 23) Ongahelipi ovalumenhu ovo va nangekwa po tava dulu okuhopaenena Gideon? Otava dulu okupandula Jehova omolwaasho va wanifa po. (1 Kor. 4:6, 7) Pashihopaenenwa, ngeenge omukulunhuongalo ta pandulwa omolwonghedi yaye yokuhonga, ota dulu okuyukifa elitulemo kodjo yehongo, Eendjovo daKalunga, ile kedeulo olo hatu pewa okudilila kehangano laJehova. Ovakulunhuongalo otava dulu okudiladila, ngeenge ohava hongo ngoo monghedi oyo tai fimanekifa Jehova, ile ohave limonikifa ashike kovanhu. Natu ka taleni koshimoniwa shomukulunhuongalo wedina Timothy. Eshi a li opo a nangekwa po, Timothy okwa li e hole okuyandja oipopiwa yomoipafi. Okwa ti: “Onda li handi ningi etwalemo lile nokulongifa omafaneko a kitakana. Naasho luhapu osha li hashi ningifa ovanhu va pandule nge. Ashike osho osha li sha ningifa ovanhu va yandje elitulemo kwaame, ponhele yoku li yukifa kOmbiibeli, ile kuJehova.” Mokweendela ko kwefimbo, Timothy okwa li a mona kutya okwa pumbwa okulundulula onghedi yaye yokuhonga, opo vamwe vaha yandje elitulemo lihapu kuye. (Omayel. 27:21) Oshidjemo osha li shike? Okwa ti: “Paife ovanhu va yoolokafana ohava lombwele nge nghee oshipopiwa shange she va kwafela va ungaunge noupyakadi, ve lididimikile eyeleko, ile va ehene popi elela naJehova. Omatyekosha oo ohaa etele nge ehafo linene shi dulife olupandu olo nda li handi pewa omido da ya.”

9. Ongahelipi okudulika nosho yo ouladi waGideon wa li wa yelekwa? (Tala efano kombada yoshifo.)

⁹ Konima eshi Gideon a li a nangekwa po e li omutokoli, okudulika nosho yo ouladi waye owa li wa yelekwa. Okwa li a pewa oshinakuwanifwa sha kwata moiti shokuhanauna po oaltari yaBaal oyo ya li ya tungwa kuxe. (Ovatok. 6:25, 26) Lwanima, eshi Gideon a li a ongela etangakwaita, okwa li a lombwelwa lwoikando ivali a ninipike omuvalu walo. (Ovatok. 7:2-7) Xuuninwa, okwa li a lombwelwa va ponokele onhanda yovatondi mokati koufiku. — Ovatok. 7:9-11.

10. Ongahelipi tashi dulika okudulika kwomukulunhuongalo ku yelekwe?

¹⁰ Ovakulunhuongalo ove na okukala hava “dulika nehalo liwa.” (Jak. 3:17) Omukulunhuongalo oo ha dulika oha tula moilongo osho Omishangwa tadi ti nosho yo ewiliko olo tali di kehangano laKalunga. Kungaho, oha tulile po vamwe oshihopaenenwa shiwa. Ashike nande ongaho, okudulika kwaye otashi dulika ku yelekwe. Pashihopaenenwa, otashi dulika a mone shidjuu okweendela pamwe newiliko olo ta pewa. Peemhito dimwe, otashi dulika a kale a limbililwa ngeenge ewiliko lonhumba otali longo ngoo shili, ile oli li tuu pandunge. Ile otashi dulika a pulwe a longe oshilonga osho tashi dulu oku mu kwatifa po. Ongahelipi ovakulunhuongalo tava dulu okuhopaenena okudulika kwaGideon meenghalo da tya ngaho?

11. Oshike tashi dulu okukwafela ovakulunhuongalo va kale hava dulika?

¹¹ Pwilikina noukeka kewiliko noku li tula moilonga. Kalunga okwa li a lombwela Gideon nghee e na okuhanauna po oaltari yaxe, apa e na okutunga oaltari ipe yaJehova nosho yo oshinamwenyo osho e na okuyamba. Gideon ka li a limbililwa ewiliko olo, okwa li ashike e li tula moilonga. Kunena, ovakulunhuongalo ohava pewa ewiliko okudja kehangano laJehova okupitila meenhumwafo, momashiivifo nosho yo momifindalandu di na sha nonghalonawa yetu yopamhepo nosho yo yopalutu. Otu hole ovakulunhuongalo, molwaashi ohava shikula noudiinini ewiliko lopakalunga. Eongalo alishe ohali mono ouwa. — Eps. 119:112.

12. Ongahelipi ovakulunhuongalo tava dulu okutula moilonga Ovaheberi 13:17, ngeenge ehangano laJehova ole va lombwele va lundulule onghedi omo hava ningi oinima?

¹² Kala u na ehalo lokuninga omalunduluko. Dimbuluka kutya Jehova okwa li a lombwela Gideon a shunife hanga ovakwaita aveshe keumbo. (Ovatok. 7:8) Gideon otashi dulika a li te lipula kutya: ‘Elunduluko eli ola pumbiwa ngoo shili? Otali ka longa ngoo?’ Ashike nande ongaho, Gideon okwa li a dulika. Ovakulunhuongalo kunena ohava hopaenene Gideon mokudulika, eshi ehangano tali va lombwele va ninge oinima monghedi imwe i lili. (Lesha Ovaheberi 13:17.) Pashihopaenenwa, mo 2014, Olutuwiliki ola li la ninga po elunduluko li na sha nonghedi omo oilonga yokutunga Omalupale Ouhamba nosho yo Omalupale Oyoongalele hai futwa. (2 Kor. 8:12-14) Omaongalo kaa li vali e na okushunifa omukuli. Ponhele yaasho, omaongalo mounyuni aushe okwa li e na okwoongela oyuuyemo yao,  opo omatungo ehangano a dule okutungwa keshe opo a pumbiwa, kashi na nee mbudi kutya eongalo otali dulu okufuta, ile hasho. Eshi José a li a uda kombinga yelunduluko olo, okwa li a limbililwa ngeenge otali ka longa ngoo. Okwe lipopila, a ti: ‘Itapa ka tungwa nande Olupale lOuhamba limwe. Oinima hasho hai longo ngaho mounyuni ou.’ Oshike sha kwafela José a yambidide ewiliko olo? Okwa ti: “Eendjovo odo di li mOmayeletumbulo 3:5, 6 oda dimbulukifa nge ndi kale nde lineekela muJehova. Oshidjemo osha li shikumwifi neenghono. Itatu tungu ashike Omalupale Ouhamba mahapu, ndele otwe lihonga yo okuyandja omayambidido meenghedi dimwe di lili, opo pa kale efaafano.”

13. (a) Gideon okwa li a tomhwa shi na sha nashike? (b) Ongahelipi ovakulunhuongalo tava dulu okuhopaenena Gideon? (Tala yo efano.)

¹³ Longa ehalo laJehova nouladi. Gideon okwa li a dulika kuJehova, nonande okwa li a tila, noshinakuwanifwa shaye osha li sha nyika oshiponga. (Ovatok. 9:17) Konima eshi a li a pewa eshilipaleko okudja kuJehova, Gideon okwa li a tomhwa filufilu kutya Kalunga ote ke mu yambidida, eshi ta amene oshiwana shaYe. Ovakulunhuongalo, ovo ve li moitukulwa omo oilonga yetu ya shilikwa, ohava hopaenene Gideon. Ohava kwatele komesho nouladi okwoongala nosho yo oilonga yomomapya, nonande ope na omatilifo e na sha nokukwatwa po, okupulwaapulwa, okukanifa oilonga, ile elongifo leenghono. c Pefimbo loudjuu munene, ovakulunhuongalo otava ka pumbwa ouladi, opo va dulike komalombwelo oo tava ka pewa, nonande osha nyika oshiponga oku a tula moilonga. Omalombwelo oo otashi dulika a ka kale e na sha nokuyandja etumwalaka olo la fa eemhawe dopafaneko nanghee tu na okuxupa peponokelo laGog yaMagog. — Hes. 38:18; Eh. 16:21.

14. Elididimiko laGideon ola li la yelekwa ngahelipi?

¹⁴ Gideon okwa li e na okulonga noudiinini, opo a longe e li omutokoli. Eshi Ovamidian va li va lya onghaku pefimbo lolwoodi, olo la li ko mokati koufiku, Gideon okwa li e va taataa okudja kOlufilu laJisreel fiyo okomulonga waJordan, oo tashi dulika wa li wa dingililwa koixwa ihapu. (Ovatok. 7:22) Mbela Gideon okwa li ashike  a xulila puJordan? Ahowe! Nonande okwa li a loloka, ye pamwe novalumenhu vaye 300 ova li va tauluka omulonga nova twikila oku va taataa. Xuuninwa, ova li va hanga Ovamidian noku va finda. — Ovatok. 8:4-12.

15. Onaini tashi dulika elididimiko lomukulunhuongalo li yelekwe?

¹⁵ Omafimbo amwe, omukulunhuongalo otashi dulika a kale a loloka palutu, pamadiladilo, ile a wililwa po pamaliudo omolwokufila oshisho eongalo nosho yo oukwaneumbo waye. Meenghalo da tya ngaho, ongahelipi ovakulunhuongalo tava dulu okuhopaenena Gideon?

16-17. Oshike sha kwafela Gideon e lididimike, nelineekelo lilipi ovakulunhuongalo tava dulu okukala ve na? (Jesaja 40:28-31) (Tala yo efano.)

¹⁶ Kala u na elineekelo kutya Jehova ote ku pameke. Gideon okwa li e lineekela kutya Jehova ote ke mu pa eenghono, na Jehova osho a li e mu ningila. (Ovatok. 6:14, 34) Pomhito imwe, Gideon novalumenhu vaye ova li tava taataa eehamba mbali dOvamidian kolupadi, ofimbo eehamba odo tashi dulika da li keengamelo. (Ovatok. 8:12, 21) Ashike kekwafo laKalunga, Ovaisrael ova li ve va hanga nokufindana molwoodi olo. Sha faafana, ovakulunhuongalo navo otava dulu okulineekela muJehova, oo “iha loloka, ndele iha kenyanana.” Ote ke va pa eenghono, ngeenge ve di pumbwa. — Lesha Jesaja 40:28-31.

¹⁷ Natu ka taleni koshimoniwa shaMatthew, oshilyo shOkomitiye yOkukwatafana nOipangelo. Oshike she mu kwafela e lididimike? Matthew okwa ti: “Onda mona oushili wOvafilippi 4:13. Peemhito dihapu, ngeenge nda loloka neenghono nohandi kala ndi udite itandi dulu vali okuninga sha, ohandi ilikana nda mana mo. Ohandi pula Kalunga a pe nge eenghono dopalutu nosho yo dopamadiladilo, odo nda pumbwa, opo ndi yambidide ovamwatate. Peemhito da tya ngaho, ohandi kala ndi udite omhepo yaJehova tai pameke nge notai kwafele nge ndi lididimike.” Ngaashi Gideon, ovakulunhuongalo vetu ovo hava longo noudiinini, otashi dulika va taalele omandangalati, eshi tava lifa oufita nopehe na okuliholamwene. Ashike ove na okukala ve na ondjele nokudidilika kutya itava dulu alushe okuwanifa po oshilonga keshe osho va hala okulonga. Ndele otava dulu okukala ve lineekela kutya Jehova ota ka uda omailikano avo, eshi tave mu pula e va kwafele note ke va pameka ve lididimike. — Eps. 116:1; Fil. 2:13.

18. Ongahelipi ovakulunhuongalo tava dulu okuhopaenena Gideon?

¹⁸ Ope na oilihongomwa i li pefimbo notai longo oyo ovakulunhuongalo tava dulu okulihonga kuGideon. Ovakulunhuongalo ove na okukala ve na ondjele nelininipiko, ngeenge tashi uya poilonga oyo ve na okutambula ko nosho yo monghedi omo ve na okulinyenga, ngeenge tava kembaulwa, ile tava pandulwa. Ove na okukala ovaduliki novaladi, unene tuu eshi exulilo lounyuni ou tali ende tali ehene popepi. Ove na okukala ve na elineekelo kutya kashi nee mbudi kutya omandangalati elipi tashi dulika va shakeneke, Kalunga ote ke va pa eenghono. Otwa pandula neenghono ovafita ovo hava longo noudiinini notwa ‘fimaneka ovalumenhu ngaashi vo.’ — Fil. 2:29.