1, 2. Omalunduluko oludi lilipi taa dulu okuningwa, ngaashi sha ulikwa moshimoniwa shomunafikola umwe oo a li ha i kofikola yopombada?

OMUNAFIKOLA wedina Tony okwa li a hala okweefa po ofikola yopombada. Omumati oo ehe na xe, ka li naanaa e na ohokwe mofikola nokwa li ha tale eemuvi noha kala nookaume kaye momaxuliloshivike. Ka li ha longifa eenghono noka li a pikwa koikolwifa. Ka li e na elalakano lasha monghalamwenyo. Nokwa li a limbililwa ngeenge Kalunga oko ngoo e li shili. Opo nee okwa ka shakeneka ovalihomboli vEendombwedi nokwa li a popya navo nghee ha kala a limbililwa kombinga yaKalunga. Ova li ve mu pa oumbo vavali, The Origin of Life — Five Questions Worth Asking nosho yo Was Life Created?

² Eshi ovalihomboli ovo va ka aluka, Tony okwa li a lundulula omadiladilo aye. Okwa li a konakona oumbo ovo a mana mo, nomapandja avo okwa li e li tonya keexulo. Okwa ti kutya, “Kalunga oko e li shili.” Okwa li a tambula ko ekonakonombiibeli, nomokweendela ko kwefimbo, onghalamwenyo yaye oya ka lunduluka. Okwa hovela okukala he lihongo nawa kofikola nokwa li umwe womwaavo hava piti noitwa yopombada. Nokuli nomukulunhufikola, oo a li e shii eitavelo laTony  lipe, okwa li a kumwa. Okwa ti: “Owa ninga omalunduluko manene meenghedi nosho yo mokulihonga kwoye. Mbela omolwaashi ho endafana nEendombwedi daJehova?” Tony okwa ti kutya heeno nokwa li a yandja oundombwedi muwa. Okwa li a pita ofikola yaye yopombada, nopaife oku li omukokolindjila wondjikilile nosho yo omuyakuliongalo. Okwa hafa yo paife eshi e na Xe a denga mbada, Jehova. — Eps. 68:5.

3. Jehova okwa lombwela ovanyasha va hoolole ondjila ilipi?

³ Oshimoniwa shaTony otashi tu dimbulukifa kutya Jehova oku na ko nasha lelalela novanyasha ovo ve li mokati ketu. Okwa hala mu hafele oidjemo iwa nomu kale nonghalamwenyo ya mbilipalelwa. Onghee hano, okwe mu pa omayele a ti: “Dimbulukwa Omushiti woye momafiku ounyasha woye.” (Omuud. 12:1) Osho kashi fi shipu mounyuni ou wokunena. Ashike nande ongaho, otashi shiiva. Kekwafo laKalunga, oto dulu okupondola, hamounyasha ashike woye ndele omonghalamwenyo yoye aishe. Oku shi yelifa, diladila koshilihongomwa osho hatu dulu okulihonga kehokololo laDavid naGoliat nosho yo eshi Ovaisrael va li va kwata ko Edu lEudaneko.

4, 5. Oshilihongomwa sha denga mbada shilipi hatu dulu okulihonga eshi Ovaisrael va li va finda Ovakanaan nosho yo mehokololo laDavid naGoliat? (Tala efano pehovelo loshitukulwa.)

⁴ Eshi Ovaisrael va li popepi nEdu lEudaneko, Kalunga ka li e va lombwela va xwepopaleke ounghulungu wavo wokulwa ile ve lideulile oita. (Deut. 28:1, 2) Ponhele yaasho, okwa li e va lombwela kutya ova pumbwa okudulika koipango yaye nokulineekela muye. (Jos. 1:7-9) Pataleko lopanhu, omayele oo otaa dulu okukala itaa ti sha. Ashike omayele oo okwa li a denga mbada, molwaashi Jehova okwa li a pa oshiwana shaye efindano konima eshi sha li sha finda Ovakanaan. (Jos. 24:11-13) Okudulika kuKalunga otaku pula eitavelo, ashike eitavelo olo ohali kwafele ovanhu va pondole alushe. Nonande opa pita efimbo, oshili oyo inai lunduluka. Otai longo nokunena.

⁵ Omukwaita umwe, Goliat, okwa li e na oule weemeta 2.9 nokwa li a homatekeka. (1 Sam. 17:4-7) Ashike David okwa li e na oinima ivali: oshiumbifo nosho yo eitavelo muKalunga kaye, Jehova. David okwa li ta monika a fa elai kwaavo va li vehe na eitavelo. Kava li tuu va puka! Goliat oye a li elai. — 1 Sam. 17:48-51.

6. Oshike hatu ka kundafana moule paife?

⁶ Oshitukulwa sha tetekela osha popya oinima inhe oyo hai weda ko kehafo letu nohai tu kwafele tu pondole monghalamwenyo. Oinima oyo oyo okuwanifa po omhumbwe yetu yopamhepo, okupandula ookaume ketu ovo twa pewa kuKalunga, okulitulila po omalalakano opamhepo taa ti sha nosho yo okuhafela emanguluko tu li oshiwana shaKalunga. Natu ye moule woshikundafanwa osho, nopomhito ei ohatu ka kundafana omafinamhango amwe oo taa hangwa mEpsalme 16.

7. (a) Ongahelipi to dulu okuyelifa omunhu oo ha diladila pamhepo? (b) Oshike sha li “oshitukulwa” shaDavid, nosha li she mu kuma ngahelipi?

⁷ Omunhu oo ha diladila pamhepo oku na eitavelo muKalunga noha tale ko oinima ngaashi Kalunga he i tale ko. Oha kongo ewiliko kuKalunga nokwa tokola okudulika kuye. (1 Kor. 2:12, 13) David oku li oshihopaenenwa shiwa. Okwa imba a ti: “Omwene Oye oshitukulwa shefyuululo lange noshoneka yange.” (Eps. 16:5) “Oshitukulwa” osho osha kwatela mo ekwatafano liwa laDavid naJehova, oko ha kongo eameno. (Eps. 16:1) Oshidjemo? Okwa shanga a ti: “Nomwenyo wange tau nyakukwa.” Kapa li shimwe hashi etele David ehafo shi dulife ekwatafano laye naKalunga. — Lesha Epsalme 16:9, 11.

8. Oinima imwe ilipi hai weda ko kehafo letu lashili?

⁸ Ehafo olo David a li ha mono ihali monika kwaavo hava yandje elitulemo komalihafifo nosho yo komamona. (1 Tim. 6:9, 10) ­Omumwatate  umwe wokoCanada okwa ti: “Embilipalelo lashili ihali etwa kwaasho hatu mono monghalamwenyo, ndele okwaasho hatu pe Omuyandji wakeshe oshipewa shiwa, Jehova Kalunga.” (Jak. 1:17) Heeno, okukulika eitavelo muJehova nosho yo oku mu longela otaku ka ningifa onghalamwenyo yoye i kale i na eityo notaku ku etele embilipalelo. Ongahelipi to dulu okukulika eitavelo loye? Ou na okukala ho kala efimbo naye, mokulesha Eendjovo daye, mokukonakona eshito laye nosho yo mokudiladila kombinga yomaukwatya aye, mwa kwatelwa ohole yaye yoku ku hola. — Rom. 1:20; 5:8.

9. Ongahelipi to dulu okweefa Eendjovo daJehova di ku me ngaashi da li da ma David?

⁹ Ohole yaJehova yoku tu hola omafimbo amwe ohai ulikwa okupitila momayele opahole. David okwa li a tambula ko omayele opahole a tya ngaho. Okwa ti: “Ohandi pandula, Omwene, eshi wa pukulula nge; moufiku omutima wange tau shi dimbulukifa nge.” (Eps. 16:7) Okwa li ha dilonga kunghee Kalunga ha diladila, nokukaleka omadiladilo aye metwokumwe nao nokweefa e mu me. Ngeenge owa ningi sha faafana, naave oto ka kulika ohole yoye yokuhola Kalunga nosho yo ehalo loye lokudulika kuye. Oto ka kulika yo oupamhepo woye. Omumwameme wedina Christin okwa ti: “Ngeenge handi ningi omapekapeko nokudilonga kwaasho nda lesha, ohandi kala ndi udite kutya Jehova okwa nunina nge oshinima osho.”

10. Ngaashi sha popiwa muJesaja 26:3, okukala hatu tale ko oinima ngaashi Kalunga oku na omauwa elipi?

¹⁰ Kashi fi omutotolombo okupopya kutya okutala ko oinima ngaashi Kalunga he i tale ko ohaku ku pe yo eshiivo nounongo wa wedwa po moku ku kwafela u tale ko ounyuni nosho yo onakwiiwa ngaashi Kalunga. Omolwashike Kalunga e ku pa eshiivo nounongo wa tya ngaho? Okwa hala u litulile po omalalakano taa ti sha monghalamwenyo, u ninge omatokolo opandunge, nou kale wa teelela nodjuulufi onakwiiwa u na elineekelo. (Lesha Jesaja 26:3.) Omumwatate wedina Joshua, oo hadi koUnited States, okwa ti: “Okukala popepi naJehova ohaku ku kwafele u kale u na etaleko la yuka mukeshe shimwe.” Osho oshoshili nohashi eta embilipalelo.

11. David okwa holola ngahelipi oshinima sha fimana shi na sha nokukonga ookaume kashili?

¹¹ Lesha Epsalme 16:3. David okwa li e shii nghee ta dulu okumona ookaume kashili. Okwa li a ‘hokwa’ okweendafana naavo ve hole Jehova, ovo va popiwa ve li “ovayapuki,” sha hala okutya ovo va li va koshoka paenghedi novayuki. Omupsalme umwe naye osho a li e udite ngaho shi na sha nokuhoolola ookaume. Okwa shanga a ti: “Aame omukwao waava, tave ku tila, nowaava, tava shikula omalombwelo oye.” (Eps. 119:63) Ngaashi twe shi mona moshitukulwa sha tetekela, naave oto dulu okumona ookaume vahapu vawa mokati kaavo hava tila nohava dulika kuJehova. Ookaume ovo ova kwatela mo ovanhu vomido da yoolokafana.

12. Oukaume pokati kaDavid naJonatan owa li wa kanghamena koshike?

¹² Omupsalme David ka li ashike a panga oukaume noomakula vaye. Okwa li yo e na kaume kopofingo oo ta dulu oku mu tulila mo. Mbela oto dimbuluka edina laye? oJonatan. Oukaume wavo oo umwe womoukaume wa twa kekipa wa shangwa mOmbiibeli. Mbela ou shii ngoo kutya Jonatan okwa li e dule David nomido 30 lwaapo? Mbela oukaume wavo owa li wa kanghamena koshike? Owa li wa kanghamena keitavelo lavo muKalunga, kefimanekafano nosho yo kouladi wavo eshi tava kondjifa ovatondi vaKalunga. — 1 Sam. 13:3; 14:13; 17:48-50; 18:1.

13. Ongahelipi to dulu okumbwalangadja mokukonga ookaume? Yandja oshihopaenenwa.

¹³ Ngaashi David naJonatan, nafye ohatu mono ‘ehafo linene’ mokukala tu hole ovo ve hole Jehova nove na eitavelo muye. Kiera, oo a kala ta longele Kalunga oule womido, okwa ti: “Onda panga oukaume novanhu mounyuni  ­aushe, ovanhu vomomaputuko novomomihoko da yoolokafana.” Ngeenge owa mbwalangadja monghedi oyo, oto ka mona oumbangi wa yela weenghono dokuhanganifa dEendjovo nomhepo yaKalunga.

14. (a) Oshike tashi dulu oku ku kwafela u litulile po omalalakano taa ti sha? (b) Ovanyasha vamwe ohava kala ve udite ngahelipi kombinga yokulitulila po omalalakano opamhepo?

¹⁴ Lesha Epsalme 16:8. David okwa li ta yandje elitulemo kokulongela Jehova. Naave oto ka hafela onghalamwenyo ya mbilipalelwa ngeenge owa pitifa komesho okulongela Jehova nokulitulila po omalalakano oku mu longela. Omumwatate wedina Steven okwa ti: “Okulonga ndi na omalalakano, oku a hanga nosho yo okutala opo nda ninga omalunduluko monakudiwa okwa etela nge embilipalelo.” Omumwatate omunyasha a dja koGermany oo ta longele paife koshilongo shimwe okwa ti kutya, “Ngeenge nda kulupa, inandi hala okutala konakudiwa yange nokumona kutya ashishe osho nda ninga oshi na sha ashike nouwa wange.” Otwe lineekela naave osho u udite ngaho. Ngeenge osho, longifa oshali yoye u fimanekife Kalunga nou ningile vamwe ouwa. (Gal. 6:10) Litulila po omalalakano opamhepo, ndele to pula Jehova okupitila meilikano e ku kwafele waa hange. Ota ka kala a hafa okunyamukula omailikano a tya ngaho. — 1 Joh. 3:22; 5:14, 15.

15. Omalalakano elipi tashi dulika we litulila po? (Tala oshimhungu “ Omalalakano amwe oo taa ti sha.”)

¹⁵ Omalalakano elipi tashi dulika we litulila po? Otaa dulu okukala a kwatela mo okuyandja omatyekosha to longifa oitya yoye mwene pokwoongala kwopaKriste, okukokola ondjila, ile okuya kObetel. Otashi dulika u kendabala okulihonga elaka limwe nelalakano loku ka longa koshilongo shimwe moukalele. Barak, omupiya omunyasha oo ha longo efimbo li yadi, okwa ti kutya, “Okupenduka efiku keshe ndi shii kutya ohandi ka longifa eenghono dange mokulongela Jehova ohaku tulumukifa nge shi dulife omalipyakidilo amwe.”

16. David okwa li e udite ngahelipi kombinga yomifikamhango daJehova douyuki, nomolwashike?

¹⁶ Lesha Epsalme 16:2, 4. Ngaashi twe shi mona moshitukulwa sha tetekela, eemhango nomafinamhango aKalunga ouyuki okwe tu  ­mangulula moku tu kwafela tu kulike ohole yaasho shiwa notu kale tu tonde osho shii. (Amos 5:15) Omupsalme David okwa li a tala ko Jehova e li Odjo ‘youwa.’ Ouwa ohau kwafele omunhu a longe osho shiwa, ile shi li mondjila. David okwa li a longa noudiinini opo a hopaenene Kalunga kaye, nokuninga ouwa ngaashi Kalunga. David okwa li yo e tonde osho shii momesho aKalunga. Osho osha kwatela mo okulongela oikalunga, oilonga oyo tai nyono po ehafo lovanhu nosho yo efimaneko olo Jehova e na okupewa. — Jes. 2:8, 9; Eh. 4:11.

17, 18. (a) David okwa li a didilika shike kombinga yoidjemo oyo hai etifwa komalongelokalunga oipupulu? (b) Oshike hashi ningifa ovanhu kunena va ‘hapupalife ouyahame wavo’?

¹⁷ Pefimbo lOmbiibeli, omalongelokalunga oipupulu okwa li a tambula ko oluhaelo. (Hos. 4:13, 14) Oushili oyoo kutya omalongelokalunga a tya ngaho okwa li a hokwa oulunde wopambelela. Ashike osho inashi eta ehafo tali kalelele. Mepingafano naasho, David okwa ti kutya ‘ava ve likongela kalunga e lili, ove nomayehamo mahapu.’ Otava etele yo ovanhu vahapu okumona oixuna kuhapu. (Jes. 57:5) Jehova oku tonde oilonga inyanyalifi ya tya ngaho. (Jer. 7:31) Ngeno oko wa li pefimbo olo, otashi dulika ngeno wa pandula ovadali voye ngeenge ova li ve na eitavelo muJehova nohava dulika kuye.

¹⁸ Nokunena, omalongelokalunga oipupulu ohae lipwililikile oluhaelo, nokuli noushenge. Ashike ovanhu ovo ve na onghalamwenyo youkakombolilifa ya tya ngaho onghee ngoo tava twikile okumona oilanduliko ii okudja ngoo konale. (1 Kor. 6:18, 19) Ovanhu ‘otava hapupalifa ouyahame wavo,’ ngaashi tashi dulika we shi mona. Onghee hano, ovanyasha pwilikineni kuTate weni womeulu. Kaleni mwa tomhwa filufilu kutya okudulika kuye oku na sha nouwa weni. Kalekeni momadiladilo kutya oupyakadi keshe hau etifwa komapuko ou dule filufilu omalihafifo keshe opakafimbo. (Gal. 6:8) Joshua, oo a popiwa metetekelo, okwa ti kutya “Ohatu dulu okulongifa emanguluko letu monghedi keshe twa hala, ndele oku li longifa nai ihaku eta embilipalelo.”

19, 20. Ovanyasha ovo ve na eitavelo muJehova nohava dulika kuye otava ka mona omanangeko noupuna elipi?

¹⁹ Jesus okwa lombwela ovashikuli vaye a ti: “Ngeenge tamu kala meendjovo dange, onye ovalongwa vange shili, ndele tamu ka shiiva oshili, noshili otai mu mangulula.” (Joh. 8:31, 32) Emanguluko olo ola kwatela mo okumanguluka ko komalongelokalunga oipupulu, okulipwililikila oshinima shonhumba nosho yo okwiitavela oinima oyo ihe fi yoshili. Ola kwatela mo shihapu. Ngaashi twe shi mona, ola kwatela mo ‘emanguluko loshinge shovana vaKalunga.’ (Rom. 8:21) Makela emanguluko olo paife ‘mokukala metwokumwe neendjovo daKristus,’ ile omahongo aye. Kungaho, oto ka ‘shiiva oshili’; haku lihonga ashike kombinga yayo ndele oto kala yo metwokumwe nayo.

²⁰ Ovanyasha, hafeleni emanguluko leni olo mwa pewa kuKalunga. Longifeni pandunge emanguluko olo, ndele tamu litulile po ekanghameno liwa li na sha nonakwiiwa. Omumwatate umwe omunyasha okwa ti: “Okulongifa emanguluko pandunge u li omunyasha ohashi ku kwafele lela ngeenge to ningi omatokolo a kwata moiti, ngaashi okukonga oilonga tai wapalele ile okuhoolola kutya hombola ile hombolwa ile kala ino hombola ile ino hombolwa oule wefimbo lonhumba.”

21. Ongahelipi to dulu okukala mondjila oyo tai twala ‘komwenyo waalushe’?

²¹ Mounyuni ou wa kulupa, onghalamwenyo oyo haku tiwa oiwa inai koshoka noixupi. Ihatu kala tu shii kutya efiku lomongula otali uya nashike. (Jak. 4:13, 14) Oshiwa okukala mondjila oyo tai twala ‘komwenyo waalushe.’ (1 Tim. 6:19) Kalunga ihe tu fininike tu ende mondjila oyo. Ofye vene tu na okuninga ehoololo. Ninga Jehova “oshitukulwa” shoye. Hafela ‘oinima iwa’ ihapu oyo e ku pa. (Eps. 103:5) Kala u na eitavelo kutya ota dulu oku ku pa “ouyadihafo” nosho yo “ouwapalinyenye . . . fiyo alushe.” — Eps. 16:11.