1. Ovanyasha vahapu ova wanifa po nale oinima iwa ilipi?

 OMUDO keshe, ovanyasha Ovakriste omayovi ohava ninginifwa. Mbela owa katuka nale onghatu oyo? Ngeenge osho, ovamwatate novamwameme nosho yo Jehova ove ku hafela. (Omayel. 27:11) Diladila pauxupi shi na sha noinima iwa oyo wa wanifa po nale. Owa konakona Ombiibeli noukeka, tashi dulika oule womido donhumba. Ekonakono loye ole ku tomha u itavele kutya Ombiibeli oi li Eendjovo daKalunga. Kakele kaasho, owa shiiva yo Omushangi wOmbiibeli nou mu hole. Ohole yoye yokuhola Jehova oya hapupala fiyo oposhitwa opo u li paife, u li omupiya waJehova e mu liyapulila nowa ninginifwa. Owa ninga etokolo la denga mbada.

2. Oshike hatu ka kundafana moshitukulwa eshi?

 ² Fimbo ino ninginifwa, eitavelo loye ola li la yelekwa meenghedi donhumba, odo da li de shi ningifa shidjuu okukala omudiinini kuJehova. Ndele eshi to ende to ningi omukulunhu, oto ka shakeneka omayeleko mape. Satana ota ka kendabala e ku amune ko kuJehova noku ku ehenifa kokule naYe. (Ef. 4:14) Ashike ino efa osho shi ku ningilwe. Oshike tashi dulu oku ku kwafela u kale omudiinini kuJehova, nokukala metwokumwe neudaneko loye loku mu longela? Twikila okuninga exumokomesho ‘nokulalakanena’ oukulunhu wopamhepo. (Heb. 6:1) Ongahelipi to dulu okuninga ngaho?

3. Exumokomesho lilipi ovakriste aveshe va pumbwa okuninga konima yeninginifo?

³ Konima yeninginifo, atusheni otwa pumbwa okutula moilonga omayele omuyapostoli Paulus, oo a li a pa ovaitaveli vakwao  vomuEfeso. Okwa li e va ladipika va ninge “ovakulunhu pamhepo” ve li Ovakriste. (Ef. 4:13) Oyo oi li onghedi imwe yokupopya kutya ‘twikileni okuninga exumokomesho lopamhepo.’ Ohatu dulu okuuda ko kutya Paulus okwa li a hala okutya shike, eshi a yelekanifa okukula kwopamhepo nokukula kwopalutu kwokaana. Ngeenge okaana ka dalwa, ovadali vako ohava kala ve ka hole nohava kala va hafa. Ashike ihaka kala okahanana fiyofiyo. Mokweendela ko kwefimbo, oke na okweefa po “oikala younona.” (1 Kor. 13:11) Naasho osha faafana nOvakriste. Konima yeninginifo, otu na okutwikila okuninga exumokomesho. Natu ka kundafaneni omaetepo amwe oo tae tu kwafele tu ninge ngaho.

4. Oukwatya ulipi tau dulu oku tu kwafela tu ninge exumokomesho lopamhepo? Shi yelifa. (Ovafilippi 1:9)

⁴ Hapupalifa ohole yoye yokuhola Jehova. Owa ulika nale kutya ou hole Jehova neenghono. Ashike ohole yoye yoku mu hola otai dulu okukala yomoule. Ngahelipi mbela? Omuyapostoli Paulus okwa tumbula onghedi imwe mOvafilippi 1:9. (Lesha.) Paulus okwa ilikana, opo ohole yOvafilippi “i hapupale.” Onghee hano, ohole yetu yokuhola Jehova otai dulu okuhapupala. Ohatu dulu okuninga ngaho, mokukala tu na ‘eshiivo lashili neendunge dokuyoolola.’ Ngeenge otwa kala tu shii nawa Jehova, ohatu ka kala tu mu hole shi dulife nale nohatu ka kala twa lenga omaukwatya aye nonghedi yaye yokuninga oinima. Ohatu ka kala twa halelela oku mu hafifa, noitatu ka kala twa hala okuninga oinima oyo tai mu nyemateke. Otu na okulonga noudiinini, opo tu mone kutya ehalo laye olilipi po, nanghee hatu dulu okukala metwokumwe nalo.

5-6. Ongahelipi hatu dulu okuhapupalifa ohole yetu yokuhola Jehova? Shi yelifa.

⁵ Ohatu dulu okuhapupalifa ohole yetu yokuhola Jehova mokushiiva nawanawa Omona waye, oo ha hopaenene filufilu omaukwatya aXe. (Heb. 1:3) Onghedi ya denga mbada omo hatu dulu okushiiva Jesus omokukonakona omahokololo Omavaengeli ane. Ngeenge ino hovela natango okulesha Ombiibeli efiku keshe, oto dulu okuhovela paife okulesha omahokololo oo e na sha naJesus. Eshi to lesha omahokololo oo, yandja elitulemo le likalekelwa komaukwatya aye. Okwa li ha dulu okupopiwa naye noupu nokwa li ha ukata ounona momaoko aye. (Mark. 10:13-16) Okwa li omunanghenda nomunambili, novahongwa vaye ova li hava kala va manguluka oku mu lombwela omaliudo avo. (Mat. 16:22) Kungaho, Jesus okwa li ha hopaenene Xe womeulu. Jehova naye oha popiwa naye noupu, nohatu dulu okwiilikana kuye. Ngeenge hatu ilikana kuye, ohatu dulu oku mu mbubulila omitima detu. Otu na elineekelo kutya ite ke tu tokola. Oku tu hole noku na ko nasha nafye. — 1 Pet. 5:7.

⁶ Jesus okwa li ha kenukile ovanhu. Omuyapostoli Mateus okwa ti: “Eshi a mona eengudu dovanhu, okwe di kenukila molwaashi oda li da hepekwa noda ekelwashi da fa eedi dihe na omufita.” (Mat. 9:36) Jehova oha kala e udite ngahelipi? Jesus okwa ti: “Tate womeulu ina hala pa kane nande oumwe womwaava vanini.” (Mat. 18:14) Eendjovo odo otadi tu hekeleke, molwaashi otadi ulike kutya Jehova oku tu hole neenghono. Eshi hatu ende hatu shiiva Jesus nawanawa, ohole yetu yokuhola Jehova otai ka hapupala.

7. Okweendafana nOvakriste va pyokoka pamhepo otashi ke tu kwafela ngahelipi?

⁷ Oto dulu yo okuhapupalifa ohole yoye nokuninga exumokomesho u li Omukriste mokushiiva nawa ovamwaxo, ovo va pyokoka, ovo ve li meongalo leni. Tala kunghee va hafa. Inave lipa oushima, eshi va ninga etokolo lokulongela Jehova. Va pula ve ku kufile ko koimoniwa yavo imwe, oyo va mona eshi va kala nokulongela Jehova. Ngeenge to ningi etokolo la fimana, va pula ve ku pe omayele. Dimbuluka kutya “ovapukululi  vahapu otava eta exupifo.” — Omayel. 11:14.

8. Ngeenge ou na omalimbililo e na sha naasho Ombiibeli tai ti, oshike to dulu okuninga po?

⁸ Finda omalimbililo. Ngaashi sha tumbulwa  mokatendo 2, Satana ota kendabala oku ku imba u ninge exumokomesho lopamhepo. Onghedi imwe ta dulu oku shi ninga, omoku ku etela omalimbililo e na sha nomahongo amwe Ombiibeli. Pashihopaenenwa, vamwe otashi dulika va kendabale oku ku tomha u itavele kutya Kalunga haye e tu shita, ndele otwe uya po paevolusi. Eshi wa li okaana, otashi dulika wa li ho diladila kanini kombinga yoshinima osho, ile iho shi diladila nandenande. Ashike paife eshi wa kula, otashi dulika wa hongwa kombinga yoshinima osho mofikola. Osho ovahongi voye hava popi shi na sha noevolusi otashi dulika tashi monika sha fa shi li pandunge notashi ku tomho. Ndele otashi dulika inava kendabala okumona ngeenge oku na Omushiti. Dimbuluka efinamhango olo li li mOmayeletumbulo 18:17, tali ti: “Pehovelo lomoihokolola keshe umwe e nounongo; ndelenee omuhokololifi wavo te uya ndele te mu konakona.” Ponhele yokwiitavela omadiladilo oo wa uda kofikola, diladila noukeka koshili oyo tai hangwa mEendjovo daKalunga, Ombiibeli. Ninga omapekapeko moishangomwa yetu. Popya novamwatate nosho yo novamwameme ovo va li va itavela moevolusi monakudiwa. Va pula kutya oshike sha li she va tomha va itavele kutya oku na Omushiti, oo e tu hole. Eenghundafana da tya ngaho, otadi dulu oku ku kwafela u mone kutya oku na shili Omushiti.

9. Oshike we lihonga moshimoniwa shaMelissa?

⁹ Omumwameme wedina Melissa okwa li a mona ouwa muhapu, eshi a ninga omapekapeko e na sha neshito. * Okwa ti: “Mofikola ovahongi ohava yelifa oevolusi monghedi oyo tai dulu okudiladilifa ovanhu kutya ehongo loevolusi oloshili. Potete, kanda li handi kala nda hala okuninga omapekapeko, molwaashi onda li handi kala nda tila kutya pamwe ohandi ka mona kutya ehongo loevolusi oli li mondjila. Ashike onda li handi tomhafana kutya Jehova ina hala tu mu longele tuhe na oumbangi. Onghee onda li nda hovela okuninga omapekapeko. Onda lesha embo Is There a Creator Who Cares About You?, Was Life Created? nosho yo Nghee oinima i na omwenyo ye uya po — Omapulo atano a fimanenena. Naasho osho nda li lela nda pumbwa.  Onda li nda hala ngeno osho nda ningile tete.”

10-11. Oshike tashi dulu oku ku kwafela u kale wa koshoka paenghedi? (1 Ovatessalonika 4:3, 4)

¹⁰ Henuka elihumbato inali koshoka. Ngeenge omunhu e li mepupi lokamukondapweyu, omahalo aye okuya momilele ohaa kala e na eenghono. Omafimbo amwe, vamwe otashi dulika ve ku fininike u ye moluhaelo. Satana okwa hala u wanife po omahalo oye. Oshike tashi dulu oku ku kwafela u kale u na elihumbato lopaenghedi la koshoka? (Lesha 1 Ovatessalonika 4:3, 4.) Lombwela Jehova meilikano loye lopaumwene omaliudo oye. Mu lombwela nghee u udite filufilu, noku mu pula e ku pameke. (Mat. 6:13) Dimbuluka kutya Jehova okwa hala e ku kwafele, ndele haku ku tokola. (Eps. 103:13, 14) Eendjovo daKalunga nado otadi dulu oku ku kwafela. Melissa, oo a popiwa metetekelo, okwa li ta kondjifa omadiladilo inaa koshoka. Okwa ti: “Okulesha Ombiibeli efiku keshe osha kwafela nge ndi twikile okukondjifa omahalo ange a puka. Ohashi dimbulukifa nge kutya ame onda Jehova, nonda hala oku mu longela.” — Eps. 119:9.

¹¹ Ino kendabala okukandula po omaupyakadi kwoove mwene. Popya novadali voye shi na sha nonghalo oyo to kondjo nayo. Kashipu okupopya kombinga yoinima yoye yopaumwene, ashike osha fimana okuninga ngaho. Melissa okwa ti: “Onda ilikana ndi pewe ouladi, opo nee onda popya natate kombinga youpyakadi wange. Konima yaasho, onda li ndi udite nda pepelelwa. Onda li ndi shii kutya Jehova oku uditile nge etumba.”

12. Ongahelipi to dulu okuninga omatokolo e li pandunge?

¹² Kala ho wilikwa komafinamhango Ombiibeli. Eshi to ende to kulu, ovadali voye otave ke ku pa emanguluko u kale ho ningi omatokolo kwoove mwene. Ashike ope na natango oinima ihapu oyo uhe shii. Ongahelipi to dulu okuhenuka okuninga omapuko oo taa dulu okukuma ekwatafano loye naJehova? (Omayel. 22:3) Omumwameme wedina Kari okwa popya osho she mu kwafela a ninge omatokolo e li pandunge. Okwa mona kutya ngeenge ou li Omukriste a kula pamhepo, ino pumbwa okukala u na eemhango dakeshe shimwe monghalamwenyo. Okwa ti: “Onda pumbwa okuuda ko omafinamhango Ombiibeli, ponhele ashike yeemhango.” Ngeenge to lesha Ombiibeli, lipula kutya: ‘Eevelishe edi otadi hongo nge shike shi na sha netaleko laJehova? Mbela odi na omafinamhango taa dulu okuwilika nge, opo ndi longe osho sha yuka? Ngeenge osho, ongahelipi handi ka mona ouwa, ngeenge onde a tula moilonga?’ (Eps. 19:7; Jes. 48:17, 18) Ngeenge owa kala ho lesha Ombiibeli nokudilonga komafinamhango ayo, otashi ka kala shipu kwoove okuninga omatokolo oo taa hafifa Jehova. Eshi to ende to ningi exumokomesho, oto ka mona kutya ino pumbwa omhango monghalo keshe, molwaashi oto ka kala u udite ko nghee Jehova ha tale ko oinima.

13. Ongahelipi ookaume ketu tava dulu oku tu kwafela? (Omayeletumbulo 13:20)

¹³ Hoolola ookaume ovo ve hole Jehova. Ngaashi sha tumbulwa metetekelo, ookaume ovo to hoolola otava dulu oku ku kwafela u ninge Omukriste a pyokoka pamhepo. (Lesha Omayeletumbulo 13:20.) Omumwameme wedina Sara okwa li a kanifa ehafo laye. Opo nee opa li pa ningwa oshinima shonhumba osho she mu kwafela a kale e na etaleko liwa. Sara okwa ti: “Onda li nda mona ookaume pefimbo la wapala. Ame nosho yo omumwameme umwe omunyasha otwa li hatu konakona pamwe Oshungonangelo oshivike keshe. Kaume kange umwe okwa li a kwafela nge ndi hovele okunyamukula pokwoongala. Omolwekwafo lookahewa kange, onda li nda hovela okukonakona paumwene nokwiilikana nda mana mo. Onda li nda hovela  okupameka ekwatafano lange naJehova, nonda li vali nda hafa.”

14. Osha enda ngahelipi Julien a pange oukaume nookaume vawa?

¹⁴ Ongahelipi to dulu okupanga oukaume novanhu ovo tava dulu oku ku nwefa mo nawa? Julien, oo paife e li omukulunhuongalo, okwa ti: “Eshi nda li omunyasha, onda mona ookaume vawa, eshi nda kala handi udifa pamwe navo moukalele. Ookaume va tya ngaho, ova li ovaladi nova kwafela nge ndi mone nghee handi dulu okuhafela oukalele. Onda li nda hovela okulitulila po elalakano lokuya moilonga yefimbo li yadi. Onda li yo nda didilika kutya onda xutwifa ookaume vawa, molwaashi onda li ashike handi pange oukaume nookaume vepupi lange. Lwanima, onda ka mona ookaume vawa mObetel. Oshihopaenenwa shavo osha kwafela nge ndi kale handi hoolola pandunge omalihafifo, naasho osha ehenifa nge popepi elela naJehova.”

15. Paulus okwa pa Timoteus elondwelo lilipi li na sha neendafano? (2 Timoteus 2:20-22)

¹⁵ Oto ka ninga po shike ngeenge owa didilike kutya oho endafana naumwe meongalo, oo ta dulu okunyona po ekwatafano loye naJehova? Paulus okwa li e shi shii kutya vamwe meongalo ihava diladila noihava katuka ngaashi Ovakriste. Onghee okwa li a londwela Timoteus e va kale kokule. (Lesha 2 Timoteus 2:20-22.) Ekwatafano letu naJehova oshinima shi na ondilo. Molwaashi otwa longa noudiinini, opo tu ehene popepi naJehova, katu na okupanga oukaume naavo tava dulu okunyona po ekwatafano letu naTate wetu womeulu. — Eps. 26:4.

16. Omalalakano elipi to dulu okulitulila po?

¹⁶ Litulila po omalalakano, oo tae ku etele ouwa. Litulila po omalalakano oo tae ku pameke notae ku kwafele u ninge Omukriste a pyokoka. (Ef. 3:16) Pashihopaenenwa, oto dulu okuhoolola okuxwepopaleka onghedi yoye yokukonakona nokulesha Ombiibeli pandjikilile. (Eps. 1:2, 3) Ile oto dulu okukendabala okukala ho ilikana lwoikando ihapu tashi di komutima. Otashi dulika yo wa pumbwa filufilu elipangelo ngeenge to hoolola omalihafifo, nanghee u na okulongifa efimbo loye. (Ef. 5:15, 16) Ngeenge Jehova okwa mono kutya oto longo noudiinini u ninge exumokomesho, ota ka kala a hafa.

17. Ouwa ulipi hatu mono, ngeenge hatu kwafele vamwe?

¹⁷ Ngeenge owa kala ho kwafele vamwe, oto ka ninga Omukriste a pyokoka. Jesus okwa ti:  “Okuyandja ohaku eta ehafo shi dulife okupewa.” (Oil. 20:35) Oto ka mona ehafo linene, ngeenge owe litulile po efimbo nokulongifa eenghono doye dounyasha u kwafele ovanhu vakweni. Pashihopaenenwa, oto dulu okulitulila po elalakano u kwafele ovanamido nosho yo ovo ve na omaunghundi opalutu meongalo leni. Oto dulu oku ke va landela ko koinima yavo, ile u va kwafele nghee tava dulu okulongifa oikwaelektronika yavo. Ngeenge ou li omumwatate, litulila po elalakano u ninge omuyakuliongalo to shi ningi nelalakano, opo u kwafele ovamwaxo. (Fil. 2:4) Oto dulu yo okuulikila ohole ovo vehe li meongalo mokukala ho va udifile onghundana iwa yOuhamba. (Mat. 9:36, 37) Ngeenge otashi shiiva, litulila po elalakano u ye moilonga yefimbo li yadi.

18. Ongahelipi oilonga yefimbo li yadi tai dulu oku ku kwafela u ehene popepi elela naJehova?

¹⁸ Oilonga yefimbo li yadi otai dulu oku ku yeululila eemhito dihapu, odo tadi ku kwafele u ninge exumokomesho lopamhepo. Ngeenge ou li omukokolindjila, oto dulu okuya kOfikola yOvaudifi vOuhamba. Oto dulu yo oku ka longa kObetel, ile moilonga yokutunga omatungo ehangano. Omumwameme umwe omunyasha wedina Kaitlyn, oo e li omukokolindjila, okwa ti: “Okukala efimbo lihapu novamwatate novamwameme, ovo va pyokoka pamhepo, osha kwafela nge ndi ehene popepi elela naJehova konima eshi nda ninginifwa. Oihopaenenwa yavo oye linyengifa nge ndi kale handi konakona Ombiibeli moule nondi xwepopaleke onghedi yange yokuhonga.”

19. Omanangeko noupuna elipi to ka hafela, eshi to twikile okuninga exumokomesho lopamhepo?

¹⁹ Ngeenge owa twikile okuninga exumokomesho lopamhepo, oto ka hafela omanangeko noupuna mahapu. Ito ka hepeka eenghono doye dounyasha, u litulile po omalalakano itaa ti sha. (1 Joh. 2:17) Oto ka henuka ouyehame, oo hau di mokuninga omatokolo ehe li pandunge. Ponhele yaasho, oto ka pondola nokumona ehafo lashili. (Omayel. 16:3) Oshihopaenenwa shoye shiwa otashi ke linyengifa ovaitaveli vakweni, kutya nee ovanyasha, ile ovakulunhu. (1 Tim. 4:12) Naasho sha fimanenena, oto ka kala wa wanenwa nou na ombili oyo hai di mokuhafifa Jehova nokukala u na ekwatafano lopofingo naye. — Omayel. 23:15, 16.