1. Ongahelipi to dulu okupameka ekwatafano lopofingo naumwe?

LUHAPU, onghatu yotete oyo wa pumbwa okukatuka opo u pameke oukaume naumwe, okukala naye efimbo. Eshi tamu popi nokulombwelafana oimoniwa, otashi ka pameka ekwatafano leni. Ndele ohashi kala eshongo ngeenge tashi uya pokupameka ekwatafano naJesus. Omashongo amwe omuo oelipi?

2. Eshongo lotete lilipi twa taalela?

² Eshongo lotete ololo kutya inatu mona Jesus komudidi. Ovakriste vahapu vomefelemudo lotete, navo ova li va taalela eshongo la faafana. Ndele nande ongaho, omuyapostoli Petrus okwa ti: “Omu hole Kristus nonande inamu mu mona nandenande. Nonande kamu mu wete paife, omwe mu itavela.” (1 Pet. 1:8) Onghee hano, ohatu dulu okupanga oukaume naJesus nonande inatu mu mona komudidi.

3. Eshongo etivali lilipi twa taalela?

³ Eshongo etivali ololo kutya ihatu dulu okupopya naJesus. Ngeenge hatu ilikana, ohatu popi odikilila naJehova. Ashike ohatu ilikana medina laJesus, ndele ihatu popi odikilila naye. Oshoshili kutya Jesus ina hala tu ilikane kuye. Omolwashike mbela? Omolwaashi eilikano oli li onghedi yokulinyongamena, notu na ashike okulinyongamena kuJehova. (Mat. 4:10) Kakele kaasho, ohatu dulu okuulika kutya otu hole Jesus.

4. Eshongo etitatu olilipi, noshike hatu ka kundafana moshitukulwa eshi?

 ⁴ Eshongo etitatu ololo kutya Jesus oku li meulu, onghee itatu dulu okukala naye odikilila. Ashike nande ongaho, ohatu dulu okushiiva shihapu shi na sha naJesus nopehe na okweehena popepi naye komudidi. Ohatu ka kundafana oinima ine oyo hatu dulu okuninga opo tu pameke ekwatafano letu naye. Ndele natu ka konakoneni tete kutya omolwashike sha fimana kufye okupanga oukaume wopofingo naKristus.

5. Omolwashike tu na okupanga oukaume naJesus? (Tala yo oshimhungu “ Ngeenge otwa pange oukaume naJesus, ohatu ka panga yo oukaume naJehova” nosho yo “ Kala u na etaleko la yuka li na sha nonghandangala yaJesus.”)

⁵ Otu na okukala ookaume kaJesus ngeenge otwa hala okukala tu na ekwatafano liwa naJehova. Omolwashike mbela? Diladila komatomheno aa avali. Lotete, Jesus okwa lombwela ovahongwa vaye ta ti: “Tate oku mu hole, molwaashi omu hole nge.” (Joh. 16:27) Okwa ti yo: “Kape na ou te uya kuTate, ngeenge ita pitile mwaame.” (Joh. 14:6) Ngeenge otwa kendabala okupanga oukaume wopofingo naJehova, ofimbo inatu panga oukaume naJesus kungaho ohatu ka kala twa fa omunhu ta kendabala okupumina metungo. Jesus okwa li a longifa efaneko la yukila oko eshi a li te lipopi mwene ta ti aame “oshivelo omo eedi di na okupitila.” (Joh. 10:7) Etomheno etivali ololo kutya Jesus okwa li ha hopaenene filufilu omaukwatya aXe. Okwa li yo a lombwela ovahongwa vaye ta ti: “Keshe ou a mona nge, okwa mona yo Tate.” (Joh. 14:9) Onghee onghedi ya fimana oyo tai dulu oku tu kwafela tu shiive Jehova omokukonakona onghalamwenyo yaJesus. Ohole yetu yokuhola Jesus otai ka  hapupala eshi hatu lihongo kombinga yaye. Nohole yetu yokuhola Xe otai ka hapupala eshi ekwatafano letu naJesus tali kulu.

6. Etomheno likwao lilipi tu na lokukala tu na ekwatafano liwa naJesus? Shi yelifa.

⁶ Otu na okukala tu na ekwatafano naJesus opo omailikano etu a nyamukulwe. Osho otashi ulike kutya otu na okuninga shihapu shihe fi ashike okupopya outumbulilo “medina laJesus,” oo hatu tumbula pexulilo lomailikano etu. Otu na yo okushiiva nghee Jehova ha longifa Jesus mokunyamukula omailikano etu. Jesus okwa lombwela ovayapostoli a ti: “Keshe osho tamu indile medina lange, ohandi shi mu pe.” (Joh. 14:13) Nonande Jehova oye ha udu noha nyamukula omailikano etu, okwa pa Jesus oufemba wokuninga omatokolo aYe. (Mat. 28:18) Onghee hano, ofimbo Kalunga ina nyamukula omailikano etu, oha tale ngeenge ohatu tula ngoo moilonga omayele aJesus. Pashihopaenenwa, Jesus okwa ti: “Ngeenge ohamu dimine po ovanhu omanyono avo, Xo yeni womeulu naye ote ke mu dimina po yo, ndele ngeenge ihamu dimine po ovanhu omanyono avo, Xo yeni naye ite ke mu dimina po.” (Mat. 6:14, 15) Inashi fimana tuu okukala hatu ungaunga navamwe monghedi omo Jehova naJesus hava ungaunga nafye!

7. Oolyelye hava mono ouwa mekuliloyambo laJesus?

⁷ Ovo ve na ekwatafano lopofingo naJesus ovo ashike tava dulu okumona ouwa mekuliloyambo laye. Osho otu shi shii ngahelipi? Jesus okwa ti kutya okwa ‘yandjela ookaume kaye omwenyo waye.’ (Joh. 15:13) Ovanhu ovo va li va longela Jehova noudiinini ofimbo Jesus ine uya kombada yedu, otave ke lihonga kombinga yaye nokukala ve mu hole. Ovalumenhu novakainhu ovo ngaashi Abraham, Sara, Moses naRahab otava ka nyumuka. Ndele nokuli novapiya vaJehova ovayuki ovo, otava ka pumbwa okupanga oukaume naJesus opo va ka mone omwenyo waalushe. — Joh. 17:3; Oil. 24:15; Heb. 11:8-12, 24-26, 31.

8-9. Ngaashi sha yelifwa muJohannes 15:4, 5, oshike twa pumbwa okuninga ngeenge otwa pange oukaume naJesus, nomolwashike sha fimana?

⁸ Ohatu mono ehafo ngeenge hatu longo pamwe naJesus moilonga yokuudifa nokuhonga ovanhu onghundana iwa yOuhamba. Eshi Jesus a li kombada yedu, okwa li omuhongi. Naashi a shuna meulu, e li omutwe weongalo, ota twikile okuwilika oilonga yokuudifa nokuhonga. Oha mono eenghendabala doye nokwe di lenga eshi to kwafele vahapu ve li honge kombinga yaye nosho yo yaXe. Ohatu dulu ashike okupondola moilonga ei kekwafo laJehova nolaJesus. — Lesha Johannes 15: 4, 5.

⁹ Eendjovo daKalunga oda popya kutya otu na okukala tu hole Jesus opo tu hafife Jehova. Onghee natu ka kundafaneni oinima ine oyo tu na okuninga opo tu pange oukaume naJesus.

10. Onghatu yotete ilipi twa pumbwa okukatuka opo tu pange oukaume naJesus?

¹⁰ (1) Lihonga kombinga yaJesus. Ohatu dulu okulihonga kombinga yaJesus mokulesha omambo Ombiibeli ngaashi laMateus, Markus, Lukas nosho yo Johannes. Ngeenge otwa kala hatu dilonga komahokololo opaMbiibeli e na sha nonghalamwenyo yaJesus, ohatu ka kala tu hole Jesus notwe mu fimaneka omolwonghedi omo a li ha ungaunga novanhu. Pashihopaenenwa, nonande okwa li Omwene wavo, ka li ha ungaunga novahongwa vaye onga ovapika. Ponhele yaasho, okwa li he va hololele omadiladilo nosho yo omaliudo aye omoule. (Joh. 15:15) Jesus okwa li ha kala e udite oluhodi nokulila pamwe navo. (Joh. 11:32-36) Nokuli novapataneki vaye ova li hava mono kutya okwa li ha pange oukaume  naavo hava pwilikine ketumwalaka laye. (Mat. 11:19) Ngeenge otwa hopaenene onghedi omo Jesus a li ha ungaunga novahongwa vaye, ohatu ka kala tu na ekwatafano la kola navamwe, hatu ka kala twa wanenwa, twa hafa nohatu ka kala tu hole Jesus notwe mu fimaneka.

11. Onghatu onhivali ilipi twa pumbwa okukatuka opo tu pange oukaume naJesus, nomolwashike ya fimana?

¹¹ (2) Kala ho hopaenene onghedi yaJesus yokudiladila neenghatu daye. Ngeenge otwa kala tu shii onghedi yaJesus yokudiladila noku i shikula, ohatu ka panga oukaume wopofingo naye. (1 Kor. 2:16) Ongahelipi hatu dulu okuhopaenena Jesus? Diladila koshihopaenenwa shimwe. Jesus okwa li ha kala unene te lipula shi na sha nokukwafela vamwe ponhele yokuliwapalela mwene. (Mat. 20:28; Rom. 15:1-3) Molwaashi okwa li ha diladila monghedi ya tya ngaho, okwa li e na omhepo yeliyambo noyokudimina po. Jesus ka li ha udu nai diva kwaasho ovanhu tava popi kombinga yaye. (Joh. 1:46, 47) Ka li yo ha efa omapuko oo vamwe va ninga monakudiwa a nwefe mo onghedi yaye yokudiladila. (1 Tim. 1:12-14) Jesus okwa ti: “Ovanhu aveshe otava ka shiiva kutya nye ovahongwa vange ngeenge omu holafane.” (Joh. 13:35) Oshiwa okulipula kutya “Mbela ohandi shikula ngoo oshihopaenenwa shaJesus mokuninga ngaashi handi dulu opo ndi pange ombili novamwatate novamwameme?”

12. Onghedi onhinhatu ilipi twa pumbwa okukatuka opo tu pange oukaume naJesus, nongahelipi tu na okuninga ngaho?

¹² (3) Kala ho yambidida ovamwaxe vaKristus. Ngeenge hatu yambidida ovamwaxe vaKristus ovavaekwa, kungaho otwa fa oye hatu yambidida. (Mat. 25:34-40) Onghedi ya fimanenena omo hatu dulu okuyambidida ovavaekwa omoku ku kufa ombinga pauyadi moilonga yokuudifa Ouhamba nokuninga ovanhu ovahongwa, oilonga oyo Jesus a pa ovashikuli vaye aveshe va longe. (Mat. 28:19, 20; Oil. 10:42) Ovamwaxe vaKristus otava dulu ashike okuwanifa po oilonga oyo ya fimanenena yokuudifa mounyuni aushe kekwafo ‘leedi dimwe.’ (Joh. 10:16) Ngeenge ou li umwe womeedi dimwe, efimbo keshe to kufa ombinga moilonga oyo, ito ulike ashike kutya ou hole ovamwaxe vaJesus, ndele ou hole yo Jesus mwene.

13. Ongahelipi hatu dulu okutula moilonga omayele aJesus oo taa hangwa muLukas 16:9?

¹³ Onghedi imwe omo hatu dulu okupanga oukaume naJehova nosho yo naJesus omokulongifa oiniwe yetu mokuyambidida oilonga oyo tava wilike. (Lesha Lukas 16:9.) Pashihopaenenwa, ohatu dulu okuyandja omayambidido okukwafela moilonga yomounyuni aushe, nomayambidido oo ohaa longifwa mokuyambidida oilonga yokuudifa onghundana iwa moitukulwa ye likalela. Ohaa longifwa moilonga yokutunga nokukaleka monghalo iwa omatungo ehangano oo haa yambidida elongelokalunga lashili nohaa longifwa yo mokukwafela ovo va hangwa koiponga yopaushitwe. Ohatu dulu yo okuyandja omayambidido e na sha neefuto deongalo letu nokukwafela pauhandimwe ovo ve li momhumbwe. (Omayel. 19:17) Odo odo eenghedi omo hatu dulu okuyambidida ovamwaxe vaKristus.

14. Onghatu onhine ilipi twa pumbwa okukatuka opo tu ninge ookaume kaJesus ngaashi sha ulikwa mOvaefeso 4:15, 16?

¹⁴ (4) Kala ho yambidida omalongekido eongalo lopaKriste. Ohatu ka ehena popepi elela naJesus oo e li omutwe weongalo ngeenge ohatu longele kumwe naavo va nangekwa po ve tu file oshisho. (Lesha Ovaefeso 4:15, 16.) Pashihopaenenwa, ohatu kendabala ngaashi hatu dulu opo tu longife pauyadi Omalupale Ouhamba aeshe. Nomolwaasho omaongalo amwe okwa ya mumwe nopa ningwa yo omalunduluko  e na sha noitukulwa omo hatu udifile. Omalunduluko a tya ngaho okwa kwafela ehangano li xupife oimaliwa ihapu. Pefimbo opo tuu opo, ovaudifi vamwe ova li ve na okwiikilila omalunduluko mape. Ovaudifi ovo ovadiinini otashi dulika va kala oule womido dihapu meongalo lonhumba nova panga oukaume novamwatate novamwameme. Ashike paife ova tuminwa va ka longele komaongalo amwe e lili. Jesus iha kala tuu a hafa ngeenge ta tale ovashikuli vaye ovo ovadiinini tava yambidida elongekido la tya ngaho!

15. Oukaume wetu naJesus otau ka xwepopala ngahelipi monakwiiwa?

¹⁵ Ovo va vaekwa nomhepo iyapuki ove na eteelelo loku ka kala naJesus fiyo alushe, tava ka pangela pamwe naye mOuhamba waKalunga. Otava ka mona Kristus, tava ka popya naye notava ka kala efimbo naye. (Joh. 14:2, 3) Ovo ve na eteelelo loku ka kala kombada yedu otava ka pewa elitulemo kuJesus noku va ulikila ohole. Nonande itava ka mona Jesus, ekwatafano lavo naye otali ka enda tali kulu eshi tava hafele pauyadi onghalamwenyo oyo va pewa kuJehova naJesus. — Jes. 9:6, 7.

16. Omanangeko noupuna elipi hatu mono eshi tu na ekwatafano naJesus?

¹⁶ Ngeenge otwa tambula ko eshivo laJesus lokukala ookaume kaye, ohatu ka mona omanangeko noupuna mahapu. Pashihopaenenwa, ohe tu ulikile ohole paife noku tu yambidida. Ohatu ka kala nomwenyo waalushe monakwiiwa. Naasho sha fimanenena oshosho kutya, ngeenge otwa pange oukaume naJesus, otashi ke tu kwafela tu ehene popepi elela naXe yaJesus, Jehova. Kashi fi tuu oufembanghenda okwiifanwa ookaume kaJesus!