Felisa: Onda kulila moukwaneumbo wa hepa moSpain. Oukwaneumbo wetu owa li muKatolika, notwa li tu hole oinima yopalongelokalunga. Ovapambele vange 13 ova li ovapristeri, nova li hava yakula kongeleka. Tatekulu mumwaina wameme okwa li omupristeri nokwa li yo omuhongi mofikola yaKatolika. Konima eshi tatekulu a fya, Omupapa John Paul II okwa li e mu tanga noku mu popila mouwa. Tate okwa li omuhambuli woitenda, nameme okwa li omulongi womepya. Otwa dalwa vahetatu, aame oshiveli.

Eshi nda li ndi na omido 12, moSpain omwa li mwa tukuluka oita yopashiwana. Konima yoita, tate okwa li a twalwa modolongo molwaashi epangelo kala li la hokwa omayele aye e na sha nopolotika. Molwaashi tate okwa li a kwatwa po, osha li shidjuu kumeme oku tu nyangela oikulya atushe. Onghee hano, meme okwa li a tumina ovamwamemekadona vatatu ava vanini Araceli, Lauri, naRamoni va ka kale keumbo leesestela modoolopa yaBilbao opo va ka mone oikulya ya wana.

Araceli: Pefimbo opo onda li ndi na omido 14, Lauri 12, naRamoni omido 10. Otwa li twa djuulukwa neenghono oukwaneumbo wetu. Oilonga yetu meumbo leesestela okwa li okuwapaleka. Konima yomido mbali, eesestela ode ke tu tembulila keumbo la kula leesestela modoolopa yaZaragoza olo hali pashukile ovanamido. Otwa li hatu longo oilonga ihapu hatu wapaleke okombifa, naasho osha li hashi tu lolola unene.

Felisa: Eshi ovamwamemekadona va tembulilwa keumbo leesestela koZaragoza, meme natatekulu oo a li omupristeri ova li va tokola naame oko ndi ye. Elalakano lavo lokutumina nge oko, ova li va hala ndi kale kokule nomumati oo a li a hala nge. Onda li nda hala okuya ko molwaashi onda li ndi hole Kalunga. Onda li handi i kongeleka efiku keshe, nonda li nokuli nda hala okuninga omutumwa waKatolika ngaashi omumwameme umwe oo e li koAfrika.

Eshi nda ya keumbo leesestela okwa li ndi udite kutya itandi longo natango shihapu ngaashi nda li nda  hala. Nonande onda li nde lineekela kutya eesestela otadi ka ladipika nge ndi ka longele Kalunga koilongo imwe, inadi shi ninga. Omudo wa ka landula ko, onda li nda shuna keumbo opo ndi ka file oshisho tatekulu oo e li omupristeri. Onda li handi mu yakula meumbo, nokwiilikana Olusaalia pamwe naye onguloshi keshe. Onda li yo handi unganeke eengala domongeleka noikutu yoshihongwafano shaMaria noyovayapuki.

Araceli: Fimbo nda li moZaragoza, onda li nda ninga eano lange lotete opo ndi ninge osestela. Oosestela ova li va tokola ve tu tukule atushe vatatu. Ova li va tembulila nge keumbo leesestela koMadrid, ofimbo Lauri a li a tembulilwa koValencia. Ramoni ye okwa li a fyaala moZaragoza. Fimbo nda li moMadrid, onda li nda ninga eano etivali opo ndi ninge osestela. Ovanhu vahapu ova li have uya okukala meumbo leesestela ngaashi ovanafikola novanamido. Onghee hano, omwa li hamu kala oilonga ihapu. Onda li handi longo moshipangelo meumbo leesestela.

Onda li nda halelela okuninga osestela molwaashi onda li handi diladila kutya ohatu ka kala hatu lesha Ombiibeli efimbo keshe nokulihonga kombinga yayo. Mepingafano naasho, onda li ashike nda uda nai molwaashi kapa li nande oumwe ha longifa Ombiibeli ile ha popi kombinga yaKalunga ile yaJesus. Onda li nde lihonga Oshilatina, nda konakona onghalamwenyo yovayapuki vaKatolika nokwiilikana Maria. Ndele luhapu otwa li hatu longo oilonga idjuu.

Onda li handi lipula noudjuu, handi diladila kutya ngeno onda kongele oilonga opo ndi mone oimaliwa yokukwafela vambuletu ponhele yokulonga meumbo leesestela noku va ninga oipuna. Onda li nda popya nosestela oyo i li omukulunhu wetu, ndele handi i lombwele kutya onda hala okufiya po onhele oyo. Okwa li ashike a patela nge mokanduda kamwe molwaashi okwa li ta diladila kutya ohandi ka ninguluka.

Eesestela oda li da kufa nge mo mokanduda oko, ashike eshi va mona kutya natango onda hala okufiya po eumbo olo, ova li va patela nge mo vali. Konima eshi va idilila nge mo lwoikando itatu, ova lombwela nge kutya ohandi dulu ashike okuya ngeenge onda ane handi ti: “Onda hala okufiya po onhele ei molwaashi onda hala okulongela Satana ponhele yaKalunga.” Osho osha li sha limbililika nge. Onda li nda halelela okuya, ashike kanda li nda hala okushanga eendjovo odo. Lwanima onda ka tokola ndi popye nomupristeri, ndele handi mu lombwele kombinga yaasho sha ningwa po. Omupristeri okwa li a pewa epitikilo komubisofi opo ndi tuminwe keumbo leesestela koZaragoza. Eshi nda ninga ko eemwedi dinini, onda li nda pitikwa ndi ye. Diva ashike konima yaasho, Lauri naRamoni navo ova ka fiya po eumbo leesestela.

Felisa: Konima yefimbo, onda li nda hombolwa nonda ka tembukila koCantabria, oshitukulwalongo shaSpain. Natango onda ka twikila ashike okuya kongeleka  pandjikilile. Oshoondaxa shimwe, omupristeri mongeleka okwa li a handuka ta ti: “Taleni embo eli!” Okwe tu ulikila embo Oshili oyo tai twala komwenyo waalushe. Okwa ti: “Ngeenge omwa pewa embo eli komunhu, li eteni kwaame ile mu li ekeleshi!”

Molwaashi kanda li ndi na embo olo, onda li nde li hala. Opo nee konima yomafiku manini, peumbo letu opa li pe uya ovakainhu vavali. Ovakainhu ovo ova li Eendombwedi daJehova nova li va pa nge embo olo. Onde li mana ko ashike moufiku umwe. Eshi ovakainhu ovo va ka aluka, ova li va pula nge ngeenge inandi hala ekonakonombiibeli, nonda li nda nyamukula kutya onda hala.

Molwaashi onda li nda halelela okuhafifa Kalunga, onda li nde lihonga oshili kombinga yaye, nonda li nda hovela okukala ndi mu hole neenghono. Naasho osha li sha ningifa nge ndi kale nda hala okulombwela keshe umwe kombinga yaye, nonda ka ninginifwa mo 1973. Onda kendabala ngaashi handi dulu okulombwela vambuletu kombinga yoshili. Ashike vambuletu, unene tuu omumwamemekadona Araceli, okwa li ha pataneke nge kutya onda itavela oipupulu.

Araceli: Molwaashi ovanhu meumbo leesestela ova li hava ungaunga naame nonyanya, onda li handi kala nda handuka noinandi panda elongelokalunga olo. Ashike onda kala ngoo handi i kongeleka mOyoondaxa nokwiilikana Olusaalia efiku keshe. Ndele natango onda li nda hala okuuda ko Ombiibeli nonda li nda pula Kalunga a kwafele nge. Opo nee Felisa okwa li a lombwela nge kombinga yaasho e lihonga. Felisa okwa li a tunhukwa kombinga yaasho a itavela nonda li handi diladila kutya ke li nawa momutwe. Onghee hano, kanda li handi itavele osho ta popi.

Lwanima onda li nda shuna koMadrid omolwoilonga, nonda ka hombolwa. Oule womido, onda didilika kutya ovanhu ovo hava i keengeleka alushe ihava kala metwokumwe nomahongo aJesus. Onghee hano, osha li sha shololifa nge ndi kale ihandi i vali kongeleka. Okudja opo kanda li vali nda itavela momundilo woheli nomokwiilikana ovayapuki. Kanda li yo nda itavela kutya ovapristeri otava dulu okudima po omatimba ovanhu. Onda li nokuli nda ekelashi oihongwafano aishe oyo nda li ndi na. Eenghatu odo inandi di katuka molwaashi ngeno ndi wete handi ningi oshinima shi li mondjila, ndele omolwaashi nda li nda uda nai. Ashike onda kala handi ilikana handi ti: “Jehova kwafele nge, onda hala ndi ku shiive!” Ohandi dimbuluka kutya Eendombwedi daJehova oda kala hadi uya peumbo letu  oikando ihapu, ashike kanda li handi di yeulula. Osha li sha ningifa nge ndi kale inandi lineekela vali omalongelokalunga.

Omumwamemekadona Lauri okwa li ha kala moFrance omanga Ramoni ha kala muSpain. Mo 1980 lwaapo, ova li va hovela okukonakona Ombiibeli nEendombwedi daJehova. Onda li ndi wete kutya, ngaashi Felisa, navo kava li ve shii kutya otave lihongo omahongo oipupulu. Lwanima onda ka shakeneka mushiinda shange Angelines oo e li Ondombwedi yaJehova notwa li twa panga oukaume naye. Angelines nomushamane waye ova kala hava pula nge lwoikando ngeenge inandi hala okukonakona Ombiibeli navo. Ova li va didilika kutya nonande inandi lineekela momalongelokalunga, ova li ve wete kutya onda hala okushiiva kombinga yOmbiibeli. Lwanima, onde ke va lombwela nda ti: “Ohandi konakona ashike Ombiibeli nanye ngeenge ohandi longifa Ombiibeli yange mwene.” Onda li ndi na Ombiibeli yetoloko loNácar-Colunga.

Felisa: Eshi nda ninginifwa mo 1973, moSantander osho shi li oshilandopangelo shaCantabria omwa li ashike Eendombwedi daJehova 70. Otwa li hatu i momalweendo male opo tu ka udifile ovanhu komikunda omafele odo di li moshitukulwalongo osho. Onghee hano, otwa li hatu i momalweendo oo nobesa nolwanima otwa li hatu i notuwa.

Moule womido donhumba, onda li nda konakona Ombiibeli novanhu vahapu, nomulongo naumwe vomuvo ova li va ninginifwa. Ovakonakonimbiibeli vange vahapu ova li Ovakatolika nonda li ndi na oku ve lididimikila. Ngaashi ame, navo ova li va pumbwa efimbo opo va mone kutya osho va itavela osha puka. Onda li ndi shii kutya Ombiibeli nosho yo omhepo iyapuki oyo ashike tai dulu okukwafela omunhu a lundulule onghedi yaye yokudiladila noku ude ko oshili. (Ovaheberi 4:12) Omushamane wange Bienvenido oo a li omupolifi, okwa ninginifwa mo 1979. Meme okwa fya eshi opo a hovele okukonakona Ombiibeli.

Araceli: Eshi nda tameka okukonakona Ombiibeli nEendombwedi daJehova, onda li ndi udite kutya itandi dulu oku di lineekela naanaa. Ashike eshi pa pita efimbo, kanda li vali ndi udite ngaho. Eendombwedi ihadi hongo ashike ovanhu Ombiibeli, ndele ohadi tula yo moilonga omahongo ayo. Onda li nda hafa unene eshi eitavelo lange muJehova nomOmbiibeli la enda tali kulu. Ovashiinda shange vamwe ova li va didilika elunduluko la tya ngaho nova li va lombwela nge kutya, “Araceli, twikila okweenda mondjila oyo wa hoolola!”

Ohandi dimbuluka nda li handi ilikana handi ti: “Tangi Jehova eshi ino efa nge, naashi wa kwafela nge ndi mone eshiivo lashili lOmbiibeli olo nda li handi kongo.” Onda li yo nda pula Felisa a dimine nge po eshi nde mu ula nai. Okudja opo, ponhele yokukala hatu tanguna, otwa li hatu hafele okupopya kombinga yOmbiibeli. Onda li nda ninginifwa mo 1989, eshi nda li ndi na omido 61.

Felisa: Paife ondi na omido 91, nomushamane wange okwa fya noihandi dulu okulonga naanaa shihapu ngaashi nale. Ashike ohandi lesha natango Ombiibeli efiku keshe, handi i kokwoongala nongeenge handi dulu ohandi ka udifila ovanhu.

Araceli: Ondi hole okulombwela ovapristeri neesestela adishe odo handi shakene nado kombinga yaJehova molwaashi naame onda li osestela. Onda li nda kundafana navamwe vomuvo, navahapu ova li va tambula omambo noifo. Omupristeri umwe eshi nda kundafana naye lwoikando, okwa li a dimina kombinga yaasho nde mu lombwela. Opo nee okwa li a pula nge ta ti: “Ohandi ka ninga shike vali ndi fike apa? Oilyo yongeleka nosho yo oukwaneumbo wange otava ka tila nge ngahelipi?” Onde mu nyamukula nda ti: “Kalunga ye ote ke ku tila ngahelipi?” Omupristeri okwa li a mona kutya ondi li mondjila, nosha li she mu nyemateka. Ashike okwa li ta monika a fa ehe na ouladi wokuninga omalunduluko.

Ihandi dimbwa eshi omushamane wange a lombwelele nge kutya okwa hala okuya naame kokwoongala. Okwa li e na omido 80 nasha eshi a ongala oshikando shotete, nokudja opo ka li ha faula okwoongala. Okwa li a konakona Ombiibeli, ndele ta hovele okuudifa. Ihandi dimbwa eshi twa li hatu longo naye moukalele, nokwa ka fya eshi kwa li ku na eemwedi mbali a ka ninginifwe.

Felisa: Eshi nda hovela okulongela Jehova ovamwamemekadona vatatu ava vanini ova li tava pataneke nge. Ashike lwanima navo ova ka tambula ko oshili. Osho osha li oshinima shimwe shomoinima ya denga mbada oyo nda ningilwa monghalamwenyo yange. Konima yaasho, otwa li hatu hafele okukala pamwe hatu popi kombinga yaKalunga ketu, Jehova nosho yo Eendjovo daye. Lwanima atushe otwa ka kala hatu longele Jehova. *