Efiku limwe omutenya Osoondaxa, Kenneth naFilomena, ovo hava kala moCuraçao, ova li va ka talela po ovalihomboli ovo va li hava konakona navo Ombiibeli.

Kenneth okwa ti: “Eshi twa fika peumbo lavo, opa li pa patwa notuwa kaya li po. Ashike ope na sha she linyengifa nge ndi dengele kongodi yomukulukadi.”

Omukulukadi okwa nyamukula ndele ta ti kutya omushamane waye okwa ya koilonga. Ashike diva eshi a mona kutya Kenneth naFilomena ove li peumbo lavo, okwe ya pomuvelo ndele te va ifana va ye meumbo.

Ova li va didilika diva kutya okwa li ta lili. Eshi Kenneth a li ta hovele ekonakonombiibeli neilikano, omukainhu oo okwa li a hovela vali okulila. Opo nee Kenneth naFilomena ova li ve mu pula nombili kutya oshike sha ningwa po.

Omukainhu okwa hokolola kutya okwa li a diladila okulidipaa omutenya oo, nokwa li ta shangele omushamane waye omukanda u na sha nokulidipaa eshi ongodi yaKenneth ye mu kangheka. Okwe va lombwela kutya oku na epolimano, onghee ova li va lesha pamwe naye Omishangwa tadi hekeleke okudja mOmbiibeli. Etwomukumo olo ola li la xupifa omwenyo.

Kenneth okwa ti: “Ohatu pandula Jehova eshi e tu longifa tu kwafele omukainhu ou a li a wililwa po, unene tuu eshi e tu linyengifa, tashi dulika okupitila momweengeli ile momhepo yaYe iyapuki, opo tu denge ongodi!” *

Kenneth naFilomena ove li ngoo mondjila eshi va itavela kutya Kalunga okwa ya mo olunyala, kutya nee okupitila momweengeli ile momhepo yaYe iyapuki, ile eenghono daye tadi longo? Ile okudenga ongodi kwaKenneth oshinima ashike sha ningwa ngahenya?

Itatu dulu lela kutya oshike sha ningwa po. Ashike otu shii kutya Kalunga oha longifa ovaengeli vaye va kwafele ovanhu pamhepo. Pashihopaenenwa, Ombiibeli otai ti kutya Kalunga okwa longifile omweengeli a wilike omuudifi wevaengeli Filippus a ka kwafele elenga lokuEtiopia olo la li tali kongo ekwafo lopamhepo. — Oilonga 8:26-31.

Omalongelokalunga mahapu ohaa ladipike ovanhu va kale va itavela moishitwa yopamhepo inaenghono, imwe oyo haa ti kutya oi na onghenda nohai wanifa po ehalo laKalunga ile hai amene ovanhu pauhandimwe. Ovanhu vahapu inava itavela ashike kutya ovaengeli oko ve li, ndele ova itavela yo kutya oishitwa oyo yopamhepo ohai va etele ouwa wonhumba. Ashike vahapu vamwe inava itavela kutya oku na ovaengeli.

Ovaengeli oko ngoo ve li shili? Ngeenge osho, ova dja peni? Ohava ningi naanaa shike? Mbela otava dulu okuya olunyala monghalamwenyo yoye? Natu ka konakoneni omaumbangi onhumba.