Onda dalelwa muMulhouse, okadoolopa ka hepa noka shiivikila oukolokoshi, ke li koushilolundume waFransa. Onda putukila moshitukulwa omo mu yadi oukolokoshi nokuhaudafana momaukwaneumbo. Moukwaneumbo wetu ovakainhu ova li va talika ko vehe na oufemba wokuninga omatokolo noihava kundafanwa navo noupu kovalumenhu. Onda li nda hongwa kutya omukulukadi oku na ashike okulonga oilonga yomokombifa nokufila oshisho oukwaneumbo.

Efimbo olo handi putuka, onghalo oya li idjuu neenghono. Tate okwa fya koikolwifa eshi nda li ndi na omido omulongo. Konima yomido nhano okudja opo, omumwamememati umwe okwa li e lidipaa. Omudo oo tuu oo, opa li pa holoka eenhamanana pokati kavamwe vomoukwaneumbo wetu odo da twala fiyo omefyo. Osha li sha tilifa nge neenghono. Vamwe vomoukwaneumbo wetu ova li va honga nge okulwa handi longifa ombele nosho yo ondjebo ngeenge pa holoka eenhamanana. Onghalo oyo oya ningifa nge ndi lishangaule kolutu nokukala handi nu oikolwifa.

Eshi nda li ndi na omido 16, onda li handi nu oupokati weebiila 10 no-15 efiku keshe, nolwanima onda ka hovela okulongifa oingangamifi. Onda li handi landifa oitenda opo ndi dule okufuta oikoya yange. Onda ka ya modolongo eshi nda wanifa omido 17. Oikoya oyo nda li ndi na omolwoumbudi nokulonga ominyonena, oya li 18.

Eshi nda li ndi na omido 20 nasha, onghalo yange oya li ya naipala neenghono. Onda li handi nu eezolo 20 depangwe mefiku noingangamifi ikwao oyo inai pitikilwa moshilongo. Oikando ihapu onda kala handi alukile mefyo omolwokulongifa oingangamifi sha pitilila. Onda li handi kala nda homata eembele neendjebo dokuliamena molwaashi onda li handi landifa oingangamifi. Pomhito imwe, hanga ndi yashe omulumenhu umwe; lao linene, oholo oye mu enda ashike pomunghulo. Meme okwa ka fya eshi ndi na omido 24, nokudja opo ouxwapindi wange owa lunda pombada. Ovaendi vokolupadi ova li hava henuka nge ngeenge twa shakene navo molwaashi ova li hava tila nge. Luhapu momaxuliloshivike, onda li handi kala kopolifi ile moshipangelo molwaashi onda li ndi hole okulwa.

Onda hombola ndi na omido 28. Omolwonghalo oyo nda putuka nayo, omukulukadi wange kanda li nde mu fimaneka. Onda kala handi mu denge noku mu ula omalaka inaa koshoka. Katwa li hatu ningile oinima pamwe. Onda li ashike ndi wete sha wana okukala handi mu pe oinima oyo nda vaka. Lwanima opa ka ningwa oshinima shididilikwedi. Omukulukadi wange okwa li a hovela okukonakona Ombiibeli nEendombwedi daJehova. Oshikando shotete a hovela okukonakona, okwa li a efa po okushila omakaya, okutambula oimaliwa ya vakwa nokwa li a alulila nge oinima ya vakwa oyo nda li nde mu pa. Osho osha li sha handula nge neenghono.  Onda kala handi mu pataneke, handi mu ningile omwifi womakaya moshipala noku mu popila mowii kovashiinda molwaashi ashike ha konakona Ombiibeli.

Onguloshi imwe onda li nda kolwa, ndele handi xwike eumbo letu. Omukulukadi wange okwa li e tu amena tuha pye, fye nomonakadona wetu oo a li e na omido 5. Eshi nda ka kololokwa onda li ndi udite ondjo neenghono. Onda li ndi udite kutya Kalunga ita ka dimina nge po nandenande. Ohandi dimbulukwa oshikando shimwe omufita a ti kutya ovo hava longo owii otava ka ya moheli. Ndokotola wange naye okwa li a ula nge a ti: “Ove ku na vali efiku u xwepopale, osho ashike to kala ngaho.”

Eshi eumbo letu la pya po, otwa li twa tembukila keumbo lovadali vomukulukadi wange. Oshikando shimwe eshi Eendombwedi de uya okutalela po omukulukadi wange, onda li nde di pula kutya: “Kalunga ota dulu ngoo okudima po omanyono ange aeshe?” Ova li va ulikila nge mOmbiibeli omushangwa wo 1 Ovakorinto 6:9-11. Omushangwa oo ou na omusholondodo woilonga oyo Kalunga e tonde nowa weda ko yo tau ti: “Ndele mwa li mu li ngaha, vamwe vomunye.” Eendjovo odo oda kwafela nge ndi mone kutya ohandi dulu okulundulula. Ova li yo va ulikila nge 1 Johannes 4:8, osho sha kwafela nge ndi mone kutya Kalunga okuhole nge. Molwaashi onda li nda tuwa omukumo, onde di pula tu kale hatu konakona nado Ombiibeli luvali moshivike, nonda li nda hovela okukala handi ongala pamwe nado. Onda kala handi ilikana pandjikilile kuJehova.

Moule ashike womwedi umwe eshi nda hovela okukonakona, onda li nda efa po okulongifa oingangamifi. Lwanima onda ka kala handi vele neenghono. Onda li handi tu eendjodi ditilifi, handi vele omutwe woshipwataula, handi hangwa komaefipa nosho tuu. Onda mona kutya pomhito opo Jehova okwa li a kwafela nge nokwa pameka nge. Onda li ndi udite ngaashi omuyapostoli Paulus oo a li a kwafelwa kuJehova, nokwa li a shanga a ti: “Aishe ohandi i dulu omolwaKristus, ou ta pameke nge.” (Ovafilippi 4:13) Mokweendela ko kwefimbo onda ka efa po okushila omakaya. — 2 Ovakorinto 7:1.

Ombiibeli oya kwafela nge pauhandimwe noya xwepopaleka onghalo youkwaneumbo wetu. Onda li nda lundulula onghedi omo nda li handi ungaunga nomukulukadi wange. Onda li nda hovela okukala nde mu fimaneka nongeenge handi popi naye ohandi ti “kwafele nge” nosho yo “tangi.” Onda ka hovela yo okukala handi ungaunga nawa nomonakadona wetu. Eshi nda konakona Ombiibeli oule womudo umwe, onda li nde liyapulila Jehova nokuninginifwa, nda shikula oshihopaenenwa shomukulukadi wange.

Ondi na lelalela oushili kutya omafinamhango Ombiibeli okwa xupifa nge. Ovapambele vange, ovo vehe fi Eendombwedi, navo ove shii kutya ngeno nghi konakonene Ombiibeli ngeno otashi dulika nda fya koingangamifi ile nda dipawa.

Ombiibeli oya lundulula filufilu onghalo youkwaneumbo wetu noya kwafela nge ndi mone kutya ondi na oshinakuwanifwa shashike ndi li omushamane. (Ovaefeso 5:25; 6:4) Otwa li twa hovela okuningila oinima pamwe tu li oukwaneumbo. Ponhele yokukaleka ashike omukulukadi wange e lipyakidila noilonga yomokombifa, paife ohandi mu kwafele nehafo a dule okukala ha wanifa po eevili 70 omwedi keshe moilonga yokuudifa. Naye oha kwafele nge yo nehafo opo ndi wanife po oshinakuwanifwa shange ndi li omukulunhuongalo.

Onde linyengifwa neenghono kohole nonghenda oyo nda ulikilwa kuJehova Kalunga. Onda halelela okushiivifila ovanhu vahapu kombinga yomaukwatya aJehova, ovo va talika ko vehe na eteelelo lasha, ngaashi nda li nda talika ko kovanhu vahapu. Paife ondi shii kutya Ombiibeli oi na eenghono dokukwafela keshe umwe a kale e na onghalamwenyo i na eityo. Ombiibeli oya kwafela nge ndi kale ndi hole nokufimaneka ovanhu, ovalumenhu nosho yo ovakainhu, noya kwafela nge yo ndi kale nde lifimaneka ame mwene.