Mbela ngeno oto ka nyamukula ngahelipi ngeenge wa pulwa kutya: “Owa hala okukala nomwenyo fiyo alushe?” Ovanhu vahapu otashi dulika va nyamukule kutya heeno, ashike ove udite kutya oshinima sha tya ngaho itashi shiiva. Otashi dulika va tye kutya efyo oli li oshitukulwa shonghalamwenyo, sha hala okutya otwa shitwa tu kale hatu fi.

Natu tye nee ngeno epulo ola lundululwa ndele tali kala ngaha: “Owe lilongekidila okufya?” Kashi na nee mbudi kutya omunhu oo a pulwa oku li monghalo ya tya ngahelipi, vahapu otava ka nyamukula kutya ahowe. Osho otashi ulike shike? Otashi ulike kutya otwa shitwa nehalo lokukala nomwenyo, kashi na nee mbudi kutya ohatu shakeneke omashongo e fike peni. Ombiibeli otai ulike kutya Kalunga okwa shita ovanhu nehalo lokukala nomwenyo. Oya ti: ‘Okwa tula momutima wavo oukwaalushe.’— Omuudifi 3:11.

Oshoshili kutya ovanhu ihava kala nomwenyo fiyo alushe. Ndele mbela opa ningwa epuko lashike? Mbela Kalunga okwa ninga po sha opo a xwepopaleke onghalo oyo? Ombiibeli oya yandja omanyamukulo taa kumu omutima notaa yandje omatomheno a fimanenena kutya omolwashike Jesus a hepekwa nokudipawa.

Omatukulwa Ombiibeli atatu opehovelo embo laGenesis otae tu lombwele kutya Kalunga okwa popya kutya ovalihomboli votete, Adam naEva, otava dulu okukala nomwenyo waalushe nokwa li e va lombwela kutya oshike ve na okuninga opo vaha fye. Ehokololo ola popya kutya ova dopa okudulika kuKalunga, nokungaho ova kanifa omwenyo waalushe. Osho va ninga osha popiwa paunafangwa, novanhu vamwe nokuli ohave shi tale ko onga omahokololo onghuluyonale. Ndele ngaashi ashike Omavangeli a popya oshili kombinga yaJesus, embo laGenesis nalo ola popya oshili. *

Okunyona kwaAdam okwa ka etifa oidjemo ilipi? Ombiibeli oya ti: “Ngaashi oulunde wa etwa mounyuni komunhu umwe [Adam], nefyo okoulunde, osho nee efyo ole uya movanhu aveshe, shaashi aveshe va nyona.” (Ovaroma 5:12) Adam okwa nyona omolwokuhadulika kuKalunga. Kungaho okwe lietela efyo nokwa kanifa omwenyo waalushe. Oludalo laye alishe ola fyuulula oulunde kuye, nomolwaashi hatu vele, hatu kulupa nohatu fi. Etomheno olo kutya omolwashike hatu fi otali tu kumwe naasho ovanongononi va didilika shi na  sha nonghedi omo okaana haka fyuulula omaukwatya onhumba kovadali vako. Ndele mbela Kalunga oku na osho a ninga po opo a xwepopaleke onghalo oyo?

Kalunga okwa ninga po elongekido opo a mangulule ovanhu ile a futile po osho sha kanifwa kuAdam, sha hala okutya omwenyo waalushe. Ndele mbela osho Kalunga okwe shi ninga ngahelipi?

Ombiibeli oya popya mOvaroma 6:23, ya ti: “Ondjabi youlunde oyo efyo.” Osho otashi ulike kutya efyo oilanduliko youlunde. Adam okwa fya omolwokunyona kwaye. Sha faafana, nafye ohatu hangwa kefyo olo li li oilanduliko youlunde molwaashi otwa nyona. Nonande hafye twa nyona, otwa dalwa tu li ovalunde. Onghee hano, Jehova okwa yandja Omona waye, Jesus, opo e tu kulile ‘mondjabi youlunde.’ Osho osha li tashi shiiva ngahelipi?

Molwaashi omunhu umwe a wanenena, Adam, okwe tu etela oulunde omolwokuhadulika, natango omunhu umwe a wanenena okwa li e na okudulika fiyo omefyo opo e tu mangulule moulunde. Ombiibeli oye shi popya ngaha: “Ngaashi kokuhadulika kwomunhu ou umwe ava vahapu va ninga ovalunde, osho yo kokudulika kwaau umwe ava vahapu tava ningi ovayuki.” (Ovaroma 5:19) ‘Omunhu umwe’ oo ta popiwa oJesus. Okwa li a dja mo meulu, ndele ta dalwa e li omunhu a wanenena *, nokwa fya ponhele yetu. Osho oshe shi ningifa tashi shiiva opo tu kale tu na ekwatafano naKalunga nosho yo eteelelo loku ka mona omwenyo waalushe.

Omolwashike Jesus a li e na okufya opo tu dule okukulilwa moulunde? Mbela Kalunga Omunaenghono adishe ka li ta dulu okulongifa onghedi imwe ihe fi ekuliloyambo laJesus, opo a yandje omwenyo waalushe koludalo laAdam? Nopehe na omalimbililo, Kalunga oku na eenghono doku shi ninga. Ashike ngeno okuninga ngaho kashi li metwokumwe nomhango oyo a li a yandja, oyo tai ti kutya, ondjabi youlunde efyo. Omhango oyo oya fimanenena, noitai dulu okulundululwa ashike ngahenya. Komhango oyo oko kwa kanghamena ouyuki. — Epsalme 37:28.

Ngeno Kalunga okwa taulukile omhango oyo, ovanhu  otashi dulika ngeno va kale va limbililwa kutya nomoinima imwe pamwe osho ha ningi. Pashihopaenenwa, otashi dulika ve lipule kutya, ota ka tokola ngoo pauyuki kutya oolyelye vomoludalo laAdam va wana oku ka mona omwenyo waalushe? Mbela ngeno ovanhu otava ka kala ngoo ve na elineekelo kutya ota ka wanifa po omaudaneko aye? Ndele molwaashi Kalunga omuyuki, otu na elineekelo kutya ashishe osho ta longo oshi li mondjila.

Kalunga okwe tu yeululila omhito yoku ka kala nomwenyo waalushe mOparadisa kombada yedu, e shi ninga okupitila mekuliloyambo laJesus. Jesus okwa popya muJohannes 3:16 a ti: “Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” Efyo laJesus ola ulika kutya Kalunga omuyuki noku hole ovanhu nohole inene.

Omolwashike Jesus a li e na okuhepekwa nokufya efyo liyahameka ngaashi sha popiwa mOmavangeli? Mokulididimikila omayeleko nokukanyatela oudiinini, Jesus okwa nyaneka pomutenya oipupulu yOndiaboli eshi ya ti kutya ovanhu itava dulu okukala ovadiinini kuKalunga ngeenge ve li moudjuu. (Job 2:4, 5) Osho Satana a popya otashi dulika sha li tashi monika sha fa oshili eshi a li a pukifa Adam a longe oulunde. Ndele Jesus oo a li a wanenena ngaashi Adam, okwa kala omudiinini nonande okwa li ta hepekwa. (1 Ovakorinto 15:45) Kungaho okwa ulika kutya Adam ngeno okwa dulikile kuKalunga ngeno naye okwa pondola. Jesus okwe tu tulila po oshihopaenenwa eshi e lididimikila omashongo. (1 Petrus 2:21) Molwaashi Jesus okwa kala ha dulika, Kalunga okwe mu pa ondjabi yoku kala nomwenyo waalushe meulu.

Paife otu na omhito yoku ka mona omwenyo waalushe molwaashi Jesus okwe tu fila shili. Mbela owa hala oku ka kala nomwenyo fiyo alushe? Jesus okwa popya kutya oshike tu na okuninga eshi a ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” — Johannes 17:3.

Ovanyanyangidi voshifo eshi otave ku ladipike u lihonge kombinga yaJehova Kalunga kashili nosho yo Omona waye, Jesus Kristus. Eendombwedi daJehova domoshitukulwa sheni otadi ka kala da hafa oku ku kwafela. Oto dulu yo okumona ouyelele tau kwafa ngeenge owa i kepandja letu lokointaneta, ko-www.jw.org.