“Ngeenge omwa pula sha Tate, ote ke shi mu pa medina lange.” — Johannes 16:23.

Eendjovo odo daJesus oda ulika nawanawa kutya Jehova okwa hala tu ilikane kuye hatu pitile medina laJesus Kristus, ndele hakupitila moihongwafano, movaengeli ile movafi. Ngeenge hatu ilikana kuKalunga hatu pitile medina laJesus, ohatu ulike kutya otwa fimaneka onghandangala oyo ta dana. Jesus okwa ti: “Kape na ou te uya kuTate, ngeenge ita pitile mwaame.” — Johannes 14:6.

“Mu mbubulileni omitima deni.” — Epsalme 62:8.

Ngeenge hatu ilikana kuJehova, ohatu popi naye ngaashi ashike hatu popi natate wetu omunahole. Ponhele yokulesha membo ile tu endulule oinima oyo twa kopela, otwa pumbwa okupopya naye nefimaneko nosho yo tashi di komutima.

“Keshe osho hatu mu indile pahalo laye ote tu udu.” — 1 Johannes 5:14.

Jehova Kalunga okwe tu lombwela mOmbiibeli kutya ote ke tu ningila shike nashike a hala tu mu ningila. Opo Kalunga a pwilikine komailikano etu, otwa pumbwa okwiilikana metwokumwe ‘nehalo laye.’ Opo tu dule okuninga ngaho, otwa pumbwa okukonakona Ombiibeli opo tu mu shiive nawanawa. Ngeenge otwa ningi ngaho, omailikano etu otae ke mu hafifa.

Ilikana kombinga yeemhumbwe doye. Ohatu dulu okwiilikana kuKalunga kombinga yeemhumbwe detu da keshe efiku, ngaashi oikulya, oidjalomwa nosho yo onhele yokukala. Ohatu dulu yo okwiilikana tu pewe ounongo opo tu ninge omatokolo eli mondjila nosho yo eenghono opo tu lididimikile omashongo. Ohatu dulu okwiilikana tu kale tu na eitavelo, tu diminwe po notu pewe ekwafo laKalunga. — Lukas 11:3, 4, 13; Jakob 1:5, 17.

Ilikanena vamwe. Ovadali ovanahole ohava kala va hafa ngeenge ve wete ounona vavo ve hole vamwe. Jehova okwa halelela ovana vaye, ovo ve li kombada yedu, va kale ve na ko nasha navamwe. Oshi li pandunge okwiilikanena ookaume ketu kopahombo, ounona ovapambele nosho yo ookaume ketu. Omuhongwa Jakob okwa shanga a ti kutya natu ‘ilikanenafaneni.’ — Jakob 5:16.

Ulika olupandu loye. Ombiibeli oya popya kombinga yaKalunga Omushiti wetu ya ti: “E mu longela ouwa. Okwe mu lokifila odula okudja meulu nokwe mu pa eloolo, e mu kutifa noikulya nokwa yadifa omitima deni nehafo.” (Oilonga 14:17) Ngeenge otwa diladila kombinga yoinima aishe oyo Kalunga e tu ningila, osho tashi ke tu linyengifa tu mu pandule okupitila meilikano. Ashike nande ongaho, otwa pumbwa okuulikila Kalunga olupandu letu mokudulika kuye. — Ovakolossi 3:15.

Omafimbo amwe otashi dulika tu teke omukumo molwaashi ashike omailikano etu taa di komutima itaa nyamukulwa diva. Mbela otu na okufika pexulifodiladilo kutya Kalunga ke na ko nasha nafye? Hasho nandenande. Natu ka taleni koimoniwa tai shikula oyo tai ulike kutya otashi dulika omafimbo amwe twa pumbwa ashike okutwikila okwiilikana.

Steve, oo a popiwa moshitukulwa shotete, okwa popya a ti: “Ngeno kanda li nda twikila okwiilikana, ngeno onda kanifa eteelelo lokukala nda hafa vali.” Mbela oshike she mu kwafela? Okwa hovela okukonakona Ombiibeli, nokwe lihonga kutya okwa pumbwa okutwikila okwiilikana nopehe na okusholola. Steve okwa ti: “Onda ilikana kuKalunga ndi mu pandule omolwekwafo olo nda kala nokumona kookaume kange. Paife onda hafa shi dulife nale.”

Ongahelipi shi na sha naJenny, oo a li e udite kutya Kalunga ina wana okunyamukula omailikano aye? Okwa ti: “Eshi nda li ndi udite ndihe na oshilonga, onda ilikana kuKalunga a kwafele nge ndi ude ko kutya omolwashike nda li ndi udite ngaho.” Mbela osho she mu kwafela ngahelipi? Okwa weda ko a ti: “Okupopya naKalunga okwa kwafela nge ndi litale ko ngaashi ye ha tale nge ko, nonokutya nande omutima wange ou tokole nge, ye ita tokola nge. Osha kwafela nge yo ndiha sholole.” Oshidjemo? Okwa ti: “Eilikano ola kwafela nge ndi tale ko Jehova e li omunhu wolela, Tate yange, kaume kange, Kalunga omunahole nosho yo kutya ota ka yambidida nge alushe ngeenge nda pumbwa ekwafo laye mokulonga osho tashi mu wapalele.”

Natu ka taleni koshihopaenenwa shaIsabel. Eshi a li e na eteelelo, eendokotola ode mu lombwela kutya okaana kaye otaka ka dalwa ke li oshilema. Osho osha li she mu wilila po neenghono. Vamwe ova li nokuli ve mu ladipika e likufe eteelelo olo. Okwa ti: “Osha fa ashike nda li handi fi molwaashi omutima wange owa li udjuu neenghono.” Mbela okwa ninga po shike? Okwa ti: “Onda ilikana nokwiilikana kuKalunga a yambidide nge.” Mokweendela ko kwefimbo, okwa ka dala okaana okamati, Gerard, nokali oshilema. Mbela Isabel okuudite ngoo kutya Kalunga okwa nyamukula omailikano aye? Heeno. Omonghedi ilipi po mbela? Okwa ti: “Ngeenge handi tale omonamati wange, oo e na omido 14 paife, ta hafele onghalamwenyo nonande oku li oshilema, ondi wete kutya oye enyamukulo nenangeko noupuna lange linenenene la dja kuJehova Kalunga.”

Eendjovo da tya ngaho tadi di komutima ohadi tu dimbulukifa eendjovo domupsalme odo tadi ti: “Omwene, Ove ho udu odjuulufi yovalininipiki; Oove ho pameke omitima davo; nokutwi kwoye to ku ehenifa kuvo.” (Epsalme 10:17) Mbela oo kae fi tuu omatomheno a femba okutwikila okwiilikana!

MOmbiibeli omu na omailikano mahapu aJesus. Eilikano limwe olo li shiivike nawa ololo a li a honga ovahongwa vaye. Mbela oshike hatu lihongo keilikano olo?