Mbela okulesha Ombiibeli kwoye otaku ka kala kuhe fi kuhokwifa ile otaku ka kala taku talaleke? Shihapu oshe likolelela kunghee to lesha. Natu ka tale kwaasho to dulu okuninga po opo u kale u na ohokwe yokulesha nou ku hafele.

Hoolola Ombiibeli oyo i shii okulineekelwa noina elaka li li pefimbo. Ngeenge owa lesha ouyelele oo u na oitya ihapu idjuu noya kulupa oyo uhe shii, ito ka hafela noupu oku i lesha. Onghee hano, konga Ombiibeli oyo ya longifa elaka lipu okuudiwa ko, olo tali kumu omutima woye. Ndele pefimbo opo tuu opo, nai kale ya tolokwa noukeka noi li paushili. *

Longifa outeknologi woshinanena. Kunena Ombiibeli kai li ashike molupe lomambo a pilindwa, ndele oi li yo molupe lopaelektronika. Eembibeli dimwe otadi dulu okuleshwa kointaneta ile okutapelwa keekombiyuta, koutableta ile keengodi dopeke opo omunhu a kale ta lesha paumwene. Dimwe odi na oikwafifo ya wedwa po oyo tai ku kwafele u konge diva eevelishe dimwe vali da pamba oshikundafanwa ile u yelekanife nokuli omatoloko Eembiibeli dimwe. Ngeenge owa hala okupwilikina ponhele yokulesha komudidi, Ombiibeli oya kwatwa yo moungalo. Ovanhu vahapu ohava hafele okupwilikina fimbo ve li molweendo moyeendifo yaaveshe, fimbo tava kosho ile tava longo oilonga yonhumba oyo tai va pitike va pwilikine. Omolwashike ito kendabala okulongifa onghedi oyo tai ku wapalele?

Longifa oikwafifo yokukonakona Ombiibeli. Oikwafifo yokukonakona Ombiibeli otai dulu oku ku kwafela u mone ouwa muhapu mwaasho to lesha. Ope na ouwaalita  voilongo oyo ya popiwa mOmbiibeli, oyo tai dulu oku ku kwafela u mone eenhele odo to shakeneke mokulesha kwoye noku di kwatakanifa noiningwanima. Oitukulwa ngaashi eshi ile oyo i li ko-website, jw.org, otai dulu oku ku kwafela u shiive oitukulwa ihapu yOmbiibeli.

Lesha meenghedi da yoolokafana. Ngeenge ou wete okulesha Ombiibeli okudja kehovelo fiyo ya pwa ko tashi monika shitilifa, omolwashike ito kulike ohokwe yoye mokuhovela noitukulwa oyo u wete ihokwifa unene kwoove? Ngeenge owa hala okushiiva ovanhu va fimanenena ovo va tumbulwa mOmbiibeli, oto dulu okuhovela okulesha kombinga yovanhu. Ope na oihopaenenwa yomaetepo oo to dulu okulongifa moshimhungu, “ Konakona Ombiibeli moule mokushiiva nawa ovanhu ovo va tumbulwa mo.” Ile pamwe owa hala okulesha Ombiibeli to kongo oikundafanwa ile oiningwanima she likolelela palandulafano layo. Omolwashike ito kendabala onghedi imwe yomuyo?