Rut 4:1-22
4 Boas okwa ya, ndele ta ka kala omutumba poshivelo shoshilando. Opa li tapa ende omupambele wopopepi oo a popiwa kuBoas metetekelo. Boas okwa tya kuye: “Kaume, ila u kale omutumba apa.” Opo nee okwa ya, ndele ta kala omutumba.
2 Boas okwa ifana ovakulunhu voshilando omulongo, ndele ta ti: “Kaleni omutumba apa.” Opo nee ova kala omutumba.
3 Boas okwa lombwela omupambele oo a ti: “Naomi oo a aluka koshitukulwa shaMoab, oku na okulandifa po epya olo la li lomupambele wange Elimelek.
4 Onghee onda li handi diladila ndi ku lombwele kutya, ‘Li landa po moipafi yovakalimo vomoshilando noyovakulunhu voshiwana shetu. Ngeenge oto li lande po, li landa po. Ndele ngeenge ito li lande po, lombwele nge, osheshi oove u na oufemba woku li landa po tete, naame aame nde ku shikula.’” Okwa nyamukula a ti: “Onda hala oku li landa po.”
5 Boas okwa ti: “Efiku olo to lande epya kuNaomi, ou na yo oku li landa kuRut omufiyekadi Omumoab, opo efyuululo li kale kedina lanakufya.”
6 Omupambele oo wopopepi okwa ti: “Itandi dulu oku li landa po, osheshi otali nyono po efyuululo lange. Ohandi ku pe oufemba u li lande po, molwaashi ame itandi dulu oku li landa po.”
7 MuIsrael omwa li onghedindjikilile i na sha nokuyandja po oufemba wefyuululo, opo ku kolekwe oshinima keshe tashi landwa: Omunhu okwa li ha kufa ko olukaku laye noku li yandja kwaao ta fyuulula, naasho osha li onghedi yokukoleka eudafano.
8 Eshi omupambele oo a lombwela Boas kutya, “li landa po,” okwa dula ko olukaku laye.
9 Opo nee Boas okwa lombwela ovakulunhu voshilando novanhu aveshe a ti: “Onye eembangi dange nena eli, eshi handi lande kuNaomi oinima aishe oyo ya li yaElimelek, yaKilion naMahlon.
10 Ohandi kufa po yo Rut Omumoab, oo a li omukulukadi waMahlon, a ninge omukulukadi wange, opo a dalele nakufya ovana, nedina lanakufya opo liha dimbiwe kovamwaina nokovanhu aveshe vomoshilando. Onye eembangi dange nena eli.”
11 Ovanhu aveshe ovo va li poshivelo shoshilando novakulunhu voshilando ova ti: “Heeno, fye eembangi. Jehova na nangeke noupuna omukulukadi oo to hombola a kale ngaashi Rakel naLea, ovo va hapupalifa oshiwana shaIsrael. Oinima nai ku endele nawa muEfrata, ove u liningile edina* liwa muBetlehem.
12 Eumbo loye nali kale ngaashi eumbo laPeres, omonamati waTamar naJuda, omolwoludalo olo Jehova te ke mu pa nomukulukadi woye omunyasha.”
13 Boas okwa kufa po Rut a ninge omukulukadi waye. Okwa nangala naye, na Jehova okwe mu efa a ninge oufimba, ndele ta dala okaana okamati.
14 Ovakainhu ova tya kuNaomi: “Jehova na tangwe, osheshi okwe ku pa omufyuululi nena. Edina lokaana oko nali shiivifwe muIsrael.
15 Otake* ku* hekeleke* notake ku yambidida moukulupe woye, molwaashi oka dalwa koshitenya shoye osho shi ku hole noshi dule ovanamati vaheyali.”
16 Naomi okwa kufa okaana nokwe ka ukata, ndele ta kala nako.*
17 Ovakainhu vopoushiinda ove ka luka edina. Ova ti: “Naomi okwa dalelwa okamati,” nove ka luka Obed. Obed oye xe yaIsai, xe yaDavid.
18 Omusholondodo wepata laPeres oo ou: Peres okwa dala Hesron;
19 Hesron okwa dala Ram; Ram okwa dala Aminadab;
20 Aminadab okwa dala Nashon; Nashon okwa dala Salmon;
21 Salmon okwa dala Boas; Boas okwa dala Obed;
22 Obed okwa dala Isai; Isai okwa dala David.
Eshangelo lopedu
^ Eln., “shiivifa edina loye.”
^ Sha hala okutya, okatekulu kaNaomi.
^ Ile “Omwenyo woye otake u.”
^ Ile “Oka ninga omuhekeleki.”
^ Ile “te ka file oshisho.”
