Ovatokolipangeli 4:1-24
4 Eshi Ehud a fya, Ovaisrael ova longa natango osho shii momesho aJehova.
2 Onghee Jehova okwe va yandja* meke laJabin, ohamba yaKaanan, oo a pangela muHasor. Ondjai yetangakwaita laye oSisera, oo a li ha di muHaroset-goiim.
3 Ovaisrael ova pula ekwafo kuJehova, molwaashi Jabin* okwa li e na omatemba oita 900 a xwikilwa oivela ya honga komalola,* nokwa kala ta hepeke neenghono Ovaisrael oule weedula 20.
4 Omuprofeti Debora, omukulukadi waLappidot, oye a li omutokoli muIsrael pefimbo opo.
5 Okwa li ha kala omutumba momulunga,* oo wa li pokati kaRama naBetel koshitukulwa shokeemhunda shaEfraim, nOvaisrael ova li hava i kuye va ka tokolwe.
6 Debora okwa tuma Barak, omonamati waAbinoam, a dja muKedes-naftali, ndele ta ti kuye: “Jehova, Kalunga kaIsrael, okwe ku pa oshipango, a ti: ‘Inda, ndele to dingilile* omhunda yaTabor, ndele to i pamwe novalumenhu 10 000 va dja mepata laNaftali nolaSebulon.
7 Ohandi ke ku tumina Sisera, ondjai yetangakwaita laJabin, pamwe nomatemba aye oita nomatangakwaita aye kokamulonga kaKison, nohandi ke mu yandja momake oye.’”
8 Ndele Barak okwa tya kuDebora: “Ngeenge oto i pamwe naame, ohandi i, ashike ngeenge ito i pamwe naame, itandi i.”
9 Opo nee Debora okwa ti: “Ohandi i filufilu pamwe naave. Ashike olwoodi olo to ka lwa itali ku etele efimano, osheshi Jehova ota ka yandja Sisera momake omukainhu.” Onghee Debora okwa fikama nova ya pamwe naBarak kuKedes.
10 Barak okwa tuma Sebulon naNaftali va ye kuKedes, novalumenhu 10 000 ove mu shikula. Debora naye okwa ya pamwe naye.
11 Heber, Omukeni, okwe litongola ko kOvakeni vakwao, oludalo laHobab, xemweno yaMoses, netwali laye ola li la dikwa popepi nomuti wa kula muSaananim, osho shi li popepi naKedes.
12 Ova li va lombwela Sisera kutya Barak, omonamati waAbinoam, okwa ya komhunda yaTabor.
13 Opo nee Sisera okwa ongela diva omatemba aye oita aeshe 900 a xwikilwa oivela ya honga komalola* nomatangakwaita aeshe, oo a dja nao kuHaroset-goiim, opo a ye kokamulonga kaKison.
14 Onghee Debora okwa tya kuBarak: “Fikama, osheshi Jehova ota ka yandja Sisera momake oye nena. Jehova ote ke ku wilika filufilu.” Ndele Barak okwa londoloka komhunda yaTabor pamwe novalumenhu 10 000 ve mu shikula.
15 Opo nee Jehova okwa ngwangwaneka Sisera, omatemba aye oita aeshe nomatangakwaita aeshe moipafi yaBarak. Xuuninwa, Sisera okwa londoloka mo metemba laye, ndele ta faduka po kolupadi.
16 Barak okwa taataa omatemba oita nosho yo omatangakwaita fiyo okuHaroset-goiim. Omatangakwaita aeshe aSisera okwa dipawa neongamukonda, nokape na nande oumwe a xupa po.
17 Ashike Sisera okwa faduka po kolupadi, a ya ketwali laJael, omukulukadi waHeber, Omukeni, osheshi opa li ombili pokati kaJabin, ohamba yaHasor, noukwaneumbo waHeber, Omukeni.
18 Opo nee Jael okwa dja mo a ka shakeneke Sisera, ndele ta ti kuye: “Ila mo, omwene wange, kala apa. Ino kala wa tila.” Onghee Sisera okwa ya metwali laJael, ndele Jael te mu tuvikile nekumbafa.
19 Sisera okwa tya kuJael: “Alikana, kwafele nge omeva manini ndi nwe, osheshi onda fya enota.” Onghee Jael okwa patulula okandini komashini ka longwa moshipa, ndele te mu pe a nwe. Konima yaasho, okwe mu tuvikila natango.
20 Sisera okwa lombwela Jael, a ti: “Kala ofika poshivelo shetwali, ndele ngeenge okwa di omunhu te ku pula kutya, ‘Omu na omunhu omu?’ tya, ‘Ahawe!’”
21 Ndele Jael, omukulukadi waHeber, okwa kufa okatenda kokudikifa etwali nosho yo ohamala meke laye. Ofimbo Sisera a li a pwila meemhofi omolweloloko, Jael okwe mu hondjaunina nokwe mu tenheka okatenda oko pombadu, ndele te ka dengele mo fiyo ka twa medu, na Sisera okwa fya.
22 Barak okwa ya ko ta kongo Sisera, na Jael okwa dja mo e mu shakeneke, ndele ta ti: “Ila, ndi ke ku ulikile omulumenhu oo to kongo.” Barak okwa ya naJael metwali nokwa mona Sisera a nangala a fya e na okatenda kokudikifa etwali ka djuuka meembadu daye.
23 Mefiku olo, Kalunga okwa finda Jabin, ohamba yaKaanan, moipafi yOvaisrael.
24 Eke lOvaisrael ola enda tali nghonopala unene nova finda Jabin, ohamba yaKaanan, fiyo osheshi va hanauna po filufilu Jabin, ohamba yaKaanan.
Eshangelo lopedu
^ Ile “landifa po.”
^ Eln., “ye.”
^ Eln., “omatemba oshivela shilaula.”
^ Eln., “omulunga waDebora.”
^ Ile “tula ovalumenhu voye.”
^ Eln., “omatemba oshivela shilaula.”
