Ovatokolipangeli 3:1-31
3 Ei oiwana oyo Jehova a efa i kale mo, opo i dule okuyeleka Ovaisrael aveshe, ovo inava mona oita yomuKaanan,
2 (okwe va efa va kale po, opo omapupi Ovaisrael a shiive oita, oo inaa mona nande onale oita):
3 ovapangeli vatano vOvafilisti, Ovakaanan aveshe, Ovasidon nosho yo Ovahevi, ovo hava di komhunda yaLibanon, okudja komhunda Baal-hermon fiyo okuLebo-hamat.*
4 Oiwana oyo oya li i lile po okuyeleka Ovaisrael, osho tashi ka ulika ngeenge Ovaisrael otava ka dulika koipango yaJehova, oyo a li a pa ooxe okupitila muMoses.
5 Onghee Ovaisrael ova li hava di mokati kOvakaanan, kOvaheti, kOvaamori, kOvaperesi, kOvahevi nokOvajebusi.
6 Ova li hava kufa ovanakadona vavo ve va ninge ovakulukadi vavo, novanakadona vavo ohave va yandje kovanamati vavo, nova li va hovela okulongela ookalunga vavo.
7 Onghee Ovaisrael ova longa osho shii momesho aJehova, ndele tava dimbwa Jehova, Kalunga kavo, nova li va longela ooBaal nosho yo eepala diyapuki.*
8 Opo nee Jehova okwa li a handukila Ovaisrael neenghono, ndele te va yandje* meke laKusan-risataim, ohamba yaMesopotamia.* Ovaisrael ova longela Kusan-risataim eedula hetatu.
9 Eshi Ovaisrael va pula ekwafo kuJehova, Jehova okwe va tumina omuxupifi, Otniel, omonamati waKenas, ondenge yaKaleb, e va xupife.
10 Omhepo yaJehova oye uya muye, ndele ta ningi omutokoli muIsrael. Eshi a ya kolwoodi, Jehova okwa yandja Kusan-risataim, ohamba yaMesopotamia* momake aye, opo nee okwa finda Kusan-risataim.
11 Lwanima, edu ola li la tulumukwa* oule weedula 40. Opo nee Otniel, omonamati waKenas, okwa fya.
12 Natango, Ovaisrael ova hovela okulonga osho shii momesho aJehova. Onghee Jehova okwa efa Eglon, ohamba yaMoab, a finde Ovaisrael, molwaashi ova longa osho shii momesho aJehova.
13 Okwa ya yo pamwe nOvaammoni nOvaamalek ve ke va lwife. Ova ponokela Israel nokukwata ko oshilando shomilunga.
14 Ovaisrael ova longela Eglon, ohamba yaMoab, oule weedula 18.
15 Opo nee Ovaisrael ova pula ekwafo kuJehova, na Jehova okwe va tumina omuxupifi, Ehud, omonamati waGera, Omubenjamin, oo a li e na olumosho. Mokweendela ko kwefimbo, Ovaisrael ova yandja eefuto davo kuEhud di ye kuEglon, ohamba yaMoab.
16 Onghee Ehud okwe liningila eongamukonda li na omingenge mbali, oule walo oludimbo* limwe, ndele te li homata moshikutu shaye ketundji laye lokolulyo.
17 Opo nee okwa yandja eefuto kuEglon, ohamba yaMoab. Eglon okwa li omulumenhu a ondoka neenghono.
18 Eshi Ehud a mana okuyandja eemhale,* okwa findikila ovanhu, ovo va li va humbata eemhale.
19 Eshi a fika poihongwafano* puGilgal, okwa shuna ko, ndele ta ti: “Ohamba omufimanekwa, onda hala ndi ku lombwele oshiholekwa.” Onghee ohamba oya tya: “Tu yapukileni!” Opo nee ovapiya vayo aveshe ova dja po puyo.
20 Onghee Ehud okwe uya kuyo ofimbo ya li omutumba oyo aike monduda yayo yopombada, mwa talala nawa. Ndele Ehud ta ti: “Ondi na etumwalaka loye la dja kuKalunga.” Opo nee oya dja ko kolukalwapangelo layo,*
21 na Ehud okwa kufa mo neke laye lokolumosho eongamukonda, olo a li a homata, la ama ketundji laye lokolulyo, ndele te li mu twifa medimo.
22 Eongamukonda ola ya mo fiyo okoshikwatelo nola li la uvikwa koinghene, molwaashi ka li e li pweya mo medimo layo. Opo nee oya dja onyata momandjadja.
23 Ehud okwa dja mo a pitila poshivelo,* ndele ta idile omivelo donduda yopombada noku di pata.
24 Konima eshi a ya, ovapiya ova aluka nova mona omivelo donduda yopombada da patwa. Onghee ova tya: “Oku na okukala te likwafele* monduda yomeni ya talala.”
25 Ova kala va teelela fiyo osheshi va loloka, ashike eshi va mona kutya ita patulula natango omivelo donduda yopombada, ova kufa eeshapi, ndele tava patulula po nova mona omwene wavo a nangala pedu a fya.
26 Ehud okwa ya ofimbo va li tava ongaonga nokwa pita poihongwafano* nokwa ka fika nombili kuSeira.
27 Eshi a fika, okwa shika enghuma koshitukulwa shokeemhunda shaEfraim, nOvaisrael ova ya koshitukulwa shokeemhunda ve mu shikula.
28 Opo nee okwa tya kuvo: “Shikulei nge, molwaashi Jehova okwa yandja ovatondi veni, Ovamoab, momake eni.” Onghee ove mu shikula, ndele tava nangele Ovamoab pomataulukilo omulonga waJordan, noinava efa nande oumwe a tauluke.
29 Ova dipaa Ovamoab ve fike 10 000 lwaapo, ovalumenhu aveshe ovanaenghono novaladi, nokape na nande oumwe a xupa po.
30 Onghee Ovaisrael ova li va finda Ovamoab mefiku olo, nedu ola li la tulumukwa* oule weedula 80.
31 Okwa shikulwa kuSamgar, omonamati waAnat, oo a dipaa ovalumenhu Ovafilisti 600 noshixwango sheengobe.* Okwa xupifa yo Ovaisrael.
Eshangelo lopedu
^ Ile “oposhivelo shaHamat.”
^ Tala Omafatululo oitya.
^ Eln., “landifa po.”
^ Eln., “Aram-naharaim.”
^ Eln., “Aram.”
^ Ile “li na ombili.”
^ Oludimbo olo lixupi otashi dulika li na eesendimeta 38 lwaapo. Tala Oshiwedelwako B14.
^ Ile “eefuto odo da li hadi pewa eehamba.”
^ Ile tashi dulika, “pekololo lomamanya.”
^ Ile “koshipundi shayo.”
^ Ile tashi dulika, “opo hapa piti omhepo.”
^ Eln., “ta uvike eemhadi daye.”
^ Ile tashi dulika, “pekololo lomamanya.”
^ Ile “li na ombili.”
^ Ile “oshiti sha honga shokushovela eengobe.”
