Ovatokolipangeli 18:1-31
18 Pefimbo olo, muIsrael kamwa li ohamba, nepata lOvadan ola li tali kongo onhele* yokukala, molwaashi kava li natango va mona efyuululo mokati komapata Ovaisrael.
2 Ovadan ova tuma ovalumenhu vatano, va dja mepata lavo, ovalumenhu ovanaendunge va dja muSora naEstaol, va ka ndaade edu noku li konakona. Ova tya kuvo: “Indeni, mu ka konakone edu.” Ova li va ya koshitukulwa shokeemhunda shaEfraim, keumbo laMika, naako oko va nangala.
3 Eshi va li popepi neumbo laMika, ova dimbuluka ondaka* yomulumenhu omunyasha Omulevi, nova ya kuye, ndele tave mu pula, tava ti: “Olyelye e ku eta ko oku? Oto kongo shike konhele ei? Omolwashike u li oku?”
4 Okwe va lombwela osho Mika e mu ningila, a ti: “Okwa kuta nge ndi kale omupristeri waye.”
5 Opo nee ova tya kuye: “Alikana, pula Kalunga, ngeenge ohatu ka pondola molweendo letu.”
6 Omupristeri okwa tya kuvo: “Indeni nombili, Jehova oku li pamwe nanye molweendo leni.”
7 Onghee ovalumenhu vatano ova twikila nolweendo lavo, ndele tava i kuLais. Ova mona nghee ovanhu vomuLais ve li kuvo vene ngaashi Ovasidoni. Ova li ve udite va amenwa; kava li va tila omaponokelo nokape na ovapangeli ovakwanyanya tave uya medu lavo ve va hepeke. Ova li hava di kokule nOvasidoni nokava li hava endafana novanhu vamwe vali.
8 Eshi va shuna kovamwaxe, muSora nomuEstaol, ovamwaxe ove va pula, tava ti: “Osha enda ngahelipi?”
9 Ova nyamukula va ti: “Natu yeni tu ke va lwifeni, molwaashi otwa mona kutya edu oliwa neenghono. Omolwashike tamu ongaonga? Inamu ongaonga, ndele tu yeni tu ka nangaleni edu olo.
10 Ngeenge omwa fiki, otamu ka hanga ovanhu inava tila omaponokelo, nedu oliwa neenghono. Kalunga okwe li yandja momake eni, li li onhele oyo i na keshe shimwe shi li kombada yedu.”
11 MuSora nomuEstaol omwa dja ovalumenhu 600, vomepata lOvadan, va homatela olwoodi.
12 Ova ya, ndele tava ongo onhanda muKiriat-jearim shomuJuda, nomolwaashi onhele oyo, oyo i li kouninginino waKiriat-jearim, hai ifanwa Mahane-dan* fiyo okunena.
13 Ova dja ko oko, ndele tava i koshitukulwa shokeemhunda shaEfraim, nova ya keumbo laMika.
14 Opo nee ovalumenhu vatano, ovo va li va ka ndaada kedu laLais, ova lombwela ovamwaxe, va ti: “Kamu shii kutya momaumbo oo omu na okatetahema, oihongwafano yaterafim,* oshihongwafano nosho yo oshihongwafano sha hambulwa moshivela?* Diladileni kutya oshike tamu ka ninga po.”
15 Onghee ova kanghama, ndele tave uya peumbo laMika, omo mwa li hamu di omulumenhu omunyasha Omulevi, nove mu pula kutya ote shi endifa ngahelipi.
16 Efimbo alishe olo, ovalumenhu 600 vomepata laDan, ovo va homatela olwoodi, ova kala va fikama pomuvelo.
17 Ovalumenhu vatano, ovo va li va ya va ka ndaade edu, ova ya meni va ka kufe oshihongwafano, okatetahema, oihongwafano yaterafim* nosho yo oshihongwafano sha hambulwa moshivela.* (Omupristeri okwa li a fikama pomuvelo pamwe novalumenhu 600 va homatela olwoodi.)
18 Ova ya meumbo laMika, ndele tava kufa oshihongwafano, okatetahema, oihongwafano yaterafim* nosho yo oshihongwafano sha hambulwa moshivela.* Omupristeri okwa tya kuvo: “Otamu ningi ngahelipi?”
19 Ashike ova tya kuye: “Mwena, ino popya sha. Ila tu yeni u ka ninge tate* nomupristeri wetu. Shilipi shiwa kwoove, okukala omupristeri weumbo lomulumenhu umwe, ile okukala omupristeri wepata nowoludi muIsrael?”
20 Onghee omupristeri okwa dimina, ndele ta kufa okatetahema, oihongwafano yaterafim* nosho yo oshihongwafano, ndele ta i pamwe novanhu.
21 Ova twikila nondjila yavo, va tetekelifa ounona, oimuna noinima oyo i na ongushu.
22 Eshi Ovadan va hangwa va enda ko oshinano shonhumba okudja peumbo laMika, ovashiinda shaMika ova ongala, ndele tave va shikula. Xuuninwa, ova hanga Ovadan.
23 Eshi va ingida Ovadan, ova tanauka, ndele tava ti kuMika: “Oupyakadi ou li peni? Omolwashike mwa ongala?”
24 Onghee okwa tya: “Omwa kufa po ookalunga vange ovo nda ninga, nomwa ya yo nomupristeri. Onda xupa po nashike? Omolwashike tamu pula nge kutya: ‘Oupyakadi woye ou li peni?’”
25 Ovadan ova nyamukula, va ti: “Ino popya nafye ngaho, molwaashi ovalumenhu, ovo hava handuka diva, otave ke ku ningila owii, naasho otashi dulu oku ku kanififa omwenyo woye nosho yo eemwenyo dovaneumbo loye.”
26 Onghee Ovadan ova ya nondjila yavo, na Mika eshi a mona kutya ovahapu ve va dule, okwa tanauka, ndele ta shuna keumbo laye.
27 Konima eshi va kufa osho Mika a ninga, nosho yo omupristeri waye, ova ya kuLais, kovanhu ovo va li ve udite va amenwa nokava li va tila omaponokelo. Ove va dipaa neongamukonda, ndele tava xwike po oshilando nomundilo.
28 Kape na oo a li ta dulu oku shi xupifa, molwaashi osha li kokule naSidon, mefilu laBet-rehob, novakalimo kava li hava endafana novanhu vamwe vali. Opo nee ova tungulula oshilando, ndele tava kala omo hava di.
29 Natango, ova luka oshilando Dan, ve shi lukila xe Dan, omonamati waIsrael, ashike edina loshilando osho nale ola li Lais.
30 Konima yaasho, Ovadan ove lidikila oshihongwafano, na Jonatan, omonamati waGersom, omonamati waMoses, novanamati vaye ova ninga ovapristeri vepata lOvadan fiyo efiku olo ovakalimo vomedu va ya moukwatwa.
31 Opo nee ova dika oshihongwafano osho Mika a ninga, nosha kala oko omafiku aeshe oo eumbo laKalunga kashili la kala muSilo.
Eshangelo lopedu
^ Eln., “efyuululo.”
^ Ile “omutono.”
^ Tali ti “Onhanda yaDan.”
^ Ile “ookalunga vomeumbo.”
^ Ile “oshikalunga sha hemunwa.”
^ Ile “ookalunga vomeumbo.”
^ Ile “oshikalunga sha hemunwa.”
^ Ile “ookalunga vomeumbo.”
^ Ile “oshikalunga sha hemunwa.”
^ Ile “omuyandjimayele.”
^ Ile “ookalunga vomeumbo.”
