Embo lOvaroma 11:1-36
11 Nandi pule, mbela Kalunga okwa ekelashi oshiwana shaye? Hasho nandenande! Osheshi naame Omuisrael, oludalo* laAbraham, nda dja mepata laBenjamin.
2 Kalunga ina ekelashi oshiwana shaye osho a li a hoolola. Mbela kamu shii osho omushangwa wa popya kombinga yaElia eshi a li ta popi naKalunga kombinga yOvaisrael a nyemata?
3 Elia okwa ti: “Jehova, ova dipaa ovaprofeti voye, va hanauna po eealtari doye ndele aame andike nda fyaala po nova hala okudipaa nge.”
4 Kalunga okwe mu nyamukula ngahelipi? Okwa ti: “Ondi na ovanhu 7 000 ovo inave linyongamena Baal.”
5 Sha faafana, nopaife ope na oshixupe shOvaisrael ovo va hoololwa kuKalunga omolwefilonghenda laye.
6 Osho osha hala okutya okwe va hoolola omolwefilonghenda, ndele hamolwoilonga yavo, molwaashi ngeno ova li va hoololwa omolwoilonga, ngeno kali fi vali efilonghenda.
7 Nandi tye ngahelipi? Osho Ovaisrael va li tava kongo nelitulemo inave shi mona, ndele ovo va hoololwa ove shi mona. Vahapu ova fifa eliudo lavo,
8 ngaashi pa shangwa taku ti: “Kalunga okwe va kofifa eemhofi didjuu dopamhepo. Omesho ove na, ndele kave wete ko, omatwi ove na, ndele kave udite ko fiyo okunena.”
9 David naye okwa ti: “Oitendele* yavo nai va pundukife nokuninga omwiyo nehandukilo lavo.
10 Omesho avo naa twikifwe opo vaha mone ko, neembuda davo nadi petamifwe alushe.”
11 Nandi pule, mbela ova punduka, ndele inava dja po vali? Hasho nandenande! Eenghatu davo da puka oda etela ovanhu vomoiwana exupifo, naasho oshe va handukifa.
12 Eenghatu davo da puka oda punapalifa ounyuni nokuninipala kwavo okwa punapalifa ovanhu vomoiwana. Ngeno omuvalu wavo owa li wa wana po, ngeno oupuna wavo owa kala muhapu neenghono.
13 Paife ohandi popi nanye nye ovanhu vomoiwana. Molwaashi ondi li omuyapostoli koiwana, onda lenga* neenghono oilonga yange yokuudifa
14 opo ndi linyengife ovanhu vomoshiwana shetu va kale yo va hala okuxupifwa.
15 Ngeenge okweekelwashi kwavo otaku ningifa ovanhu va hanganifwe naKalunga, onghalo otai ka kala ya tya ngahelipi ngeenge ova tambulwa ko? Otava ka kala va fa va nyumuka koufi.
16 Kakele kaasho, ngeenge oshipambu shomungome osho tashi yandjwa shi li oshiimati shotete oshiyapuki, omungome aushe ouyapuki; nongeenge omidi odiyapuki, noitai oiyapuki yo.
17 Ashike ngeenge oitai imwe oya tetwa ko, ndele nye ovo mwa dja kolumono lomoixwa omwa twikwa mokati kayo notamu mono ouwa momidi dolumono olo,
18 inamu litanga eshi mwa ninga oitai. Ngeenge otamu litange, dimbulukeni kutya hanye mwa humbata omidi, ndele odo de mu humbata.
19 Otashi dulika mu tye: “Oitai oya tetwa ko opo tu twikwe mo.”
20 Heeno oshoshili, oitai inya oya tetwa ko omolwokuhe na eitavelo kwayo, ndele nye omu li ko omolweitavelo. Inamu kala nounhwa, ndele kaleni mwa tila.
21 Ngeenge Kalunga ina xupifa oitai ei yopaushitwe, nanye ota dulu okukala ine mu xupifa.
22 Onghee hano, kaleni mu shi shii kutya Kalunga oha file onghenda noha dulu okuhandukila. Oha handukile ovo tave mu efa po, ndele nye ote mu file onghenda ngeenge omwa kala mu na olupandu omolwefilonghenda laye; ngeenge hasho, nanye otamu tetwa ko.
23 Ngeenge ove lialuluka, navo otava ka twikwa mo, osheshi Kalunga ota dulu oku va twika mo vali.
24 Ngeenge omwa tetwa kolumono lomoixwa, ndele tamu twikwa kolumono lomepya, osho shihe li paushitwe, hano oshipu okushuna ko oitai oyo ya li ya tetwa kolumono lomepya.
25 Ovamwatate, onda hala mu shiive oshiholekwa eshi shiyapuki opo muha diladile kutya omu shii oinima aishe. Ovaisrael vamwe itava ka dulika fiyo osheshi omuvalu wovanhu vomoiwana ovo va hoololwa kuKalunga wa wana,
26 nokungaho Israel ashishe otashi ka xupifwa. Omishangwa oda ti: “Omuxupifi ota ka dja muSion nota ka kwafela oludalo laJakob li efe po oilonga ii.
27 Onda ninga ehangano navo ndi va dimine po omatimba avo.”
28 Ove tonde onghundana iwa omolweni, ndele Kalunga oku va hole omolweudaneko olo a ningila ooxekulululwa.
29 Kalunga ite ke lipa oushima omolweeshali odo a yandja naashi a hoolola vamwe.
30 Nale kamwa li mwa dulika kuKalunga, ndele paife omwa filwa onghenda omolwokuhadulika kwOvajuda.
31 Okwe mu fila onghenda omolwokuhadulika kwOvajuda, naasho otashi ke mu ningifa yo a file onghenda Ovajuda.
32 Kalunga okwa efa ovanhu aveshe va kale moupika wokuhadulika, nokwe va efa va kale ngaho opo e va file onghenda.
33 Oupuna, ounongo neshiivo laKalunga oi fike peni! Kape na oo ta dulu okuuda ko omatokolo neendjila daye.
34 “Olyelye ta dulu okushiiva omadiladilo aJehova, ile olyelye ta dulu oku mu pa omayele?”
35 Ile, “olyelye e mu pa sha tete opo e shi shunifilwe?”
36 Oinima aishe oye e i shita, oyaye noya dja kuye. Kalunga na fimanekwe fiyo alushe. Amen.
