Ovaheberi 5:1-14
5 Keshe oo a nangekwa po e li omupristeri munene ota yakula ovanhu moinima i na sha naKalunga mokuyandja eeshali nosho yo omayambo omolwomatimba avo.
2 Omupristeri oo ota dulu okufila onghenda* ovo tava nyono* shaashi otave shi ningi omolwokuhashiiva sha. Ndele molwaashi naye omulunde,
3 oku na okuyandja omayambo omolwomatimba aye mwene ngaashi ashike ha yambe omolwomatimba ovanhu.
4 Omunhu ita dulu okuninga omupristeri pahalo laye mwene, ndele Kalunga oye ashike ta dulu oku mu nangeka po, ngaashi a li a nangeka po Aron.
5 Sha faafana, Kristus haye mwene e litula pondodo yokukala omupristeri munene, ndele okwa tulwa po kuKalunga oo a popya kombinga yaye ta ti: “Ove omona wange; nena onda ninga xo.”
6 Okwa popya yo momushangwa umwe ta ti: “Ove omupristeri panghedi yaMelkisedek, noto kala omupristeri fiyo alushe.”
7 Eshi Kristus a li kombada yedu,* okwa li ha indile nokwiilikana a mana mo, nokwiingida pombada a nyika oluhodi kwaau ta dulu oku mu xupifa mefyo, nokwa li a udika molwaashi okwa li e na etilokalunga.
8 Nonande okwa li omona waKalunga, okwe lihonga okudulika eshi a li ta mono oixuna.
9 Konima eshi a ulika kutya omuduliki filufilu, oshe mu ningifa a kale a wana okuxupifa aveshe ovo hava dulika kuye,
10 molwaashi okwa nangekwa po kuKalunga e li omupristeri munene panghedi yaMelkisedek.
11 Otu na shihapu okupopya kombinga yaye, ndele oshidjuu oku mu yelifila molwaashi ihamu udu ko oinima diva.
12 Okutala kefimbo olo la pita po, omwa li mwa wana ngeno okukala ovahongi, ndele omwa pumbwa vali umwe e mu honge omahovelohongo eendjovo daKalunga, osheshi ponhele yokulya eendja da pama omwa shuna komashini.
13 Keshe ou ta twikile okunyama omashini, ina shiiva eendjovo daKalunga douyuki, osheshi oye okahanana.
14 Ndele eendja da pama odaava va kula, ovo eendunge davo dokuyoolola da deulwa, opo va dule okutongola ouwa nowii.
Eshangelo lopedu
^ Ile “okuungaunga neyavelelo; nondjele.”
^ Ile “va pukifwa.”
^ Eln., “Eshi a li pambelela.”
