Omuudifi 5:1-20
5 Pashukila eenghatu doye, ngeenge to i keumbo laKalunga kashili; oshixwepo okweehena popepi u pwilikine, shi dulife okuyandja eyambo ngaashi omalai haa ningi, osheshi kae shi shii kutya osho taa ningi oshii.
2 Ino endelelifa okanya koye, noino endelela okupopya momutima woye koshipala shaKalunga kashili, osheshi Kalunga kashili oku li meulu, ndele ove ou li kombada yedu. Nomolwaasho u na okuninipika eendjovo doye.
3 Osheshi okutwa eendjodi ohaku etifwa komalipyakidilo mahapu unene,* nokupopya eendjovo dihapu ohaku ningifa omunhu a popye oulai.
4 Ngeenge owa udanekele sha Kalunga, ino ongaonga oku shi wanifa po, osheshi iha hokwa omalai. Osho wa udaneka, shi wanifa po.
5 Oshixwepo okukala ino udaneka sha, shi dulife okuudaneka sha, ndele ito shi wanifa po.
6 Ino efa okanya koye ke ku* ningife u nyone, noino lombwela omweengeli* kutya osha li ashike epuko. Omolwashike u na okuhandukifa Kalunga kashili omolwoshinima osho wa popya, opo a hanaune po oilonga yomake oye?
7 Osheshi ngaashi ashike omalipyakidilo mahapu haa ningifa omunhu a twe eendjodi, eendjovo dihapu nado odongaho elela. Ashike tila Kalunga kashili.
8 Ngeenge owa mono ohepele tai fininikwa, omunhu ta pengifa ouyuki, ile ta longo okuhenouyuki moshitukulwa sheni, ino kuminwa oshinima osho. Molwaashi omukwanepangelo oo e na ondodo yopombada ota pashukilwa kwaao e na ondodo i dule yaye, nope na vamwe natango ovo ve na eendodo di dule davo.
9 Natango, oilikolomwa yomoshilando ohave i tukulilwa aveshe; nokuli nohamba ohai mono ouwa tau di mepya.
10 Oo e hole oshisilveri ke na efiku a wanenwe nandenande koshisilveri, naao e hole emona ita ka wanenwa nandenande. Naashi yo oshongaho elela.
11 Ngeenge oinima iwa ya hapupala, ovo have i longifa ohava hapupala yo. Ndele mbela mwene wayo oha mono mo ouwa washike, kakele ashike koku i tala nomesho aye?
12 Oo ha yakula oha kofa eemhofi diwa, kutya nee oha li shinini, ile oshihapu, ndele oo e na emona lihapu ihali mu kofifa nawa.
13 Onda mona oshiponga sha kula* koshi yetango: ovo ve liongelela omaliko otave lietele oupyakadi.
14 Omaliko oo okwa hanauka po omolwoshinima* osho sha holoka po, nongeenge okwa ka ninga xe, ita ka kala e na osho ta pe omonamati shi li efyuululo.
15 Ngaashi ashike omunhu a dile medimo laina hamunghele, ota ka shuna yo ngaashi ashike e uyile. Noita ka ya nasha shomoilonga yaye aishe idjuu.
16 Naashi yo oshiponga* sha kula: Ngaashi naanaa e uyile, osho yo ta ka shuna; mbela oo a kala ta longo oilonga idjuu okwa mona ouwa washike, eshi a kala a fa ta taataa omhepo?
17 Natango efiku keshe iha li a hafa, molwaashi oha kala a kenyanana, ta vele nokwa handuka.
18 Eshi osho nda mona shiwa nosha wapala: omunhu ngeenge ta li nokunwa, ndele ta hafele oilonga yaye aishe idjuu oyo ha longo koshi yetango momafiku aye manini okukalamwenyo oo Kalunga kashili e mu pa, osheshi oyo oyo ondjabi* yaye.
19 Shikwao vali, ngeenge Kalunga okwa pe omunhu omamona noupuna a dule oku i hafela, oku na okutambula ondjabi* yaye nokuhafela oilonga yaye idjuu. Ei oyo oshali ya dja kuKalunga.
20 Osheshi ita ka didilika* noupu nghee omafiku okukalamwenyo kwaye taa piti po, molwaashi Kalunga kashili okwe mu lipyakidilifa nehafo momutima waye.
Eshangelo lopedu
^ Ile “koisho ihapu unene.”
^ Eln., “ombelela yoye.”
^ Ile “omutumwa.”
^ Ile “oudjuu.”
^ Ile “oshilonga shii.”
^ Ile “oudjuu.”
^ Ile “oshitukulwa.”
^ Ile “oshitukulwa.”
^ Ile “dimbuluka.”
